1 Bĕṭrus 1

1A-wa năkk Bĕṭrus wa n-ănămmašul n-Ɣisa Ălmasex hin-iktabăn i-imumĕnăn-wi ăsnăfrăn Măssinăɣ ĕmmăhăšnen jer-ikallăn wi n-Bĕntu, Gălasya, Kafadusya, Azya d-Bitinya. 2Abba Măssinăɣ iman-net, dăɣ-tĕllulĕya-net, a-s ăru d-kăwăn-ăsnăfrăn, ikrăš-kăwăn s-tărna n-Unfas-net, iẓlăy-kăwăn-dd jer-timĕttawen i-ad-tamašalăm erhet n-Ɣisa Ălmasex-i kăwăn-iššĕšdăjăn s-ašni-net. Ăhuulăɣ-kăwăn-in, ĕttarăɣ s-Măssinăɣ, ad-kăwăn-isĕnnĕflĕy dăɣ-ănnuɣmăt d-ălxer. 3Namĕlet Măssinăɣ-i n-Abba n-Emăli-nănăɣ Ɣisa Ălmasex. Tĕmɣăre n-tăhanint-net a dăɣ-dd-issĕnkăr Ɣisa Ălmasex jer-inĕmmuttan, ikf'-anăɣ dăɣ-tĕssĕba-net tămudre tăynayăt, ăsdăttăt daɣ ăṭṭăma wa hanăɣ-ăsjăr 4i-ad-nĕjrĕw tăkasit ta hăt išĕnnawăn itwăr Măssinăɣ i-tamĕtte-net. Tăkasit-en, hawăn-itwăr dăɣ-ălžănnăt, wăr ɣĕššĕd, wăr tăt-isĕmăḍis hărăt, wăr-inăxxĕs ănnur-net. 5Măssinăɣ iman-net, dăɣ-tĕssĕba n-immun wa săr-s jăm a kăwăn-e-agĕẓăn s-tărna-net i-ad-tĕjrĕwăm ĕlɣĕllas wa hawăn-itwăr dd-e-infilĕlăn ašăl wa d-e-tĕmdĕw ăddunya-ta-dăɣ. 6Ǝnta-den-dăɣ ĕssĕbab n-tedăwit ta jăm kud-dăɣ irammăs-kăwăn, ămăra-dăɣ, ălɣizabăt ăjjeen kăwăn-ăssikmăn iman măšan, a-wa sĕmmăn kăwăn-irmăsăn, wăr-e ăhaj irmas-kăwăn. 7Ălɣizabăt-en, ăddălil-net, i n-ad-itbat ekew n-immun-năwăn-i ilăn ălqin ufăn wăla orăɣ. Orăɣ iman-net, wăr-iɣlel, efew a dăɣ-t-itajj ăwadĕm i-ad-išdaj. Ǝmmĕk-wen-dăɣ daɣ a-s kăwăneḍ, afăl wădden ad-inšĕš immun-năwăn s-ălɣizabăt i-ad-ăttălmăd a-wa dăr-ogdăh immun-năwăn. Afăl tidĕt-dăɣ a-s itbat immun-năwăn, ašăl wa dd-e-iqqĕl Ɣisa Ălmasex, a data-s tĕkrĕšăm tĕmmal d-ălxurmăt d-semɣar. 8Ɣisa, tărham-t kud-dăɣ wăr kăla t-tĕnhăyăm s-tiṭṭawen-năwăn, tomanăm săr-s daɣ kud-dăɣ har ămăra-dăɣ, wăr t-tĕnheyăm. A-wen-dăɣ a făl ĕssĕbab n-tedăwit-năwăn, ija dăɣ-tĕmɣăre s-wăr t-illa măjrăd t-ăssiifhămăn. 9Dăwătăt ed ĕlɣĕllas a-s marušăt wa kăwăn-e-ăkf Ɣisa ed tomănăm săr-s. 10Ǝlɣĕllas wa kăwăn-ikfă Măssinăɣ, ăru d-ăssewălăn ănnăbităn dăɣ-isălan-net, ĕmmăɣăn hullan i-ad-ĕjrăhăn tisăɣlay-net, wăr t-illa ĕlkĕttab wăr-ăsfăykăn i-a-wen, 11wăr t-illa a-s wădden jăn-t i-ad-ĕlmĕdăn ăzzăman d-hărătăn wi maden-ăj dăɣ-a-wa hasăn-dd-ăsnăfalăl Unfas n-Ălmasex-i izzăɣăn dăɣ-ulhawăn-năsăn. Ǝnta-en-dăɣ a tăn-issĕlmădăn a-s Ălmasex, ad-inhĕy tersĕmmawen, tĕzzar ijjĕš ălxurmăt. 12Ănnăbităn-en, issĕlmăd-tăn Măssinăɣ a-s ĕlɣĕllas wa s-xaṭṭăbăn isălan-net, wădden ăzzăman wa hăn a dăɣ-dd-e-infilĕl, ănn-ak, inn'-asăn, i năwăn kăwăneḍ-i s-ăxṭăbăn inĕmmušal isălan n-Ălĕnžil s-tărna n-Unfas Šăddijăn-wa dd-ifălăn išĕnnawăn. Ălĕnžil-i-hi, wăla ănjălosăn ăsidărhănăn ajunf dăɣ-s măšan, wăr-ĕjrewăn turhajăt n-a-wen. 13Tĕssĕba n-a-wen-dăɣ a făl, ăsimătărăɣ-kăwăn d-ad-tăqqaymĕm tĕjbasăm, ɣaymăt jam ĕnniyăt, ăjăt ăṭṭăma-năwăn iket-net dăɣ-a-wa kăwăn-e-ăkf Ɣisa Ălmasex ašăl wa dd-e-infilĕl. 14Mašălăt a-wa fălla-wăn irha Măssinăɣ, wăr tĕlkemăm i-erk derhanăn wi n-ibda tamašalăm dăɣ-ălžăhalăt, 15ănn-ak, tĕlkĕmet tĕšĕdje n-tămudre-năwăn i-ta n-Măssinăɣ ed ĕnta-i kăwăn-dd-iɣrăn s-iman-net, šăddiij. 16Măssinăɣ iman-net a innăn dăɣ-măjrăd-net: "Išdajăt ed năkk šăddiijăɣ." 17Šămad dăɣ-tittar-năwăn, ɣarrăm Măssinăɣ s-isĕm "Abba", adiš tĕjjĕšet tuksĕḍa-net ulhawăn-năwăn, a tĕkkam tĕddarăm tămoosăm imăjarăn făll-ărori n-ăkall-i-dăɣ. Ǝnta, wăr-ăẓnămăẓlăy ăddinăt, ilkam, ad-išrăɣ hak ăwadĕm s-a-wa has-jăn imojjan-net. 18Tĕssanăm a-s wădden hărătăn wăren ĕnfa hărăt šund aẓrĕf meɣ orăɣ a-s kăwăn-dd-ikkăs Măssinăɣ dăɣ-terk tămudre ta dd-tĕtrăm, 19ănn-ak ašni ilan ălqim, ašni n-Ălmasex-i ămmun šund Ašăɣol šăddijăn s-wăr t-illa ălɣib t-iwarăn a-s kăwăn-iɣlăs. 20Ăru, iket-di făw dd-xallăk ăddunya, ăsnăfrăn-t Măssinăɣ i-a-wen-dăɣ. Ašăl-i-hi, a-wen s-ăru t-iktăb Măssinăɣ, ăsnăfalăl-t-dd dăɣ-tĕssĕba-năwăn dăɣ-išilan-wi-dăɣ n-ajilal. 21Ǝnta-en-dăɣ a dd-orăwăn immun-năwăn s-Măssinăɣ ed issĕnkăr-t-dd dăɣ-tamăttant, ikf'-e ălxurmăt dăɣ-ittus n-ad-ăns immun-năwăn d-ăṭṭăma-năwăn făll-Măssinăɣ. 22Ašăl-i, šămad, tămešălăm tidĕt, adiš, šăddiijăm. Orăw-dd săr-wăn a-wen tărha jer-iman-năwăn wăr tĕha tĕlmĕnufăɣa. Nĕmărhăt hărwa jer-iman-năwăn s-ulh imdan 23ed tămudre ta tăynayăt kăwăn-ikfa Măssinăɣ, wădden abbatăn-năwăn wi n-ăddunya-ta-dăɣ s-a ijăn dăɣ-ilkam ad-tăn-iba a hawăn-tăt-ikfăn; măjrăd wa iɣlălăn n-Măssinăɣ-i ihakkăn tămudre a-s ĕssĕbab-net 24făl-a-s innă ĕlkĕttab n-Măssinăɣ a-s: "Amăskoy ăgg-adĕm, wăr-iẓley d-teyĕšše, taɣrĕst-net, wăr tĕẓley d-ta n-tăboyt. Teyĕšše tiɣar, tăboyt ad-tiḍĕw, tiɣar-in ĕnta-dăɣ 25măšan, măjrăd n-Emăli ĕnta, iɣlal." Ăywa, măjrăd-wen-dăɣ a hawăn-ătwăjjăn a-s tĕslăm i-isălan n-Ălĕnžil.

will be added

X\