1 Kăl-Kurĕnta 10

1Ayĕtma, wăr ărheɣ ad-tĕžhalăm dăɣ-isălan n-a-wa irmăsăn imɣarăn-nănăɣ ibda dăɣ-tenere. Ăzzăman-en, tĕllay jĕnnĕj-săn tejărăkt, sasaɣad-tăn, ijrăw-asăn Măssinăɣ ad-ĕjlĕyăn ejărew wa sĕmmăn, 2olăh a-wen d-a-s ătiwăsălmăɣăn dăɣ-tejărăkt-en d-ejărew wa sĕmmăn dăɣ-idĕm n-tassaɣt ta jăn d-ănnăbi Mosa, 3ăzzăbbăt-dd Măssinăɣ fălla-săn amĕnsi n-talĕmmiẓt dd-ifalăn išĕnnawăn, ĕkšăn, 4ĕswăn dăɣ-aman wi fălla-săn dd-ăzzăbbăt Măssinăɣ. Aman-en, taḍaɣt dd-falăt išĕnnawăn a dd-ĕzjarăn, tărjăš ḍăra-săn e-s ĕkkăn dăɣ; taḍaɣt-en, tamătart n-Ălmasex a tămoos. 5Hakd a-wen-dăɣ, tunjăy tĕššĕm-năsăn amišĕl n-erhet n-Măssinăɣ, ăbjănjănăn fălla-s, hăn-dd-i ăjjootnen dăɣ-săn ămmuun dăɣ-tenere-en-dăɣ. 6Hărătăn-win-dăɣ, ălmitalăn a hanăɣ-ămoosăn i-ad-wăr nĕjješ ălxal wa ĕjjăšăn, i-ad-wăr nĕsĕdărhĕn a-wa lăbasăn ăsdărhănăn. 7Ǝbḍĕwăt d-ălɣibadăt n-ăṣṣănămăn, wăr jem a-wa jăn iyyăḍ dăɣ-săn ed ătwănn'-anăɣ: "Tăqqima tamĕtte, tĕkšă, tĕswă, tĕbdad ad-dallăl dat-ăṣṣănămăn-net." 8Wăr nĕsămăḍaset iman-nănăɣ šund a-wa jăn iyyăḍ dăɣ-săn; win-hi ĕntăneḍ, ihlăk dăɣ-săn Măssinăɣ sănatăt timĕrwen d-kăraḍ n-efăḍ n-ăhalĕs dăɣ-iyyăn n-ašăl. 9Wăr nĕtirmet Ălmasex šund a-wa jăn iyyăḍ dăɣ-săn, ed wi jănen a-wen, ĕkšănăt-tăn taššălen. 10Wăr tăbjănjănăm šund a-wa jăn iyyăḍ dăɣ-săn ed, tĕssanăm a-s, os'-en-dd ănjălos wa iṭṭăfăn tamăttant, ilhăs-tăn iket-dăɣ-năsăn. 11A-wa tăn-irmăsăn, ifăqqăn n-a-wa ăddoben ad-hanăɣ-irmĕs a ămoos i-ad-năj ĕnniyăt i-iman-nănăɣ. Isălan-wi-dăɣ, ĕktăbăn i-ad-hanăɣ-sĕfhĕmăn hărăt năkkăneḍ-i hănen ajilal n-ăddunya. 12A-wen-dăɣ a făl ere ordăn iman-net tebădde, ăjet ĕnniyăt i-ad-wăr-oḍa. 13A-s kăwăn-ăžžurrăb Iblis-dăɣ, ĕnta a-s itižărrub dăgg-adĕm iket-năsăn, Măssinăɣ Ămaɣdal a ămoos, wăr kăwăn-e-ăyy ăžžurrăb-kăwăn Iblis s-a t-illăn jĕnnĕj-tădabit-năwăn, ănn-ak, e-d kăwăn-ăžžurrăb-dăɣ, ad-kăwăn-ăkf daɣ tădabit n-ăṣṣăbarăt s-dd-tĕntăšăm iman-năwăn dăɣ-a-wen. 14Ayĕtma wi ĕkneɣ tărha, jawăḍăt i-ălɣibadăt n-ăṣṣănămăn, 15meddĕn ĕjrahnen hărăt a-s ăssewălăɣ, a-wen-dăɣ a făl zĕnnĕzjumĕtăt hullan dăɣ-a-wa hawăn-janneɣ. 16Afăl ălwăqq wa d-nĕtihăr amĕnsi wa šăddijăn n-Emăli, afăl ălwăqq wa d-nĕsass dăɣ-alkas wa šăddijăn i-ad-numay i-Măssinăɣ, ajăn wădden ĕnta-den-dăɣ a-wa isidĕttun tartit-nănăɣ d-Ălmasex s-tărna n-ašni-net. Ajăn wădden tajĕlla ta nĕtuẓan jer-iman-nănăɣ i-ad-hanăɣ-dd-sĕktĕw tamăttant ta ija Ɣisa dăɣ-tĕssĕba n-ibăkkaḍăn, tamăttant-ten-dăɣ inhăy dăɣ-taɣĕssa-net, a hanăɣ-tĕssărtăyăt dăr-s. 17Šămad wăr t-illa ar tajĕlla tiyyăt, a-wen a t-ămoosăn taɣĕssa n-Ălmasex, a-wen-dăɣ daɣ a-s năkkăneḍ, kud nĕjjĕt-dăɣ, nămoos tiyyăt taɣĕssa dăɣ-tĕssĕba n-tassaɣt-nănăɣ dăr-s. 18Ǝkyĕdăt ɣas dăɣ-kăl-Iṣrayil, ɣur-săn wi tattănen isan n-tikutawen ti jănen i-Măssinăɣ, osaɣăn daɣ dăɣ-tĕssĕba n-takute-ten-dăɣ d-Măssinăɣ ed asăɣrĕs wa făll-ɣarrăs takute, i n-Măssinăɣ. 19Ma tordam, ma ĕkkeɣ dăɣ-a-wen? Tordam a-s isan ikat ăwadĕm i-ăṣṣănămăn, ămoosăn hărăt? Meɣ ăṣṣănămăn iman-năsăn făw, ak hărăt? Wăr-ămoosăn wăla a ĕnḍărrăn, 20ănn-ak, a ărheɣ, ad-kăwăn-sĕlmĕdăɣ a-s a ikăt ăwadĕm i-ăṣṣănămăn-dăɣ, wădden Măssinăɣ a-s t-ikăt, alšinăn a-s t-ikăt. Ăywa! Năkk, wăr-ărheɣ ad-tasɣĕm hărăt d-alšinăn. 21Wăr tăddobem ad-sassăm dăɣ-alkas wa kăwăn-dd-isakten tanăɣla ta ija ašni n-Emăli Ɣisa dăɣ-tĕssĕba n-ad-tĕjrĕwăm tenăšše n-ibăkkaḍăn-năwăn, talĕsăm daɣ ḍarăt-a-wen, tesăse dăɣ-alkas wa dăɣ-sassăn inaɣbadăn n-alšinăn ăssaɣăt wa d-tăn-ɣabbădăn. Wăr tăddobem ad-tĕkšĕm tajĕlla ta kăwăn-dd-saktet taɣĕssa n-Ɣisa-i ămmun i-ad-tĕjrĕwăm tenăšše n-ibăkkaḍăn-năwăn, talĕsăm daɣ ḍarăt-a-wen tetăte n-tajĕlla ta tăttăn inaɣbadăn n-alšinăn ăssaɣăt wa d-tăn-ɣabbădăn. 22Meɣ, kăwăneḍ, a tărham ad-asĕm Emăli fălla-wăn? Tordam a-s tăddobem ad-tăɣlĕsăm dăɣ-ăššar-net afăl t-ijjăš aḍkăr fălla-wăn? 23Wăr t-illa a-s wădden nĕjraw săr-s măšan, wădden hărăt iket-net a infan hărăt. 24Wăr dăɣ-wăn itămmăɣet wăl' iyyăn i-tĕnfa ta n-iman-net ĕnta ɣas, ănn-ak, izĕzăret tĕnfa ta n-imidiwăn-net ta n-iman-net. 25Isan tĕjrăwăm nazzăn dăɣ-ăssuk-dăɣ, a ămoosăn-dăɣ, ăkšăt dăɣ-săn kunta wăr tăn-ĕkrehăn ulhawăn-năwăn 26ed ĕlkĕttab n-Măssinăɣ, innă: "Ăkall d-a-wa t-ihăn iket-net, i n-Emăli." 27Afăl kăwăn-dd-ăsmăjarăt ere wărăn ămoos amumĕn, afăl t-tĕkkăm, amĕnsi hawăn-dd-issĕskăr-dăɣ, ăkšăt dăɣ-s, wăr t-kărrăhnet ulhawăn-năwăn 28măšan, afăl kăwăn-iɣtăl ăwadĕm, inn'-awăn: "Hewăt, isan-di, i n-teɣse ikat ăwadĕm i-ăṣṣănăm, wăr tăn-tĕkšem dăɣ-tĕssĕba n-ăwadĕm wa hawăn-illăɣen i-ad-wăr tăɣšedăm iman-net." 29Wăr hawăn-ĕnneɣ a-wen dăɣ-tĕssĕba n-aɣăšad n-iman wi-năwăn, ănn-ak, ĕnneɣ-awăn-t dăɣ-tĕssĕba n-ad-wăr tăɣšedăm iman n-ăwadĕm wa kăwăn-ikkăsăn dăɣ-taɣdărt d-ad-wăr tĕššekăm iman-năwăn ḍarăt a-wa. Ǝssanăɣ a-s ad-hi-ĕnnĕn iyyăḍ dăɣ-wăn: "Ajăn năkk, mafăl tĕyyăɣ ăwadĕm ikmam-ahi dăɣ-tărha n-iman-in, dăɣ-tĕssĕba n-a-s ikrah a-wa tajjăɣ? 30Năkk a-wa dăɣ-ămmoyăɣ i-Măssinăɣ ălwăqq wa d-tattăɣ, ĕndek a-wa ijrăwăn i-ăwadĕm ad-ijjĕš ti-nin făll-amĕnsi s-išwăr ămmoyăɣ i-Măssinăɣ dăɣ-tĕssĕba-net?" 31Ămăra, ĕnneɣ-awăn: jer-tattăm wăla sassăm, a tăjjăm-dăɣ, ăjăt-t dăɣ-derhan n-ad-sĕmɣărăm Emăli. 32Wăr tumasăt i-ăwadĕm wăl' iyyăn ĕssĕbab n-tanmĕšrayt jer-ămoos ăgg-Ălyăhud wăla ăgg-Ălyunan wăla amumĕn. 33Tălălăt-ahi, wăr tĕjjăɣ făw a dăɣ-hi-ĕššakăn ăddinăt, wădden tĕnfa n-iman-in ɣas a ḍarăt ošalăɣ, ănn-ak, dăɣ-a-wa tăjjăɣ iket-net, ăzizărăɣ tĕnfa n-ăddinăt wi iyyăḍnen ta-nin i-ad-tăn-iɣlĕs Măssinăɣ.

will be added

X\