1 Ɗyemnaa mo, ba wu man nee, Waar nii c`in mulki nkaa gurum a kaaɗi wuri kuɗi ki̶ seen kas aa? Wan ki̶n satpo ɗiisi a nwun ɗi wu man Waar ni. 2 Ni a kaa sumpo ɗiisi si, mat ɗi wura kì̵ c`in ɗik, ɓe Waar mu ɗik ni ki̶ ɓal wura ashak ki̶ mish fi̶ra, har parɗi mish ni wurin muut. Katɗang parɗi mish ni wuri muut, ɓe ba Waar mu ɗik ni kuɗi ki̶ mee ɓal nkaa mat ni wura kas. 3 Amma katɗang mish ni wuri kuɗi ki̶ seen, ɗangɓe mat ni wura so ɗik mmee gwar ɗiici, ɓe gurum mon mpet wura a mat ngaa. Amma katɗang mish ki̶ mat ni wuri kì̵ muut, ɓe ba gurum mon mpet wura a mat ngaa kas. 4 Ɗyemnaa mo, ni aasi pe wun ɗi zak, wun, wuu ten wu murap ndi̶ghi̶n Waar ni, mpeeɗi wuu ɗee a nyem ɗi mo kì̵ ɓal wun ndi̶ghi̶n shin kì̵ Daa Jesu Kristi. Yaksi wuu ɗee a mu Kristi, wuri ɗi Naan yaghal kì̵ wuri a peemúut. Mun ki̶ wun, muu ɗee ki̶ koghop ni mpee ɗak kì̵ Naan. 5 Kaaɗi gyet mu kuɗi yam, mɓut shikbish, ɓe koo ɗi jí muu man Waar ni, ɓe Waar nii le ku mu c`in ɗak ɗiibish har ni j`i ki̶ muut nkaa mun. 6 Amma yaksi ɓe ba mu kuɗi a nder kì̵ Waar ni kas, mpeeɗi mi̶se funu ɗiiyam ni ɗee a ɗiimumuut. Mpeemi̶ni, mbii ɗiibish ɗi gyet ni ndi̶ghi̶n mun si, ba ni kuɗi a koghorong nkaa mun kas. Yaksi, ba mun nseyil nNaan a ndi̶ghi̶n Waar ɗi wuri ran ni yam si kas, amma mun nseyil nwuri a ndi̶ghi̶n ar ɗiipoo shi Riin fi̶ri. 7 Mun nsat a me ɗak ye? Nee, Waar ni a mbii ɗiibish aa? Waash! Ba ni aasi kas koo diɓen! Katɗang ba gyet a mpee Waar ni kas, ɓe ba gyet wan man shikbish ki̶ mbii ɗiiret kas. Katɗang ba gyet a mpeeɗi Waar ni sat ne taji a kyaghar mbii kì̵ gurum kas, ɓe ba ɗi wan man kyaghar mbii kì̵ gurum kas. 8 Amma shikbish ni katpee ndi̶ghi̶n Waar ni, ɓe ni le ku wan ki̶n kyaghar mbii mo shini-shini ndi̶ghi̶n putughup fi̶na. Katɗang ba a mpee Waar kas, ɓe ɗi ba mee shikbish ɗi kas. 9 Gyet yam, kaaɗi ba wan man Waar kas, ɓe wan ki̶ seen. Amma kaaɗi Waar ni j`i, ɓe shikbish ni j`i put, ɗangɓe ni le wan muut. 10 Waar ɗiisi ni, a mpeku gurum mo kat seen ɗi, amma ni waa j`i aa muut nwan. 11 Mpee Waar ni, ɓe shikbish ɗi ni ndi̶ghi̶n wan, ni katpee ku ni num wan ɗi, har ni le kun c`in shikbish. Mpeemi̶ni ɓe shikbish nii j`i ki̶ muut nkaa wan. 12 Amma Waar kì̵ Naan ni mo a ɗiiɓang, ki̶ koo a Waar ɗiiɗang ye, ɓe ni a ɗiiɓang, ki̶ ni a ɗin ndi̶re, ki̶ ni a ɗiiret zak. 13 Kyet ɗiisi ni kám nee, mbii ɗi ni a ɗiiret, ɓe a nin nwaa baaj`i ki̶ muut nkaa wan mmi̶ni aa? Waash! Koo diɓen. Amma a shikbish ɗi ni ndi̶ghi̶n wan si, a ni j`i ki̶ muut, mpeku ni kám sat ɗi nee, ni a shikbish. Mpeemi̶ni Waar ɗi ni a mbii ɗiiret, nii kám nee shikbish ni a mbii ɗiibish hakyeng. 14 Mu man nee, Waar ni a mu Riin, amma wan a gurum ɗi ba gyet wan ki̶ Riin kì̵ Naan kas. Gyet wan ɗee a ki̶rom kì̵ shikbish. 15 Ba gyet wan man mbii ɗi wan ki̶n c`in mo kas, mpeeɗi gyet wan ki̶n c`in a mbii ɗi ba ɗyen nwan nc`in mo kas. Amma mbii ɗi gyet wan kwar mo, ɓe wan ki̶n c`in a mi̶ni mo. 16 Katɗang gyet wan ki̶n c`in a mbii ɗiibish ɗi ba ɗyen nwan nc`in ni kas, ɓe ɗiisi ni kám nee, wan riɓet ne Waar kì̵ Naan ni a ɗiiret. 17 Ni aasi ɓe, ba a wan ki̶n c`in mbii ɗiibish ni mo kas, amma a shikbish ɗi ni ndi̶ghi̶n putughup fi̶na. 18 Wan man nee, ba mee mbii ɗiiret mɓut mi̶se fi̶na kas. Wan ki̶n riɓet c`in a mbii ɗiiret mo, amma ba wan mak c`in mo kas. 19 Mbii ɗiiret ɗi wan ki̶n riɓet c`in mo, ɓe ba ki̶n c`in a mo kas, amma mbii ɗiibish ɗi wan ki̶n kwar mo si, ɓe ki̶n c`in a mi̶ni mo. 20 Katɗang wan ki̶n c`in a mbii ɗi ba ɗyen nwan nc`in mo kas, ɓe ɗiisi ni kám nee, baa a wan ki̶n c`in mbii ɗiibish ni mo kas, amma a shikbish ɗi ni ndi̶ghi̶n wan. 21 Wan kat mbii ɗiisi ni ɗee nwan a kaa mee mi̶se si. Wan ɗi wan ki̶n riɓet c`in a mbii ɗiiret, ɓe wan waa c`in a mbii ɗiibish. 22 Ndi̶ghi̶n putughup fi̶na, ɓe wan ki̶n riɓet c`in a mbii ɗi Waar kì̵ Naan ni sat. 23 Amma wan naa mee Waar ɗiici ni nkaa c`in ɗak ndi̶ghi̶n san fi̶na mo, ɗi nii c`in lek ki̶ Waar ɗi pan fi̶na mang. Ni yaa wan, ki̶ nii le wan ɗee a ki̶rom kì̵ shikbish ɗi ni ndi̶ghi̶n san fi̶na mo. 24 Jeel mi̶na oo! A we mput ki̶ wan ndi̶ghi̶n nan ɗi ni a mu muut si ye? 25 Amma wan pi̶lang Naan, mpeeɗi ndi̶ghi̶n Jesu Kristi Daa funu, ɓe wuri kì̵ put ki̶ wan. Mpeemi̶ni wan shikáa fi̶na ɓe pan ɗi ni ndi̶ghi̶n putughup fi̶na, ni riɓet ku wan seyil nNaan, amma ndi̶ghi̶n nan fi̶na si, ɓe shikbish ɗi ni ndi̶ghi̶n wan si, ni se koghorong nkaa wan.
