1 Kăl-Kurĕnta 3

1Ayĕtma-ɣ, a-wa hawăn-janneɣ, wăr hawăn-t-jĕnneɣ s-ĕmmĕk wa s-t-mad-ănnăɣ i-ăddinăt dăɣ-ănniihăḍ Unfas Šăddijăn, ănn-ak, jeɣ-awăn-in măjrăd wa mad-ăjăɣ i-ăddinăt ĕglanen făll-derhan n-iman-năsăn, ed ija ɣur-i a-s dăɣ-isălan-wi-dăɣ n-immun, tămoosăm aratăn hărwa. 2A-wen-dăɣ a făl măjrăd wa hawăn-in-tajjăɣ, ămoos săr-i a-s šund axx, wădden imĕnsiwăn ăẓẓaynen, ed wăr tăddobem alămaẓ-net, ălwăxla a-s hannăyăɣ a-s har ašăl-i-dăɣ, wăr has-tăddobem hărăt, ed wădden Unfas Šăddijăn a dăɣ-wăn ănnihăḍăn. 3Kăwăneḍ daɣ har ămăra-dăɣ, wăr t-illa a kăwăn-iẓlayăn d-inĕẓẓulam ed hak iyyăn dăɣ-wăn, osam făll-amidi-net, kannăsăm jer-iman-năwăn. Ǝntăneḍ-den-dăɣ hărătăn wi kăwăn-ĕšlanen ăsidăttătnen a-s wăr tĕẓleyăm d-ăddinăt ĕglanen făll-derhan n-iman-năsăn. 4Wădden, afăl dd-iggăd iyyăn dăɣ-wăn ad-ijanna: "Năkk Bulĕs a-s ĕlkamăɣ", ijann'-as wa iyyăḍăn: "Aa făw, năkk Ăbbăloš a-s ĕlkamăɣ", ajăn wădden ĕnta-den-dăɣ a wa ăsidătten a-s tĕṭṭafăm ălxal n-ăddinăt ĕglanen făll-derhan n-iman-năsăn. 5Uhĕn Ăbbăloš-i-dăɣ făw, mi ămoos? Năkk daɣ Bulĕs, mi ămoosăɣ? Ǝnhĕywăt! Năkkăneḍ, wăr nămoos ɣas ar inaxdimăn n-Măssinăɣ hawăn-dd-ija ĕssĕbab i-ad-kăwăn-in-nĕsĕssiɣĕd isălan n-immun săr-s, wăr hanăɣ-iha daɣ ere s-wădden a-wa itamašal iket-net, Emăli a t-ikfăn turhajăt n-amišĕl-net. 6A-wa ămešălăɣ, olăh ɣas d-ahĕšk s-năkk a t-ăddomen, ăddomeɣ-t măšan, Ăbbăloš, a t-issĕswăn, issĕdwăl-t-dd Măssinăɣ. 7A-wen-dăɣ a făl wa ăddomen hakd wa issĕswăn, wăr-ămoosăn wăla, ănn-ak Măssinăɣ-i dd-issĕdwălăn a-s hărăt. 8Wa ăddomen hakd wa issĕswăn, wăr t-illa a-s ănimajărăn ed hak iyyăn dăɣ-săn, ad-t-ăkf Măssinăɣ ălxaqq n-tide-net. 9Iket-nănăɣ, Măssinăɣ a dăr-nănniixdăm, kăwăneḍ a-s ašĕkrĕš-net wa dăɣ-ixdăm, kăwăneḍ daɣ a-s ehăn-net wa itĕdday. 10Dăɣ-a-wa hi-dd-iqqălăn năkk, ikf'-ahi Măssinăɣ ănnuɣmăt n-ad-alăhăɣ d-ălbănna n-emăssărho issanăn ălxidmăt-net, ĕkneɣ asĕns n-ăssas n-ehăn, osă-dd ḍar'-i ălbănna iyyăn, ikrăs fălla-s. Hakd a-wen-dăɣ, ĕnta da a-wa dăr-kăwăn-ăsimătărăɣ: hak ăwadĕm-dăɣ, ăjet ĕnniyăt i-ĕmmĕk wa s-itĕdday făll-ehăn-en 11ed wăr t-illa ere ăddoben asĕns n-ăssas săl wa s-išwăr insă, a-wen a t-ămoosăn Ɣisa wa n-Ălmasex. 12A-wen-dăɣ a făl ăssas-en, jer-ikras fălla-s ăwadĕm s-orăɣ wăla s-aẓrĕf wăla s-timăɣwanen ti n-tilăllaten lănen ălqim, wăla s-isăɣerăn wăla s-alĕmmoẓ wăla s-ajăbăl, 13hak ăwadĕm-dăɣ, ilkam ad-dd-infilĕl a-wa ămešăl ed, ad-t-dd-isĕffukkăr ašăl wa ilkămăn făl-a-s ašăl-en, ăhijăljăl efew wa išăšdajăn hărăt iket-net i-ad-dd-infilĕl a-wa ămešăl hak ăwadĕm. 14Wa s-dd-ăqqimăn ijităn-net, wăr tăn-ikša efew, ad-ijrĕw ălhăk-net, 15wa s-ikša efew ijităn-net, ad-ifut. Tidĕt, ad-iɣlĕs măšan, ad-alăh ĕlɣĕllas-net d-i n-ere făll-intăs efew, iɣlăs-dd dăɣ-s. 16Ajăn, wăr tĕssenăm a-s kăwăneḍ a-s ehăn n-ămudd wa šăddijăn n-Măssinăɣ? Izzaɣ Unfas Šăddijăn dăɣ-ulhawăn-năwăn. 17Ǝlmĕdăt a-s ere ăsmăḍăsăn meɣ ere iɣšădăn ehăn n-ămudd-en-dăɣ, ad-t-ihlĕk Măssinăɣ făl-a-s ehăn n-Măssinăɣ, šăddiij. Ehăn-en daɣ, kăwăneḍ a t-ămoosăn. 18Wăr dăɣ-wăn ităkărraset wăl' iyyăn iman-net, i dăɣ-wăn ordăn iman-net tayĕtte s-timtăr ti făll-tĕgl' ăddunya, ăsimătărăɣ-t d-ad-ăj iman-net enĕbbeddĕl i-ad-t-ăkf Măssinăɣ tayĕtte ta n-tidĕt 19făl-a-s, musnăt wa tăttilăl ăddunya, ĕbbuddĕl dat-Măssinăɣ. A-wen-dăɣ a făl iktab dăɣ-ĕlkĕttab n-Măssinăɣ a-s: "Imusănăn n-ăddunya-ta-dăɣ, tikărras-năsăn a-s tăn-irammăs Măssinăɣ." 20Iktab daɣ a-s: "Issan Emăli a-wa ihăn inĕzjam n-imusănăn n-ăddunya-ta-dăɣ, musnăt-năsăn, wăr săr-s iẓley d-ăho ăhohăn." 21Ayĕtma, wăr tăjjăt fella-năwăn dăɣ-ăwadĕm wăl' iyyăn băršeɣ ad-jannem: ĕlkamăɣ i-măndam wa wăla wa, ed wăr t-illa făw a-s wădden, ikf'-awăn-t Măssinăɣ, 22jer-năkk Bulĕs, wăla Ăbbăloš, wăla Bĕṭrus wăla ăddunya wăla tămudre, wăla tamăttant, a-wa t-illăn ămăra-dăɣ hakd a-wa ilkămăn. A-wen-dăɣ iket-net, i-năwăn, 23măšan, kăwăneḍ, il'-iwăn Ălmasex, Ɣisa Ălmasex ĕnta, i n-Măssinăɣ.

will be added

X\