1 Kăl-Kurĕnta 12

1Ayĕtma, ămăra, dăɣ-isălan n-isuf wi ităjj Măssinăɣ s-tărna n-Unfas Šăddijăn i-ăddinăt wi omănnen s-Ălmasex, wăr-ărheɣ ad-dăɣ-săn tĕžhalăm. 2Tĕssanăm a-s ibda a-s tănimăšrăyăm i-Măssinăɣ, ăṣṣănămăn ɣas a ḍarăt tošalăm siha d-siha, a-s ija a-wen, wăr t-tĕlla tăfert tăddobet ad-dd-tĕzjăr imawăn-năsăn. 3A-wen-dăɣ a făl ărheɣ, ad-hawăn-ăllăɣeɣ a-s, wăr t-illa ere s-iha Unfas Šăddijăn ulh-net dd-e-iggĕdăn, ad-ijanna: "Ilɣăn Măssinăɣ Ɣisa", wăr t-illa daɣ ăgg-adĕm ăddooben tĕnna n-a-s: "Ɣisa a-s Emăli" ar s-ad-t-dd-intaj Unfas Šăddijăn s-tĕnna n-a-wen. 4Isuf n-Măssinăɣ wi ităjj i-dăgg-adĕm s-tărna n-Unfas Šăddijăn, ĕjjĕtăn ănnuɣăn-năsăn măšan, Unfas ĕnta iyyăn ɣas; 5imašalăn wi issăɣlăf Măssinăɣ i-dăgg-adĕm s-tărna n-Unfas-net, ĕjjĕtăn, ĕẓlayăn măšan, a-wen, wăr hin-ikkes a-s Emăli iyyăn a ihakkăn a-wen; 6tădabit daɣ ta ihăkk Măssinăɣ i-asĕssiwĕḍ n-imašalăn-win-dăɣ, tĕbḍa s-ăwadĕm-ăwadĕm măšan, Măssinăɣ iyyăn a isarɣasăn a-wen-dăɣ iket-net i-ăddinăt iket-năsăn. 7Hak amumĕn-dăɣ, ijraw ɣur-Unfas Šăddijăn tădabit tiyyăt s-ixdăm a infan imumĕnăn wi iyyăḍnen. 8Ăwadĕm iyyăn, ijraw ɣur-Unfas Šăddijăn tădabit n-tĕnna n-măjrăd ilan ujreh, iyyăn ijraw ɣur-Unfas Šăddijăn tĕlɣulĕma, a-wen iket-net, Unfas-en-dăɣ n-iyyăn a t-ihakkăn. 9Ăwadĕm iyyăn, ihakk'-e Unfas immun, ăkf iyyăn tădabit n-ad-izizuy imarhinăn, 10ăkf iyyăḍ tădabit n-tijawt n-tikunen, ăkf iyyăḍ tădabit n-asĕssiwĕḍ i-ăddinăt isălan fălla-s dd-ăzizăbbăt Măssinăɣ, ăkf iyyăn musnăt jer-ăddinăt, iyyăḍ tădabit n-asiwĕl n-awalăn wăren ătwăssan, ăkf daɣ iyyăḍ tădabit n-ăttăfăssir n-awalăn-en-dăɣ. 11Unfas Šăddijăn-en-dăɣ a itajjăn hărătăn-win-dăɣ iket-dăɣ-năsăn. Hak ăwadĕm-dăɣ d-tădabit ta s-irha ad-has-tăt-ăkf, hak ăwadĕm-dăɣ, wăr-ăssalăh a-wa t-ikfă d-a-wa ikfă amidi-net. 12Ăyyăt-ahi ad-kăwăn-ăkfăɣ ălmital s-kăwăn-ĕssĕfhĕmăɣ edăgg wa-dăɣ: wădden taɣĕssa n-ăwadĕm-i-dăɣ, tiyyăt ɣas măšan, tămmuzjăl, tartit n-izĕmmuzjal-en-dăɣ iket-năsăn a-s taɣĕssa. Ǝnta-den-dăɣ daɣ a-wa nĕja dăɣ-tassaɣt-nănăɣ d-Ălmasex, 13iket-nănăɣ, iyyăn n-Unfas a dăɣ-nătwăsălmăɣ i-ad-nasăɣ, numas tiyyăt taɣĕssa. A-wen, wăr săr-s ĕẓleyăn kăl-Ălyăhud wăla kăl-Ălyunan wăla eklan wăla ilăllan ed iket-dăɣ-năsăn, Unfas-wen-dăɣ n-iyyăn a ĕjrăwăn. 14Taɣĕssa ya, wăr tămoos azămmăzjul iyyăn ɣas, ĕjjĕtăn izĕmmuzjal-net. 15Afăl dd-iggăd aḍăr, inna: "Năkk, wăr hi-tĕla taɣĕssa ed wăr-ămoosăɣ ăfuss", ajăn ikkăs-t a-wen dăɣ-tumast n-azămmazjul n-taɣĕssa? 16Kud dd-tĕggăd daɣ tamĕẓẓujt, tĕnnă: "Năkk, wăr hi-la taɣĕssa ed, wăr-ămoosăɣ tiṭṭ", ajăn a-wen ikkas-tăt dăɣ-tumast n-hărăt dăɣ-taɣĕssa? 17Ǝnnăr tămoos tăɣĕssa iket-net tiṭṭ, ma s-mad-isĕl ăgg-adĕm hărăt? Ǝnnăr tămoos taɣĕssa iket-net tamĕẓẓujt, ma s-mad-isunsĕj ăwadĕm hărăt? 18Wădden ĕmmĕk-wen-dăɣ daɣ a-s dd-ixlăk Măssinăɣ taɣĕssa, ănn-ak a-s tăt-dd-ixlăk, hak azămmazjul n-taɣĕssa-dăɣ d-edăgg wa s-has-irha dăɣ-taɣĕssa. 19Ǝnnăr azămmazjul iyyăn ɣas a t-illan, iket-di, wăr t-tĕmmil taɣĕssa. 20Dăɣ-tĕssĕba n-a-wen-dăɣ a făl, taɣĕssa, ĕjjĕtăn izĕmmuzjal-net măšan, taɣĕssa ĕnta, tiyyăt ɣas. 21A-wen-dăɣ a făl wăr tăddobăt, ad-dd-tĕggĕd tiṭṭ, tănn i-ăfuss: "Năkk, wăr dăɣ-k leɣ ĕššăɣĕl", wăr-ăddobăt daɣ eɣăf, ad-dd-iggĕd, ănn i-iḍarăn: "Wăr săr-wăn ămɣatărăɣ." 22Wădden, hannăyăm a-s izĕmmuzjal n-taɣĕssa-nănăɣ wi wăr nĕkna asĕfrar, ĕntăneḍ-en-dăɣ a hanăɣ-ĕnfanen s-hărăt, 23ija ɣur-năɣ a-s izĕmmuzjal n-taɣĕssa-nănăɣ wi nĕkna mĕlkăhaw, ĕntăneḍ, a nĕkna asĕbbĕlĕl, wi s-hanăɣ-ăsikărakăḍ wăla ad-năɣăr ismawăn-năsăn, ĕntăneḍ-en-dăɣ a nĕkkan aṣătar. 24Wi iwăr sărho, wăr nămɣatăr s-aṣătar-năsăn făl-a-s Măssinăɣ iman-net-i dd-iknăn taɣĕssa, ij'-asăn ăddăbara făl iwăr sărho išrutăn wi ifăl. 25A-wen ij'-e Măssinăɣ i-ad-wăr kĕnnĕs taɣĕssa d-iman-net, dihen, hak azămmazjul-dăɣ, ăkkuul dăɣ-amidi-net. 26A-wen-dăɣ a făl e-d ăsnin edăgg iyyăn dăɣ-taɣĕssa, taɣĕssa iket-net daɣ a tăsniinăt, e-d irxăm daɣ edăgg iyyăn dăɣ-taɣĕssa, taɣĕssa iket-net a madăt-tisraw. 27Kăwăneḍ, a-s taɣĕssa n-Ălmasex, hak iyyăn dăɣ-wăn-dăɣ, ămoos azămmazjul-net iyyăn. 28A-wen-dăɣ a făl dd-ăšmašăl Măssinăɣ inĕmmušal s-tizarăt dăɣ-ălxidmăt-net wa n-ălkănisăt, issĕlkăm-asăn-dd ănnăbităn, ĕlkămăn-asăn ălɣulam, ĕlkămăn-asăn ăddinăt wi lănen tădabit n-iji n-tikunen, ĕlkămăn-asăn wi lănen tădabit n-azuzi n-imarhinăn, ĕlkămăn-asăn wi ha tărha n-ad-ĕdhĕlăn imidiwăn-năsăn d-wi lănen tădabit n-asĕssiɣĕd-năsăn d-wi lănen tădabit n-măjrăd n-awalăn wăren ătwăssan. 29Ǝnhĕywăt, wădden ăddinăt iket-dăɣ-năsăn a-s inĕmmušal, wădden iket-dăɣ-năsăn a-s ănnăbităn, wăr ămoosăn iket-năsăn ălɣulam, wădden iket-năsăn a ĕjrawnen tădabit n-tijawt n-tikunen 30wăla azuzi n-imarhinăn wăla măjrăd n-awalăn wăren ătwăssan wăla tădabit n-ăttăfăssir-năsăn. 31Šămad isălan-den-dăɣ, adiš, ărheɣ dăɣ-wăn ad-sĕddărhĕnăm isuf n-Unfas Šăddijăn wi ufănen, win-dăɣ a-s lam s-ad-tĕdgĕẓăm dăɣ-umăɣ-hasăn. Ăyyăt-ahi ad-kăwăn-sĕlmĕdăɣ a-wa ufăn dăɣ-a-wen-dăɣ iket-net.

will be added

X\