Rom 8

1Yaksi ba mee ngo mmak canɗiyeel ɗiibish nkaa nyem ɗi mo ndi̶ghi̶n Jesu Kristi kas. 2Mpeeɗi ɓal ɗi ni a mu Riin kì̵ Naan ɗi nii cín seen, ɗi ni ndi̶ghi̶n Jesu Kristi ni kì̵ fwoon wan mɓut waar mu shikbish ki̶ mu muut. 3Waar ɗi gyet Naan wuri cín ni nsar kì̵ Mosis, ba ni mak ɓam mun kas, mpeeɗi mun gurum, ba jí mun ki̶ ɓal mpee mak kiyeer waar ni kas. Amma yaksi, Naan wuri c`in mbii ɗi, ba jí waar ni mak c`in ni kas. Naan wuri lop Làa fi̶ri ndi̶ghi̶n nan kaa mun gurum si, mpeku wuri tep ɓal ki̶ shikbish ɗi ndi̶ghi̶n mun gurum. 4Mpeku mu mak c`in mbii ɗiiret ɗi Waar ni sat, ne mu c`in, ki̶ taji mun gurum mu mwaan ndang kyaghar mu mi̶se funu ɗiibish mo kas. Amma ni ret ku mu mwaan ndi̶ghi̶n ɓal mu Riin zak. 5Nyem ɗi moo mwaan a ndi̶ghi̶n nan, ɓe putughup furu moo lepan a nkaa kyaghar mu nan. Amma nyem ɗi moo mwaan a ndi̶ghi̶n Riin, ɓe moo lepan a nkaa Riin Ɗiiɓang. 6Katɗang gurum ki̶ mwaan a ndang pan mu mi̶se mu gurum, ɓe peekyes ni a muut ɗi ngaa-ngaa, amma katɗang a Riin kì̵ Naan wurii tap, ki̶ pan mu gurum, ɓe peekyes ni a seen ɗiiso ngaa-ngaa ki̶ tongriyang zak. 7Katɗang pan mu mi̶se kì̵ gurum ni ɗee a koghorong nkaa wuri, ɓe ngo mi̶ni ɗee a shaarlek kì̵ Naan, mpeeɗi ba wuri mak c`in mbii ɗi Waar kì̵ Naan ni sat kas. 8Nyem ɗi moo mwaan a ndi̶ghi̶n kyaghar mu mi̶se mu nan furu ɓe ba mo mak tong ɗyen nNaan kas. 9Amma ba wun wu kuɗi a ndi̶ghi̶n mi̶se mu gurum kas, a Riin kì̵ Naan ki̶ tap wun. Katɗang ɓe Riin kì̵ Naan ni ndi̶ghi̶n putughup fuu mo azeen. Ngo ɗi ba wuri ki̶ Riin kì̵ Kristi kas, ɓe ba gwar mi̶ni, a mu Kristi kas. 10Amma katɗang Jesu Kristi wurii tong ndi̶ghi̶n wun, ɓe wun ki̶ seen, mpeeɗi wuri kì̵ le ku wu ɗee a ɗiiret nyit kì̵ Naan, koo ɗi nan fuu mon mmurap, mpeeɗi wu c`in shikbish. 11Katɗang Riin kì̵ Naan, ɗi wuri yaghal ki̶ Jesu Kristi a peemúut, wuri ndi̶ghi̶n wun, ɓe ni ɗee agaak nee, wuri ɗi wuri yaghal ki̶ Jesu Kristi a peemúut, wurin ncín seen nwun, mɓwoon ɗi suk fuu mo kì̵ murap, shiɓal kì̵ Riin fi̶ri ɗi ni ndi̶ghi̶n putughup fuu mo. 12Mpeemi̶ni, ɗyemnaa fi̶na mo, mun kì̵ káat nJesu Kristi, ɓe taji mu mwaan ndang mi̶se mu gurum kas. 13Katɗang wu mwaan a ndi̶ghi̶n kyaghar mu mi̶se mu gurum, ɓe wunn mmurap. Amma katɗang wun mwaan a ndi̶ghi̶n ɓal mu Riin kì̵ Naan, ɓe wu le ku ɗak ɗiibish mu mi̶se mu gurum ni muut, ɗangɓe wun nkat seen. 14Jir nyem ɗi Riin kì̵ Naan wurii sel mo, ɓe mo a jep kì̵ Naan mo. 15Riin ɗi Naan wuri cín mun, ba ni a mpee ku ni le mu ɗee ɗi a nyem ki̶i̶rmuut mo kas. Amma wuri le mu ɗee a jep ki̶ Naan mo. Ndi̶ghi̶n wuri, ɓe mu mak pet Naan nee. "Daa puun funu." 16Riin kì̵ Naan ni le ku mu man ndi̶ghi̶n putughup funu mo nee, azeen-nzeen mun a jep kì̵ Naan mo. 17Kaaɗi mun a jep fi̶ri mo si, ɓe mun nkat ɗiiret ɗi Naan wuri kì̵ ten le ni mpee nyem fi̶ri mo. Katɗang mun a ɗiimi̶ndong ki̶ Daa Jesu Kristi, ɓe mun nlap mbii ɗi Naan wuri kì̵ ten le ni mpee Jesu Kristi zak. Katɗang mu shwaajeel ashak ki̶ wuri, ɓe mun tong ashak ki̶ wuri ndi̶ghi̶n ɗiiɗes kì̵ Naan. 18Wan pan nee, jeel ɗi muu shwaa yaksi, ba ni mak ku mo kaghan ni shi ɗiiɗes ɗi Naan wurin nwoo ni mmun parpuus mi̶ni kas. 19Jir mbii ɗi Naan wuri le mo, moo kyaghar mpee gong puus ɗi Naan wurin nwoo ɗiiɗes fi̶ri njep fi̶ri mo. 20Mbii ɗi Naan wuri le mo, mo ɗee a ɗiibuu, ba ɗiisi ni a ɗyen ki̶ mo kas, a Naan wuri kì̵ ten le ku mo ɗee aasi, shi canciin. 21Mpee mbii ɗi wuri le mo, ku mo pwat ɗi ndi̶ghi̶n sar kì̵ mbii ɗiibish ɗi ni wat mo, mpeku taji mo ɗee a ki̶rom kì̵ mbii ɗi nii wam kas. Amma mpeku mo kat ɗiiɗes ɗi kaa jep kì̵ Naan mo si. 22Mu man nee, jir mbii ɗi Naan wuri le mo ndi̶ghi̶n yil ɗiisi, mo nkaa gwaar gwan shiɓal, ki̶ mo nkaa shwaajeel kaa mat ɗi aak ki̶ se wura si. Mo ɗi nkaa shwaajeel mi̶ni har cicinsi. 23Ba a mbii ɗi Naan wuri le mo, mo nkaa gwaar gwan ni ɓejee kas, amma ki̶ mumun ɗi Naan wuri kì̵ ten shee cín Riin fi̶ri mmun shi zughum. Mun ɗi nkaa maap ndi̶ghi̶n putughup funu mo, kaaɗi muu gong parpuus ɗi Naan wurin nlap mun kaa jep fi̶ri mo si. Mi̶ni a parɗi wurin nfwoon mun ɗi nsar kì̵ mbii ɗiibish mo jir. 24Naan wuri ɓam mun, a mpeeɗi muu leyit nkaa mbii ɗi wuri sat ne, mon ndung j`i. Amma katɗang muu ten mu naa mbii ɗi muu leyit nkaa ni, ɓe ba ni kuɗi a leyit kas. A we mmak canciin leyit nkaa mbii ɗi wuri kì̵ ten naa ni ye? 25Amma katɗang muu canciin a nkaa mbii ɗi ba muu naa mo kas, ɓe mun ngung ku mu gong ɗi. 26Riin kì̵ Naan wurii ɓam mun mɓut ncíinɓal funu mo, mpeeɗi ba mu man kaaɗi ni ret ku mu c`in aduwa si kas. Amma Riin shikáa fi̶ri, wurii ɗang mpee mun ki̶ gwan ɗi ni met mu sat. 27Naan ɗi wuri man putughup kì̵ gurum mo jir, ki̶ wuri man pan kì̵ Riin fi̶ri. Riin kì̵ Naan, wurii ɗang pe Naan mpee nyem ɗiiɓang mo, ntiit kì̵ ɗyen kì̵ Naan. 28Mu man nee, ndi̶ghi̶n mbii mo jir, ɓe Naan wurii c`in ɗak ɗiiret fi̶ri mo, a mpee ɓam nyem ɗi mo wal nwuri. Nyem ɗi wuri kì̵ ten pi̶rep mo ntiit ki̶ ɗyen fi̶ri. 29Nyem ɗi Naan wuri kì̵ ten bi̶lip mo yam-yam, ɓe wuri ten waghar mo leɗik, mpeku mi̶se furu mo ɗee ɗi kaa mu Làa fi̶ri si, ɗi wuri ɗee a shee làa mɓut ɗyemni̶ghi̶n mo ɗes. 30Nyem ɗi Naan wuri ten bi̶lip mo si, ɓe wuri pi̶rep mo, mpeku mo ɗee a nyem fi̶ri mo. Nyem ɗi wuri pi̶rep mo, ɓe wuri le ku ɗee a ɗiiret nyit fi̶ri. Nyem ɗi wuri le ku mo ɗee a ɗiiret nyit fi̶ri, ɓe wuri cín ɗiiɗes mmo zak. 31Mun nsat a me, ɗiki̶ nkaa mbii ɗiisi mo zak ye? Katɗang Naan wuri ɗi ashak ki̶ mun, ɓe a we mmak c`in nlek ki̶ mun ye? 32Naan ɗi ba wuri tap kiyee Làa fi̶ri kas, amma wuri cín Làa fi̶ri mpee mun jir, ɓe cirang ɗang wurin nnook cín mbii mo mmun jir ashak ki̶ wuri shi zughum ye? 33A we mmak satpo ɗiibuu nkaa nyem kì̵ Naan mo ye? A Naan a ngo ɗi wuri le mun a ɗiiret. 34Ɓe a we mmak sat ne mun a nyemɗiibish ye? Kristi Jesu wuri kì̵ muut mpee mun, ɗangɓe Naan kì̵ yaghal ki̶ wuri a peemúut. Yaksi, ɓe wurii tong nsarse kì̵ Naan, ki̶ wurii ɗang ɗi pu Naan mpee mun. 35A we mmak ɓàk mun ki̶ wal kì̵ Kristi ye? Koo mbii daampee, koo jeel, koo ɗi gurum mo lejeel mmun, koo neen, koo ngum, koo a lagham, koo kwai ye? 36Ni a riran ndi̶ghi̶n takarda kì̵ Naan nee: "A mpee sum fugha, ɓe mun ndi̶ghi̶n jeel mu muut shidaar-shidaar. Mo mang mun kaa tum ɗi gurum mon ndung so nfet ni si." 37Amma ndi̶ghi̶n mbii ɗiisi mo jir, ɓe mu met nyemse koghorong mo, shi ɓal kì̵ Jesu ɗi wuri wal mmun. 38Wan man azeen nee, ba mee mbii mmak ɓàk mun ki̶ wal kì̵ Jesu kas, koo ɗi a muut, koo seen, koo a nyemlop kì̵ Naan mo, koo a riin ɗiibish mo, koo a iiko mu ɗeng mo, koo mbii ɗi mo ɗi yaksi, koo a mbii ɗi mon ndung j`i a kiyeen. 39Koo a mbii ɗi mo ndi̶ghi̶n ɗengnaan mo, koo a ndi̶ghi̶n jurung kì̵ yil ni, ɓe ba mee mbii ɗi, ɗi nin mmak ɓàk mun ki̶ wal, ɗi Naan wuri ki̶ni mpee mun, ɗi ni ndi̶ghi̶n kristi Jesu Daa funu kas.

will be added

X\