1 Bĕṭrus 2

1Ǝnhĕywăt, ĕbḍĕwăt d-tăllăbăst a tămoos-dăɣ, ĕbḍĕwăt d-amsud d-tĕlmĕnufăɣa d-ĕmmunšăɣ d-tiẓmit jer-iman-năwăn. 2Alăhăt d-imărkăsăn s-hărkuk ărhan taḍĕḍt, ĕnsĕyăt kăwăneḍ-dăɣ axx wa wăr-inxes hărăt ămoos măjrăd n-Măssinăɣ i-ad-kăwăn-isĕṣṣuhĕt, tĕdwĕlăm dăɣ-immun, tăɣlĕsăm ed innă ĕlkĕttab n-Măssinăɣ: 3"Kăwăneḍ, tăkrăbbem tăẓude ta ija alkum i-Emăli." 4Ẓĕẓẓihĕẓăt-dd iman-năwăn Emăli ed iddar. Ǝnta a-s tăhunt ta n-aɣmăr lăt ălqim hakkăt ăṣṣahăt i-ehăn, unjăyăn săr-s dăgg-adĕm măšan, ăsnăfrăn-tăt Măssinăɣ ed inhăy a-s ĕnta a tufăt. 5Ămăra, kăwăneḍ-dăɣ, tămoosăm šund tihun ĕddarnen warnen tăhunt-ten-dăɣ, umasăt šund ehăn wa šăddijăn izzăɣ Măssinăɣ, tămoosăm šund kăl-tikutawen-net ăššiišdăj t-ĕkfanen iman-năsăn i-ad-tamašalăm erhet-net, ɣabbădăm-t dăɣ-idĕm n-a-wa hawăn-ămoos Ɣisa Ălmasex. Ǝnta-den-dăɣ takute ta kăwăn-warăt i-ad-tĕkrĕšăm idĕm dat-Măssinăɣ. 6Dăɣ-isălan n-a-wen-dăɣ a dăɣ-innă ĕlkĕttab, innă Măssinăɣ: "Ăsnăfrănăɣ tăhunt n-aɣmăr ta tĕfrănăt lăt ălqim dăɣ-aɣrĕm wa n-Sayon. Ǝnta a he-sănsăɣ s-tizarăt i-ad-tumas ăssas. Ere fălla-s issĕntămăn immun-net-dăɣ, wăr-iha miši n-ad-ilkam ad-ămmujrăẓ." 7Kăwăneḍ-i săr-s omănnen, ad-tĕtwăsĕmɣărăm măšan ăddinăt wi has-ăsɣărnen ulhawăn-năsăn, iktab a-s: "Tăhunt-ta hin-jărăn ălbănnatăn, a-s dd-tĕšrăy tanfust, ĕnta a tăqqălăt ta n-aɣmăr n-ăssas n-ehăn iket-net." 8Ătwănn'-anăɣ daɣ a-s: "Tăhunt, a hasăn-irassălăn, tiḍĕwăn." Rassăl-asăn ed unjăyăn omănăn s-măjrăd n-Măssinăɣ, ĕnta-den-dăɣ tetewărt-năsăn, a-wen-dăɣ a dăr-ăniihăjjăn. 9Măšan kăwăneḍ-i n-imumĕnăn, ij'-iwăn Măssinăɣ tamĕtte ăsinăfrăn i-iman-net, tămoosăm ejhăn n-kăl-tikutawen făll-ăminakăl, ĕddĕwĕl šăddijăn, tamĕtte ăsidărfăt; ikkăs-kăwăn-dd Măssinăɣ iman-net dăɣ-tihay, ij'-iwăn dăɣ-ănnur-net wa ăhusken i-ad-tiimĕlĕm dat-ăddinăt tĕmɣăre d-tihusay n-ijităn-net. 10Ibda, wăr hem tamĕtte-net măšan, ašăl-i, tămoosăm tamĕtte n-Măssinăɣ; ibda, wăr hem wi s-oḍăn tăhanint măšan ašăl-i, oḍăn-awăn-tăt. 11Ayĕtma-ɣ-i ĕkneɣ tărha, imăjarăn d-imĕhhujjaj a tămoosăm făll-ărori n-ăkall-wa-dăɣ; a-wen-dăɣ a făl, ĕttarăɣ dăɣ-wăn ad-tĕyyĕm erk derhanăn wi n-ibda kăwăn-saknasnen d-tumast-năwăn ta tăynayăt. 12Ǝṭṭĕfăt ălxal olaɣăn jer-inĕẓẓulam i-ad-sĕbbuggĕtnăt tihusay n-tămudre-năwăn a-wa-dăɣ kăwăn-sawarăn uḍlem n-a-s erk ăddinăt a tămoosăm, afăl tamašalăm a-wa olăɣăn data-săn, ad-hasăn-umas a-wen ănnur i-ad-sĕmɣărăn Măssinăɣ ašăl wa hasăn-dd-e-infilĕl. 13Tĕssĕba n-a-wen-dăɣ hawăn-iqqăl Emăli a făl mašălăt a-wa fălla-wăn irha ĕlxĕkum iket-net, sărĕsăt iman-năwăn dat-ămănokal n-ăkall ed ĕnta a ixkamăn făll-hărăt iket-net, 14sărĕsăt iman-năwăn dat-gĕfăr wa ija ămănokal n-ăkall jĕnnĕj-wăn ed ĕnta a t-ikfăn tărna ta s-iɣattăs ăššăreɣa, isawar uḍlem imĕsdăɣwa, itimĕl wi tamašalnen a-wa olăɣăn. 15Erhet n-Măssinăɣ, itbat: mašălăt a-wa olăɣăn i-ad-sĕssusĕmăm erk ăddinăt wi ĕžhălnen wăren ĕla tayĕtte. 16Tidĕt-dăɣ a-s lam iman-năwăn măšan, wăr tăjjăt a-wen ăsaru i-ad-tamašalăm tăllăbăst, ănn-ak, a tăjjăm-dăɣ, ăjăt-t dăɣ-a-s kittĕwăm a-s eklan n-Măssinăɣ a tămoosăm. 17Sĕmɣărăt ăddinăt iket-năsăn, ărhăt ayĕtma-wăn dăɣ-ăddin, uksaḍăt Măssinăɣ, sĕmɣărăt ămănokal n-ăkall. 18Eklan! Sărĕsăt iman-năwăn dăɣ-tuksĕḍa n-Măssinăɣ daw-mĕssaw-wăn, uksaḍăt, sĕmɣărăm wi dăɣ-săn olăɣnen, ăẓednen, hakd-dăɣ wi s-iẓẓĕwăt ălxal-năsăn. 19Irhuj-awăn afăl ălɣizabăt wa hannăyăm amišĕl n-erhet n-Măssinăɣ a t-dd-orăwăn săr-wăn wădden ăḍḍărora. 20Ǝndek isĕm wa-ihăn ĕbbărĕḍ dd-oraw ăḍḍărora? Wăr t-illa. Măšan, kunta ălɣizabăt-wa hannăyăm, tuksĕḍa n-Măssinăɣ a săr-wăn-t-dd-orăwăn, adiš, irhuj-awăn ed a-wen-dăɣ a he-isiwĕḍăn idĕm-năwăn dat-Măssinăɣ. 21Ălɣizabăt šund-wen-dăɣ a-s kăwăn-dd-iɣră Măssinăɣ ed Ălmasex ĕnta-dăɣ, inhăy ălɣizabăt, oyy'-awăn-dd s-a-wen-dăɣ ălmital i-ad-t-tăttălălăm. 22"Ălmasex, wăr kăla ofa abăkkaḍ, wăr kăla innă bahu", 23ătwărbăḍ măšan, wăr-irbeḍ; inhăy tersĕmmawen măšan wăr kăla dd-tĕzjăr terk tettert emm-net, ănn-ak, ăssoɣăl talɣa-net Măssinăɣ-i išarrăɣăn s-iqqud. 24Ălmasex iman-net a irḍăn s-ad-inhĕy aɣăna dăɣ-taɣĕssa-net, ătwăṣlăb făll-tajĕttewt, ămmut i-ad-iḍkĕl făll-iman-net ibăkkaḍăn-nănăɣ, i-ad-numas šund inĕmmuttan dăɣ-isălan wi n-ibăkkaḍăn, nĕjrĕw tămudre tăynayăt, nĕṭṭĕf tămudre toɣadăt dat-Măssinăɣ. Ăllubbăḍ hullan dăɣ-taɣĕssa-net i-ad-tĕzzĕyăm dăɣ-turhĕnna-năwăn 25făl-a-s ibda, kăla tămoosăm šund tihatten ăssujjălnen măšan ămăra, tăqqălăm-dd Amăḍan wa iḍmănăn iman-năwăn.

will be added

X\