1 Kăl-Kurĕnta 11

1Tălălăt-ahi s-ĕmmĕk wa s-ăttilălăɣ Ălmasex. 2Ayĕtma, ămmoyăɣ-awăn ĕmmĕk wa s-hi-kittĕwăm hak ašăl, hannăyăɣ daɣ a-s a-wa kăwăn-ĕssăɣrăɣ d-a-wa dăr-kăwăn-ăsmătărăɣ, tamašălăm-t iket-net. 3Ămăra, ărheɣ ad-kăwăn-in-sĕjrăhăɣ hărăt iyyăn: Ɣisa a ixkamăn dăɣ-hak ăhalĕs, ăhalĕs a ixkamăn dăɣ hănne-s, Ɣisa daɣ Măssinăɣ a dăɣ-s ixkamăn. 4A-wen-dăɣ a făl e-d itĕddal ăhalĕs Măssinăɣ, meɣ ijraw ɣur-Măssinăɣ măjrăd s-ila s-ad-t-ăffăssăr i-ăddinăt, wăr-ităjjet a-wen injaḍ ed asĕmmăḍri a itajj Ɣisa-i n-ămănokal-net. 5Tamăḍt daɣ, e-d tĕddal Măssinăɣ, meɣ e-d tĕjrăw ɣur-Măssinăɣ măjrăd s-la s-ad-t-tăffăssăr i-ăddinăt, wăr la s-ad-tăj a-wen wăr tăswăr ed tamăḍt wărăt tăswăr, asĕmmăḍri a tajj ăhalĕs-net ed wăr tĕẓley d-ere ăsităbălbălăn; asĕttĕbĕlbĕl ya, ăsikărakăḍ făll-tamăḍt. 6A-wen-dăɣ a făl tamăḍt ta wărăt tărha aswăr, adiš šĕjwĕšet daɣ, măšan, kunta ija ɣur-wăn a-s ăsikărakăḍ ad-šĕjwĕš tamăḍt meɣ tăstăbălbăl, adiš, uf'-as ad-sĕwăr. 7Ăhalĕs ĕnta, wăr-ămɣatăr s-ad-injaḍ e-d itĕddal Măssinăɣ ed Măssinăɣ, ixlăk-anăɣ dăɣ-milhaw wa-net i-ad-t-nĕsĕmɣăr, a-s ija a-wen, semɣar wa ila ăhalĕs, hănne-s a dd-ifal, 8ed ašăl wa dd-ixlăk Măssinăɣ ăddunya, wădden ăhalĕs, a dd-iknăn dăɣ-tamăḍt, ănn-ak tamăḍt a dd-tĕknăt dăɣ-ăhalĕs. 9Wădden ăhalĕs a dd-iknăn dăɣ-tĕssĕba n-tamăḍt, ănn-ak, tamăḍt a dd-tĕknăt dăɣ-tĕssĕba n-ăhalĕs. 10Dăɣ-tĕssĕba n-a-wen-dăɣ d-dăɣ-tĕssĕba n-ănjălosăn wi ăsijădnen hak ăssaɣăt, a făl iwar tamăḍt ad-tăsiwăr eɣăf-net i-ad-tăssikna s-a-wen-dăɣ a-s tăqbal a-s ill'-e jĕnnĕj-s ăhalĕs-net. 11Măšan, hakd a-wen-dăɣ dăɣ, năkkăneḍ-i s-ašăl-i-dăɣ, nosăɣ d-Emăli s-immun wa săr-s nĕja, ăhalĕs, wăr t-illa ar s-tamăḍt, tamăḍt daɣ, wăr t-tĕlla ar s-ăhalĕs 12făl-a-s, ašăl wa dd-ixlăk Măssinăɣ ăddunya, ăhalĕs a dăɣ-dd-ikkăs tamăḍt măšan, ašăl-i-dăɣ, wăr t-illa ăhalĕs s-wădden tamăḍt a t-torăwăt. A-wen iket-net, Măssinăɣ ad-dd-ifal. 13Ǝjrăhăt-in ɣas kăwăneḍ iman-năwăn: ak, ăhuuskăt ad-dd-tĕjjĕš tamăḍt wărăt tăswăr ălžămaɣăt n-imumĕnăn tĕddalnen Măssinăɣ, ad-t-tĕddal ĕnta-dăɣ? 14Ajăn wădden, a-wa hanăɣ-iɣlăyăn iket-net, isakn'-anăɣ a-s wăr dd-osenăt tišĕkkaḍ făll-ăhalĕs? Ilăš fălla-s a-wen 15măšan, tamăḍt ĕnta, a-wa hanăɣ-iɣlăyăn iket-net, ăssiikn'-anăɣ a-s tišĕkkaḍ, tamăḍt a făll-ăhusknăt ed Măssinăɣ a has-tănăt-ikfăn i-ad-tudabăt ad-tĕṣtăr iman-net. 16Ăywa, kunta han-kăwăn ăddinăt ha tamădašt dăɣ-isălan-wi-dăɣ, ĕlmĕdnet a-s wăr t-illa agna nĕzzay săl wa-dăɣ, wăr t-illa daɣ agna ĕzzaynăt ălkănisăten n-Măssinăɣ ti iyyăḍnen săl wa-dăɣ. 17Ămăra, ăssiilmădăɣ-kăwăn a-s wăr ɣur-i lem tisenen ed, ĕsleɣ a-s kăwăneḍ, e-d tažămmaɣăm, wăr tinɣĕymim i-ad-tĕhĕlĕm s-data, ănn-ak, a-wa kăwăn-isahalăn s-ider ɣas a făl tažămmaɣăm. 18S-tizarăt, ĕsleɣ a-s e-d tažămmaɣăm i-ălɣibadăt, tiẓunawen a tajjăm, ĕflasăɣ a-s a-wen, ija dăɣ-s hărăt, 19ed băḍḍo-băḍḍo, ăhhuuššăl ɣas i-ad-itwĕnhĕy wi s-itbăt a-s tidĕt a-s ĕlkamăn. 20Ǝsleɣ a-s tažămmaɣăm măšan, ažĕmmăɣ-năwăn i-ad-tahĕrĕm amĕnsi wa n-tasăktot šăddijăn n-Emăli, wăr-itĕjj s-ălmăɣna 21făl-a-s, e-d iwwăḍ ălwăqq wa n-tetăte n-amĕnsi-en, hak iyyăn dăɣ-wăn, ad-iḍĕw dăɣ-a-wa dd-iwwăy ad-t-itatt, umas a-s aɣil-năwăn iyyăn, ălluẓ, a-s ija a-wen, aɣil wa iyyăḍăn, ăyyiwăn har dăɣ-s ikkăs făw asmĕd ĕnniyăt. 22Ma jăn ihănan-năwăn tĕkšĕm-dd, tĕswĕm-dd dăɣ-săn tĕzzar tĕkkĕm-dd ălkănisăt n-Măssinăɣ? Meɣ kăwăneḍ, wăr tĕssĕmɣărăm ălkănisăt ta n-Măssinăɣ? Meɣ a tărham ad-sĕmmăḍrĕyăm ăddinăt wi kăwăn-hănen wăren la hărăt? Ak ĕndek ɣas a-wa s-tărhăm ad-hawăn-tăn-ănnăɣ dăɣ-a-wen? Ak a tărham ad-hawăn-ăqqĕsăɣ? Xăram-awăn! 23Ămăra, a-wa hi-issăɣra Emăli a-s ărheɣ ad-hawăn-t-in-sĕssiwĕḍăɣ: Ehăḍ wa dăɣ-ila Emăli Ɣisa s-ad-ăttărmăs, iḍkăl tajĕlla, 24ămmoy i-Măssinăɣ tĕzzar, ăẓun-tăt jer-inĕṭṭulab-net, inn'-asăn: tajĕlla-ta-dăɣ a-s taɣĕssa-nin ta mad-ăkfăɣ dăɣ-idăggan-năwăn. Ɣăymăt tažămmaɣăm, tuẓanăm-tăt jer-iman-năwăn i-ad-hi-dd-kittĕwăm. 25Ǝssĕmdăn tetăte ɣas, ijă a ĕnnin-dăɣ daɣ i-kara wa n-tesăse, iḍkăl-t, innă: "A-wa ihăn kara-wa-dăɣ a-s tasăktot n-ărkăwăl n-tassaɣt wa ăynayăn madăn-imĕl jer-i dăr-wăn afăl inɣăl ašni-nin dăɣ-tĕssĕba-năwăn. E-d t-tĕswăm-dăɣ, ɣaymăt hi-dd-kittĕwăm, 26e-d tĕžĕmmăɣăm-dăɣ har tohărăm tajĕlla d-kara-wa-dăɣ, isălan n-tamăttant n-Emăli a tajjăm har ašăl wa dd-mad-iqqĕl." 27A-wen-dăɣ a făl ere ikšăn tajĕlla-ta-dăɣ dd-siktĕwăt taɣĕssa n-Emăli, meɣ ere iswăn kara-wa-dăɣ dd-isiktĕwăn ašni-net, dăɣ-a-s, wăr-ikfa a-wen semɣar, asĕffăṭṭi ɣas a itajj dăɣ-taɣĕssa d-ašni n-Emăli-i ikfa i-ĕlɣĕllas n-dăgg-adĕm. 28A-wen-dăɣ a făl hak ăwadĕm-dăɣ, izĕjjĕzzet iman-net, ikkĕset abăkkaḍ dăɣ-tămudre-net tĕzzar, ijrĕw s-ad-ăkš tajĕlla n-Emăli, isĕw daɣ kara-net 29făl-a-s, ere ikšăn tajĕlla n-Emăli meɣ iswă kara-net dăɣ-a-s wăr-omen a-s a-wa taɣĕssa n-Emăli d-ašni-net, ăwadĕm-en, ilmĕdet a-s ĕḍmanăn dăɣ-s iman-net. 30Dăɣ-tĕssĕba n-a-wen-dăɣ făw a făl kăwăn-han ăddinăt ăssilmăḍnăt turhĕnnawen d-inĕbdan, iyyăḍ făw, ămmun. 31Afăl nădoɣ i-iman-nănăɣ, wăr hanăɣ mad-iwăr uḍlem dat-Măssinăɣ. 32Măšan, kud hanăɣ-iwăr uḍlem dăɣ-ăššăreɣa n-Emăli-dăɣ, ija a-wen dăɣ-ittus n-ad-naɣĕd, dihen, wăr mad-nahăr d-ăddunya ujĕš n-temse. 33Ayĕtma, e-d tĕžžĕmmăɣăm i-ad-tĕkšĕm tajĕlla ta dd-siktut taɣĕssa n-Emăli, ẓĕẓẓidărăt, nĕmăqqĕlăt jer-iman-năwăn, 34kunta ih'-iwăn ere ălluẓăn, ăkšet-dd ɣur-ehăn-net tĕzzar, i-ad-wăr-itumas ažĕmmăɣ-năwăn a fălla-wăn dd-isiḍĕwăn ăššăreɣa n-Măssinăɣ. Harătăn wi iyyăḍnen hin-oyyeɣ wăr tăn-ĕnneɣ, ad-hawăn fălla-săn ĕdwĕnneɣ afăl kăwăn-in-oseɣ.

will be added

X\