1 Kăl-Kurĕnta 6

1Ǝnd'-e-d-il' ălmăɣna n-a-s e-d iɣšăd iyyăn dăɣ-wăn hărăt i-ă/n/na-s, ad-ăyy-wen ălžămaɣăt wa n-imĕššeddĕjăn-i s-ăniihăjja ad-dăɣ-săn ăj isălan, ašĕl, isĕrrĕwrĕw-as s-ăššăreɣa wa n-inĕẓẓulam i-ad-has-ĕkkĕsăn tekăriḍt. 2Meɣ kăwăneḍ, wăr tĕssenăm a-s imĕššeddĕjăn a he-ĕšrăɣnen kăl-ăddunya-ta-dăɣ? Kunta daɣ dăɣ-tĕssĕba-nănăɣ năkkăneḍ-i-dăɣ a-s ilkam, ad-išrăɣ Măssinăɣ ăddinăt, mafăl hawăn-indar ad-tĕjrĕwăm ăddăbara jer-iman-năwăn i-hărăt wărăn făror. 3Ajăn wăr tĕssenăm a-s wăla ănjălosăn, ilkam ad-tăn-nĕšrăɣ ăb' ăṭṭăma n-ad-hanăɣ-indăr ad-nĕjrĕw ăddăbara i-talɣa wărăt făror jat făll-ărori n-ăkall-wa-dăɣ. 4Kunta ill'-e a ikkan jere-wăn, kăwăneḍ-i n-imumĕnăn, ma tattărăn isălan n-a-wen s-kăl-ăššăreɣa wăren oher hărăt d-ălkănisăt? 5Ăsikărakăḍ a-wa jăm, ɣas kăwăneḍ, ălžămaɣăt-năwăn imda, ăbă-dd dăɣ-s enĕsdebbăr iwar sărho ikkăn jer-ĕssin ă/n/natăn jer-ikka hărăt. 6Wăr kăwăn-ĕjrehăɣ! Ma n-ĕmmĕk n-ad-itišk iyyăn dăɣ-wăn i-amidi-net s-inĕẓẓulam, iɣaššăd isĕm-net. 7Ăyyăt-ahi ad-kăwăn-sĕlmĕdăɣ a-s uɣšad-wen-dăɣ toyyăm ikka jere-wăn, ĕnta a ăssiitbătăn iba n-iqqud-năwăn. Uhĕn kăwăneḍ, ma ja taẓidert-năwăn? Kunta iḍlăm-kăwăn ăwadĕm, ma hawăn-ikkasăn ad-fălla-s tĕṣbărăm? 8Ɣas, kăwăneḍ, tokăyăm-dd a-wen har ămăra-dăɣ, wăr t-illa ere s-wădden, issan s-iba n-iqqud-năwăn, kăwăneḍ-di-dăɣ a iwar uḍlem ed tihăɣăm ayĕtma-wăn. 9Ajăn wăr tĕssenăm a-s ăddinăt wi wăren oɣed, xăram-asăn ujĕš n-Tĕmmĕnĕya n-Măssinăɣ? Wăr săswadăt iman-năwăn: inămmăḍăsăn, imăṣṣănămăn, imĕzzĕna, meddĕn wi sasalahnen iman-năsăn d-tiḍeḍen, meddĕn wi tinmĕkkĕnen jer-iman-năsăn, 10imăkrăḍăn, kăl-taxărbĕnit, imăswan n-asmĕd, kăl-tinawen d-wi tihăɣnen, xăram-asăn ujĕš n-Tĕmmĕnĕya n-Măssinăɣ. 11Ǝntăneḍ-den-dăɣ hărătăn wi s-tăkkilem ibda, tamašalăn-tăn iyyăḍ dăɣ-wăn măšan, ašăl-i-dăɣ, tărridăm-dd dăɣ-a-wen, iššĕšdăj-kăwăn Măssinăɣ, ikf'-iwăn idĕm s-isĕm n-Emăli-nănăɣ Ɣisa Ălmasex s-tărna n-Unfas Šăddijăn n-Măssinăɣ-i hanăɣ-ilăn. 12Ǝjrawăɣ s-hărăt iket-net, măšan wădden hărăt iket-net a infan hărăt, wăr t-illa a-s wădden ĕjrawăɣ săr-s măšan, wăr-e ăyyăɣ hărăt wăl' iyyăn ănnihăḍ dăɣ-i. 13Iyyăḍ dăɣ-wăn, jannen: imĕnsiwăn, tăsa a takkăn, tăsa daɣ, imĕnsiwăn a-s dd-tăxlăk, tidĕt a-wen, măšan, ĕlmĕdăt a-s tăsa hakd imĕnsiwăn, ilkam ad-tăn-iba. Taɣĕssa, wăr tănhăjja d-ad-tăt-isamăḍas ăwadĕm ed taɣĕssa, ti n-Emăli, Emăli daɣ, i n-taɣĕssa, ĕnta a ilan s-ad-dăɣ-s ănnăhăḍ. 14Măssinăɣ daɣ-i dd-issĕnkărăn Emăli Ɣisa jer-inĕmmuttan, ĕnta daɣ a-s ilkam ad-hanăɣ-dd-isĕnkăr jere-săn s-tărna-net. 15Ajăn wăr tĕssenăm a-s taɣĕssa-năwăn, ašrut n-ta n-Ălmasex a tămoos? Ɣas ĕnd'-e-d-il' ĕmmĕk ad-iḍkĕl ăwadĕm ašrut la taɣĕssa n-Ălmasex, asăɣ-t d-taɣĕssa n-tălkăxbat? Xăša! 16Meɣ, ajăn, wăr tĕssenăm a-s ere ohărăn isĕftaɣ d-tălkăxbat, ămoos dăr-s tiyyăt taɣĕssa ed iktab a-s: "Ăhalĕs, afăl osăɣ d-tamăḍt, ămoosăn tiyyăt taɣĕssa." 17Ǝmmĕk-wen-dăɣ daɣ a-s ere ikfăn iman-net i-Emăli, ad-dăr-s ahăr iyyăn n-ĕnniyăt. 18Ayĕtma, jawăḍăt i-asĕmmăḍĕs n-iman-năwăn. Abăkkaḍ ămešăl ăwadĕm-dăɣ, wăr-oher hărăt d-taɣĕssa-net, măšan, ere isamăḍasăn iman-net, han-t iman-net. 19Meɣ ajăn, wăr tĕssenăm a-s taɣĕssa-năwăn ămăra, ĕnta a-s ehăn n-ămudd wa măqqărăn dăɣ-izzaɣ Unfas Šăddijăn wa kăwăn-ikfa Măssinăɣ, ikrăš-kăwăn, ăbas lam iman-năwăn. 20Ăsdărfăt-kăwăn Măssinăɣ s-ălqim măqqărăn, a-wen-dăɣ a făl, sĕmɣărăt-t dăɣ-ĕnniyăt-năwăn hakd-dăɣ tiɣĕswen-năwăn. ((Dăɣ-isălan n-a-wen-dăɣ a făl iktab a-s: Taɣĕssa hakd ĕnniyăt, i n-Măssinăɣ.))

will be added

X\