1 Kăl-Tăslonika 3

1Ayĕtma, tĕndăr-anăɣ taɣimit wăla isălan-năwăn, a-wen-dăɣ a făl năssof ad-năqqayĕm năkkăneḍ dăɣ-aɣrĕm wa n-Atinya, 2nĕšĕmmišĕl-in săr-wăn ă/n/na-năɣ Timoti-i dăr-nohăr ălxidmăt-nănăɣ i-Măssinăɣ dăɣ-isălan n-asĕssiwĕḍ n-Ălĕnžil n-Ălmasex i-ad-kăwăn-isĕṣṣuhĕt dăɣ-immun-năwăn, isĕsmĕḍ ulhawăn-năwăn. 3Wăr-ităggădet ălɣizabăt wa hannăyăm ašăl-i-dăɣ d-ĕnniyăt n-wăl' iyyăn dăɣ-wăn, isinhĕynĕhĕy immun-năwăn, tĕssanăm a-s ălɣizabăt iha a-wa s-hanăɣ-dd-iɣra Măssinăɣ s-iman-net, năjet fălla-s. 4Ăzzăman wa nĕkkăs ɣur-wăn, nĕkkăs-kăwăn dăɣ-taɣdărt n-a-s ad-năqquzzĕbăt s-išĕkkelăn n-tersĕmmawen ăjjootnen. Măjrăd-wen-dăɣ hawăn-nĕja, itbăt, ĕnta-da-dăɣ hannăyăm ija ašăl-i-dăɣ. 5Indăr-ahi ad-ăhajăɣ ĕṣbarăɣ iba n-isălan-năwăn ɣas, ăšmašălăɣ-in săr-wăn Timoti i-ad-hi-dd-ilmĕd isălan n-immun-năwăn ed, ăssiirmăɣ-ahi hullan a-s ămmukkăn, ăžžurrăb-kăwăn Iblis dăɣ-utăr n-asĕbbuṭṭĕl n-ălxidmăt wa ăṣṣohen nĕja ɣur-wăn. 6Ăssiilmădăɣ-kăwăn a-s Timoti iket hi-dd-osa, ifal-kăwăn-dd, ija dăɣ-năɣ isălan n-ălxer n-a-wa dăr-ogdăh immun d-anmărh wa jăm jer-iman-năwăn. Illăɣăt-anăɣ daɣ a-s wăr hanăɣ-tĕkyeḍăm ed tenere-năwăn ta hanăɣ-tărmăsăt, tărmas-kăwăn kăwăneḍ-dăɣ. 7Ărheeɣ ayĕtma-ɣ, ad-hawăn-ăllăɣeɣ a-s isălan-năwăn-win-dăɣ s-nĕslă, ăsdătten-anăɣ immun-năwăn, ămoos-anăɣ a-wen a ăssismăḍăn tirĕmmaɣ d-tersĕmmawen ti hanăɣ-ărmăsnen. 8Ămăra-dăɣ, wăr-iẓley d-a-s nofray i-iman-nănăɣ, nakkărăn-dd dăɣ-tamăttant ed nĕslă, a-s hălăm iman-năwăn dăɣ-alkum-năwăn i-Emăli. 9Ǝndek ɣas tĕmɣăre n-tămayit ta s-năddobăt ad-tăt-năj i-Măssinăɣ i-ad-tagdăh d-tedăwit-i-dăɣ nĕja a-s nĕsla isălan-n-immun-năwăn? 10A-wen-dăɣ a făl, ehăḍ d-ašăl, nĕtajăynan dat-Măssinăɣ i-ad-hanăɣ-ăkf turhajăt n-ad-kăwăn-nalĕs ahănay i-ad-săr-wăn-in nĕsĕmdĕw a-wa hin-osăr immun-năwăn. 11Dalăɣ Măssinăɣ-i n-Abba-nănăɣ, dalăɣ-t ĕnta d-Emăli-nănăɣ Ɣisa dăɣ-ad-hanăɣ-isĕfrăr tabarăt s-kăwăn-in-nĕkka, 12dalăɣ-t i-ad-isiwăḍ tărha jer-iman-năwăn, isĕnnĕflĕy ulhawăn-năwăn dăɣ-tărha n-e d t-illăm ăgg-adĕm, tagdăh tărha-năwăn d-ta hawăn-nĕja, 13iṣṣuhĕt immun-năwăn, išdajăn ulhawăn-năwăn, ifĕl-kăwăn e d t-illăm uḍlem dat-Abba-nănăɣ Măssinăɣ ašăl wa dd-mad-iqqĕl Emăli-nănăɣ Ɣisa Ălmasex, ăddeew d-imĕššeddĕjăn-net iket-dăɣ-năsăn. ((Amin.))

will be added

X\