1 Kăl-Kurĕnta 5

1Ayĕtma! Ma ămoos erk ălxal wa fălla-wăn nĕsall? Ătiwăsla a-s ih'-iwăn ăwadĕm iṭṭafăn erk ălxal, erk ălxal s-kăla wăr-ătwăsla wăla jer-inĕẓẓulam, ed itawănna a-s ih'-iwăn ăhalĕs itihrĕn asĕftăɣ d-hănne-s n-ti-s. 2Ɣas kăwăneḍ, ija ɣur-wăn xorĕzzĕma ogdăhăn d-a-wen-dăɣ, uhĕn-dăɣ, hălăm ad-tabărajăm, ăniihăjja a-s iba a tĕṭṭăfăm, isnanăn iman-năwăn, tĕkkĕsĕm-in ăwadĕm wa ămešălăn tăkunt togdăhăt d-a-wen-dăɣ jere-wăn. 3Tidĕt, wăr t-ĕlleɣ ɣur-wăn măšan, a-wen wăr hin-ikkes a-s ham inĕzjam-in, ăwadĕm wa ămešălăn tăkunt-ten-dăɣ, ăru t-ĕssĕḍlămăɣ šund ɣas ĕlleɣ jere-wăn. 4Ămăra, žămmăɣăt s-isĕm n-Emăli-nănăɣ Ɣisa, tĕjĕm ɣas šund a-s năkk iman-in a t-illan jere-wăn, ad-fălla-wăn dd-izĕzzubbĕt Emăli-nănăɣ tărna-net, 5tĕjĕm dihen ăwadĕm wa ămešălăn tăkunt-ten-dăɣ dăɣ-ifassăn n-Iblis i-ad-umas a-s kud-dăɣ, tĕhlăk taɣĕssa-net, ašăl wa ilkămăn dd-mad-ass Emăli, ad-ijjĕš ălžănnăt. 6Tĕluše n-ibărajăn han-kăwăn! Ajăn wăr tĕssenăm a-s takmĕttet n-tăẓẓa ĕnḍărrăt a sakafăt ejel ăjjeen. 7Abăkkaḍ-wen-dăɣ, olăh d-tăẓẓa ta tărĕwăt, ĕkkĕsăt-t-in jere-wăn i-ad-tišdajăm šund a-wa ija ejel ăynayăn. Ălmasex a-s Faska-nănăɣ, ĕnta a hanăɣ-dd-ija Măssinăɣ Ašăɣol wa n-tenăšše n-ibăkkaḍăn. 8A-wen-dăɣ a făl, ažĕmmăɣ-nănăɣ, wăr-ija făll-tăẓẓa tărĕwăt, nĕbḍĕwet d-a-wa ărĕwăn lăbasăn hanăɣ-išlăn d-amsud, umaset ažĕmmăɣ-nănăɣ a ijan făll-tijĕlwen ti wăr ha tăẓẓa, a-wen ălmăɣna-net a-s, nĕnmĕnnet tidĕt jer-iman-nănăɣ s-ĕnniyăt šăddijăn. 9Dăɣ-tăkarḍe-nin ta săl ta-dăɣ, ĕktabăɣ-awăn-in a-s ĕbḍĕwăt iman-năwăn d-ere isamăḍasăn iman-net. 10A-s hawăn-in-ĕktăbăɣ a-wen, wăr-otesăɣ ɣas ăddinăt wi samăḍasnen iman-năsăn, wăla wi n-imărhan n-aẓrĕf, wăla wi tamašalnen taxărbĕnit, wăla wi n-imăkrăḍăn, wăla wi n-imăṣṣănămăn dăɣ-ăddunya-ta-dăɣ, ed dihen, ad-hawăn-iqqĕl ăššil, ad-tĕzjărăm ăddunya-ta-dăɣ. 11A hawăn-ĕnneɣ, ĕbḍĕwăt iman-năwăn, wăr sărtayăt hărăt d-ăwadĕm ijannen ămoos ă/n/na-wăn dăɣ-ăddin, a-s ija a-wen, isamăḍas iman-net, meɣ tĕšl'-e taxărbĕnit, meɣ ămoos emăṣṣănăm, meɣ ăgg-ănnămima, meɣ emăsăw n-asmĕd, meɣ itihăɣ; ăwadĕm itamašalăn hărătăn-win-dăɣ, wăr dăr-s toherăm wăla ăkoss. 12Wădden năkk a iwar asĕḍlam n-ăddinăt wi n-ajăma wăren ĕzzey Măssinăɣ, Măssinăɣ a-s ilkam ad-tăn-išrăɣ măšan, ălmăssexităn wi hănen ammas n-ălkănisăt, kăwăneḍ a iwar ad-tăn-tăɣtĕlăm, sĕssiɣĕdăm-tăn. 13Ăddinăt wi n-ajăma wăren ămoos ălmăssexităn, Măssinăɣ a-s ilkam ad-tăn-išrăɣ, isĕḍlĕm-tăn, măšan, kăwăneḍ, innă ĕlkĕttab n-Măssinăɣ: "Ǝkkĕsăt enăllăbăs jere-wăn."

will be added

X\