1 Kăl-Tăslonika 5

1Ayĕtma, ămăra, dăɣ-isălan n-ăzzăman wăla ălwăqq wa d-mad-ăj a-wen, wăr tămɣatărăm s-ad-hawăn-in-iktĕb ăwadĕm dăɣ-isălan-win-dăɣ; 2tĕssanăm kăwăneḍ iman-năwăn a-s ašăl wa dd-itaqqăl Emăli, ad-dd-iḍĕw făll-ăddinăt s-ĕmmĕk wa s-dd-itiḍĕw emăkrăḍ făll-ăwadĕm s-tišrayăt n-ehăḍ. 3Ad-ăqqiimăn ăddinăt jannen: "Ălɣafyăt ija, xayy, tăẓude n-tămudre, wăr fălla-năɣ ija hărăt", har fălla-săn dd-iḍĕw ălmăṣṣibăt ijan armuḍ ăssuksăḍăn, olăhăn d-ejăḍăl wa dd-tăjj tiẓẓurt făll-tamăḍt lat ĕnniyăt, wăr dăɣ-săn dd-e-iɣlĕs ăwadĕm. 4Ayĕtma, kăwăneḍ, wăr kăwăn-iha ere ihan tihay har fălla-wăn dd-iḍĕw ašăl-en šund emăkrăḍ, 5dăgg-ănnur wădden dăgg-ehăḍ wăla dăgg-tihay a tămoosăm, wăr t-illa a iffarăn dăɣ-a-wa tăjjăm. 6A-wen-dăɣ a făl wăr hanăɣ-irămmăset eḍĕs šund ăddinăt wi iyyăḍnen, năjet ĕnniyăt, nĕṭṭĕfet ălxal dăɣ-hărăt iket-net. 7Ăddinăt wi taṭṭăsnen, s-ehăḍ a-s taṭṭăsăn, wi sassănen asmĕd, itakkăs dăɣ-săn ĕnniyăt, ehăḍ a-s tajjăn a-wen, 8năkkăneḍ, dăgg-ănnur a nămoos, nĕṭṭĕfet ălxal dăɣ-hărăt iket-net, umaset-anăɣ immun d-tărha šund aɣărh ilsan taɣĕssa-nănăɣ, umaset-anăɣ ĕlɣĕllas wa s-nĕjăr ăṭṭăma-net šund takĕnbut n-tăẓoli tigĕẓăt eɣăf n-ăwadĕm dăɣ-tisăwaten 9făl-a-s Măssinăɣ, wăr hanăɣ-ăsnăfrăn i-temse, ănn-ak, ăsnăfrăn-anăɣ, i-ad-hanăɣ-ijrĕw ĕlɣĕllas dăɣ-idĕm n-Emăli-nănăɣ Ɣisa Ălmasex. 10Dăɣ-tĕssĕba n-a-wen-dăɣ a făl ămmut Ɣisa Ălmasex dăɣ-idăggan-nănăɣ i-ad-dăr-s nahăr tămudre jer-nămmut wăla nĕddar. 11Ɣas, hak iyyăn dăɣ-wăn dăɣ, isĕsmĕḍet ulh n-amidi-net, tĕnmĕdhĕlăm jer-iman-năwăn s-ĕmmĕk-wĕdi-dăɣ s-kăwăn-išla a-wen ămăra-dăɣ. 12Ḍarăt-a-wen, ayĕtma, imizărăn wi kăwăn-ikfa Emăli, tilĕyyoɣnen dăɣ-asĕnnĕmhĕl-năwăn dăɣ-tabarăt-net, ĕssĕnăt dăɣ-săn, 13ăkfăt-tăn semɣar d-tărha dăɣ-tĕssĕba n-a-wa ăxdămăn jere-wăn; imĕlet ălxer jere-wăn. 14Ayĕtma, năsmătăr-kăwăn d-ad-tăɣtĕlăm ăddinăt wi ămišăršărnen wăren ĕrha ălxidmăt s-ăṣṣahăt-năsăn, sĕkkuyĕdăt wi ha tasăja, ĕdhĕlăt wi lămmeḍnen, ẓĕẓẓidărăt făll-ăddinăt iket-năsăn. 15Ăjăt ĕnniyăt i-iman-năwăn; wăr ẓelăm tăllăbăst s-tăllăbăst, ănn-ak, asĕsăt hărkuk dăɣ-amišĕl n-a-wa olăɣăn jer-jere-wăn kăwăneḍ wăla jere-wăn d-ăddinăt wi iyyăḍnen. 16Dăwătăt hărkuk, 17ădĕlăt Măssinăɣ hărkuk, 18umayăt i-Măssinăɣ dăɣ-hărăt iket-net, ĕnta-den-dăɣ a-wa fălla-wăn irha Măssinăɣ dăɣ-tassaɣt-năwăn d-Ɣisa Ălmasex. 19Wăr tĕktelăm ălxidmăt n-Unfas Šăddijăn dăɣ-ulhawăn-năwăn, 20wăr tăsfăṭṭem daɣ a-wa hawăn-jannen ăddinăt wi ikfa Măssinăɣ măjrăd-net i-ad-hawăn-t-in-sĕssiwĕḍăn, 21ăknăt azĕjjĕzz n-a-wa hawăn-jănnen iket-net, tĕṭṭĕfăm dăɣ-s a-wa olăɣăn, tĕšlĕyăm i-bahu, 22udaɣăt i-a-wa lăbasăn, a ămoos-dăɣ. 23Măssinăɣ-i n-Măssi-s n-ălxer iman-net a dalăɣ i-ad-kăwăn-išĕšdĕj tĕmdam, ĕttarăɣ dăɣ-s ad-agĕẓ ĕnniyăt-năwăn d-iman-năwăn d-tiɣĕswen-năwăn i-ad-wăr kăwăn-itĕwwer uḍlem wăl' iyyăn har ašăl wa dd-mad-iqqĕl Emăli-nănăɣ Ɣisa Ălmasex. 24Măssinăɣ-i kăwăn-dd-iɣrăn s-iman-net, oɣad, ĕnta daɣ a kăwăn-e-agĕẓăn dăɣ-e d t-illăm ăššar. 25Ayĕtma, ădĕlăt-anăɣ-in Măssinăɣ năkkăneḍ-dăɣ. 26Nĕmĕjjăt jer-iman-năwăn isofan janen s-tărha tĕmdat. 27Ǝttarăɣ dăɣ-wăn dăɣ-idĕm n-Emăli, ad-tăɣrĕm tăkarḍe-ta-dăɣ i-ayĕtma dăɣ-ăddin iket-dăɣ-năsăn. 28Ikf'-iwăn Emăli-nănăɣ Ɣisa Ălmasex ănnuɣmăt-net. Amin!

will be added

X\