1 Exya 4

1Imărhan-in, he kăwăneḍ! Wădden ere dd-iggădăn inn'-awăn Măssinăɣ ad-t-dd-ăšimašălăn, tĕflĕsăm-t. Arĕmăt-tăn iket-dăɣ-năsăn tĕzzar, tĕssĕnăm tayĕtte-năsăn Măssinăɣ a dd-tĕfal meɣ a dd-ĕkkasăn ɣas dăɣ-iɣăfawăn-năsăn. A-wen, janneɣ-awăn-t i-ad-tĕlmĕdăm a-s ăddunya-ta-dăɣ, ĕbsayăn dăɣ-s ănnăbităn n-bahu ăjjootnen. 2Ǝnta da tamătart ta kăwăn-madăt-sĕlmĕd a-s ăddinăt-en, Unfas Šăddijăn n-Măssinăɣ a tăn-ihan meɣ: e d t-illăm ăwadĕm ăjjĕyhăn a-s Ɣisa Ălmasex osă-dd ăddunya dăɣ-taɣĕssa n-ăgg-adĕm, Unfas n-Măssinăɣ a t-ihan, 3măšan, ăwadĕm iket-net ăkkuddălăn ass n-Ɣisa Ălmasex i-ăddunya iqqal ăgg-adĕm, wăr t-iha Unfas n-Măssinăɣ, Unfas wa n-ăddăžžal a t-ihan. Ăddăžžal n-Ălmasex-en, tĕslăm a-s imal-dd, ăssiilmădăɣ-kăwăn ămăra a-s ijjăš-dd ăddunya. 4Kăwăneḍ-i n-ilyaḍăn-in, Măssinăɣ a kăwăn-ilăn, tĕkrăšăm daɣ tărna făll-ănnăbităn wi n-bahu făl-a-s Unfas wa kăwăn-ihăn irna Unfas wa ihăn kăl-ăddunya. 5Ănnăbităn-en n-bahu, măjrăd wa n-ăddunya a tajjăn, tăsijăd-asăn daɣ ăddunya ed, terše a tăn-tĕja 6măšan, năkkăneḍ Măssinăɣ a hanăɣ-ilăn. Ere wa ăksuḍăn Măssinăɣ, ad-hanăɣ-isĕjĕd, ere wa wărăn ăksuḍ Măssinăɣ, wăr hanăɣ-mad-isĕjĕd. A-wen-dăɣ a hanăɣ-isalmadăn Unfas wa ilkamăn i-tidĕt d-Unfas wa išĕnmĕšrĕyăn ăddinăt. 7Imărhan-in, nĕnmărhet jer-iman-nănăɣ ed tărha Măssinăɣ a dd-tĕfăl, ere wa s-tĕha tărha ulh-net, ara n-Măssinăɣ t-izzayăn a ămoos, 8ere wa s-wăr ha tărha ulh-net, wăr izzey Măssinăɣ ed Măssinăɣ emărh. 9Ǝnta da ĕmmĕk wa s-hanăɣ-dd-ăsnăfalăl Măssinăɣ tărha ta hanăɣ-ija: ăšmašăl-dd Rure-s wa n-iyyăn s-ăddunya i-ad-hanăɣ-umas ĕssĕbab n-tămudre. 10Ǝnta da a-wa ăsidătten tărha ta hanăɣ-ija Măssinăɣ: wădden năkkăneḍ a t-ărhănen s-tizarăt, ĕnta a hanăɣ-irhăn s-tizarăt ed ăšmašăl-dd săr-năɣ Rure-s i-ad-umas takute hanăɣ-madăt-tĕjrĕw tenăšše n-ibăkkaḍăn-nănăɣ. 11Imărhan-in, šămad Măssinăɣ, ij'-anăɣ tărha togdăhăt d-a-wen-dăɣ, adiš, năkkăneḍ-dăɣ, iwar-anăɣ ad-nĕnmărh jer-iman-nănăɣ. 12Wăr t-illa ere s-kăla inhăy Măssinăɣ măšan, afăl nănmărha jer-iman-nănăɣ, ad-dd-iddĕk ulhawăn-nănăɣ, isĕnnĕfilĕl daɣ tărha-net dăɣ-năɣ s-ĕmmĕk itbatăn. 13Unfas Šăddijăn wa hanăɣ-ikfa Măssinăɣ, ĕnta a hanăɣ-isalmadăn a-s nosaɣ d-Măssinăɣ, osaɣ daɣ dăr-năɣ. 14Măssinăɣ, ăšmašăl-dd Rure-s i-ad-umas Ămaɣlas n-ăddunya. Ămoos a-wen a nĕnhay s-tiṭṭawen-nănăɣ, nĕtilɣut daɣ săr-s. 15Ere ăjjĕyhăn a-s Ɣisa Rure-s n-Măssinăɣ, osaɣ d-Măssinăɣ, osaɣ dăr-s daɣ Măssinăɣ. 16Năkkăneḍ, nĕflas tărha ta hanăɣ-ija Măssinăɣ ed, Măssinăɣ emărh. Ere ămoosăn emărh iket-net, osaɣ d-Măssinăɣ, osaɣ dăr-s daɣ Măssinăɣ. 17Afăl tĕtbăt tărha-nănăɣ i-Măssinăɣ dăɣ-ulhawăn-nănăɣ, wăr-mad-nărmăɣ ašăl wa ilkămăn făl-a-s, ad-năj dăɣ-ăddunya-ta-dăɣ tămudre tolăhăt d-ta dăɣ-s ija Ɣisa. 18Tărha d-tuksĕḍa, wăr tidawnăt ed, tărha, wăr tĕyy edăgg i-tuksĕḍa. Ɣas, ere s-wăr ha ar tuksĕḍa ulh-net, a-di tărha a wărăt ha ulh-net ed, tuksĕḍa wăr tĕjj ar dăɣ-tĕssĕba n-tisnant tĕlkamăt. 19Năkkăneḍ, ha tărha ulhawăn-nănăɣ ed, Măssinăɣ a hanăɣ-irhăn s-tizarăt. 20Ere innăn: ărheɣ Măssinăɣ, a-s ija a-wen ăššunjăt ă/n/na-s dăɣ-ăddin, a-di anăsbahu a ămoos făl-a-s kăyy, kunta ă/n/na-k wa t-illăn dat-tiṭṭawen-năk, hannăyăd-t, wăr t-tărhed, ma isalmadăn s-tărha-năk i-Măssinăɣ-i wăr hĕnnĕyăd? 21Alămăr wa hanăɣ-dd-oyyă Ɣisa Ălmasex, ĕnta da: "Ere innăn irha Măssinăɣ, adiš ărhet daɣ ă/n/na-s dăɣ-ăddin."

will be added

X\