1 Kăl-Kurĕnta 1

1A-wa năkk, Bulĕs, wa dd-iɣra Măssinăɣ dăɣ-erhet-net, i-ad-umasăɣ ănămmašul n-Ɣisa Ălmasex, hawăn-in-iktabăn năkk d-Sustin-i n-ă/n/na-ɣ dăɣ-ăddin. 2Nĕktab-awăn-in kăwăneḍ-i n-imĕššeddĕjăn hănen ălkănisăt ta n-aɣrĕm wa n-Kurĕnta, nĕktab-in daɣ i-imĕššeddĕjăn wi iyyăḍnen ɣarrănen isĕm n-Emăli Ɣisa Ălmasex, edăgg hăn-dăɣ, Emăli-năsăn a-s wa-nănăɣ. 3Năhuul-kăwăn-in, nĕttar s-Măssinăɣ-i n-Abba-nănăɣ d-Emăli-nănăɣ Ɣisa Ălmasex a kăwăn-ikfăn ănnuɣmăt d-ălxer. 4Ămmoyăɣ i-Măssinăɣ, timĕlăɣ-t hak ašăl dăɣ-tĕssĕba n-ănnuɣmăt wa săr-wăn-dd-torăw tassaɣt ta jăm d-Ɣisa Ălmasex, 5wăr t-illa făw a-s wădden ikf'-awăn-t; ikf'-iwăn musnăt n-măjrăd, ikf'-iwăn daɣ musnăt n-erhet-net. 6Hannăyăɣ a-s isălan n-Ălmasex wi făl hawăn-năjjĕyh, tĕslăm-asăn, tĕjrăhăm-tăn, ĕntămăn dăɣ-ulhawăn-năwăn. 7Dăɣ-isălan n-isuf wi ităjj Unfas Šăddijăn i-dăgg-adĕm, wăr t-illa dăɣ-săn-i hin-toḍanăm, tĕjrawăm-tăn iket-dăɣ-năsăn; diha t-tĕllăm ašăl-i-dăɣ, wăr tăqqelăm ɣas ar i-uɣĕl n-Emăli-nănăɣ Ɣisa Ălmasex-i 8ăddooben ad-kăwăn-isĕntĕm dăɣ-immun-năwăn, iṭṭĕf-kăwăn i-ašăl wa n-tebădde dd-mad-iqqĕl Ɣisa Ălmasex, wăr t-illa uḍlem kăwăn-iwarăn. 9Măssinăɣ-i kăwăn-dd-iɣrăn s-iman-net i-ad-tărtĕyăm d-Rure-s Ɣisa Ălmasex-i n-Emăli-nănăɣ, ămaɣdal a ămoos. 10Ayĕtma! Ǝttarăɣ dăɣ-wăn dăɣ-idĕm n-Emăli-nănăɣ Ɣisa Ălmasex d-ad-tahĕrĕm iyyăn n-emm, wăr itĕmmalet băḍḍo-băḍḍo wăl' iyyăn jere-wăn, ăjăt hărăt iket-net s-iyyăt tayĕtte d-iyyăn n-ĕnniyăt. 11A-wen janneɣ-awăn-t, ayĕtma-ɣ, făl-a-s, jan dăɣ-i ăddinăt n-ehăn wa n-Kĕluwi isălan ădduuttătnen n-a-s, ĕllan-t ikĕnnasăn dd-orawnen tibĕḍḍawen jere-wăn. 12Ǝgleɣ har ĕsleɣ făw a-s ɣur-wăn dihen, ĕllan-t iyyăḍ jannănen: "Năkkăneḍ, a-wa făll-igla Bulĕs a făll-nĕgla." Iyyăḍ jannen: "Năkkăneḍ, Ăbbăloš a năssof", jannen daɣ iyyăḍ: "Aa, năkkăneḍ ɣas, Bĕṭrus a-s nĕlkam", jannen daɣ wi iyyăḍnen: "Făw, năkkăneḍ, Ɣisa a-s nĕlkam." 13Uhĕn kăwăneḍ, ma kăwăn-ijrăwăn? Ajăn Ălmasex, ibḍa meɣ ăẓun? Ajăn Bulĕs a ătwăṣlăbăn dăɣ-tĕssĕba n-ibăkkaḍăn-năwăn? Ajăn, isĕm wa-nin Bulĕs a-s tătwăsălmăɣăm dăɣ-aman? 14Ămmoyăɣ i-Măssinăɣ a-s, wăr t-illa ere dăɣ-wăn ăssilmăɣăɣ, kunta wădden, Krisbus d-Gayĕs 15i-ad-wăr ijĕnn ăwadĕm wăl' iyyăn a-s isĕm wa-nin a-s ătwăsălmaɣ dăɣ-aman. 16Ănšăt-ahi-dd, ĕkteɣ-dd a-s năkk a issĕlmăɣăn kăl-ehăn wa n-Stifanas. Ḍarăt ăddinăt-win-dăɣ, wăr-ĕssenăɣ făl ere ăssilmăɣăɣ dăɣ-aman ɣur-wăn ed, năkk, 17wădden asĕlmaɣ n-ăddinăt dăɣ-aman a făl hi-dd-ăšmašăl Ălmasex, ănn-ak, ăšmašăl-ahi-dd i-ad-sĕllĕnžeɣ ăddinăt, wădden s-a iglan s-tayĕtte ta săɣren dăgg-adĕm i-ad-wăr fĕnnĕẓăɣ hărăt dăɣ-tărna ta hăt tamăttant ta ija Ălmasex făll-tajĕttewt. 18Tidĕt, ălxuṭbăt wa ihălăn ebre n-isălan n-tamăttant ta ija Ɣisa făll-tajĕttewt, ămoos i-wi hallăknen mălayăɣna măšan, năkkăneḍ-i dd-iɣlăs Măssinăɣ, ămoos-anăɣ tărna ta t-dd-fălăt. 19Dăɣ-isălan n-a-wen-dăɣ a dăɣ-innă ĕlkĕttab n-Măssinăɣ: "Ad-ăɣšĕdăɣ iɣăfawăn n-imĕssorha, sĕbboṭṭĕlăɣ musnăt n-kăl-musnăt." 20Šămad isălan-den-dăɣ, ma s-ăddooben imĕssorha tĕnna-net? Ma s-ăddooben kăl-musnăt iji-net? Ma s-ăddooben inĕsdebbărăn n-ăddunya-ta-dăɣ tĕnna-net? Măssinăɣ iman-net a issĕtbătăn a-s sărho n-ăddunya-ta-dăɣ, mălayăɣna ɣas 21făl-a-s, šămad ăddunya-ta-dăɣ, ĕnta hakd sărho-net, indăr-as ad-tĕzzĕy Măssinăɣ-i s-a-wa ija iket-net, sărho a-s t-ija, ijrăẓ-as ad-iɣlĕs imumĕnăn s-immun săr-s, a-wen, jan-t wi săr-s wăren omen, mălayăɣna. 22Ǝnhĕywăt ɣas, kăl-Ălyăhud, wăr-ošelăn ɣas ar ḍarăt ahănay n-ijităn n-Măssinăɣ, kăl-Ălyunan ĕntăneḍ, sărho wa n-fălṣăfa a ḍarăt ošalăn, 23măšan, năkkăneḍ, Ălmasex wa ătwăṣlăbăn făll-tajĕttewt a nĕxaṭṭăb, ămoos a-wen i-kăl-Ălyăhud a-s wăr-ĕrhen măsăllăt-net, ămoos i-inĕẓẓulam mălayăɣna. 24Hakd a-wen-dăɣ, ămoos i-ăddinăt-wi dd-iɣră Măssinăɣ s-iman-net i-ad-tăn-iɣlĕs, jer-i n-kăl-Ălyăhud wăla i n-kăl-Ălyunan, tărna d-sărho wa tăn-isalmadăn s-Măssinăɣ. 25A-wa dd-ifălăn Măssinăɣ wăr jen ăddinăt hărăt, ojăr sărho wa t-ihăn, uhĕn wa ihăn dăgg-adĕm iket-dăɣ-năsăn, a-wa dd-ifălăn Măssinăɣ wăr jen dăgg-adĕm hărăt, ojăr ăṣṣahăt wa t-ihăn, wa ihăn dăgg-adĕm iket-dăɣ-năsăn. 26Sĕjrăhăt ɣas, ayĕtma, ĕmmĕk wa s-kăwăn-dd-iɣră Măssinăɣ s-iman-net. A-s kăwăn-dd-iɣra, wăr dăɣ-wăn ĕjjĕtăn imĕssorha s-a-wa ĕḍkăḍăn dăgg-adĕm s-sărho, wăr kăwăn-hen daɣ imĕṣṣuha wăla ilăllan s-ĕjut, 27măšan a-wa-dăɣ ămoosăn dat-tiṭṭawen n-ăddunya-ta-dăɣ mălayăɣna, ĕnta a ăsnăfrăn Măssinăɣ i-ad-iqqĕn iɣăfawăn n-imĕssorha, a-wa-dăɣ wăr jen kăl-ăddunya hărăt, a ăsnăfrăn i-ad-tăn-isĕmmăxĕlxĕl săr-s. 28Hărătăn-win-dăɣ, wăr-ĕssĕfrărăn, ĕlkăhăn, wăren ĕla idĕm data-săn, a ăsnăfrăn Măssinăɣ i-ad-tăn-isĕmmăḍrĕy săr-săn. 29A-wen, ij'-e Măssinăɣ i-ad-wăr-isĕkif ăwadĕm wăl' iyyăn iman-net data-s. 30Ǝnta-en-dăɣ a kăwăn-osăɣăn d-Ɣisa Ălmasex-i hawăn-dd-ămoosăn sărho wa dd-ifălăn Măssinăɣ d-iqqud; idĕm-net a dăɣ-kăwăn-iššĕšdăj Măssinăɣ, ăsdărfăt-kăwăn-dd dăɣ-ibăkkaḍăn-năwăn 31s-ĕmmĕk wa s-tăn-innă ĕlkĕttab a-s innă: "Ere s-ăsriwăn iman-net-dăɣ, israwnet dăɣ-tĕssĕba n-a-wa has-ija Măssinăɣ."

will be added

X\