1 Kăl-Kurĕnta 4

1Ayĕtma-ɣ, năkkăneḍ-i n-inĕmmušal, eklan n-Ălmasex a nămoos, ikf'-anăɣ Măssinăɣ turhajăt n-ad-năwwăkkăl ĕddăraj wa s-dd-ăsnăfalăl ălmăɣna-net. 2Ămăra, ăddinăt ăwwikkălnen hărăt, wăr t-illa a dăɣ-săn ătiwărhăn a săl iqqud dăɣ-a-wa ăɣlăfăn. 3Dăɣ-a-wa hi-dd-iqqălăn, wăr-ăkkulăɣ dăɣ-a-wa dăɣ-i jannem kăwăneḍ, wăla dăɣ-a-wa dăɣ-i jănnen ăddinăt wi iyyăḍnen, wăr-ĕdgeẓăɣ dăɣ-almud n-ak, a-wa făll-i itawănnen i olaɣăn meɣ i lăbasăn. 4Wăr t-illa a dăɣ-ĕššakăɣ iman-in, hakd a-wen-dăɣ, wădden a făll-i ikkasăn uḍlem, Emăli a-s emĕššerrăɣ-in. 5A-wen-dăɣ a făl hawăn-janneɣ, wăr tăswărăm ăwadĕm wăl' iyyăn uḍlem a ikkăs ăzzăman n-a-wen wăr dd-iwweḍ. Ăyyăt a-wen i-ašăl wa dd-mad-ass Emăli-i he-ijĕn ănnur-net făll-a-wa tăjjăn ăddinăt dăɣ-tihay, isĕnnĕfilĕl-dd a-wa ihăn ulhawăn n-ăddinăt. Ašăl-en, hak ăwadĕm, ad-ijrĕw ɣur-Măssinăɣ tĕmmal ta dăr-ănihăjja. 6Ayĕtma-ɣ, ĕḍkălăɣ-awăn-dd isălan-in năkk d-Ăbbăloš i-ad-umas a-wen ălmital wa s-kăwăn-safhamăɣ a-s: "Wăr ităkket ăwadĕm wăl' iyyăn jĕnnĕj a-wa ĕnnăn ĕlkĕttabăn n-Măssinăɣ." A-wen-dăɣ a făl wăr-ităbărajet wăl' iyyăn dăɣ-wăn dăɣ-tĕnna n-a-s ăssof iyyăn dăɣ-năɣ amidi-net. 7Kăyy daɣ-i itabărajăn s-a-wen, ma led wăr len ăddinăt wi iyyăḍnen? Ma led făw s-wădden Măssinăɣ a hak-t-ikfăn? Šămad daɣ a-wa led iket-net, Măssinăɣ a hak-t-ikfăn, adiš ma dăɣ-tabărajăd šund a-s wădden Măssinăɣ a kăy-ikfăn. 8Ayĕtma, kăwăneḍ ya, ăru d-tĕyyĕwănăm, tărzăɣăm, tĕssĕntăm făw tĕmmĕnukĕla, ăbas săr-năɣ tămiɣatărăm. Kunta tidĕt-dăɣ a-s tămnakălăm, tanĕmmirt, adiš, nahret dăr-wăn tĕmmĕnukĕla-ten-dăɣ. 9Năkkăneḍ-i n-inĕmmušal, s-tĕnnĕd, ij'-anăɣ Măssinăɣ adday n-ăddinăt, nolăh d-ăddinăt s-ăru d-tăɣtăs tamăttant-năsăn, nămoos i-ăddinăt hakd ănjălosăn taliwen dăɣ-sabăryaḍăn. 10Nămoos ăddinăt wăren ĕjreh hărăt dăɣ-tĕssĕba n-isĕm n-Ălmasex, măšan kud-dăɣ wăr nĕjreh hărăt, kăwăneḍ ya tĕmdam, tăssorhem dăɣ-tassaɣt ta jăm d-Ălmasex; nĕbrar, nătiwălkăh măšan, kăwăneḍ tămoosăm imĕṣṣuha, ăssimɣărăn-kăwăn ăddinăt. 11Har ămăra-dăɣ, isimnĕnniḍ-anăɣ laẓ d-fad, irmas-anăɣ ɣĕllĕl, nĕjarrăw tiwit, nămitănjăr siha d-siha, 12hak ašăl tĕffay tide-nănăɣ făl ĕṣṣuhu n-ălxidmăt wa nĕha s-ifassăn-nănăɣ i-ad-nĕkkĕs aɣăna făll-iman-nănăɣ. Wi hanăɣ-gaggărnen, nĕlaqqăn-asăn iman-nănăɣ, wi hanăɣ-ɣazzăbnen, nĕšammăr-asăn, 13wi ɣaššădnen ismawăn-nănăɣ, nĕẓaẓad-asăn măjrăd; nămoos ɣas dat-ăddinăt šund ănnikal hin-ifarrăḍ ăwadĕm, har ămăra-dăɣ, wăr t-illa ere hanăɣ-ăssifrărăn. 14Ayĕtma, wăr hawăn-in-ĕktebăɣ isălan-wi-dăɣ i-ad-kăwăn-sĕkmoɣ iman, wăla i-ad-kăwăn-sĕkkurĕkĕḍăɣ, ănn-ak, ăddăbaratăn šund wi ităjj abba isamătarăn mĕddana-s a hawăn-in-tajjăɣ, ed tidĕt-dăɣ a-s, aratăn ĕkneɣ tărha a tămoosăm. 15Ămăra, kud-dăɣ lam măraw afḍăn n-imăsăɣran kăwăn-saɣranen isălan n-Ălmasex, iyyăn n-abba a lam, năkk a t-ămoosăn ed năkk a kăwăn-in-ăssawăḍăn isălan n-Ălĕnžil-i kăwăn-osaɣăn d-Ălmasex. 16A-wen-dăɣ a făl, ăsimătărăɣ-kăwăn d-ad-hi-tăttălălăm. 17Dăɣ-isălan n-a-wen-dăɣ a făl săr-wăn-in-ăšmašălăɣ Timoti-i n-rure-ɣ ĕkneɣ tărha, iɣdal hullan dăɣ-alkum-net i-Emăli, afăl kăwăn-in-osa, ad-kăwăn-dd-isĕktĕw tašniwen ti s-ĕlkamăɣ i-Ɣisa Ălmasex d-ĕmmĕk wa s-tănăt-salmadăɣ i-ălkănisăten iket-dăɣ-năsnăt. 18Iyyăḍ dăɣ-wăn ordan a-s wăr-ilkem ad-kăwăn-in-ăqqalăɣ, itajj dăɣ-săn a-wen-dăɣ aḍu, 19ănset ĕnniyăt-năwăn, kunta irḍa Măssinăɣ s-a-wen, ad-kăwăn-in-ăkkăɣ šik, dihen ăddinăt wi ɣur-ija a-s wăr-ilkem ad-kăwăn-in-ăqqalăɣ, ad-ĕnhĕyăɣ a-wa ăddoben 20făl-a-s Tĕmmĕnĕya n-Măssinăɣ, Măssinăɣ a tăt-isatbatăn dăɣ-imojjan-năwăn wădden tăẓude n-măjrăd d-milɣaw n-ilĕs. 21Ma tărham daɣ ămăra? Ak ma tăssofăm ad-kăwăn-in-ăkkăɣ ăwwayăɣ tăborit meɣ ad-kăwăn-in-ăkkăɣ d-ĕnniyăt ăẓedăn?

will be added

X\