1 Bĕṭrus 4

1Ɣas šămad Ălmasex iman-net inhăy aɣăna dăɣ-taɣĕssa-net măšan hakd a-wen-dăɣ, iẓẓĕydăr, adiš, ăjăt kăwăneḍ-dăɣ făll-a-wen ed ăwadĕm wa ihannăyăn ălɣizabăt făll-tĕssĕba n-Ălmasex, asĕlmad a itajj a-wen, a-s ĕnta-i-dăɣ, tidĕt-dăɣ a-s ibḍa d-abăkkaḍ. 2A tĕkkăm tĕddarăm dăɣ-taɣĕssa-ta-dăɣ, wăr tăttălălăt erk derhanăn-wi făll-tĕgl' ăddunya, ănn-ak, mašălăt erhet n-Măssinăɣ. 3Igdăh-awăn a-wa-dăɣ tĕkkăsăm dăɣ-iba n-tuksĕḍa n-Măssinăɣ a-s tămoosăm inĕẓẓulam. Ăzzăman-en, wăr tĕmišilăm ar asĕmmăḍĕs n-iman-năwăn, erk derhanăn, tesăse n-asmĕd, tansit, iba n-asĕgdah, ălɣibadăt n-ăṣṣănămăn d-a-wa olăhăn d-a-wen. 4Ašăl-i, tămudre-năwăn, tămoos tăqqăn n-eɣăf i-ăddinăt wi s-kăla dăr-wăn ohărăn tămudre-ten-dăɣ ed tĕbḍăm d-a-wa ḍarăt ošalăn ĕntăneḍ hărwa, a t-ămoosăn: asĕmmăḍĕs n-iman, asĕssiki, tĕkkufăra. 5Ilkam ad-tăn-išrăɣ Măssinăɣ, ĕnta-en-dăɣ a-s ilkam, ad-išrăɣ ăddinăt iket-dăɣ-năsăn jer-wi ăba hakd-dăɣ wi ĕddărnen. 6A-wen-dăɣ a făl wi ăba s-ătwăjjăn isălan n-ălxer, ătwăšrăɣăn dăɣ-isălan n-a-wa ămešălăn făll-ărori n-ăkall ed a-wen-dăɣ a iqqalăn i-dăgg-adĕm iket-dăɣ-năsăn. Ašăl-i, ĕddarăn iket-dăɣ-năsăn dat-Măssinăɣ s-tărna n-Unfas Šăddijăn. 7Ayĕtma, sămdo n-hărăt iket-net, ohăẓ-dd. Iwăret-kăwăn sărho, ăjăt ĕnniyăt i-iman-năwăn, agĕẓăt iman-năwăn. Wăr kăwăn-in-išăšlalet hărăt wăl' iyyăn i-ad-tudabem tamădilt n-Măssinăɣ. 8Zăzrăt tărha tĕmdat jer-iman-năwăn i-hărăt iket-net făl-a-s, tărha, timĕs-in ibăkkaḍăn ăjjootnen. 9Ijjĕšet-kăwăn amăjaru wărăn ija s-ažĕžžănɣĕl n-tiṭṭawen wăla abjĕnjĕn. 10Tădabit ta kăwăn-ikfa Măssinăɣ dăɣ-ănnuɣmăt-net, wăr tăt-inăkkăẓet wăl' iyyăn dăɣ-wăn i-amidi-net, mašălăt a-wen i-ad-tumasăm imăḍanăn ĕfrannen n-a-wa kăwăn-issăɣlăf Măssinăɣ. 11Wa ikfă Măssinăɣ musnăt n-măjrăd, ămmăjrădet s-a-wa innă Măssinăɣ, wa ijrăwăn s-ad-ixdĕm i-imidiwăn-net, ixdĕmet s-ăṣṣahăt wa t-ikfă Măssinăɣ. Sĕmɣărăt Măssinăɣ dăɣ-idĕm n-Ɣisa Ălmasex dăɣ-hărăt iket-net, ĕnta a ănihăjjăn d-ălxurmăt iɣlalăn d-tanhaḍt tăɣlalăt. Amin! 12Ayĕtma wi ĕkneɣ tărha, wăr tăqqănnet irrumăn wi hannăyăm olăhnen d-tukĕse n-tahĕst iɣăfawăn-năwăn, wăr teɣalăt irmas-kăwăn a-wărăn ănhăjja, 13ănn-ak, umaset-awăn a-wen ĕssĕbab n-tedăwit ed a-wa kăwăn-irmasăn, kăla irmăs Ălmasex. Dăwătăt ămăra-dăɣ dăr-s tohărăm tersĕmmawen-tin-dăɣ i-ad-timɣar tedăwit-năwăn ašăl wa dd-e-infilĕl Ălmasex dăɣ-ălxurmăt-net. 14Tĕnḍĕḍ-awăn afăl kăwăn-rabbăḍăn ăddinăt dăɣ-tĕssĕba n-a-s il'-iwăn Ălmasex, tĕnḍĕḍ-awăn ed dihen, a kăwăn-irmăsăn-dăɣ, ad-fălla-wăn isăns Măssinăɣ Unfas-net wa ilăn ălxurmăt. 15Wăr kăwăn-ităjjăšet ere ihannăyăn aɣăna făl-a-s innin ija iman n-ăwadĕm, wăla okar, wăla ija erk hărăt, wăla ijjaš isălan t-dd-wăren iqqel. 16Kunta ih'-iwăn ere ititwĕɣĕzzĕben făl-a-s innin ălmăssexi a ămoos, wăr has-itumaset a-wen asăkor, ănn-ak umaset-as a-wen ĕssĕbab n-tămayit i-Măssinăɣ n-a-s t-iwar isĕm-wen-dăɣ n-ălmăssexi. 17Ăššăreɣa n-Măssinăɣ wa ilkămăn, issĕntă; tamĕtte-net daɣ a-s issĕntă. Adiš šămad năkkăneḍ-i-dăɣ a-s issĕntă Măssinăɣ, ĕndek isălan n-wi unjăynen omanăn s-Ălĕnžil n-Măssinăɣ? Ma dăɣ-săn ilkamăn? 18Iktab a-s: "Kunta wăla wa n-ămaɣdal, šărnaš d-e-iɣlĕs, adiš, ma innă wa n-enăllăbăs d-wa n-anăsbăkkaḍ?" 19A-wa-dăɣ a făl ere dăɣ-wăn ihannăyăn aɣăna-dăɣ dăɣ-tĕssĕba n-amišĕl n-erhet n-Măssinăɣ, isăɣlĕfet iman-net Ămaxlak-i n-Ămaɣdal, wărăn irăẓẓ dăɣ-tĕnna-net. Wăr kăwăn-išălḍašet iji n-a-wa olăɣăn.

will be added

X\