1 Timoti 1

1A-wa năkk, Bulĕs, wa s-omăr Măssinăɣ-i n-Ămaɣlas-nănăɣ d-Ɣisa Ălmasex-i iha ăṭṭăma-nănăɣ, tumast n-anămmašul-net. 2Ăhuulăɣ-kăy-in Timoti kăyy-i n-rure-ɣ wa n-tidĕt dăɣ-immun. Ikf'-ik Măssinăɣ-i n-Abba-nănăɣ d-Emăli-nănăɣ Ɣisa Ălmasex ănnuɣmăt, tărha d-ălxer. 3Timoti, a-s kăy-fălăɣ, ĕkkeɣ teje ta n-Masidunya, ăsmătărăɣ-kăy d-ad-tăqqaymĕd dăɣ-aɣrĕm wa n-Ifăsus, sĕmmăqqĕd făll-ăddinăt wi t-hănen saɣranen tijĕttewen ănimăšrăynen i-tidĕt ta tădduttet, 4i-ad ĕyyĕn fălla-săn tinfusen ti n-ibda wăren ĕnfa hărăt d-tamădašt dăɣ-ăṭṭarexăn n-imɣarăn wăren dd-itirĕw ar tĕšĕjrĕt n-măjrăd. Wăr t-illa a dd-isaɣsal a-wen-dăɣ dăɣ-amišĕl n-erhet n-Măssinăɣ wăla dăɣ-ehel n-s-data dăɣ-immun. 5Dăɣ-a-wa s-kăy-omărăɣ, ĕnneɣ-ak, ĕṭṭĕfnet ăddinăt jer-iman-năsăn tărha tĕmdat d-ad-wăr t-illa a dăɣ-ĕššakăn iman-năsăn d-immun wăr ha tĕlmĕnufăɣa. 6Hărătăn-win-dăɣ, ĕšlăyăn-asăn ăddinăt ăjjootnen, ĕššĕškăn iman-năsăn s-taxxalen. 7Ăddinăt-en, ĕrhan tumast n-ălɣulam n-alămăr wa n-ănnăbi Mosa, a-s ija a-wen, a-wa jănnen s-ɣur-săn ija a-s wăr t-illa ere hasăn-t-ojărăn musnăt, hakd-dăɣ a-wa săɣren ăddinăt, wăr t-illa a dăɣ-s ĕjrahăn ĕntăneḍ iman-năsăn. 8Alămăr wa n-Mosa, wăr t-ijrew hărăt, olaɣ iket-net afăl t-itamašal ăwadĕm s-ălmăɣna. 9Nĕssan a-s alămăr, a ămoos-dăɣ, wăr dd-ăzzubbăt i-ăddinăt oɣadnen, ănn-ak, osă-dd i-inăllăbăsăn d-imĕffellĕgăn d-ăddinăt wi wăren ăddiin d-inăsbăkkaḍăn d-inămăšrayăn d-ikufar d-imăjjan n-iman n-imărawăn-năsăn d-imăjjan n-iman n-ăddinăt 10d-wi samăḍasnen tiɣĕswen-năsăn d-meddĕn wi tajjănen meddĕn tiḍeḍen, d-wi hin-žanšanen ăddinăt d-inĕsbuha d-imărẓan n-ărkăwăl d-e d t-illăm ăgg-adĕm ănimăšrăyăn i-tijĕttewen n-teɣăre ta n-tidĕt tădduttet tĕjrăwăm, ĕntăneḍ-den-dăɣ ăddinăt wi s-dd-ăzzăbbăt Măssinăɣ alămăr-net. 11Teɣăre-en-hi, isălan n-Ălĕnžil-wi hi-issăɣlăf Măssinăɣ a ha. Ǝnta-en-dăɣ daɣ a hanăɣ-itajjăn isălan n-ălxer d-tănoflayt ta hanăɣ-t-tĕllăt ɣur-Măssinăɣ-i n-Măssi-s n-ălxurmăt. 12Ămmoyăɣ i-Emăli-nănăɣ Ɣisa Ălmasex ĕnta-i hi-ikfăn ăṣṣahăt wa s-ămɣatărăɣ, iflăs-ahi i-ad-hin-sĕssiwĕḍăɣ ămašal wa dăr-hi-ăsnăhăjja, 13wăr hi-iṭṭef eɣa n-a-wa s-kăla ămoosăɣ ăkafăr d-ălmuɣăzzăb n-enăllăbăs s-ăkkus ašni-net măšan, tătwaḍăn-ahi tăhanint ed a-wa ămešălăɣ, ălžăhalăt d-tăɣart n-ulh a dăɣ-t-ămešălăɣ. 14A-wen iket-net, ojăr-t săr-i ănnuɣmăt wa măqqărăn făll-i issĕnsă Emăli-nănăɣ, ăsnăflăy-ahi dăɣ-immun d-tărha ta dd-tirĕw tassaɣt d-Ɣisa Ălmasex. 15A-wa măjrăd itbatăn s-ănihăjja ad-săr-s iqbĕl e d t-illăm ăgg-adĕm: Ɣisa Ălmasex, ijjăš-dd ăddunya i-ad-iɣlĕs inăsbăkkaḍăn s-năkk Bulĕs a-s wa ăzzarăn, dăɣ-săn ojărăn iket-dăɣ-năsăn. 16A-wen-dăɣ a făl hi-oḍăn Măssinăɣ tăhanint i-ad-umasăɣ ălmital i-ăddinăt wi iyyăḍnen n-a-s Ɣisa Ălmasex, h'-e taẓidert n-a-s ere săr-s omănăn, ad-ijrĕw tămudre tăɣlalăt. A-wen hi-ija, ăddoobăt daɣ ad-t-ăj i-e d t-illăm ăgg-adĕm. 17A-wen-dăɣ a făl năkfet hărkuk Măssinăɣ semɣar d-ălxurmăt, ĕnta a-s Ămănokal wa n-Ămaɣlal, wăr fălla-s la tamăttant tărna, wăr-itĕtwĕnhĕy, ĕnta a-s Măssinăɣ wa n-iyyăn. Amin! 18Alyaḍ-in Timoti, a-wa s-ărheɣ ad-kăy-sĕmmĕtărăɣ dăr-s, wăr-iẓley d-măjrăd wa s-kăla t-innă Măssinăɣ i-ăddinăt i-ad-hak-t-ĕnnĕn, ĕnnăn-ak-tăn daɣ. Umaset măjrăd-wen-dăɣ hak-ătwănnăn a kăy-ăsinămănɣăn dăɣ-ălxidmăt wa ăhuusken hed i-ad-ăkk s-data. 19Ǝṭṭĕf immun, wăr-itĕmmalet a dăɣ-tĕššakăd iman-năk, ĕhlăkăn ăddinăt ăjjootnen wăren ja a-wen, ănmăšrăyăn i-immun; 20ăddinăt en-dăɣ, ih'-en Himni d-Ălxaḍer-i jeɣ dăɣ-ifassăn n-Iblis, ănmănhăyăn d-iman-năsăn i-ad-ĕlmĕdăn a-wa ihăn asĕkkufăr.

will be added

X\