1 Timoti 2

1Dat-hărăt iket-net, ăsimătărăɣ-kăwăn d-ad-tĕdĕlĕm Măssinăɣ, tĕjĕm ălhimmăt, tăjjăynănăm-t, tumayăm-as i-ad-aḍĕn tăhanint i-e d t-illăm ăgg-adĕm. 2Ădĕlăt Măssinăɣ i-imănokalăn d-kăl-ĕlxĕkum i-ad-ozja ăkall, ija dăɣ-s ălxer, nĕṭṭĕf tămudre tăddiinăt, tăssiimɣărăt Măssinăɣ. 3Tittar-tin-dăɣ ăhuskătnen a ĕjraẓnen i-Măssinăɣ-i n-Ămaɣlas-nănăɣ-i 4irhan ĕlɣĕllas n-e d t-illăm ăgg-adĕm, ĕzzĕyăn tidĕt iket-dăɣ-năsăn. 5Măssinăɣ, iyyăn ɣas, wăr dd-ija daɣ ar iyyăn n-ĕssĕbab s-ăẓmăẓăl iman-net d-dăgg-adĕm, a t-ămoosăn Ɣisa Ălmasex-i dd-ămoosăn ăgg-adĕm. 6Ikfă iman-net i-ad-isĕddărfĕt e d t-illăm ăgg-adĕm dăɣ-ibăkkaḍăn-net, ĕnta-den-dăɣ ĕmmĕk wa s-ăjjĕyha ălwăqq wa dd-tăwwăḍ, tăqqăn ta issĕbdăd Măssinăɣ n-a-s irha ĕlɣĕllas n-ăddinăt iket-dăɣ-năsăn. 7Dăɣ-tĕssĕba n-a-wen-dăɣ a făl hi-ija Măssinăɣ ămaway n-isălan-net d-anămmašul; tidĕt a janneɣ wădden bahu, Măssinăɣ a hi-dd-ăšmašălăn i-ad-săɣrăɣ inĕẓẓulam immun d-tidĕt ta-net. 8A-wen-dăɣ a făl dăɣ-wăn ărheɣ kăwăneḍ-i n-meddĕn, ad-tĕddalăm Măssinăɣ dăɣ-edăgg iket-net, tajjăm ălhimmăt dăɣ-ḍakkălăm ifassăn šăddiijnen, wăla aḍkăr wăla abjĕnjĕn. 9Tiḍeḍen daɣ, ărheɣ dăɣ-snăt, ad-ĕjĕnăt a-wen-dăɣ. Ărheeɣ dăɣ-snăt ad-tajjănăt isĕlsa tănăt-wăren-ĕkšef, isĕlsa tănăt-ĕṣtarnen; udaɣ ad-sasahaɣnăt ašăl i-ad-tănăt-in-ĕjrăhăn ăddinăt, wăr tăjjănet i-iɣăfawăn-năsnăt asĕssĕkĕn s-iẓẓĕwăt ălqim-net, wăr tăjjănet orăɣ wăla timăɣwanen okăynen ămaku wăla isĕlsa s-ikna ălqim-năsăn eẓăwe, 10ănn-ak, zĕzjărnet-dd tihusay n-imărkedăn wi ănihăjjănen d-tiḍeḍen jannănen ăksuḍnăt Măssinăɣ. 11Ălwăqq wa n-ălxuṭbăt n-măjrăd n-Măssinăɣ dăɣ-ălkănisăt, susĕmnet dăɣ-a-s ăsidăwnăt a-wen d-asjĕd d-asrĕs n-iman; 12ĕgdalăɣ-asnăt ad-xaṭṭăbnăt meɣ ad-tanăhaḍnăt dăɣ-meddĕn d-a-wa s-lăn s-ad-t-ĕjĕn dăɣ-ălkănisăt, susĕmnet. 13Măssinăɣ, Adĕm a dd-ixlăk s-tizarăt tĕzzar, issĕlkăm-as-dd Xĕwwa. 14Wădden Adĕm a ikkărrăs Iblis s-tizarăt i-ad-inmĕšrĕy, ănn-ak, tamăḍt a ăšnămăšrăy; tănmăšrăy s-a-wen-dăɣ ja i-măjrăd n-Măssinăɣ. 15Hakd a-wen-dăɣ, a-wen wăr hin-ikkes a-s ad-tumas anna, tĕkrĕš aratăn, iɣlĕs-tăt Măssinăɣ. Sădĕwet immun-net d-tărha tĕmdat d-tămudre šăddiijăt, tĕṣtarăt.

will be added

X\