Rom 2

1Wun nyem ɗi wuu canɗiyeel ɗiibish ngurum mo, wu man nee, wun shikáa fuu ba wuu put ndi̶ghi̶n ɗiyeel ni kas. Wun ɗi wu sat nee, gurum mo c`in mbii ɗiibish, amma wun shikáa fuu wun nkaa c`in mbii mi̶ni mo aasi zak, ɓe wuu ten wu canɗiyeel ɗiibish nsuk fuu mo mmi̶ni. 2Mu man nee, Naan wuri a ɗin ndi̶re, ki̶ wurii canɗiyeel ɗiibish nyem ɗi moo c`in mbii ɗiibish mo. 3Wugha shaar fi̶na, a man nee nyem ɗi moo c`in kiyeet ki̶ mbii mi̶ni mo, moo c`in a shikbish, amma wugha shikáa fugha, wugha nkaa c`in kiyeet ki̶ mbii mi̶ni mo zak. A pan nee, a mak put ndi̶ghi̶n ɗiyeel kì̵ Naan aa? 4Meeɓe, wugha ki̶ lepan nee, mpeeɗi Naan wurii gung, ki̶ wurii naajeel funu, ɓe ba wurin ntokɗiyeel mmun kas. Azeen, a man nee, mbii ɗi ni le ɗangɓe Naan wuri naajeel funu, ni a mpeku wuri cínpee ɗi mmun, ku mu tuwap ɗi. 5Amma katɗang wu cíi ki̶lingpee nyaghas, ku wu kwar tuwap, ɓe wuu ɗul a jeel ɗiiɗes j`i nkaa suk fuu mo. Wunn nlap kwat mi̶ni, a parpuus ɗiiɗes si, ɗi Naan wurin nwoo tughup fi̶ri ki̶ wurin ntokɗiyeel ngurum mo ndi̶re-ndi̶re. 6Parpuus mi̶ni, ɓe Naan wurin nkwat koo a weye, ntiit-ntiit ki̶ ɗak ɗi ngo ni kì̵ ten c`in mo. 7Nyem ɗi moo naa nc`in mbii ɗiiret, ku mo leyit furu mo, mpee kat seen ɗiiso ngaa-ngaa, ɓe Naan wurin ncín seen ɗi ba ni ki̶ peekyes kas, nyem mi̶ni mo. 8Amma pak gurum mo, a nyem riɓetkáa mo, ki̶ mo kwar zeen. Moo mwaan a ndi̶ghi̶n shikbish koo pi̶rang ye, ɓe tughup kì̵ Naan nin ntaa nkaa mo. 9Jir nyem ɗi moo mwaan a ndi̶ghi̶n shikbish, ɓe nyem mi̶ni mon nshwaajeel ɗiiɗes, koo ɗi mo a nyem Yahudi mo, ɗi mo shee ki̶lingpo ɗiiret ni, koo ɗi ba mo a nyem Yahudi mo kas. 10Amma Naan wurin ncín ɗiiɗes nyem ɗi mo c`in mbii ɗiiret jir, ki̶ wurin ncín tongriyang mmo zak. Koo ɗi mo a nyem Yahudi mo, ki̶ koo ɗi ba mo a nyem Yahudi mo kas. 11Mpeeɗi ba Naan wurii shwatyit ngurum mo kas. 12Nyem ɗi ba mo man Waar kì̵ Mosis kas, mo jir mo kì̵ c`in shikbish. Mpeemi̶ni ɓe seen furu mon nlagham, koo ɗi ba mo ki̶ Waar ni mo kas. Nyem Yahudi ɗi mo man Waar ni, amma mo c`in shikbish, ɓe Naan wurin ncanɗiyeel ɗiibish mmo, mpeeɗi koo ɗi moo man Waar ni mo, ɓe ba mo mwaan ntiit-ntiit ki̶ mbii ɗi Waar ni sat mmo kas. 13Mpeeɗi ba a nyem ɗi moo ki̶ling Waar kì̵ Mosis ni shi kom, a mo a nyem ɗiiret nyit kì̵ Naan kas, amma see a nyem ɗi moo c`in mbii ɗi Waar ni mo sat. 14(Jir nyem ɗi ba mo a nyem Yahudi mo kas, ɗi ba mo man Waar kì̵ Mosis ni kas, amma mmee naar, ɓe moo mwaan a nkaa mbii ɗi Waar ni sat si. Kaaɗi mo c`in mbii ɗiiret mi̶ni mo, ɓe pan ɗin mputughup furu mo ni kám nee, koo ɗi ba mo man Waar ki̶ Mosis ni kas, ɓe mo man ndi̶ghi̶n putughup furu mo, mbii ɗi ni ret ku mo c`in mo. 15Mwaan furu ni kám nee, mo kì̵ ten man Naan kaa mbii ɗi Waar ni sat si, ɓe mo mak man mbii ɗiiret ki̶ ɗiibish nyit kì̵ Naan.) 16Nin nɗee aasi har puusmi̶ni. Naan wurin ntokɗiyeel ngurum mo a ndi̶ghi̶n Jesu Kristi ntiit-ntiit ki̶ mbii ɗi mo kì̵ ten c`in mo, ki̶ mbii ɗi moo c`in mo a si̶sok ndi̶ghi̶n putughup furu mo jir. A mbii ɗi wan nkaa sat ni ngurum mo ndi̶ghi̶n po ɗiiret ni mmi̶ni. 17Wun a rang ye nyem Yahudi mo? Wun ɗi wuu sat nee, wuu gangkáa a nkaa Waar kì̵ Mosis, ki̶ wuu roghop ne wun a nyem kì̵ Naan mo. 18Wu man mbii ɗi ni ret Naan nyit, ki̶ wu man mbii ɗiiret, mpeeɗi mo kì̵ ten kám nwun ndi̶ghi̶n Waar kì̵ Mosis. 19Wuu fes wu lekáa fuu mo, kaa nyem yaakam nvum mo si, ne wun a peeɓang pe nyem ɗi moo mwaan mpeenkoo mo. 20Wu kám mwaan mmo. Wuu kam-kam nyem ɗi ba mo man mee mbii kas. Wun ki̶ Waar ni kaa mee bi̶ghi̶t mbii ɗi ni ki̶ man ki̶ zeen si. 21Kaaɗi wuu kám ngurum mo si, ɓe a me le ɗang ba wuu kám nsuk kas ye? Wuu sat nee, taji gurum c`in wat kas, amma wun shikáa fuu wuu c`in wat kas aa? 22Wuu sat nee, taji mee gurum c`in ngaa kas, amma wun wuu c`in ngaa kas aa? Wun nyem ɗi wuu sat nee, wu kwar k`um, amma wuu c`in wat nlu kì̵ k`um ni. 23Wun ɗi wuu roghop nee, wun ki̶ Waar kì̵ Naan, amma wuu wat sum kì̵ Naan mpeeɗi wuu tep Waar ni mo. 24Po Naan ɗi mo ran ni sat nee, "A mpee wun nyem kì̵ Naan mo, ɓe kaghar gurum moo katpo ɗiibuu nkaa Naan." 25Wuu sat nee, wun a nyem kì̵ Naan mo, mpeeɗi mo kì̵ can nwun. Amma can nii koghop ni, katɗang wu tap kì̵ Waar kì̵ Mosis mo. Amma katɗang wu tep Waar kì̵ Mosis ni, ɓe wun a kaa nyem ɗin nsuluk mo si. 26Katɗang mee gurum ɗi ba mo can wuri kas, wuri c`in mbii ɗi Waar ni sat, ɓe ba Naan nlap wuri kas aa? Ne mpeeɗi ba mo kì̵ can wuri kas aa? 27Nyem ɗi ba mo can mo ndi̶ghi̶n nan kas, amma mo kiyeer Waar ni mo, ɓe mo nkaa kám nwun nyem Yahudi mo nee, ba wuu mwaan a ntiit-ntiit ki̶ Waar ni kas. Koo ɗi wu man Waar ni, ki̶ mo kì̵ can wun. 28Koo ɗi mo can gurum ndi̶ghi̶n nan, ɓe ba ni mak le ku gurum ɗee a ngu Yahudi hakyeng kas, amma can ɗi ni azeen-nzeen ni, ba ni a mbii ɗi gurum mo mak naa shi yit kas. 29Ngo ɗi wuri a ngu Yahudi, ɓe wuri a ngo ɗi Naan cighi̶r ki̶ putughup fi̶ri shi ɗak ki̶ Riin Ɗiiɓang, ba a shi Waar ni kas. A Naan wurii kwoop kiyeet ki̶ gwar mi̶ni, ba a gurum mo kas.

will be added

X\