1 Exya 5

1Ere omănăn a-s Ɣisa a-s Ălmasex, ara n-Măssinăɣ a ămoos, ere irhăn amăraw adiš ad-ărh daɣ aratăn-net. 2Ǝnta da a-wa hanăɣ-isalmadăn a-s nărha aratăn n-Măssinăɣ: tărha ta n-Măssinăɣ d-amišĕl n-alămărăn-net. 3Ere innăn irha Măssinăɣ, adiš, ămašălet daɣ alămărăn-net; alămărăn-net daɣ, wăr săr-năɣ jen eẓăwe-wen-dăɣ. 4E d t-illăm ara n-Măssinăɣ, ăssiynăy, ăddoobăt ad-ikrĕš ašăl făll-ăddunya. Immun-nănăɣ a hanăɣ-ikfăn tărna-ten-dăɣ făll-ăddunya. 5Ăddunya-ta-dăɣ, mi fălla-s madăn-ikrĕš ašăl kunta wădden ere wa omănăn s-Ɣisa wa n-Rure-s n-Măssinăɣ? 6Ɣisa, ĕnta a dd-ăšmašăl Măssinăɣ s-ăddunya i-ad-itwĕsĕlmăɣ dăɣ-aman, inɣăl ašni-net, ămoos takute. Wăr dd-ijješ ăddunya i-ad-itwĕsĕlmăɣ ɣas, ijjăš-tăt-dd i-ad-itwĕsĕlmăɣ dăɣ-aman, inɣĕl ašni-net i-ad-umas takute. A-wen, tajuhe hanăɣ-ija Unfas Šăddijăn-i wărăn ijĕnn a săl tidĕt. 7Ămăra, kăraḍăt tijuhawen a ăssitbătnen a-wa ămoos Ɣisa: 8Unfas n-Măssinăɣ, aman-wi-dăɣ ătwăsălmăɣ d-ašni-net wa inɣălăn a-s ămmut. Tijuhawen-tin-dăɣ, tikkărăḍen, iyyăn n-emm a oharnăt dăɣ-a-wa ămoos Ɣisa. 9Ǝnta-den-dăɣ tajuhe ta ija Măssinăɣ făll-Rure-s. Tajuhe ta n-Măssinăɣ, tojăr ta n-dăgg-adĕm-i s-hanăɣ-răqqis ad-tăn-nĕflĕs. 10Ere omănăn s-Rure-s n-Măssinăɣ dăɣ, ad-isĕtbĕt tajuhe-ten-dăɣ măšan ere wa wărăn omen s-tajuhe n-Măssinăɣ, ija Măssinăɣ anăsbahu ed, wăr-omen s-tajuhe-ta ija Măssinăɣ făll-Rure-s Ɣisa. 11Tajuhe-en, ătwănn'-anăɣ dăɣ-s a-s: Măssinăɣ, ikf'-anăɣ tămudre ta tăɣlălăt. Tămudre-en, ikf'-anăɣ-tăt dăɣ-idĕm n-Rure-s, 12ere omănăn s-Rure-s n-Măssinăɣ, ijraw tămudre-ten-dăɣ, ere wărăn săr-s omen wăr tăt-mad-ijrĕw. 13Isălan-wi-dăɣ hawăn-in-ĕktăbăɣ dăɣ-tăkarḍe-ta-dăɣ, ĕktăbăɣ-awăn-tăn-in i-ad-kăwăn-sĕlmĕdăɣ kăwăneḍ-i omănnen s-Rure-s n-Măssinăɣ Ɣisa a-s tĕjrawăm tămudre ta tăɣlălăt. 14Fella-nănăɣ ɣur-Măssinăɣ, ĕnta da: Nĕssan a-s Măssinăɣ, ăsijăd-anăɣ, afăl a-wa dăɣ-s nĕtattăr, wăr-ănmăšrăy i-erhet-net. 15Šămad nĕflas a-s ăsijăd-anăɣ, e-d t-nĕdăl-dăɣ, adiš, nĕflas a-s a dăɣ-s nĕttăr-dăɣ, ad-hanăɣ-t-ăj. 16Ere dăɣ-wăn inhăyăn ă/n/na-s dăɣ-ăddin har ămešăl abăkkaḍ wărăn išĕkš temse, ittăret-as dăɣ-Măssinăɣ i-ad-has-ănš, ad-has-ănš. A-wen, ĕnneɣ-tăn făll-ibăkkaḍăn wi wăren šĕkš temse făl-a-s, ill'-e abăkkaḍ išaksen temse; wen, wăr hawăn-jĕnneɣ ad-tĕdĕlĕm Măssinăɣ dăɣ-tĕssĕba-net. 17Iba n-iqqud, abăkkaḍ măšan, ĕllan-t ibăkkaḍăn wăren šĕkš temse. 18Nĕssan a-s ara n-Măssinăɣ, wăr ihĕkk iman-net abăkkaḍ ed, ogaẓ-t Rure-s n-Măssinăɣ i-ad-fălla-s wăr-ikreš Iblis-i n-Anămsod ašăl. 19Năkkăneḍ, nĕssan a-s Măssinăɣ a hanăɣ-ilăn, nĕssan daɣ a-s ăddunya-ta-dăɣ iket-net, ănnihăḍ dăɣ-s Iblis. 20Nĕssan a-s Rure-s n-Măssinăɣ, osă-dd ăddunya, ikf'-anăɣ tayĕtte-ta hanăɣ-madăt-suksĕḍ Măssinăɣ wa s-ĕnta ɣas d-Rure-s Ɣisa Ălmasex a-s ĕssĕbab n-tassaɣt ta dăr-s nĕja. Ǝnta a-s Măssinăɣ, ĕnta a ihakkăn tămudre ta tăɣlălăt. 21Ilyaḍăn-in, agĕẓăt iman-năwăn dăɣ-ălɣibadăt n-ăṣṣănămăn a ămoosăn-dăɣ. Amin!

will be added

X\