1 Bĕṭrus 3

1Tiḍeḍen! Sărĕset hak iyyăt dăɣ-kmăt iman-net dat-ăhalĕs-net, wăr hasăn-tăsjătmăt măjrăd, dihen, kunta ih'-ikmăt ti s-wăr-irḍa ăhalĕs-net s-măjrăd n-Măssinăɣ, ad-t-dd-awĕynăt săr-s tihusay n-ălxal-năkmăt. 2Afăl jămăt a-wen, ad-ĕnhĕyăn d-iman-năsăn tĕšĕdje n-tămudre-năkmăt d-semɣar wa hasăn-jămăt dăɣ-tuksĕḍa n-Măssinăɣ. 3Wăr tošelmăt ḍarăt tihusay-ti lănen mănhoy d-isĕhhĕska d-isĕssĕkna wi jănen s-iẓăban d-iẓărkan n-aẓrĕf d-orăɣ d-isĕlsa wi lănen ălqim, 4ănn-ak, sĕhhĕskĕtmăt ammas n-ulhawăn-năkmăt, tihusay-tin-dăɣ a lanen ălqim iɣlalăn dat-Măssinăɣ, tin-dăɣ a dd-tirĕwnen tăẓude d-ĕnniyăt ozjan. 5Tihusay-tin-dăɣ a-s kăla hasnăt-tammăɣnăt timĕššeddĕjen ti n-ibda jărnen ăṭṭăma-năsnăt dăɣ-Măssinăɣ, ăsijădnăt i-meddĕn-năsnăt. 6A-wen-dăɣ a-s kăla t-ja Sarăta-i s-făl tĕmɣăre n-semɣar-i-dăɣ tĕja i-Ibrahim, tĕglă făw har t-ɣarr s-isĕm: măssi-ɣ. Ăywa, ašăl-i-hi, kămăteḍ, Sarăta-en-dăɣ a-s tămoosmăt ešše-s afăl tamašalmăt a-wa olăɣăn dăɣ-a-s, wăr toyyemăt hărăt wăl' iyyăn iggad d-ĕnniyăt-năkmăt. 7Meddĕn! Ǝssĕnăt hullan dăɣ-tiḍeḍen-năwăn, wăr hin-tĕttĕwăm a-s tiḍeḍen ya, rĕkkĕmnăt fălla-wăn, sĕbbĕlălăt-tănăt ed timĕkkusa a ămoosnăt dăr-wăn ogdăhnen dăɣ-tăẓunt ta hawăn-ija Măssinăɣ ănnuɣmăt-net, ăjăt a-wen i-ad-wăr-itĕmmil făw hărăt inẓayăn tittar-năwăn dat-Măssinăɣ. 8Ḍarăt-a-wen daɣ, ahărăt iyyăn n-ĕnniyăt dăɣ-hărăt iket-net, aret hak iyyăn dăɣ-wăn ulh-net i-amidi-net jer-iman-năwăn šund a-wa tăjjăn ayĕtma, nĕmiḍĕnăt tăhanint, isărĕset hak iyyăn dăɣ-wăn iman-net dat-amidi-net, 9wăr ẓelăm tăllăbăst s-tăllăbăst, wăr ẓelăm tarĕbbeḍt s-tarĕbbeḍt. E-d hawăn-iɣšăd ăwadĕm hărăt, ănnăt-as: "Irăš-ak Măssinăɣ." A-wen-dăɣ a-s kăwăn-dd-iɣră Măssinăɣ s-iman-net i-ad-tĕkusĕm marušăt wa hawăn-itwăr. 10Iktab dăɣ-ĕlkĕttab n-Măssinăɣ a-s: "Ăwadĕm wa irhăn tămudre iwar sărho d-taɣrĕst, agĕẓet ilĕs-net dăɣ-tĕnna n-a lăbasăn, agĕẓet iḍlay-net dăɣ-tĕnna n-bahu." 11Jawăḍăt i-tăllăbăst, mašălăt a-wa olăɣăn, ămĕlet ălxer d-uḍĕf-net hărkuk jere-wăn d-ăddinăt, 12făl-a-s tiṭṭawen n-Emăli ĕnsanăt făll-wi data-s lanen idĕm, isajad i-tittar-năsăn măšan, inăllăbăsăn ĕntăneḍ, ikfăr-asăn. 13Mi hawăn-e-iɣšĕdăn hărăt afăl amišĕl n-a-wa olăɣăn a dăɣ-tĕdgaẓăm? 14Tĕnḍĕḍ-awăn afăl erk ĕmmĕk wa hannăyăm, amišĕl n-a olaɣăn a săr-wăn-t-dd orăwăn. Wăr kăwăn-sărmaɣnet dăgg-adĕm, wăr tăggădnet d-ĕnniyătăn-năwăn. 15Ixkĕmet Ălmasex dăɣ-ulhawăn-năwăn, ĕnta a-s Emăli. Ăṭṭăma wa kăwăn-ăsjăr Măssinăɣ, ɣaymăt hărkuk tăsidăwăm i-ad-t-sĕslĕm s-taẓidert i-ere kăwăn-ăssistănăn dăɣ-isălan-net. 16A-wen, ăjăt-t s-tăẓude tăddeewăt d-uksaḍ, wăr-immalet a dăɣ-tĕššakăm iman-năwăn, dihen, ad-sĕbbĕggum ăddinăt wi fălla-wăn jannănen bahu făl-a-s innin il'-iwăn Ălmasex. Ǝṭṭĕfăt ălxal olaɣăn dăɣ-hărăt iket-net i-ad-ĕkrukăḍăn imiksănăn-năwăn. 17Kunta Măssinăɣ a dd-ifal a-wen, ufa erk ĕmmĕk irmăsăn ăwadĕm dăɣ-a-s t-išla a olaɣăn uhĕn-i t-irmăsăn dăɣ-a-s t-išla a lăbasăn. 18Ǝnhĕywăt, Ălmasex, inhăy aɣăna, ămmut s-iyyăt i-ibăkkaḍăn n-dăgg-adĕm; wăr t-illa uḍlem t-iwarăn măšan, ămmut dăɣ-tĕssĕba n-inăsbăkkaḍăn i-ad-tăn-iẓĕnnĕmăẓĕl d-Măssinăɣ. Tidĕt-dăɣ a-s ămmut dăɣ-taɣĕssa-net, măšan, ăssoɣăl-t-dd Unfas Šăddijăn unfas-net s-tărna-net, issĕnkăr-t-dd jer-inĕmmuttan. 19S-tărna n-Unfas-en-dăɣ a-s ixṭăb isălan n-Ălĕnžil i-ăddinăt-wi s-ašăl-i-dăɣ han ălaxărăt; 20ăddinăt-en, iẓẓĕydăr Măssinăɣ fălla-săn a ikka ănnăbi Nox ikarrăs turăft n-aman ta măqqărăt măšan hakd a-wen-dăɣ, ăsɣărăn-as ulhawăn-năsăn har fălla-săn dd-oḍăn aman wi n-ḍuf, ĕkšăn-tăn iket-dăɣ-năsăn, wăr dăɣ-săn dd-iɣles a săl ĕttam ăddinăt. 21Sallăm, aman-win-dăɣ fălla-săn-dd ĕffăynen, ămoosăn tele n-atwĕsĕlmaɣ-năwăn dăɣ-aman. A-wen-dăɣ a-s ašăl-i-dăɣ, wa irḍăn s-atwĕsĕlmaɣ, asĕtbat a itajj n-a-s tidĕt-dăɣ a-s iɣlăs-t Măssinăɣ. Ǝlɣĕllas-en, wădden ašĕšdaj n-taɣĕssa s-aman a săr-wăn t-dd-orăwăn, ănn-ak, ĕjjĕluyăt dăɣ-alkum i-Măssinăɣ s-iman šăddijnen, wăr-ih' ăššăk. A-wen ĕssĕbab-net Ɣisa Ălmasex-i dd-inkărăn jer-inĕmmuttan 22tĕzzar, ikkă išĕnnawăn, ixkăm dăɣ-săn daw-aɣil n-Măssinăɣ. Ašăl-i, Ălmasex a daw-t-ĕllan ănjălosăn d-imănokalăn d-imĕṣṣuha wi ĕzzăɣnen išĕnnawăn.

will be added

X\