1 Ḍarăt-a-wen daɣ, ayĕtma, nĕttar dăɣ-wăn, năsimătăr-kăwăn dăɣ-idĕm n-Emăli Ɣisa d-ad-tĕṭṭĕfăm tămudre tĕjraẓăt i-Măssinăɣ, nĕssĕlmăd-kăwăn taɣărha n-tămudre-ten-dăɣ, nĕjrah-in a-s tamašalăm a-wa kăwăn-nĕssăɣra măšan, nărha dăɣ-wăn, ad-siwĕḍăm hărwa dăɣ-a-wen. 2 Isĕmmĕterăn wi săr-năɣ dd-fălnen Emăli Ɣisa Ălmasex kăwăn-in-năssawăḍ, tĕssanăm-tăn. 3 Erhet n-Măssinăɣ a t-ămoosăn, ad-tĕhĕlĕm s-data dăɣ-tĕšĕdje, tĕbḍĕwăm d-e d t-illăm a kăwăn-isamăḍasăn. 4 Hak ăwadĕm-dăɣ, tĕgdăhet-as hănne-s, tĕṭṭĕfăm tămudre tĕjraẓăt, tăssimɣărăt Măssinăɣ. 5 Wăr toyyem erk derhanăn ĕlwayăn-kăwăn, šinmĕšrĕyăn-kăwăn šund a-wa tăjjăn inĕẓẓulam -i wăren ĕzzey Măssinăɣ, 6 wăr-ităkărraset wăl' iyyăn dăɣ-wăn amidi-net, wăr-iḍăllămet wăl' iyyăn dăɣ-wăn ă/n/na-s dăɣ-isălan ĕkkanen hănne-s wăla ĕkkanen adubĕn-net. Ăru d-hawăn-nĕnnă, nolăs-t, a-s ere itajjăn a-wen, ilmĕdet a-s ilkam ad-dăɣ-s dd-ikkĕs Emăli ălxaqq-net. 7 Măssinăɣ, wăr hanăɣ-dd-iɣra s-iman-net i-ad-nĕsamăḍas tiɣĕswen-nănăɣ, ănn-ak, i-ad-nĕṭṭĕf tămudre dăɣ-tănnihăḍ tĕšĕdje. 8 A-wen-dăɣ a făl ere unjăyăn s-asjĕd i-isĕmmĕterăn-wi-dăɣ, wădden ăgg-adĕm a-s unjăy s-asjĕd-has, Măssinăɣ-i kăwăn-ihakkăn Unfas Šăddijăn-net daɣ a-s unjăy s-asjĕd-has. 9 Ămăra ayĕtma-ɣ, dăɣ-isălan wi n-anmărh jer-iman-năwăn, wăr tămɣatărăm s-ere hawăn-in-iktăbăn i-ad-kăwăn-isĕmmĕtăr d-a-wen ed, Măssinăɣ iman-net a kăwăn-isĕlmădăn anmărh jer-iman-năwăn. 10 Ădduuttăt daɣ a-s tărha-ten-dăɣ tĕṭṭăfăm, tĕssĕknăm-tăt i-e d t-illăm ălmăssexi izzaɣăn teje ta n-Masidunya măšan, hakd a-wen-dăɣ, nĕttar dăɣ-wăn ad-siwĕḍăm fălla-s hărwa. 11 Ǝjlĕyăt dăɣ-tărha n-tămĕzzuɣt dăɣ-ălxer, ĕjjĕšăt ĕššăɣĕl-năwăn, ăxdĕmăt s-ifassăn-năwăn, ăyyăt fălla-wăn sendad, ĕnta-den-dăɣ a-wa dăr-kăwăn-năsimătăr 12 i-ad-tĕṭṭĕfăm ălxal ăssimɣărăn ăddinăt wi n-ajăma wăren ămoos ălmăssexităn i-ad-ăbas tămoosăm ăẓuk i-ăwadĕm wăl' iyyăn. 13 Ayĕtma! Wăr nărha ad-tĕžhalăm dăɣ-isălan n-ayĕtma-năɣ dăɣ-ăddin wi s-ašăl-i-dăɣ, han eḍĕs wa n-iba, wăr ɣăššădnet iman-năwăn šund a-wa jăn wi n-ăddinăt wi iyyăḍnen s-wăr dd-ixlek ăṭṭăma dăɣ-Măssinăɣ. 14 Kunta nĕflas a-s Ɣisa, ăba-t măšan, inkăr-dd jer-inĕmmuttan, adiš, nĕflĕset daɣ a-s ilkam ad-dd-isĕnkăr Măssinăɣ jer-inĕmmuttan imumĕnăn wi ăba i-ad-ĕmĕlĕn edes-has. 15 Ămăra, dăɣ-isălan-win-dăɣ, edăwănne wa hanăɣ-ija Emăli, ĕnta a hawăn-nĕsiɣul: ătwănn'-anăɣ a-s năkkăneḍ-i dd-mad-agĕẓ uɣĕl n-Emăli nĕddar, wăr mad-nĕšwăr ăddinăt wi hănen eḍĕs wa n-iba ahănay-net, 16 ănn-ak, ašăl-en, ad-isiwĕl Emăli s-afălla tĕzzar, ilkĕm-as emăsli n-ămănokal n-ănjălosăn, tĕwĕt ḍara-s tăsinsăɣt ta n-Măssinăɣ, ifĕl-dd Emăli Ɣisa iman-net ălwăqq-wen išĕnnawăn, ĕnkărăn-dd ya ăddinăt wi s-a-s tăn-ăba-dăɣ omanăn s-Ălmasex, 17 ḍarăt-a-wen, năkkăneḍ-i dd-ogăẓ ălwăqq-wen-dăɣ nĕddar, ad-dăr-săn nahăr amĕḍkĕl făll-tijărăken s-išĕnnawăn, nĕlkĕḍ i-Emăli iket-nănăɣ, nărtĕy dăr-s dihen hărkuk. 18 Isĕsmĕḍet hak iyyăn dăɣ-wăn ulh n-amidi-net s-isălan-wi-dăɣ.
