Rom 4

1Wu pan nkaa Abraham puun ki̶ puun funu mo ndi̶ghi̶n nan. Ni kám a me mmun ye? 2Katɗang gyet Abraham wuri ɗee a ngo ɗiiret a mpee mee mbii ɗi gyet wuri c`in, ɓe ɗi gyet wuri ki̶ mbii ɗi wurin ncanjagham ɗishik amma ba a nyit kì̵ Naan kas. 3Amma po kì̵ Naan ni sat a meye? "Ni sat nee, Abraham wuri cínzeen nNaan. Mpeemi̶ni ɓe Naan le wuri ɗee a ngo ɗiiret nyit fi̶ri." 4Katɗang gurum c`in ɗak, ɓe mon nkwat wuri mpee ɗak ni. Shaghal ɗi moo cín nwuri ni, ba a zughum kas, amma mo cín nwuri a mpee ɗak ɗi gwar ni kì̵ ten c`in. 5Ba a mpee mee ɗak ɗi gurum kì̵ c`in, ɗangɓe wuri ɗee a ɗin ndi̶re nyit kì̵ Naan kas. Amma Naan ki̶ le mu ɗee a ɗiiret nyit fi̶ri a shi zughum, a mpeeɗi mu cínzeen nJesu Kristi. 6Ni a kaa ɗi Devid wuri sat si nee, ɗiiret ni ɗi nkaa ngo ɗi Naan mang wuri a ngo ɗin ndi̶re, ngo mi̶ni kat retnyit ɗiiɗes, koo ɗi ba gwar mi̶ni c`in mee mbii ɗi ni le ku Naan kwat wuri kas, 7nee: "Nyem ɗi Naan wuri fwo shikbish furu mo, ki̶ wuri vwang mo ndi̶ghi̶n shikbish furu mo, ɓe nyem mi̶ni mo nkat retnyit. 8Ngo ɗi ba Naan wuri tang shikbish fi̶ri mo pe wuri kas, ɓe a ngo mi̶ni nin nkat retnyit." 9Retnyit ɗiisi ɗi Devid wuri satpo nkaa ni, ni a mpee nyem ɗi mo kì̵ can mo ɓejee aa? Ba ni aasi kas. Koo nyem ɗi ba mo can mo kas, ɓe retnyit ɗiisi ni a mpee mo zak. Muu ten mu sat nee, Abraham wuri ɗee a ngo ɗiiret, a mpeeɗi wuri cínzeen nNaan. 10Gyet kaaɗi Naan wuri lap Abraham kaa ngo ɗiiret si, ɓe mo kì̵ can wuri aa? Waash! Ɓe ba gyet mo ki̶ can wuri kas akuɗang. 11Can ɗiisi ni ɗee a mbii aapo nee, Naan wuri kì̵ lap Abraham kaa ngo ɗiiret si. Mpee ɗiisi, ɓe Abraham wuri ɗee a puun mu nyem ɗi mo cínzeen nNaan jir, shii kì̵ mi̶ni nee, a nyem ɗi Naan wuri mang mo ɗee a kaa nyem ɗiiret mo si, a nyem ɗi mo cínzeen nNaan mi̶ni, koo ɗi ba mo kì̵ can mo kas. 12A wuri zak, a puun ki̶ nyem Yahudi mo ɗi mo kì̵ can mo, katɗang mo mwaan ndi̶ghi̶n shiimwaan mu Abraham ni, ki̶ mo cínzeen nNaan, kaaɗi gyet Abraham wuri cínzeen nNaan si, akuɗang moo can wuri. 13Gyet yam ɓe Naan wuri satpo Abraham ki̶ dang fi̶ri mo nee, wurin ncín yil ni nsar kì̵ mo. Ba gyet Naan wuri satpo mi̶ni Abraham a mpeeɗi gyet wuri tap Waar kì̵ Mosis kas. Naan satpo mi̶ni Abraham, a mpeeɗi gyet wuri cínzeen nNaan, mpeemi̶ni wuri ɗee a ɗin ndi̶re nyit kì̵ Naan. 14Katɗang ɗi a nyem ɗi moo kiyeer Waar ni mon nkat mbii ɗi Naan wuri kì̵ ten sat ni, ɓe ɗi ba cínzeen ni ki̶ mee koghop ni kas, ɓe ɗi mbii ɗi Naan wuri sat ni a ɗiibuu. 15Waar mo, moo j`i ki̶ ɗiyeel kì̵ Naan nkaa gurum, mpeeɗi katɗang ɗi ba Waar ni mo ɗi kas, ɓe ba ɗi gurum moo tep Waar ni mo kas. 16Po ɗi Naan wuri sat ni a mpee nyem ɗi mo cínzeen nwuri, mpeku ni ɗee ɗi agaak nee, mbii ɗi Naan wuri c`in ni a mpee ɗiiret fi̶ri ɗangɓe wuri cín mbii ɗiisi mo mmun, kaaɗi wuri kì̵ ten sat si zak. Wuri cín mbii ɗiisi mo jir nyem kì̵ Abraham mo, ba a mpee nyem ɗi mo kiyeer Waar ni mo ɓejee kas, amma nyem ɗi mo cínzeen nNaan, kaaɗi gyet Abraham cínzeen nwuri si. Abraham wuri a puun funu jir. 17Kaaɗi mo kì̵ ran ni ndi̶ghi̶n takarda kì̵ Naan si nee, Naan sat Abraham nee; "Wan ki̶n le wugha a puun kì̵ gurum mo ɗes." A Naan shikáa fi̶ri wuri satpo ɗiisi Abraham. Naan ɗi Abraham cínzeen nwuri zak. Naan ɗi wurii cín seen nyem ɗi mo kì̵ murap mo, ki̶ ɗi wurii le mbii mo, mbii ɗi ba mo ɗi kas. 18Abraham wuri naa ncínzeen nNaan, ki̶ wuri leyit nkaa Naan, koo ɗi ni ɗee pe gurum a kaa mbii ɗi ba nin nkyam c`in kas si. Mpeemi̶ni ɓe Abraham ɗee a puun kì̵ gurum mo ɗes. Ni a ntiit ki̶ mbii ɗi mo kì̵ ten sat nwuri si nee, "Wugha ɗee a puun mu yil mo ɗes." 19nTiit ki̶ mi̶ni, ɓe Abraham wuri ki̶ wul ɓit mo ɗari mi̶ndong. Wuri man nee, wuri ɗee a kaa ngo ɗiimumuut si, ki̶ mat fi̶ri Seera wura a jeer zak, ki̶ pee làa-làa ni kì̵ ɗel, amma cínzeen kì̵ Abraham ni ɗar ɓal-ɓal. 20Ba Abraham wuri sat kyetwa, koo wuri nook cínzeen ndi̶ghi̶n mbii ɗi Naan kì̵ ten sat ni kas, amma wuri cínzeen hakyeng, ki̶ wuri cín ɗiiɗes nNaan zak. 21Abraham wuri fes cínzeen nee, Naan wuri ki̶ iiko mpeku wuri c`in mbii ɗi wuri kì̵ ten tuwoor ɗi. 22A mpee cínzeen fi̶ri, ɗangɓe "Naan mang wuri ngo ɗin ndi̶re." 23Ba a Abraham ɓejee ɗi Naan mang wuri kaa ngo ɗiiret si, mpee cínzeen ɓejee kas. 24Amma mun jir, katɗang mu cínzeen nNaan ɗi wuri yaghal ki̶ Jesu Kristi a peemúut. 25Daa Jesu ɗi mo tu wuri mpee shikbish funu mo, amma Naan yaghal kì̵ wuri a peemúut, mpeku mun, mu ɗee ɗi a ɗin ndi̶re nyit kì̵ Naan.

will be added

X\