1 Kăl-Kurĕnta 14

1Ayĕtma! Tĕjjĕšet tărha tĕmdat ulhawăn-năwăn, ărhăt isuf wi ităjj Unfas Šăddijăn i-dăgg-adĕm hullan wi n-asĕssiwĕḍ n-măjrăd dd-ăzizăbbăt Măssinăɣ fălla-wăn i-ăddinăt. 2Ăwadĕm wa ăddooben ad-isiwĕl awalăn wăren ătwăssan, Măssinăɣ a-s itamăjrad wădden dăgg-adĕm, wăr t-illa ere t-ifhamăn ed, Unfas a t-dd-intăjăn i-ad-isiwĕl ĕddărajăn-wi dăɣ-ăssewăl. 3Ăwadĕm wa făll-dd-ăzzăbbăt Măssinăɣ măjrăd hin-ăssawăḍ dăgg-adĕm, dăgg-adĕm a-s itamăjrad i-ad-tăn-isĕṣṣuhĕt dăɣ-immun, isĕmmĕtăr-tăn, isĕsmăḍ ulhawăn-năsăn. 4Wa isawalăn awalăn wăren ătwăssan, iman-net ɣas a iniffĕw, isiṣuhut-tăn s-a-wa ijănna măšan, wa făll-dd-ăzzăbbăt Măssinăɣ măjrăd hin-ăssawăḍ dăgg-adĕm, ălkănisăt iket-net a iniffĕw, isiṣuhut-tăt. 5Ayĕtma, derhan-in a-s ad-siwĕlăm iket-năwăn awalăn wăren ătwăssan măšan, ăssofăɣ ad-tĕjrĕwăm tădabit n-ad-hin-sasawăḍăm ăddinăt măjrăd fălla-wăn dd-ăzizăbbăt Măssinăɣ ed wa ijrăwăn turhajăt-ten-dăɣ, ojăr wa isawalăn awalăn wăren atwăssan hullan afăl wăr-ăddobăt wa isawalăn awalăn-en, ad-ăffăssăr a-wa ijănna i-ad-isĕṣṣuhĕt săr-s ălkănisăt. 6Ayĕtma, kud kăwăn-in-ĕkkeɣ ămăra, ad-hawăn-sawalăɣ awalăn wăren ătwăssan, ma s-mad-infĕw a-wen? Wădden ufa ad-kăwăn-sĕfhĕmăɣ a hi-dd-ăsinăfalăl Măssinăɣ meɣ ad-hawăn-siwĕḍăɣ musnăt meɣ ad-kăwăn-in-sĕssiwĕḍăɣ măjrăd făll-i dd-ăzizăbbăt Măssinăɣ meɣ ad-hawăn-t-săɣrăɣ? 7Ǝḍkĕlăɣet-dd ɣas ălmital făl hărăt wăr iha unfas šund taɣănibt meɣ tehărdănt, afăl emăsli wa takkăsăn, wăr ija ewet olaɣăn, ĕndek a-wa he-ăj ăwadĕm ibḍĕw emăsli wa n-taɣănibt d-wa n-tehărdănt? 8Tăsinsăɣt daɣ ta dd-ɣarrăt ĕlɣĕskăr s-tebădde, afăl wăr tăt-ăshăḍ ăwadĕm s-ĕmmĕk-net, ma ămoos ĕssărdasi wa dd-e-ibdĕdăn i-amjăr? 9Ǝmmĕk-wen-dăɣ daɣ a-s, măjrăd wa tăjjăm, afăl wăr-issĕfhăm, mi madăn-ijrăh a-wa jănnem? Ad-talăhăm ɣas d-ere ăssewălăn dăɣ-aḍu. 10Awalăn, ĕjjĕtăn dăɣ-ăddunya măšan wăr t-illa-i s-wădden il' ălmăɣna, 11afăl wăr-ĕssenăɣ ălmăɣna n-iyyăn dăɣ-săn, ad-umasăɣ ălžahil i-wa t-ămmijrădăn, umas-ahi năkk-dăɣ wa t-ămmijrădăn, ălžahil. 12Ɣas, šămad kăwăneḍ tĕknam tărha n-ajăraw n-isuf wi ihakk Măssinăɣ i-dăgg-adĕm s-tărna n-Unfas Šăddijăn, adiš, ĕmmăɣăt dăɣ-săn i-wi ufănen siṣuhutnen ălkănisăten. 13A-wen-dăɣ a făl, ăwadĕm wa ijrăwăn dăɣ-Măssinăɣ turhajăt n-ad-ămmăjrăd awalăn wăren ătwăssan, ittăret daɣ dăɣ-Măssinăɣ ad-t-ăkf turhajăt n-ăttăfăssir-năsăn 14făl-a-s, e-d tĕddalăɣ Măssinăɣ dăɣ-awal wăr-ĕssenăɣ, Măssinăɣ a ɣabbădăɣ s-ĕnniyăt-in măšan a-wa jănneɣ, năkk iman-in, wăr săr-i ila ujreh. 15Adiš, ma ănihăjjăn? Ăddoobeɣ ad-ĕdĕlăɣ Măssinăɣ dăɣ-măjrăd wărăn ătwăssan s-tărna n-Unfas Šăddijăn măšan, a-wen, wăr hin-ikkes a-s ăddoobeɣ ad-t-ădĕlăɣ s-tayĕtte-nin dăɣ-măjrăd ĕfhamăn ăddinăt, ăddoobeɣ ad-amĕlăɣ Măssinăɣ dăɣ-awal wărăn ătwăssan măšan a-wen wăr hin-ikkes a-s ăddoobeɣ ad-t-amĕlăɣ s-tayĕtte-nin s-ălmăɣna ĕjrahăn ăddinăt. 16Afăl wăr jeɣ a-wen har ɣabbădăɣ Măssinăɣ dăɣ-măjrăd wărăn ătwăssan, ĕndek ĕmmĕk wa s-mad-ăkawĕnăn ăddinăt wi hănen ălžămaɣăt n-imumĕnăn hi-ăsijădnen, ĕnnĕn-ak: "Amin!" a-s wăr t-illa a ĕfhamăn dăɣ a-wa ĕnneɣ? 17Kud-dăɣ tittar n-tămayit i-Măssinăɣ a tăjjăɣ s-a-wen, wăr-idhel a-wen amumĕn wa hi-ăsijădăn i-ad-iṣṣuhĕt dăɣ-immun-net ed wăr-issen a jănneɣ. 18Năkk, ămmoyăɣ i-Măssinăɣ, ojărăɣ-kăwăn iket-năwăn măjrăd dăɣ-awalăn wăren ătwăssan 19măšan, e-d heɣ ălkănisăt, ăssofăɣ ad-ănnăɣ sĕmmosăt tifer saɣranen hărăt dăɣ-erhet n-Măssinăɣ uhĕn ad-ănnăɣ măraw afḍăn n-tifer dăɣ-imĕjridăn wăren ătwăssan s-wăr t-illa ere tăn-ifhamăn. 20Ayĕtma-ɣ, iwšarăt, tĕyyĕm tumast n-aratăn; tidĕt, dăɣ-isălan wi hălnen ebre n-tăllăbăst, umasăt šund aratăn măšan, dăɣ-isălan n-a-wa ihălăn ebre n-tayĕtte ta n-almud n-erhet n-Măssinăɣ, umašăt meddĕn ĕmdanen. 21Iktab dăɣ-alămăr n-Măssinăɣ a-s, innă Măssinăɣ: "Tamĕtte-ta-dăɣ, ad-săr-s dd-šĕmmišĕlăɣ ăddinăt ămmijrădnen awal săl wa tamăjrad, ad-has-ămmăjrădăɣ s-iḍlay n-imăjarăn măšan hakd a-wen-dăɣ iket-net, wăr hi-mad-sĕjĕd." 22A-wen, ăssiilmăd-anăɣ a-s awalăn wi wăren ătwăssan, iji n-Măssinăɣ dd-ăsisawăy i-ad-umas ašămol wădden i-imumĕnăn, ănn-ak i-wi wăren omen, a-s ija a-wen, asiwĕl dăɣ-măjrăd dd-ăzizăbbăt Măssinăɣ făll-ăwadĕm, imumĕnăn a-s ămoos ašămol wădden ăddinăt wi wăren omen. 23Ǝssĕnăt ɣas afăl tăžžimmăɣ ălkănisăt iket-net, ad-tamăjradăn ăddinăt wi tăt-hănen iket-năsăn s-awalăn wăren ătwăssan, ăddinăt wi s-a ăynayăn d-omănăn, ma he-ĕnnĕn dăɣ-a-wen? Meɣ daɣ ma dăɣ-wăn-e-ĕnnĕn wi wăren omen? Wădden ad-hasăn-talăhăm ɣas d-inĕbbuddal iket-dăɣ-năwăn? 24Măšan, afăl măjrăd fălla-wăn dd-ăzizăbbăt Măssinăɣ a hin-sasawaḍăm ăddinăt, kud fălla-wăn dd-ijjăš ăwadĕm wărăn omen wăla-i s-a ăynayăn d-omăn, ămzăyyen-dd d-măjrăd n-Măssinăɣ wa siɣulăm, ad-ĕlmĕdăn a-s tidĕt a dăɣ-tăssewălăm, ĕššĕkăn iman-năsăn, ĕlmĕdăn daɣ s-ibăkkaḍăn-năsăn 25ed, ad-dd-isĕffukkăr măjrăd wa jăm a-wa iffărăn dăɣ-ulhawăn-năsăn. Dihen, ăwadĕm-en, ad-irkăɣ dat-Măssinăɣ, iɣbĕd-t, ăjjayh daɣ a-s tidĕt-dăɣ a-s ill'-e Măssinăɣ jere-wăn. 26Ayĕtma-ɣ, ĕndek ăddăbara? Ărheɣ dăɣ-wăn a-s e-d tĕžĕmmăɣăm, kunta, ih'-iwăn ere irhan iji n-tĕmmal i-Măssinăɣ dd-tĕjmaḍăt a-wa iɣra dăɣ-Ăẓẓăbur, meɣ ere irhan ad-isăɣăr ăddinăt, meɣ-i s-dd-ăsinăfalăl Măssinăɣ hărăt, meɣ-i ijrawăn ɣur-Măssinăɣ turhajăt n-ad-ămmăjrăd awal wărăn ătwăssan, meɣ-i ɣur-s ijrawăn turhajăt n-ad-ăllăɣăt ălmăɣna n-măjrăd wărăn ătwăssan, ăjăt hărătăn-win-dăɣ iket-năsăn dăɣ-ĕnniyăt n-ad-sĕṣṣuhum ălkănisăt. 27Wi tamăjradnen awalăn wăren ătwăssan, ĕgdăhăn ĕssin meɣ kăraḍ, ĕmzizărnet s-măjrăd, ămlet-t ere itafăssarăn a-wa jănnen, 28afăl wăr t-illa ere iffĕssărăn a-wa jănnen, adiš susĕmnet dăɣ-ălkănisăt, ămmăjrădet hak iyyăn dăɣ-săn i-Măssinăɣ dăɣ-iman-net. 29Ăddinăt wi făll-dd-ăzzăbbăt Măssinăɣ măjrăd hin-ăssawăḍăn ăddinăt, măjrădnet dăɣ-săn ĕssin meɣ kăraḍ s-emăzezar, sĕjĕdnet-asăn ăddinăt wi iyyăḍnen, zĕjjĕznet-tăn hullan i-ad-ĕbḍĕwăn a-wa olăɣăn dd-ifălăn Măssinăɣ d-a-wa dd-ĕkkăsăn ăddinăt-en dăɣ-iɣăfawăn-năsăn. 30Afăl dăɣ-wăn-in-isasawaḍ iyyăn i-tamĕtte măjrăd fălla-s dd-ăzizăbbăt Măssinăɣ har dd-inkăr iyyăn s-dd-ăsinăfalăl Măssinăɣ hărăt s-irha tĕnna-net, isusĕmet wa ăzzarăn i-ad-ămmăjrăd wa dd-išrăyăn. 31Tăddobem s-emăzezar, ad-hin-sĕssiwĕḍăm tamĕtte măjrăd fălla-wăn dd-ăzizăbbăt Măssinăɣ i-ad-săɣrĕm imumĕnăn iket-năsăn, sĕmmĕtărăm-tăn 32făl-a-s ănnăbităn, ănihăjja ad-t-illa ĕnniyăt-năsăn daw-wa n-ănnăbităn wi iyyăḍnen. 33Hak hărăt-dăɣ, ăjet s-ălxal ed Măssinăɣ, ălxer wădden tămšăršăr. Dăɣ-isălan n-tiḍeḍen ămăra, ărheɣ dăɣ-wăn, ad-tĕjĕm a-wa jănăt ălkănisăten n-imĕššeddĕjăn, 34susĕmnet dăɣ-ălkănisăt, ed wăr hasnăt t-illa măjrăd dăɣ-s, ănn-ak sĕrĕsnet iman-năsnăt, sĕjĕdnăt ed a-wen-dăɣ a innă alămăr n-Măssinăɣ. 35Ti dăɣ-snăt lăt asĕstan, tăqqĕlet ehăn-net tĕzzar sĕstĕnet ăhalĕs-net făl-a-s ilăš făll-tamăḍt, ad-tămmăjrăd dăɣ-ălkănisăt. 36Ajăn kăwăneḍ, ija ɣur-wăn a-s măjrăd n-Măssinăɣ, kăwăneḍ ad-dd-ifăl? Meɣ ija ɣur-wăn a-s kăwăneḍ ɣas a făll-t-dd-ăzzăbbăt? 37Kunta ih'-iwăn ere ordan a-s ĕnta ănnăbi a ămoos, meɣ orda s-ijraw ɣur-Unfas Šăddijăn, a wăr-ĕjrewăn ăddinăt wi iyyăḍnen, adiš, ilmĕdet daɣ a-s a-wa-dăɣ hawăn-in-ĕktăbăɣ, alămăr dd-ifalăn Emăli a ămoos. 38Ere dd-iggădăn innă a-wen bahu, wăr t-in-tĕjrehăm, Măssinăɣ a făl wăr-issen. 39Ayĕtma-ɣ, ĕdgĕẓăt dăɣ-asĕssiwĕḍ n-ăddinăt i-măjrăd fălla-wăn dd-ăzizăbbăt Măssinăɣ, wăr tĕgdelăm i-ăddinăt wi iyyăḍnen măjrăd dăɣ-awalăn wăren ătwăssan 40măšan, ăjăt a-wen iket-net s-ăneḍam d-ălxal.

will be added

X\