1 Kăl-Kurĕnta 9

1Ayĕtma, năkk-i-dăɣ, wădden ĕjrawăɣ iman-in. Ajăn wădden, ănămmašul a ămoosăɣ? Ajăn wădden ĕnhayăɣ Emăli-nănăɣ Ɣisa s-tiṭṭawen-in? Ajăn wădden kăwăneḍ iman-năwăn a-s tasĕtbat n-a-wa ăxdămăɣ i-Emăli. 2Kud-dăɣ ija ɣur-iyyăḍ a-s wădden ănămmašul a ămoosăɣ, ăniihăjja a-s wădden kăwăneḍ ed kăwăneḍ-di-dăɣ a-s tasĕtbat n-tĕnnĕmušĕla-nin dat-Emăli. 3Ăddinăt daɣ wi hi-tiẓĕmnen, sawarăn-ahi bahu, ălwižab-in hasăn da: 4wădden năkkăneḍ nĕjraw s-ad-năkš, nĕsĕw s-ĕmmĕk wa s-t-tăjjăn ăddinăt wi iyyăḍnen? 5Meɣ ĕndek diha d-ătiwănna a-s wăr năddobăt ad-nĕdubĕn hărăt dăɣ-šătma-năɣ ti n-tălmăssexiten, nidaw dăr-snăt dăɣ-isikilăn-nănăɣ s-ĕmmĕk wa s-t-jăn inĕmmušal wi iyyăḍnen d-ayĕtma-s n-Ɣisa d-Bĕṭrus? 6Meɣ năkk d-Bărnăbbas ɣas a iwar ălxidmăt s-ifassăn-nănăɣ i-ad-nĕṭṭĕf tămudre n-iman-nănăɣ? 7Mi s-kăla inhăy ĕssărdasi ihan ĕlɣĕskăr wăla timẓal, meɣ mi s-kăla ăddomăt ašĕkrĕš ăqqayĕm wăr dăɣ-s ikša? Mi s-kăla iḍăn ehăre, ăqqayĕm wăr-ăẓoẓăj, isĕw? 8A-wa hawăn-janneɣ, wădden ălɣadăt dd-ĕkkasăn dăgg-adĕm dăɣ-iɣăfawăn-năsăn, ănn-ak, alămăr wa n-Mosa a tăn-innăn. 9Iktab dăɣ-Ăṭṭăwrăt a-s: "E-d jed awdes dăɣ-tijenen n-ălkăma i-ad-dăɣ-snăt išĕbbăɣtĕš i-ad-hak-ibḍĕw tiblalen d-ahošăr, wăr has-jed ăkinbăb." Ak tordam a-s Măssinăɣ-i-dăɣ, iwdesăn a dăɣ-idgaẓ s-ĕmmĕk-wen-dăɣ? 10Năkkăneḍ-i-dăɣ n-inĕmmušal a-s iha isălan-nănăɣ. Tidĕt-dăɣ a-s dăɣ-tĕssĕba-nănăɣ a făl dd-ăzzăbbăt alămăr-wen-dăɣ ed ăwadĕm ăddomen ašĕkrĕš-net, ăhhuuššăl-t ɣas ad-ijar ăṭṭăma n-ad-has-t-dd-izjăr hărăt. 11Năkkăneḍ, năxṭăb-awăn măjrăd n-Măssinăɣ, ămoos a-wen šund ašĕkrĕš năddoomăt, ajăn afăl dd-izjăr hărăt ifassăn-năwăn săr-năɣ, ajăn a-wen a iqqanăn eɣăf ḍarăt ălxer n-Măssinăɣ wa nĕja dăɣ-ulhawăn-năwăn? 12Kunta ill'-e ere s-kăwăn-iwar ălxaqq-net, ajăn wăr t-nojer săr-wăn? Măšan, hakd a-wen-dăɣ, wăr kăwăn-iha i năzzilzăm d-hărăt, ănn-ak, năqbăl hărăt iket-net i-ad-wăr nĕja tăsahaɣt wăl' iyyăt i-Ălĕnžil n-Ălmasex. 13Ajăn, wăr tĕssenăm a-s ăddinăt wi ăxdamnen dăɣ-ehăn n-ămudd wa măqqărăn, ehăn-en-dăɣ a hasăn-iṭṭafăn tămudre? Meɣ, ajăn wăr tĕssenăm a-s ăddinăt wi ɣarrăsnen i-tikutawen făll-tasĕskărt ta n-tikutawen, a-s ăɣrăsăn-dăɣ, lan dăɣ-s ejădăr? 14Ǝmmĕk-wen-dăɣ daɣ a făl omăr Emăli a-s ăddinăt wi xaṭṭăbnen Ălĕnžil, ĕddărnet s-Ălĕnžil. 15Năkk, wăr t-illa ăẓuk fălla-wăn jeɣ. Akătab daɣ wa hawăn-in-tajjăɣ ămăra-dăɣ, wăr hawăn-t-in-tĕjjăɣ făl-a-s innin ărheɣ dăɣ-wăn hărăt, wăr t-illa a dăɣ-wăn ărheɣ, ănn-ak, ăsidăwăt-ahi hullan a-wa s-hawăn-ăxṭăbăɣ Ălĕnžil wăr t-illa a dăɣ-wăn ĕttarăɣ, ăssofăɣ făw tamăttant uhĕn ad-dăɣ-i ikkĕs ăwadĕm tedăwit-ten-dăɣ n-a-s wăr t-illa a dăɣ-wăn ĕttarăɣ a-s hawăn ăxṭăbăɣ Ălĕnžil. 16Asĕllĕnži wa tăjjăɣ i-ăddinăt, wăr tĕttărăɣ ad-hi-umas abăraj, ănn-ak, fărĕḍ a hi-ămoos, amăskoy năkk afăl ăqqimăɣ wăr-ăxṭebăɣ Ălĕnžil. 17Ǝnnăr ălxuṭbăt wa tăjjăɣ, ămoos a tajjăɣ dăɣ-iẓĕjraẓ n-iman-in, adiš, ăniihăjja d-ad-ĕjrĕwăɣ ălxaqq n-tide-nin măšan, wădden a-wen a ijăn, Măssinăɣ a hi-ijăn dăɣ-a-wen, ĕnta a hi-issăɣlăfăn ămašal-wen-dăɣ. 18Ma săr-i dd-issăɣsăl a-wen-dăɣ? Adiš, emărked-in ɣur-Măssinăɣ a t-ămoosăn ad-salănžeɣ ăddinăt dăɣ-a-s, wăr t-illa a dăɣ-săn rammăsăɣ i-ad-umasăn isălan-en, a ĕjrawăn bănnan. 19Năkk, wăr t-illa ere s-ămoosăɣ akli-net măšan, hakd a-wen-dăɣ, wăr t-illa ere s-wădden ăsrăsăɣ iman-in data-s i-ad-umas a-wen, ĕssĕbab n-ĕlɣĕllas n-tĕššĕm n-ăddinăt. 20Kăl-Ălyăhud, jeɣ-asăn iman-in ăgg-Ălyăhud i-ad-sĕjĕdĕn i-a-wa hasăn-janneɣ, utabăn, iɣlĕs-tăn Măssinăɣ; wi ĕglănen s-a-wa tĕnnă Ăṭṭăwrăt, jeɣ-asăn iman-in ere iglan făll-a-wa tĕnna Ăṭṭăwrăt kud-dăɣ ădduuttăt a-s wădden ĕnta a tănniihăḍăt dăɣ-a-wa făll-ĕgleɣ; a-wen, jeɣ-t i-ad-sĕjĕdĕn i-a-wa hasăn-xaṭṭăbăɣ, utabăn, iɣlĕs-tăn Măssinăɣ. 21Ăddinăt wi wăren ĕssen făll-Măssinăɣ, ăssalăhăɣ iman-in dăr-săn, a-s ija a-wen, năkk, ijmaḍ-t ăššăk a-s ĕssanăɣ s-Măssinăɣ ed ălqanun wa n-Ălmasex a făll-ĕgleɣ. A-wen, jeɣ-t i-ad-sĕjĕdĕn i-a-wa xaṭṭăbăɣ, utabăn, iɣlĕs-tăn Măssinăɣ. 22Ăddinăt wi rĕkkĕmnen, jeɣ-asăn iman-in iyyăn dăɣ-săn i-ad-ăɣlĕsăn ĕntăneḍ-dăɣ, ălxal hi-ijjăš ăgg-adĕm-dăɣ, ad-has-sĕssilăhăɣ iman-in dăr-s i-ad-umas a-s emăremar jeɣ-dăɣ, ad-iɣlĕs Măssinăɣ iyyăḍ dăɣ-săn. 23Jeɣ a-wen-dăɣ iket-net dăɣ-tĕssĕba n-Ălĕnžil i-ad-ĕjrĕwăɣ năkk-dăɣ ejădăr-in. 24Ajăn, wăr tĕssenăm a-s ăddinăt wi timšĕšijnen dăɣ-eɣărɣăr, ošalăn iket-dăɣ-năsăn măšan, iyyăn dăɣ-săn ɣas a madăn-ijrĕw ălhăk wa făll-igla azzal. Dăɣ-isălan wi n-immun, ašĕlăt kăwăneḍ-dăɣ i-ad-tĕjrĕwăm ălhăk-wen-dăɣ. 25Tĕssanăm a-s kăl-azzal, wăr t-illa arăkan d-asĕmănĕnnăḍ s-wădden tajjăn-t i-tiɣĕswen-năsăn i-ad-ănnehăḍăn dăɣ-snăt. Ǝntăneḍ-i išla a-wen-dăɣ, ălhăk wărăn-e ăhaj a dăɣ-săn ilkamăn, a-s ija a-wen năkkăneḍ, ălhăk wa mad-nĕjrĕw, afăl nĕjlăy dăɣ-azzal wa n-immun-nănăɣ, iɣlal. 26A-wen-dăɣ a făl năkk, ošalăɣ măšan, wădden azzal n-derhan n-iman-in ɣas a jeɣ s-tĕnnĕd ăwadĕm ănikăfnăkăfăn siha d-siha, wăr-issen a iha, năkk, wăr šĕšlĕyăɣ, 27ănnihăḍăɣ dăɣ-iman-in hullan, wăr-ĕlkemăɣ ɣas i-a-wa făll-i tărha taɣĕssa-nin, ănn-ak, Măssinăɣ a oyyeɣ a dăɣ-i ănnăhăḍ i-ad-ămašălăɣ erhet-net dăɣ-a-s ăksuḍăɣ ad-ăbas heɣ azzal-wen-dăɣ ḍarăt ălxuṭbăt wa jeɣ i-ăddinăt.

will be added

X\