1 Kăl-Kurĕnta 15

1Ayĕtma-ɣ, ărheeɣ ămăra ad-kăwăn-dd-sĕktoɣ a-s Ălĕnžil wa s-hawăn-jeɣ isălan-net, tomănăm săr-s, tĕṭṭăfăm-t, iṭṭaf daɣ tămudre-năwăn hak ašăl, 2Ălĕnžil-en, ĕnta a-s ĕssĕbab n-ĕlɣĕllas-năwăn afăl has-jăm uḍĕf s-ĕmmĕk-wa-dăɣ s-hawăn-t-in-ăssawăḍăɣ, afăl wăr has-jem a-wen, ad-umas immun-năwăn, i n-bănnan. 3Ayĕtma-ɣ, a-wa ăɣreɣ a kăwăn-ĕssăɣrăɣ năkk-dăɣ. A-wa kăwăn-ĕssăɣrăɣ daɣ, eɣăf-net da: Inn'-anăɣ ĕlkĕttab n-Măssinăɣ a-s Ălmasex, ămmut dăɣ-tĕssĕba n-ibăkkaḍăn-nănăɣ; 4inn'-anăɣ daɣ ĕlkĕttab n-Măssinăɣ a-s ijjăš aẓĕkka măšan, ašăl wa s-kăraḍ ḍarăt tamăttant-net, inkăr-dd jer-inĕmmuttan, 5issĕknă iman-net i-Bĕṭrus, ḍara-s inĕṭṭulab wi n-măraw d-ĕssin, 6ḍara-săn ĕntăneḍ, issĕknă iman-net i-imumĕnăn okăynen sĕmmosăt timaḍ n-ăwadĕm s-tĕššĕm-năsăn, tĕddar kud-dăɣ aɣil-năsăn iyyăn, ăba-t, 7ḍara-săn, issĕknă iman-net i-Yaqub, tĕzzar ĕnhăyăn-t daɣ inĕmmušal iket-năsăn. 8Ḍăra-săn iket-dăɣ-năsăn, ănfalăl-ahi-dd năkk-dăɣ Bulĕs, năkk-i n-aɣri 9ed, năkk a-s wa ĕnḍărrăn n-ajijal dăɣ-inĕmmušal, wăr-ănhăjjăɣ făw d-ad-itwĕnn năkk ănămmašul făl tĕmɣăre n-ălɣizabăt-i-dăɣ ĕssĕknăɣ ălkănisăt n-Măssinăɣ. 10Măšan, a-wen, wăr hin-ikkes a-s, Măssinăɣ a hi-ijăn dăɣ-ănnuɣmăt-net a-wa ămoosăɣ ašăl-i-dăɣ, ănnuɣmăt daɣ wa făll-i ija, wăr hin-inɣel bănnan, ed, ašăl-i-dăɣ, ăddoobeɣ ad-ănnăɣ a-s ojărăɣ inĕmmušal iket-năsăn ălxidmăt măšan, ălxidmăt-en, wădden năkk a t-ijăn, ănnuɣmăt n-Măssinăɣ-i dăɣ-i ixdămăn a t-ijăn. 11Jer-năk wăla inĕmmušal wi iyyăḍnen, hărăt iyyăn a hawăn-năxṭăb, ĕnta-den-dăɣ daɣ a-wa s-tomănăm. 12Kunta năkkăneḍ nĕnn'-awăn a-s Ălmasex, inkăr-dd jer-inĕmmuttan, adiš ma isawănnen iyyăḍ dăɣ-wăn a-s wăr tĕlkem tanăkra jer-inĕmmuttan? 13Kunta tidĕt-dăɣ a-s wăr t-tĕlla tanăkra jer-inĕmmuttan ašăl ilkămăn, adiš Ălmasex-dăɣ, wăr dd-inker jere-săn. 14Kunta daɣ Ălmasex wăr dd-inker jer-inĕmmuttan, adiš ălxuṭbat-nănăɣ, taxxalen ɣas, wăr t-illa a infa, adiš, immun-năwăn daɣ săr-s, wăr t-illa a infa. 15Kunta inĕmmuttan wăr-ilkem ad-dd-ĕnkarăn, adiš, terk tijuhawen a nămoos, nĕnnă bahu ed nĕnnă issĕnkăr-dd Măssinăɣ Ălmasex jer-inĕmmuttan, a-s ija a-wen, wăr t-dd-issĕnkăr jere-săn. 16Afăl ɣas inĕmmuttan, wăr dd-nĕkkărăn dăɣ-tamăttant, adiš, Ălmasex daɣ, wăr dd-inker jere-săn. 17Kunta daɣ Ɣisa Ălmasex, wăr dd-inker jer-inĕmmuttan, adiš immun-năwăn săr-s, wăr infa hărăt ed tĕnsam hărwa daw-ăẓuk n-ibăkkaḍăn-năwăn. 18Kunta daɣ a-wa tordăm tidĕt, adiš, wi s-a-s tăn-ăba-dăɣ omanăn s-Ălmasex, adiš ăba-tăn bănnan, wăr hasăn t-illa ăṭṭăma wăl' iyyăn. 19Kunta daɣ ăṭṭăma-nănăɣ wa nĕjăr dăɣ-Ălmasex, imdă-dd dăɣ-ăddunya-ta-dăɣ ɣas, adiš, imĕskay năkkăneḍ dăɣ-dăgg-adĕm, wăr t-illa ere hanăɣ-ojărăn tĕla n-tăhanint. 20Ayĕtma-ɣ, Ălmasex, tidĕt-dăɣ a-s inkăr-dd jer-inĕmmuttan, ĕnta a dd-issĕnkăr Măssinăɣ s-tizarăt i-ad-hanăɣ-isĕflĕs a-s inĕmmuttan wi iyyăḍnen, ilkam ĕntăneḍ-dăɣ ad-dd-ĕnkărăn. 21Ǝmmĕk-wa-dăɣ s-ăhalĕs iyyăn ad-dd-orăwăn tamăttant s-dăgg-adĕm iket-năsăn, ĕmmĕk-wen-dăɣ daɣ, a-s ăhalĕs iyyăn-dăɣ ɣas ad-dd-orăwăn a-s tĕlkam tanăkra n-ăddinăt iket-năsăn jer-inĕmmuttan. 22Dăgg-adĕm, tĕlkam dăɣ-săn tamăttant iket-năsăn ed Adĕm ad-dd-ĕzjarăn iket-dăɣ-năsăn; ĕmmĕk-wen-dăɣ daɣ a-s mad-ĕjrĕwăn ăddinăt iket-năsăn wi ărtăynen d-Ălmasex tămudre tăynayăt tăɣlalăt. 23Ămăra, tanăkra n-inĕmmuttan, ad-tăj s-emăzezar: Ălmasex a dd-inkărăn s-tizarăt jer-inĕmmuttan i-ad-umas ăḍḍimmana i-ăddinăt wi has-ĕlkămnen, ḍara-s, ad-dd-ĕnkărăn ăddinăt wi săr-s omănnen, win, tanăkra-năsăn, ad-tăj ašăl wa dd-mad-iqqĕl Ɣisa. 24Ɣur-a-wen-dăɣ, ad-mad-tĕmdĕw ăddunya. Ălwăqq-wen-dăɣ ad-mad-isuk Ɣisa Iblis ăkall ĕnta d-a-wa ila dăɣ-alšinăn d-tărna d-ăṣṣahăt, ăkf dihen Tĕmmĕnĕya iket-net Abba Măssinăɣ. 25Ɣisa, ăhhuuššăl ad-iṭṭaf Tĕmmĕnĕya hundăɣ har ăj Măssinăɣ išĕnja-net daw-iḍarăn-net, ikrĕš fălla-săn ašăl. 26Ašănjo-net wa s-mad-išrĕy, tamăttant 27făl-a-s, iktab dăɣ-ĕlkĕttab n-Măssinăɣ a-s: "Ikf'-e Măssinăɣ ašăl făll-hărăt iket-net." Tidĕt, Măssinăɣ ija hărăt iket-net daw-iḍarăn n-Ălmasex, măšan, kunta ija Măssinăɣ hărăt iket-net daw-iḍarăn n-Ɣisa, Măssinăɣ ĕnta iman-net, wăr-iha hărătăn wi mălnen daw-iḍarăn n-Ɣisa. 28Afăl ija Măssinăɣ e d t-illăm hărăt daw-iḍarăn n-Ălmasex, dihen, Ɣisa iman-net a madăn-ăj iman-net daw-tanhaḍt n-Măssinăɣ i-ad-titbat tĕmmĕnukĕla n-Măssinăɣ făll-e d t-illăm hărăt d-e d t-illăm ăgg-adĕm. 29Zĕnnĕzjumĕtăt ɣas dăɣ-măjrăd-wa-dăɣ: kunta wăr tĕlkem tanăkra dăɣ-inĕmmuttan, adiš ăddinăt wi titwĕsĕlmiɣnen dăɣ-tĕssĕba n-tasăktot n-ayĕtma-săn wi ăba, ma s-tăn-išillĕw a-wen a-s ĕssănăn a-s wăr tĕlkem tanăkra jer-inĕmmuttan? Ma tordam, mafăl šalḍašăn iman-năsăn? 30Uhĕn kunta inĕmmuttan-i-dăɣ, wăr dăɣ-săn tĕlkem tanăkra, adiš, năkkăneḍ-i-dăɣ, ma dăɣ-nĕdgaẓ, nĕtajjăš hak ašăl miši bănnan-bănnan? 31Hak ašăl, ĕkkeɣ edes i-tamăttant. Ayĕtma-ɣ, a-wa hawăn-jănneɣ ija ĕddĕttu-wa-dăɣ făl kăwăneḍ a-s mad-ăbbărăjăɣ dat-Ɣisa Ălmasex-i n-Emăli-nănăɣ. 32Kunta năkk erhet n-dăgg-adĕm ɣas a-s ĕlkamăɣ, wăr hi-t-illa ăṭṭăma n-a-s tĕlkam tanăkra jer-inĕmmuttan, adiš ma s-hi-infa akĕnnas wa jeɣ d-iwăɣsan dăɣ-aɣrĕm wa n-Ifăsus? Šămad wăr tĕlkem tanăkra jer-inĕmmuttan, adiš, "Năkšet, năswet ed ašĕkka, wăr dăɣ-năɣ ilkem ar tamăttant." 33He kăwăneḍ, wăr tĕssĕswădăm iman-năwăn! "Erk amidi jed, ad t-tumasăd." 34Iqqĕlet-kăwăn-dd ĕnniyăt, ĕbḍĕwăt d-abăkkaḍ ed a-wen-dăɣ a ăniihăjjăn făll-ăddinăt ăksuḍnen Măssinăɣ. Tidĕt-dăɣ a-s han-kăwăn ăddinăt wăren ĕzzey Măssinăɣ, a-wen janneɣ-awăn-t i-ad-dăɣ-wăn ăjăɣ tasăja. 35Ǝssanăɣ a-s măjrăd-wa-dăɣ, afăl has-ĕslăn iyyăḍ, ad hi-ĕnnĕn: "Ǝndek ĕmmĕk wa s-mad-dd-ĕnkărăn inĕmmuttan? Ma dăr-mad-talăh taɣĕssa ta dar-mad-dd-ĕnkărăn?" 36Iba n-tayĕtte yaden! Ajăn wăr tĕssenăd a-s afăl tăddomed tablalt ămăra-dăɣ, wăr-ilkem ad-hak-dd-tăssidwăl ar s-ad-tămmăt tĕzzar. 37A-wa mad-tĕddumud, wădden ĕnta a dd-madăn-idwĕl, jer-tablalt n-ălkăma wăla tiyyăt n-allonăn wi iyyăḍnen, tablalt-net ɣas a tăddomed wădden ahĕšk-net iket-net a tăddomed. 38Hakd a-wen-dăɣ, tablalt-ten-dăɣ tăddomed, ad-tăt-ăkf Măssinăɣ turhajăt n-ad-dd-sĕdwĕl a-wa s-irha s-ad-t-dd-sĕdwĕl, hak ădomm-dăɣ, ikf'-e ĕẓẓĕnĕf-net. 39A-wa iwărăn ărori n-ăkall, wăr-oleh tiɣĕswen iket-net, taɣĕssa ta n-dăgg-adĕm, tĕẓlay d-ta n-irĕzzejăn, tĕẓlay d-ta n-igḍaḍ, tĕẓlay d-ta n-imănan. 40Ǝmmĕk-wen-dăɣ daɣ a-s t-ĕllanăt tiɣĕswen n-hărătăn wi ĕllăynen dăɣ-išĕnnawăn d-tiɣĕswen n-hărătăn wi wărnen ărori n-ăkall; tĕssanăm a-s hărătăn wi ĕllăynen dăɣ-išĕnnawăn, wăr olehăn d-wi rajjăšnen făll-ărori n-ăkall. 41Asmăqqi wa n-tăfukt, iẓlay d-tĕmĕlle n-ewăr, tăfukt d-ewăr daɣ, asmăɣmăɣ-năsăn, iẓlay d-wa n-etran; etran iman-năsăn, ĕllan-t iyyăḍ ojărnen imidiwăn-năsăn asmăɣmăɣ. 42A-wen-dăɣ a dăr-tolăh tanăkra jer-inĕmmuttan. A-s tajjăšăn ăddinăt aẓĕkka, olăhăn d-tablalt ăddomăt ăwadĕm, ad-tĕnbĕl, tămmăt tĕzzar. Afăl dd-tăsfăqqăt, tĕdwăl, ăbas dăɣ-s ilkam mărkăhaw, inĕmmuttan daɣ a-s dd-mad-ĕnkărăn, wăr fălla-săn tĕla tamăttant tărna. 43A-s tajjăš tablalt ider n-ăkall, wăr făror, wăr t-illa ere fălla-s issanăn; inĕmmuttan daɣ a-s tajjăšăn aẓĕkka, wăr t-illa ăṣṣahăt tăn-ihan măšan, a-s dd-mad-ĕnkărăn, ĕḍnayăn ăṣṣahăt šund tablalt-ten-dăɣ s-ad-dd-tifăqqut, la mănhoy. 44Enĕmmettĕn, a-s itajjăš aẓĕkka, ămoos tafĕkka wăr-iha unfas măšan, a-s dd-mad-inkăr, ih'-e unfas. Ǝmmĕk-wa-dăɣ s-ĕllanăt tiɣĕswen iha unfas wa tănăt-ăssodărăn, ĕmmĕk-wen-dăɣ daɣ a-s mad-ĕmĕlnăt tiɣĕswen ăssodăr Unfas Šăddijăn n-Măssinăɣ. 45Dăɣ-isălan n-a-wen-dăɣ făw a făl innă ĕlkĕttab n-Măssinăɣ a-s: "Adĕm a-s ăhalĕs wa dd-ixlăk Măssinăɣ s-tizarăt, ixlăk-t-dd ɣas, ija dăɣ-s Măssinăɣ unfas, ămoos ăwadĕm han iman" măšan, Ɣisa-i n-Adĕm wa dd-išrăyăn, Unfas Šăddijăn-i ihakkăn tămudre a t-ikfăn tămudre. 46Wădden taɣĕssa ta tăynayăt ihăkk Unfas Šăddijăn a dd-tăzzarăt, ănn-ak taɣĕssa ɣas ta ikarrăš ăgg-adĕm a dd-tăzzarăt, tĕlkăm-as ḍarăt a-wa taɣĕssa ta tăynayăt ihăkk Unfas Šăddijăn. 47Adĕm-i dd-ăzzarăn făll-ărori n-ăkall, ăẓarĕẓ n-ăkall a dăɣ-dd-ikna; ij'-e a-wen ere ila ărori n-ăkall-i-dăɣ măšan, Ɣisa-i n-ăhalĕs wa iyyăḍăn, išĕnnawăn a dd-ifăl. 48Ăddinăt wi wărnen ărori n-ăkall, olăhăn d-ere wa tăn-dd-ăshăyăwăn dd-iknăn dăɣ-ăẓarĕẓ n-ăkall măšan, ăhalĕs wa dd-ifălăn išĕnnawăn, ăddinăt wi ila ĕkkănen ălžănnăt, ăhhuuššăl ad-dăr-s alăhăn ĕnta-en-dăɣ dd-ifălăn išĕnnawăn. 49Ǝmmĕk daɣ wa-dăɣ a-s ămăra-dăɣ, nolăh d-ere wa hanăɣ-ăshăyăwăn dd-iknăn dăɣ-ăẓarĕẓ n-ăkall, ĕmmĕk-wen-dăɣ daɣ a-s ilkam dăɣ-năɣ ad-nalăh năkkăneḍ d-ere wa dd-ifălăn išĕnnawăn. 50Ayĕtma, ĕlmĕdăt a-wa ihălăn ebre n-taɣĕssa d-ašni, wăr-e ikus Tĕmmĕnĕya n-Măssinăɣ ed taɣĕssa-ta-dăɣ, tĕlkam dăɣ-s tamăttant, ăywa, a dăɣ-tĕlkam tamăttant, wăr mad-ijjĕš tămudre ta tăɣlălăt dd-malăt. 51Ǝnta da ĕddăraj wa s-kăwăn-salmadăɣ: wădden iket-dăɣ-nănăɣ a maden-ĕnhĕy eḍĕs wa n-tamăttant, ănn-ak, ad-ĕmmuttĕynăt tiɣĕswen-nănaɣ iket-dăɣ-nănăɣ. 52A-wen, ad-ăj dăɣ-tamăzăyyat n-ewet n-tăsinsăɣt, făl ešăfălli n-tiṭṭ, afăl ija a-wen, ad-dd-ĕnkărăn inĕmmuttan dăɣ-tiẓĕska d-tiɣĕswen ăynaynen făll-wăr tĕla tamăttant tărna. Tanăkra n-inĕmmuttan-ten-dăɣ, ad-tĕmzĕyyĕt d-amutti n-tiɣĕswen-nănăɣ năkkăneḍ-i ĕddărnen i-ad-ăbas fălla-snăt la tamăttant tărna 53făl-a-s, ăhhuuššăl a-s taɣĕssa-nănăɣ ta-dăɣ făll-la tamăttant tărna, wăr t-illa ar ad-ăbas fălla-s la tamăttant tărna, ăhhuuššăl daɣ a-s taɣĕssa-nănăɣ ta-dăɣ tamăttet, wăr t-illa ar ad-tiynĕy, tumas taɣĕssa s-ăbas fălla-s la tamăttant tărna. 54Afăl tămmuttăy taɣĕssa-nănăɣ ta n-ămăra-dăɣ, tămoos taɣĕssa tăynayăt, ilsa a-wa wărăn irĕkkăh a-wa irakkăhăn, ilsa a-wa făll-wăr la tamăttant tărna, dihen, ad-itbĕt a-wa innă ĕlkĕttab n-Măssinăɣ a-s innă: "Tamăttant, tĕttĕlmăẓ-in, tamăttant tămmut!" 55Ătwănnă daɣ: "Onin tamăttant, ya tamăttant, ĕndek tărna-năm? Ma ja tistant ta s-tĕddajăd ăddinăt a ija a-wa-dăɣ, naqqăd-tăn săr-s?" 56Abăkkaḍ a ikfăn tamăttant tistant-ten-dăɣ s-hanăɣ-năqq. Alămăr wa n-ănnăbi Mosa s-hanăɣ-indăr ad-nămašăl a-wa innă a ikfăn abăkkaḍ tărna ta s-hanăɣ-isikĕw ăkall. 57Tidĕt ĕnta-den-dăɣ măšan, ĕnhĕywăt, năkfet Măssinăɣ-i hanăɣ-ikfăn tărna făll-abăkkaḍ semɣar dăɣ-idĕm n-Emăli-nănăɣ Ɣisa Ălmasex. 58A-wen-dăɣ a făl, ayĕtma-i ĕkneɣ tărha, ĕbdĕdăt făll-iman-năwăn, tĕntĕmăm dăɣ-immun-năwăn, ĕdgĕẓăt hak ašăl i-ad-ihĕl ălxidmăt wa hăm i-Emăli s-data dăɣ-a-s tĕssanăm a-s tiluyyaɣ-năwăn, wăr-e umasnăt bănnan dat-Emăli.

will be added

X\