1 Kăl-Kurĕnta 7

1Ămăra, ad-hawăn-dd-ăqqĕlăɣ isĕstanăn wi hi-jăm dăɣ-tăkarḍe ta hi-dd-tĕktăbăm. Dăɣ-a-wa ordeɣ, ufa ad-ăqqayĕm ăhalĕs wăr-ădobăn 2măšan, i-ad-wăr-itiḍĕw ăwadĕm dăɣ-asĕmmăḍĕs n-iman-net, hak ăhalĕs, ikrĕšet hănne-s, tĕkrĕšet daɣ hak tamăḍt ăhalĕs-net. 3Ăkfet ăhalĕs hănne-s ălxaqq wa fălla-s la, tăkfet daɣ tamăḍt ălxaqq wa fălla-s ila ăhalĕs-net. 4A-wen-dăɣ a ănihăjjăn făl-a-s, wădden tamăḍt a tănnihăḍăt dăɣ-taɣĕssa-net, ăhalĕs-net a dăɣ-s ănnihăḍăn; wădden daɣ ăhalĕs a ănnihăḍăn dăɣ-taɣĕssa-net, hănne-s a dăɣ-s tănnihăḍăt. 5Wăr-igăddălet wăl' iyyăn iman-net i-wa iyyăḍăn kunta wădden ad-tănimărḍăm s-a-wen i-hărăt n-ăzzăman i-ad-tĕkfĕm iman-năwăn i-tamădilt n-Măssinăɣ. A-wa săl a-wen, udaɣ făw, ad-igdĕl iyyăn iman-net i-amidi-net i-ad-wăr kăwăn-jămmăḍ tanămagiẓt, ijrĕw săr-wăn Iblis tašlĕlt s-kăwăn-ăžžurrăb, isiḍĕw-kăwăn dăɣ-abăkkaḍ. 6Măjrăd wa hawăn-in-jeɣ ămăra-dăɣ, ĕssĕyasa wădden alămăr. 7Ǝnnăr săr-i tăqqal năkk ɣas, iket-di, ănnăɣ i-e d t-illăm ăhalĕs ad-dăr-i alăh iba n-adubĕn măšan, hak ăwadĕm, wăr-e ăj ar a-wa dăr-t-ăskăllăf Măssinăɣ: ăwadĕm iyyăn, ijraw a-wa, a-s ija a-wen, iyyăn daɣ ijraw hărăt iyyăn săl wa ijrăw amidi-net. 8Ămăra, ăddinăt wi wăren ădobăn, ĕntăneḍ d-tinuḍăfen, ĕnneɣ-asăn: kunta ăddoben ad-ĕjĕn a-wa jeɣ, adiš, ăqqaymĕnet wăr-ădobănăn, ikna 9măšan, kunta hannăyăn a-s, wăr-ăddoben ad-ănnăhăḍăn dăɣ-iblis-năsăn, adiš dubĕnnet, ed ufa, ad-idubĕn ăwadĕm, uhĕn ad-t-ăj derhan-net dăɣ-a t-e-išĕkšĕn temse. 10Ăddinăt wi ădobănnen, omarăɣ-tăn, ănn-ak, Emăli a tăn-omarăn s-a-wen, wădden năkk, wăr băḍḍĕwet tamăḍt d-ăhalĕs-net, 11kunta daɣ făl-t, adiš wăr tilĕset adubĕn, tĕttăret ĕmmĕk s-tăt-dd-ăssoɣăl ăhalĕs-net; ăhalĕs daɣ ĕnta, wăr hin-itĕyyet hănne-s. 12Ăddinăt wi iyyăḍnen, ĕnneɣ-asăn, năkk daɣ a hasăn-ijannen, wădden Emăli: afăl ădobăn amumĕn tamăḍt wărăt tămoos tamumĕnt, wăr tăt-in-itĕyyet a tĕkkăs tărḍa s-taɣimit ɣur-s, 13kunta daɣ ădobăn ăhalĕs wărăn ămoos amumĕn tamumĕnt, wăr tăttăret tamumĕnt-en efel-net a ikkăs ăhalĕs-en irḍ'-as s-taɣimit ɣur-s, 14făl-a-s, tamăḍt-en, tăddoobăt ad-tumas ĕssĕbab wa t-madăn-ăj dăɣ-tabarăt n-Măssinăɣ, išdaj. Ăhalĕs daɣ wa n-amumĕn s-wăr tămoos hănne-s tamumĕnt, ăddoobăt ad-umas ĕssĕbab wa madăn-ăj hănne-s dăɣ-tabarăt n-Măssinăɣ. Afăl wăr jem a-wen, har tĕbḍăm, wăr mad-ărmĕsăn aratăn-năwăn zăbo olaɣăn. 15Jer-ăhalĕs wa wărăn omen wăla tamăḍt ta wărăt tomen, afăl ăbas irha iyyăn dăɣ-săn taɣimit ɣur-amidi-net, adiš, ijrĕwet-as tekle, dihen, wăr t-illa uḍlem iwarăn amumĕn wăla tamumĕnt ed Măssinăɣ-i hanăɣ-dd-iɣrăn s-iman-net, ălxer jer-iman-nănăɣ a-s hanăɣ-dd-iɣra. 16Kămm-i n-tamăḍt, ma tĕssanăd kunta wădden kămm a madăt-tumas i-ăhalĕs-năm ĕssĕbab wa s-t-mad-iɣlĕs Măssinăɣ? Kăyy daɣ-i n-ăhalĕs, ma tĕssanăd kunta wădden kăyy a madăn-umas ĕssĕbab wa s-mad-iɣlĕs Măssinăɣ hănne-k? 17Ḍarăt-a-wen daɣ, hak ăwadĕm-dăɣ, iṭṭĕfet tămudre ta t-ikfa Emăli, hak ăwadĕm, iṭṭĕfet tămudre ta iha a-s t-dd-iɣră Măssinăɣ s-iman-net; ĕnta-den-dăɣ a-wa săɣreɣ dăɣ-ălkănisăten iket-dăɣ-năsnăt. 18Kunta iyyăn dăɣ-wăn a-s dd-ătwăɣra, wăr-ămelăy, wăr-ităttăret ad-isĕmmilĕy iman-net; kunta daɣ kăyy a-s kăy-dd-iɣra Măssinăɣ tămelăyăd, adiš, wăr hak itumaset a-wen asăkor. 19Jer-amili wăla iba-net, wădden a-wen a infan hărăt, hărăt a t-infan, amišĕl n-alămărăn n-Măssinăɣ. 20Hak iyyăn dăɣ-wăn, iṭṭĕfet ĕmmĕk wa s-t-dd-iɣră Măssinăɣ s-iman-net. 21Kunta a-s kăy-dd-iɣră Măssinăɣ, akli a tămoosăd, wăr tămmujrăẓăd tumast-năk; măšan kunta ill'-e ĕmmĕk s-tĕjrăwăd iman-năk, ăj'-e. 22Akli daɣ wa dd-iɣră Emăli s-iman-net, ămoos elăll-net; wa n-elăll daɣ dd-iɣră Emăli s-iman-net, ămoos ămăra, akli n-Ălmasex. 23Wăr toyyem ăddinăt ăsikălen-kăwăn ed Emăli-i kăwăn-dd-iɣrăn s-iman-net i-ad-kăwăn-isĕddărfĕt, a ilan ălqim a-s kăwăn-ăslăllăt. 24Ayĕtma, hak iyyăn dăɣ-wăn-dăɣ, ăqqaymet dăɣ-ĕmmĕk wa s-t-dd-iɣră Măssinăɣ s-iman-net, ɣaymăt tĕlkamăm i-Măssinăɣ. 25Dăɣ-isălan n-timawaḍen ti wăren ĕzzey meddĕn d-ti s-kăla wăr-ădobănnăt, wăr ɣur-i t-illa alămăr hi-ikfa Emăli hasnăt, măšan, ad-kăwăn-sĕnnĕmhĕlăɣ dăɣ-isălan-năsnăt, ăjăɣ-awăn daɣ asĕnnĕmhĕl n-ăhalĕs ijrawăn ɣur-Măssinăɣ s-a-wa ijănna tidĕt, ed Măssinăɣ a dd-ifal a-wen. 26Ǝnta da a-wa hawăn-janneɣ: ordeɣ a-s dăɣ-tĕssĕba n-tirĕmmaɣ ti t-ĕllănen ămăra-dăɣ, ufa i-hak ăwadĕm-dăɣ, ad-ăqqayĕm dăɣ-taɣărha-ta-dăɣ-t-dd-iɣră Emăli. 27Ak kăyy, osaɣ-kăy hărăt d-tamăḍt? Wăr tĕtterăd amĕzzi. Ak kăyy, wăr kăy-oseɣ hărăt d-iyyăt? Adiš, wăr tĕtterăd adubĕn 28măšan, hakd a-wen-dăɣ, kud tădobănăd-dăɣ, wăr tofed abăkkaḍ; tămawaḍt daɣ ta wărăt tĕzzey meddĕn tăssofăt ad-tĕdubĕn, afăl ja a-wen, wăr tof' abăkkaḍ. A ărheɣ ad-tĕssanăm a-s tĕlkam tissust s-ăssofăɣ ad-kăwăn-ĕkkĕsăɣ dăɣ-taɣdărt-net i-ad-has-tăsidăwăm iket-di dd-tiḍĕw fălla-wăn. 29Ayĕtma, ajilal n-ăddunya a nĕha, a-wen-dăɣ a făl ɣur-ašăl-i-dăɣ, wa ădobănăn, idgĕẓet hullan dăɣ-ălxidmăt n-Emăli wa iha šund wăr-ădobăn, 30wa s-ăsninăn iman-net, idgĕẓet hullan dăɣ-ălxidmăt n-Emăli wa iha šund ɣas wăr t-illa a t-ijrawăn; wa ăsriwăn, idgĕẓet hullan dăɣ-ălxidmăt n-Emăli wa iha šund ɣas a-s wăr-iddĕwĕt; wa ižănšen, idgĕẓet hullan dăɣ-ălxidmăt n-Emăli wa iha šund ɣas wăr t-illa a ižănša; 31wi rabbăxnen dăɣ-ăddunya-ta-dăɣ, ĕjĕnet iman-năsăn šund a-s wăr t-illa a dăɣ-s ĕjrawăn ed ăddunya-ta-dăɣ d-a-wa tăt-ihăn, ilkam ad-t-iba. 32Wăr kăwăn-isărmaɣet hărăt. Idgĕẓet wa wărăn ădobăn dăɣ-hărătăn wi n-Emăli, wen ĕnta, a ităjj-dăɣ, ad-t-ăj i-ad-iẓĕjrĕẓ iman-net i-Emăli 33măšan, wa ădobănăn, hărătăn n-ăddunya-ta-dăɣ a dăɣ-idgaẓ, a ităjj-dăɣ, ad-t-ăj dăɣ-umaɣ n-ad-iẓĕjrĕẓ iman-net i-hănne-s, 34ad-ănimăntaš ĕnniyăt-net ebre n-hănne-s d-ebre n-Măssinăɣ. Ǝmmĕk-wen-dăɣ daɣ a-s tamăḍt wărăt tădobăn meɣ tămawaḍt wărăt tĕzzey meddĕn, tiɣĕswen-năsnăt d-ĕnniyătăn-năsnăt, ebre n-ălxidmăt i-Emăli ɣas a-s orakăn măšan, tamăḍt tădobănăt, wăr zĕnnĕzjumĕt ɣas ar dăɣ-ăddunya-i-dăɣ d-ĕmmĕk s-tĕẓẓĕjrăẓ iman-net i-ăhalĕs-net. 35A-wa hawăn-ĕnneɣ, tănfo-năwăn a dăɣ-hawăn-t-ĕnneɣ, wăr hawăn-ĕgdelăɣ adubĕn, ănn-ak, a ărheɣ, ad-tĕlkĕmăm i-Emăli s-ulh imdan, tĕjĕm tămudre wăr ih' anmĕntaš, tămudre, tăssiitbătăt tuksĕḍa-năwăn i-Măssinăɣ. 36Kunta inhăy abba n-talyaḍt elle-s har tokăy adubĕn har has-ămoos a-wen a ăsikărakăḍăn, kunta ijrăw ăddăbara s-tĕja elle-s ehăn, ăjet-as-t, wăr-ofa abăkkaḍ. 37Ăwadĕm wa irhăn adubĕn, idubĕnet măšan daɣ, afăl dd-inkăr abba innă, wăr t-ăšhăššăl ăwadĕm s-a-wen, a-s tăqqaymet elle-s wăla adubĕn, ăjet-as a-wa t-dd-ijjăšăn, ikna. 38Abba, wa irḍăn s-ad-tăj elle-s wărăt tĕzzey meddĕn ehăn, ija a iknan, wa ăqqimăn daɣ wăr-ăsdobăn elle-s, ija a ufăn a-wa ija-wĕnnin. 39Tamăḍt a ikkăs ăhalĕs-net iddar, wăr has-t-illa adubĕn iyyăn săl-wen-dăɣ ha, măšan, afăl t-ăba, idubĕnet-tăt ere wa s-tărha, tăjet ɣas a-wen s-ălmăɣna ilkamăn i-Emăli. 40Hakd a-wen-dăɣ, tĕnḍĕḍ i-tamăḍt ta tăqqimăt wăr toles adubĕn. Ǝnta-den-dăɣ măjrăd wa s-ărheɣ ad-hawăn-t-in-sĕssiwĕḍăɣ dăɣ-isălan-wi-dăɣ, ordeɣ daɣ a-s a-wa ĕnneɣ, iha erhet n-Unfas Šăddijăn n-Măssinăɣ iket-net.

will be added

X\