HEBREOS 8

1Alué napu ne ruinali, ye júkuru: Alué ye wa'lula balé napu jipe ajtí asíriga 'la balé ju, alueka nabí si ajtime júkuru Wa'lula Onorúgame 'yuga nulá wajtoná napu ajtí Onorúgame. 2Alueka tabilé alarigá ju napurigá jemi mochígame balé, aminami tabilé ralámuli newalila re'obachi nóchame ju, alueka Onorúgame 'yuga nóchame ju nabí 'pa rewagachi. 3Jena wijchimoba mochígame balé we'ká e'karúgame kógile Onorúgame. Esúsika tabilé we'ká e'karúgame kógile Onorúgame, iligá pe bo'nepi mukule Onorúgame kógimia. 4Jipe jemi einásaká alué Esukristo, pecha nochámikó alué nóchali napu nóchame ju alué balé jena jipe. 'Ma we'ká balé ju napu kógime ju bilé ajágame mukúgame bi'weme kórigá chátiri 'nátili napurigá nulame ju alué nulalí Moisesi nila. 5Alué u'tá re'obá wi'chite newárigime napu tabernákulo anilime nile napu nóchame nile alué balé, alueka pe tétali ju churikáréko alé 'pa rewagachi napu Onorúgame ajtí. Alekeri napu'lige Moisesi re'obá newale wi'chite, Onorúgame anele: «'La 'we a'lá 'nátiga newawa alué nóchali re'obá newá, 'la alarigá newawa napurigá ne mué benírige napu'lige napuíka mochírige alé wa'lú rabó.» 6Alué Esusi nochálila ka asíriga a'lala ju me'tigá alué balé nochálila jena wijchimoba mochígame. 'Lige alué ra'íchali napu Esusi gatélige abé 'la ju me'tigá Moisesi gatélala. Onorúgameka anile Esusi abé 'la semáriga gu'írimio ralámuli. 7Tabilé rokárélasaká alué ra'íchali gatélime Moisesi nila, 'liko 'we 'la sébali nítékuru napu nokame ju balé. 8Onorúgameka anile tabilé sébali níligará alué gatélime. Rekó ralámulika 'we semáriga noche alé re'obachi, Onorúgameka etele alué ralámuli tabilé 'la sébali olachi, alekeri Onorúgame anele ralámuli: Uché bilé ra'íchali gatémala ne suwábaga alué ralámuli Israeli ejperégame 'yuga 'lige Jurá ejperégame 'yuga. 9Ye ra'íchali tabilé alarigá nímala napurigá 'ya napu'lige buyánilige ne alué ralámuli alé wa'lú gawí bo'ígichi Ejipto anilichi. Neka napurigá bilé rió sekachí cha'pigá enágame bo'né inolá, alarigá simíturu ne alué ralámuli israelita 'yuga. 'Lige alueka tabilé e'wáturu ne ra'íchali ruwichi, alekeri a'réturu ne. 10Alué ra'íchali napu ne gatémolálige ralámuli israelita 'yuga alarigá nímala: Pachágana asimé ne a'pílipi ralámulichi 'lige gu'írimala ne oyérilichi napurigá ne nulá. 'Liko ne 'yuga mochímala alué ralámuli, 'lige alueka ne 'kúchila nímala 'lige pe ne'chí si na'támala. 11'Liko alué ralámuli 'ma tabilé ruyémili ju uché jaré ralámuli chieri ko ne, suwábaga alué napu ekí narékame ju ne nila 'nátili 'la machimela ne'chí, tabilé chéré rekó e'wélala ke 'lige rekó pe nóchame ke. 12Neka 'la e'kámala ke cha nokogá járome. 'Ma e'kásaká, 'ma tabilé nélémala ne alué chátiri 'nátili alué ralámuli nila, neka 'ma 'la e'kágempá. 13Napu'lige Onorúgame nuebo korichi ye ra'íchali, pe ruwime ju alué 'ya nerúgame ra'íchali 'ma o'chérame ko. Alué 'ya nerúgame ka 'ma 'la sébali oláguru napurigá Onorúgame najkí.

will be added

X\