1 Kăl-Tăslonika 1

1A-wa năkk, Bulĕs, hin-iktabăn năkk d-Silwan d-Timoti i-ălkănisăt n-Măssinăɣ-i n-Abba, osăɣ d-Emăli Ɣisa Ălmasex hăt aɣrĕm wa n-Tăslonika. Năhuul-kăwăn-in, nĕttar dăɣ-Măssinăɣ ad-kăwăn-ăkf ănnuɣmăt d-ălxer. 2Hak ašăl-dăɣ nămmoy i-Măssinăɣ dăɣ-tĕssĕba-năwăn, e-d t-nĕdăl-dăɣ, ad-hawăn-t-nĕdĕl kăwăneḍ-dăɣ. 3E-d nĕdăl Abba-nănăɣ Măssinăɣ-dăɣ, ad-dd-nĕktĕw ĕmmĕk wa s-tăssixdămăm immun-năwăn d-anmărh wa n-tidĕt jăm jer-iman-năwăn d-akuyĕd wa jăm dăɣ-ăṭṭăma wa kăwăn-ăsjăr Emăli-nănăɣ Ɣisa Ălmasex. 4Ayĕtma-năɣ! Nĕssan a-s, Măssinăɣ, irh'-iwăn, ăsnăfrăn-kăwăn i-ad-tumasăm tamĕtte-net. 5Isălan n-Ălĕnžil wi kăwăn-in-năssawăḍ, tărna n-Unfas Šăddijăn a-s hawăn-tăn-in-năssawăḍ wădden s-măjrăd ɣas, a-wen, tĕnhayăm-t kăwăneḍ iman-năwăn, nămešăl-t data-wăn i-ad-kăwăn-infĕw s-hărăt. 6Tĕttĕlălăm-anăɣ, tĕttĕlălăm daɣ Emăli, wăr hawăn-tĕgdel tiẓẓurt ta tĕnhăyăm ad-tăqbĕlăm măjrăd n-Măssinăɣ s-tedăwit ta ihăkk Unfas Šăddijăn. 7A-wen-dăɣ făw, a dd-orăwăn ašăl-i-dăɣ derhan s-ălmăssexităn wi ĕzzăɣnen teje ta Masidunya hakd wi ĕzzăɣnen teje ta n-Akaya n-ad-ăttălălăn ĕntăneḍ-dăɣ, ălxal-năwăn. 8Ălxidmăt wa ija măjrăd n-Emăli ɣur-wăn, ikrăš mawmaw-wa-dăɣ făl t-ĕslăn wăla ăddinăt wi hănen teje ta n-Masidunya d-ta n-Akaya. Ǝssăɣlăyăn-dd isălan n-immun-năwăn s-Măssinăɣ ăkall iket-net har ăbas nămiɣatăr făw ašăl-i-dăɣ s-asuɣĕl-năsăn. 9Wăr t-illa ere s-wădden isiɣul isălan n-asĕbbărrĕk wa hanăɣ-jăm d-ĕmmĕk wa s-tomănăm s-Măssinăɣ a-s tăqqălăm ḍarăt ăṣṣănămăn i-ad-tamašalăm erhet n-Măssinăɣ-i iddărăn ăddutten, 10tăqqalăm s-ăṣṣahăt ămăra i-uɣĕl n-Ɣisa-i n-Rure-s n-Măssinăɣ dd-issĕnkăr jer-inĕmmuttan dd-e-ifĕlĕn išĕnnawăn i-ad-hanăɣ-iɣlĕs dăɣ-aḍkăr n-Măssinăɣ wa ilkămăn.

will be added

X\