1 Exya 3

1Ǝnhĕywăt ɣas tĕmɣăre n-tărha ta hanăɣ-ija Abba, tărha ta t-tăwwăyăt har hanăɣ-ija isĕm: "Aratăn-nin," ĕnta-den-dăɣ daɣ a-wa nămoos. A-wen-dăɣ a făl wăr hanăɣ-fĕhhĕmăn kăl-ăddunya ed wăr-ĕzzeyăn Măssinăɣ. 2Imărhan-in, tidĕt-dăɣ a-s aratăn n-Măssinăɣ a nămoos ămăra-dăɣ, măšan, a-wa s-ilkam ad-t-numas, wăr dd-ănfalăl hărwa; nĕssan ɣas a-s ašăl wa dd-mad-iqqĕl Ɣisa, ad-dăr-s nalăh ed ad-t-nĕnhĕy ĕnta iman-net s-ălxal wa iha ămăra-dăɣ. 3Ere ijărăn ăṭṭăma n-a-wen-dăɣ-dăɣ, adiš, išĕšdĕjet iman-net s-ĕmmĕk wa s-Ɣisa iman-net, šăddiij. 4Ere itamašalăn abăkkaḍ, ilmĕdet a-s ănimăšrăy i-alămăr n-Măssinăɣ ed abăkkaḍ, tanmĕšrayt i-alămăr n-Măssinăɣ. 5Tĕssanăm daɣ a-s Ɣisa Ălmasex, osă-dd i-ad-ikkĕs ibăkkaḍăn făll-ăddinăt, ĕnta, wăr t-illa abăkkaḍ t-iwarăn. 6A-wen-dăɣ a făl ere osaɣăn d-Ɣisa hărăt-dăɣ, adiš, ibḍĕwet d-abăkkaḍ făl-a-s ere wărăn izzey Ɣisa, wăr t-illa a ijrah dăɣ-isălan-net, a ihakkăn iman-net abăkkaḍ. 7Ilyaḍăn-in, wăr kăwăn-išinmĕšrĕyet ăwadĕm wăl' iyyăn. Ere itamašalăn iqqud, oɣad ed Ălmasex-i s-ilkăm, oɣad, 8măšan, ăwadĕm ikfan iman-net abăkkaḍ, Iblis a t-ilăn, Iblis daɣ, ĕnta a ăzzarăn s-abăkkaḍ. Rure-s n-Măssinăɣ, Ɣisa, osă-dd i-ad-išăɣšĕd făll-Iblis a-wa itamašal. 9Ăwadĕm, e-d ămoos ara n-Măssinăɣ, ad-ăbas olwa dăɣ-abăkkaḍ ed ikf'-e Măssinăɣ tărna-net, ad-ăbas ikfa iman-net abăkkaḍ ed ara n-Măssinăɣ a ămoos. 10Ǝnta-den-dăɣ a-wa ibḍăn aratăn wi n-Măssinăɣ d-wi n-Iblis. Ere wărăn itĕjj a oɣadăn meɣ ere wărăn irha ă/n/na-s dăɣ-ăddin iket-net, a-di, wăr-ămoos ara n-Măssinăɣ. 11Isălan wi fălla-năɣ dd-ăzzubbătnen hărwa s-tizarăt, ătwănn'-anăɣ dăɣ-săn: "Nĕmărhăt jer-iman-năwăn." 12Wăr nĕtilăhet d-Kayin-i dăɣ-innăhăḍ Iblis har ij'-iman n-ă/n/na-s. Mafăl ij'-iman-net? Ij'-iman-net făl-a-s ĕnta Kayin, imojjan-net ilăbasnen, a-s ija a-wen wi n-ă/n/na-s, i oɣadnen. 13Ayĕtma-ɣ, mikḍaw wa dăr-wăn jăn kăl-ăddunya, wăr-ităqqănet iɣăfawăn-năwăn. 14Năkkăneḍ, nĕssan a-s nĕnkăr-dd dăɣ-tamăttant, nĕjjăš tămudre. Tămudre-en, ašămol-net, tărha-ta nĕja i-ayĕtma-năɣ dăɣ-ăddin. Ere wărăn irha ayĕtma-s dăɣ-ăddin, enĕmmettĕn hărwa a ămoos. 15Ere okăḍăn d-ă/n/na-s dăɣ-ăddin iket-net, emăjj n-iman a ămoos, tĕssanăm a-s wăr t-illa emăjj n-iman ijrawăn tămudre ta tăɣlălăt. 16Ɣisa Ălmasex, ikfă tămudre-net dăɣ-tĕssĕba-nănăɣ. A-wen dăɣ a făl, năkkăneḍ-dăɣ, iwar-anăɣ ad-năkf tămudre-nănăɣ i-ayĕtma-năɣ dăɣ-ăddin. 17Afăl inhăy ăhalĕs n-amărrĕzăɣ ă/n/na-s dăɣ-ăddin ămiɣatărăn, wăr has-oḍen tăhanint, ĕndek ĕmmĕk wa s-mad-ănn ha tărha n-Măssinăɣ ulh-net. 18Ilyaḍăn-in, wăr băddădet tărha-nănăɣ ɣur-măjrăd d-tăẓude n-ilĕs ɣas, tumaset tărha-nănăɣ, tărha n-tidĕt ăssiitbătăn imojjan-nănăɣ. 19Ǝmmĕk-wen-dăɣ a-s mad-nĕlmĕd a-s tĕl'-anăɣ tidĕt, ĕmmĕk-wen-dăɣ daɣ a-s mad-ismaḍăn ulhawăn-nănăɣ dat-Măssinăɣ 20făl-a-s, kunta sawărăn-anăɣ ulhawăn-nănăɣ uḍlem, Măssinăɣ ojăr ulhawăn-nănăɣ, wăr t-illa daɣ a has-idrajăn. 21Imărhan-in, kunta wăr hanăɣ-ăswărăn ulhawăn-nănăɣ uḍlem, adiš, wăr t-illa a hanăɣ-madăn-isărmăɣ dat-Măssinăɣ, 22dihen ad-dăɣ-s nĕttăr-dăɣ, ad-hanăɣ-t-ăkf ed nĕṭṭaf alămărăn-net, nĕtamašal a-wa irha. 23Măssinăɣ, ĕnta da a-wa fălla-năɣ ifrăḍ: namĕnet s-Rure-s Ɣisa Ălmasex, nĕnmărhet jer-iman-nănăɣ s-ĕmmĕk wa s-fălla-năɣ-t ifrăḍ Ălmasex. 24Ere wa itamašalăn alămărăn n-Măssinăɣ, osaɣ d-Măssinăɣ, osaɣ dăr-s daɣ Măssinăɣ; Unfas Šăddijăn wa hanăɣ-ikfa a hanăɣ-isalmadăn a-s nosaɣ d-Măssinăɣ.

will be added

X\