1 Kăl-Tăslonika 2

1Ayĕtma-ɣ, tĕssanăm kăwăneḍ iman-năwăn a-s asĕbbărrĕk wa hanăɣ-jăm a-s kăwăn-in-nosa, wăr-ămoos bănnan. 2Tĕssanăm a-s dat-ass-nănăɣ-hawăn, nĕnhay aɣăna d-ĕmmăḍri dăɣ-aɣrĕm wa n-Fĕlibb măšan, Măssinăɣ ɣas a dăɣ-nĕjăr ăṭṭăma, ikf'-anăɣ turhajăt s-hawăn-năxṭăb Ălĕnžil kud-dăɣ wăr t-illa ĕmmĕk s-wădden ĕttărăn ăddinăt ad-hanăɣ-ĕgdĕlăn s-a-wen. 3A-wa dăr-kăwăn-năsmătăr wădden i n-ad-nĕšĕnnĕmĕšrĕy ăwadĕm, wăr t-nĕja d-erk ĕnniyăt wăla s-tikărras n-ăddinăt, 4ănn-ak, Măssinăɣ a hanăɣ-ăzjăzzăn tĕzzar, issăɣlăf-anăɣ ămašal wa n-Ălĕnžil-net-i s-dăɣ ălxuṭbăt wa has-nĕtăjj, Măssinăɣ-i izajăzzen ulhawăn-nănăɣ a-s nărha ad-has-nĕjrăẓ, wădden dăgg-adĕm. 5Măssinăɣ a hanăɣ-ăjjĕyhăn, wădden măjrăd n-tikărras wăla-i n-utăr n-tetăte n-ehăre n-iyyăn dăɣ-wăn s-milɣaw n-ilĕs a hawăn-nĕja, a-wen tĕssanăm săr-s. 6Wăr nĕtter tĕmmal n-dăgg-adĕm jer-kăwăneḍ wăl' iyyăḍ săl kăwăneḍ. 7Ǝnnăr nărha a-wen, năddoobăt ad-kăwăn-nĕsĕlmĕd a-s inĕmmušal n-Ălmasex a nămoos, măšan, wăr hanăɣ-dd-ijješ ĕnniyăt-wen-dăɣ, ănn-ak, ăzzăman wa nĕkkas jere-wăn tărha šund ta tăjj anna i-aratăn-net d-asĕbbĕlĕl wa hasăn-tăjj a kăwăn-nĕssĕkna. 8Nĕj'-awăn tărha-ta-dăɣ făl năsdărhăn ad-kăwăn-in-nĕsĕssiwĕḍ Ălĕnžil n-Măssinăɣ, nămmăt daɣ dăɣ-idăggan-năwăn, kunta a-wen-dăɣ a ihan erhet n-Măssinăɣ făl tĕssĕba n-tĕmɣăre n-tărha-i-dăɣ hawăn-nĕja. 9Ayĕtma, ĕktĕwăt-dd ĕṣṣuhu n-ălxidmăt d-tiluyyaɣ ti nĕnhăy jere-wăn a-s hawăn-nĕxaṭṭăb Ălĕnžil n-Măssinăɣ, ehăḍ d-ašăl năxdam s-ifassăn-nănăɣ i-ad-wăr nĕtumas ăẓuk i-wăl' iyyăn dăɣ-wăn. 10A-wen, tăjjĕyhăm-as, ăjjĕyh'-as daɣ Măssinăɣ. A-s t-nĕlla ɣur-wăn, nĕṭṭăf jere-wăn tămudre ta tăjjăn imumĕnăn šăddijnen, tămudre toɣadăt, wăr t-illa ălɣib făw hanăɣ-iwarăn. 11Tĕssanăm a-s hak iyyăn dăɣ-wăn-dăɣ, nĕj'-as šund a-wa mad-ăj abba i-mĕddana-s. 12Hak ašăl, nĕsamătar-kăwăn i-ad-tĕkuyĕdăm, tĕṭṭĕfăm tămudre tăniihăjjăt d-teɣăre ta kăwăn-dd-ija Emăli s-iman-net i-ad-dăr-s tărtĕyăm dăɣ-Tĕmmĕnĕya-net d-ălxurmăt-net. 13Nămmoy i-Măssinăɣ, nămmoy-as daɣ hak ašăl ed ɣur-ašăl-i-dăɣ kăwăn-in-năssawăḍ măjrăd-net, tăqbălăm-t, wăr t-jem măjrăd dd-ifalăn dăgg-adĕm, ănn-ak, jăm-t măjrăd n-Măssinăɣ iman-net, a-wen-dăɣ daɣ a ămoos ed ixdam s-ăṣṣahăt dăɣ-ulhawăn-năwăn kăwăneḍ-i săr-s omănnen ašăl-i-dăɣ. 14Ayĕtma, a-wa irmăsăn ălkănisăten n-Măssinăɣ ti hănen teje ta n-Ălyăhudĕyăt osăɣnen d-Ɣisa Ălmasex a kăwăn-irmăsăn kăwăneḍ-dăɣ ed kăwăneḍ-dăɣ, ăqquzzăben-kăwăn kăl-ăkall-năwăn s-ĕmmĕk wa s-ĕntăneḍ-dăɣ, ăqquzzăben-tăn kăl-Ălyăhud. 15Kăl-Ălyăhud, ĕntăneḍ a ănɣănen ănnăbităn s-tizarăt, ănɣăn daɣ Emăli Ɣisa, ašăl-i, năkkăneḍ a tiɣĕzzĕbun, ănimăšrăyăn i-Măssinăɣ, wăr t-illa daɣ ere s-wădden ăššunjen-t, 16gaddălăn-anăɣ ad-năj i-inĕẓẓulam isălan i-ad-tăn-iɣlĕs Măssinăɣ, okăyăn ibăkkaḍăn-năsăn ămaku. Ilkam ad-dd-izĕzzĕbbĕt Măssinăɣ aḍkăr-net fălla-săn. 17Ayĕtma, tidĕt, ibḍ'-anăɣ ăssaɣăt, tujĕjăm tiṭṭawen-nănăɣ măšan, ham ulhawăn-nănăɣ. Wăr t-illa a-wa-dăɣ wăr nĕja i-ad-kăwăn-nalĕs ahănay ed naqq'-anăɣ tenere-năwăn. 18Nĕttăr a-wa-dăɣ he-năj năkk'-iwăn-in; năkk Bulĕs, har ĕssin ihăndăggan, tattărăɣ ad-kăwăn-in-ăkkăɣ măšan, igdăl-anăɣ Iblis s-a-wen. 19Šămad isălan-den-dăɣ, ĕndek ăṭṭăma-nănăɣ? Ǝndek ĕssĕbab n-tedăwit-nănăɣ? Ǝndek abăraj-nănăɣ? Kăwăneḍ a hanăɣ-ămoosăn a-wen-dăɣ iket-net ašăl wa dd-mad-iqqĕl Emăli-nănăɣ Ɣisa. 20Tidĕt-dăɣ a-s kăwăneḍ a-s abăraj-nănăɣ, kăwăneḍ a-s ĕssĕbab n-tedăwit-nănăɣ.

will be added

X\