1 Inušămăn, năkk-i n-ănušăm ăjjĕyhăn i-tersĕmmawen ti inhăy Ălmasex, kăwăneḍ a-s ăssewălăɣ ămăra. A ĕnḍărrăn ɣas a hin-ăqqimăn iqqĕl-dd ĕnta iman-net, itwĕnhĕy ălxurmăt-net, ahărăɣ-t dăr-s. 2 Ǝnta da a-wa dăr-kăwăn-ăsimătărăɣ: taɣălift-năwăn tahrut n-imumĕnăn ta kăwăn-issăɣlăf Măssinăɣ, ăjăt-as tamăḍint ta mad-ăj amăḍan i-tahrut-net, wăr has-jem tamăḍint kăwăn-tăhhuuššălăt, ănn-ak, umaset-awăn a-wen a jam d-iman-năwăn dăɣ-erhet n-Măssinăɣ. Wăr jem a-wen ĕssĕbab n-akăraš n-ehăre wărăn xălal, ănn-ak, ĕdgĕẓăt dăɣ-a-wen s-ulhawăn ĕmdanen s-iqqud. 3 Wăr tĕtterăm tanăya n-errawăn n-imumĕnăn wi kăwăn-issăɣlăf Măssinăɣ, ănn-ak, umasăt-asăn ere hasăn-ha tĕttĕlal. 4 Dihen, afăl ašăl wa dd-ănfalăl Ămănokal n-imăḍanăn wa măqqărăn, ad-kăwăn-ăkf, korona, a-wen, takĕnbut n-tĕmmĕnukĕla ta s-wăr t-illa a inaxxăsăn ini-net. Ǝnta-den-dăɣ marušăt-năwăn. 5 Kăwăneḍ daɣ-i n-imawaḍăn, sĕmɣărăt inušămăn-năwăn, sărĕsăt iman-năwăn jer-iman-năwăn ed iktab a-s: "Măssinăɣ ikfăr i-ăddinăt wi iha ĕttĕkĕbru mašăn, wi data-s sarasnen iman-năsăn, ihakk'-en ănnuɣmăt." 6 Sărĕsăt iman-năwăn daw-tărna n-ăfuss n-Măssinăɣ i-ad-kăwăn-iḍkĕl dăɣ-ašăl wa issĕbdăd i-a-wen, 7 sănsăt fălla-s inĕzjam-năwăn iket-dăɣ-năsăn ed ĕnta a kăwăn-iḍmanăn. 8 Ăjăt ĕnniyăt, ɣaymăt tokayăm. He kăwăneḍ! Wăr toyyem Iblis-i n-ămakšar-năwăn ăššišlăl-kăwăn-in, olăh ɣas d-ahăr inijjĕwăn, or' emm, ăɣilăyɣălăy, itammăɣ i-ere făll-oḍa, ilmĕẓ-t-in. 9 Ǝkfărăt-as, sĕṣṣuhĕtăt immun-năwăn s-Măssinăɣ ed tĕssanăm a-s tersĕmmawen ti kăwăn-rammăsnen ămăra-dăɣ, ărmasnăt daɣ ayĕtma-wăn dăɣ-ăddin săl kăwăneḍ făll-ărori n-ăkall-i-dăɣ. 10 Ălɣizabăt wa kăwăn-irmasăn, wăr-e-ăhaj irmas-kăwăn ed Măssinăɣ-i n-Măssi-s n-ănnuɣmăt-i kăwăn-dd-iɣrăn s-iman-net, iɣr'-iwăn-dd i-ad-dăr-s tărtĕyăm dăɣ-ălxurmăt-net wa iɣlălăn dăɣ-idĕm n-Ɣisa Ălmasex. Tĕssĕba n-a-wen-dăɣ a făl ĕnta iman-net a kăwăn-e-išĕšdĕjăn, isĕbdĕd immun-năwăn făll-ăssas intămăn. 11 Tumaset tărna hărkuk ti-net. Amin! 12 Silwan wa n-ă/n/na-ɣ n-ămaɣdal a ĕssĕktăbăɣ tifer-ti-dăɣ i-ad-kăwăn-sĕmmĕtărăɣ, tĕkuyĕdăm dăɣ-a-wa hăm, tĕlmĕdăm a-s ănnuɣmăt n-Măssinăɣ wa dăr-kăwăn-osăɣ d-iman-net, tidĕt. 13 Tăhuul-kăwăn-in ălkănisăt-ta ăsnăfrăn Măssinăɣ hăt ăkall wa n-Babilun, ăhuul-kăwăn-in daɣ Marqĕs-i n-rure-ɣ dăɣ-ăddin. 14 Nĕmĕjjăt jer-iman-năwăn isofan n-tărha tĕmdat. Kăwăneḍ-i ila Ălmasex, ikf'-iwăn Măssinăɣ ălxer-net iket-dăɣ-năwăn. Amin!
