1 Exya 2

1Ilyaḍăn-in, isălan-wi-dăɣ, kattăbăɣ-awăn-tăn-in i-ad-wăr hĕkkĕm iman-năwăn abăkkaḍ. Kunta daɣ oḍa iyyăn dăɣ-wăn dăɣ-abăkkaḍ, nĕla ănabdid ɣur-Abba, a t-ămoosăn Ɣisa Ălmasex-i oɣădăn wăr-iwer abăkkaḍ. 2Ǝnta a ikfăn iman-net i-ad-hanăɣ-umas takute ta hanăɣ-jarrăwăt tenăšše n-ibăkkaḍăn-nănăɣ; a-wen wădden năkkăneḍ ɣas a-s t-ija, ij'-e i-kăl-ăddunya tĕmda. 3Ašămol n-tĕmĕzzuyt-nănăɣ i-Măssinăɣ, a t-ămoosăn amišĕl-nănăɣ i-fărĕḍăn-net. 4Ere innăn izzay Măssinăɣ uhĕn-dăɣ wăr iṭṭef alămărăn-net, anăsbahu wărăn oher hărăt d-tidĕt a ămoos, 5măšan, ăwadĕm wa itamašalăn tĕnna n-Măssinăɣ, tĕmdă-dd tărha n-Măssinăɣ s-ulh-net, ĕnta-den-dăɣ a-wa isalmadăn a-s nosaɣ d-Măssinăɣ. 6Ere innăn osaɣ d-Măssinăɣ hărăt, adiš, iṭṭĕfet amišĕl n-erhet n-Măssinăɣ s-ĕmmĕk wa s-t-ămešăl Ɣisa. 7Imărhan-in, wădden isălan n-alămăr ăynayăn a făl hawăn-in-kattăbăɣ, ănn-ak, alămăr s-ăru-dăɣ, ɣur-eɣăf n-hărăt iket-net, ill'-e; alămăr-en, a t-ămoosăn, măjrăd n-Măssinăɣ wa s-ăru d-has-tĕslăm. 8Hakd a-wen-dăɣ, a-wen, wăr hin-ikkes a-s alămăr wa hawăn-in-kattăbăɣ, alămăr ăynayăn a ămoos. Alămăr, s-tidĕt-net, ăsnăfalăl-tăt-dd Ɣisa, tăsnăfalălăm-tăt-dd daɣ kăwăneḍ făl-a-s tihay, tilĕmnăt-in, ad-dd-itimlĕwlĕw ănnur wa n-tidĕt dăɣ-edăgg-năsnăt. 9Ere innăn ĕnta izzaɣ dăɣ-ănnur wa n-Măssinăɣ, a-s ija a-wen, okăḍ d-ă/n/na-s dăɣ-ăddin, ăwadĕm-en, iha tihay hărwa. 10Ere wa irhăn ă/n/na-s dăɣ-ăddin, ih' ănnur, wăr t-dd-e-ifĕl a-s ăšnămăšrăy ă/n/na-s, isiḍĕw-t dăɣ-abăkkaḍ 11măšan, ere okăḍăn d-ă/n/na-s dăɣ-ăddin, iha tihay, irjaš dăɣ-tihay, wăr-issen e-s ikka ed, ărmasnăt-t tihay. 12Ilyaḍăn-in, isălan-wi-dăɣ, kattăbăɣ-awăn-tăn-in ed ibăkkaḍăn-năwăn, inš'-awăn-tăn-in Măssinăɣ dăɣ-idĕm n-isĕm n-Ɣisa. 13Kăwăneḍ-i n-abbatăn dăɣ-ăddin, kattăbăɣ-awăn-in ed tĕzzayăm Wa t-illăn hărwa wăr t-illa a t-illan, kattăbăɣ-awăn kăwăneḍ-i n-imawaḍăn ed, tĕkrăšăm ašăl fall-Iblis-i n-Anămsod. 14Kattăbăɣ-awăn-in kăwăneḍ-i n-aratăn-in dăɣ-ăddin ed, tĕzzayăm Abba. Ǝktabăɣ-awăn kăwăneḍ-i n-abbatăn ed tĕzzayăm Wa t-illăn hărwa wăr t-illa a t-illan, ĕktabăɣ-awăn-in kăwăneḍ-i n-imawaḍăn ed, imĕṣṣuha ĕṭṭafnen s-sărho măjrăd n-Măssinăɣ dăɣ-ulhawăn-năsăn a tămoosăm, tĕkrašăm ašăl făll-Iblis-i n-Anămsod. 15Wăr tărhem ăddunya wăla a-wa la ăddunya. Ere irhan ăddunya, wăr ha tărha n-Abba ulh-net 16făl-a-s, a-wa la ăddunya iket-net, jer-ĕttĕkĕbru wa n-derhanăn wi lăbasnen n-taɣĕssa wăla ĕttĕkĕbru wa n-derhanăn wi n-tiṭṭawen d-aḍkul n-iman dăɣ-ĕttĕkĕbru wa dd-tirĕw terše n-wălăt ăddunya, wădden Abba a dd-ifal, ăddunya a dd-ifal. 17Tidĕt ĕnta da: ăddunya, ilkam iba-net ĕnta d-iẓĕjraẓ-net măšan, ăwadĕm wa itamašalăn erhet n-Măssinăɣ, iɣlal. 18Ilyaḍăn-in, ajilal n-ăddunya a nĕha. Wădden tĕslam a-s ilkam Ăddăžžal wa n-ămiksăn n-Ălmasex? Ărheeɣ ad-kăwăn-sĕlmĕdăɣ hărwa ămăra-dăɣ, a-s osăn-dd ăddăžžalăn n-imiksănăn n-Ălmasex ăjjootnen. Ǝnta-den-dăɣ ašămol wa hanăɣ-isalmadăn a-s ajilal n-ăddunya a nĕha. 19Ăddăžžalăn n-imiksănăn n-Ălmasex-en, a-s t-ĕllan jere-năɣ wăr t-illa a-s hanăɣ-han ed, ĕnnăr ămoosăn hărăt dăɣ-năɣ, wăr hanăɣ-hĕkkĕn iroriyawăn-năsăn. Ašăl-i, fălăn-anăɣ i-ad-dd-infilĕl a-s iket-năsăn, wăr-ămoosăn hărăt dăɣ-năɣ. 20Kăwăneḍ iket-năwăn, tĕssanăm a-wa ămoosăn tidĕt ed ikf'-iwăn Wa n-Emĕššeddĕj, Unfas Šăddijăn. 21Ɣas, akătab wa hawăn-in-jeɣ, wăr hawăn-t-in-jeɣ dăɣ-tĕssĕba n-a-s innin wăr tĕssenăm tidĕt, tĕssanăm-tăt, tĕssanăm daɣ a-s wăr t-illa ĕmmĕk s-dd-izjăr bahu tidĕt. 22Ak ăddăžžal-wa-dăɣ n-ămiksăn n-Ălmasex-i-dăɣ făw, mi t-ămoosăn? Adiš ămoos-t ere wa innăn a-s Ɣisa wădden ĕnta a-s Ălmasex, ĕnta-den-dăɣ ăddăžzal n-Ălmasex wa wărăn irḍa s-Abba wăla Rure-s. 23Ere wa wărăn irḍa a-s Ɣisa, Rure-s n-Măssinăɣ, wăr-irḍa daɣ s-Abba; ere wa iqbălăn Rure-s n-Măssinăɣ, iqbal daɣ Abba. 24Kăwăneḍ, a-wa s-tĕslăm ašăl ăzzarăn d-tomănăm s-Ɣisa Ălmasex dăɣ-ulhawăn-năwăn, ĕṭṭĕfăt-t. Afăl tĕṭṭăfăm dăɣ-ulhawăn-năwăn a-wa s-tĕslăm ašăl ăzzarăn d-tomănăm s-Ɣisa, ad-tĕtbĕt tassaɣt-năwăn d-Rure-s n-Măssinăɣ hakd Abba. 25Ǝnta da ărkăwăl wa hanăɣ-ijjăš Ălmasex, inn'-anăɣ: "Năkk, hakkăɣ-kăwăn tămudre ta tăɣlălăt." 26Ɣas, akătab wa hawăn-in-jeɣ, i n-ad-kăwăn-sĕmmĕtărăɣ d-ad-tĕjĕm ĕnniyăt i-ăddinăt-wi tattărnen ašĕšk-năwăn, 27sĕktĕwăɣ-kăwăn-dd daɣ a-s, Ălmasex, issănɣăl Unfas-net fălla-wăn. Ɣas, šămad iha Unfas-net ulhawăn-năwăn, adiš wăr tămɣatărăm s-ad-kăwăn-isăɣăr ăwadĕm wăl' iyyăn, ănn-ak Unfas-en-dăɣ a kăwăn-madăn-isăɣăr hărăt iket-net. A-wa isaɣra daɣ ĕnta, ădduuttăt a-s wăr t-iha bahu, ɣas, mašălăt a-wa kăwăn-issăɣra Unfas dăɣ-isălan n-tartit-năwăn d-Ălmasex. 28Ămăra-hi ilyaḍăn-in, ɣaymăt tosaɣăm d-Ălmasex i-ad nudabăt tebădde data-s ašăl wa dd-mad-infilĕl ed ad-hanăɣ-ijrĕw nĕṭṭaf immun, dihen, wăr mad-nĕmmujrăẓ, wăr mad-nĕkrukăḍ. 29Šămad tĕssanăm a-s Ălmasex oɣad, adiš, ĕlmĕdăt daɣ a-s ere itamašalăn a oɣădăn iket-net, ara n-Măssinăɣ a ămoos.

will be added

X\