Rom 15

1Mun ɗi muu ɗar ɓal-ɓal ndi̶ghi̶n cínzeen, ni ret ku mu ɓam nyem ɗi ba mo ki̶ ɓal kas. Taji mu wal a nkáa funu mo ɓejee ɗak kas. 2Koo a weye ndi̶ghi̶n mun, ɓe ni ret ku wuri le ku ɗyemni̶ghi̶n fi̶ri kat retnyit, mpeku wuri wurang ɗi ndi̶ghi̶n cínzeen fi̶ri. 3Mpeeɗi ba Kristi wuri wal a nkáa fi̶ri ɓejee kas. Ni a riran ndi̶ghi̶n takarda kì̵ Naan nee, "Fulup ɗi mo fulup wugha Daa Naan, ni taa nkaa wan." 4Mpeeɗi jir, po ɗi mo kì̵ ran ndi̶ghi̶n po kì̵ Naan, mo ran ni a mpee mun, mpeku ni kám ɗi mmun, ku mu leyit ɗi nkaa Daa Naan. Ku mu ɗar ɓal-ɓal, ki̶ gung mputughup, ɗi mu kat ni ndi̶ghi̶n takarda kì̵ Naan. 5Naan ɗi wuri cín gung, ki̶ ɓam putughup mmun, wuri cín tongriyang nwun ashak, ki̶ wu mwaan ndi̶ghi̶n shiimwaan mu Kristi Jesu. 6Mpeku wun jir ashak shi putughup mi̶ndong, ki̶ shi ɗoo ɗiimi̶ndong, ɓe wu kwoop Naan, ɗi wuri a puun ki̶ Daa funu Jesu Kristi ɗi. 7Mpeemi̶ni, wu lapshak mpee ɗiiɗes kì̵ Naan, kaaɗi Kristi wuri lap wun si. 8Wan ki̶n sat nwun nee, Kristi wuri j`i ɗee a ki̶rom kì̵ nyem Yahudi mo, mpeku wuri kám zeen kì̵ Naan ɗi mmo, ki̶ mpeku wuri gampo ɗi Naan kì̵ ten sat ni ɗi mpuun furu mo. 9Ki̶ mpeku gurum mo jir ndi̶ghi̶n yil ni mo jir, mo cín ɗiiɗes ɗi nNaan mpee yit naajeel fi̶ri. Kaaɗi mo kì̵ ran ndi̶ghi̶n takarda kì̵ Naan si nee: "Mpeemi̶ni ɓe wan nkwoop wugha nnaar kì̵ gurum ɗi mo ndi̶ghi̶n yil mo jir, ki̶ wan c`in kook mpee sum fugha." 10Mo waa sat zak nee: "Wun nyem ɗi ba wun a nyem Yahudi mo kas, wu c`in retnyit ashak ki̶ nyem fi̶ri mo." 11Ki̶ mo sat zak nee: "Wun nyem ɗi ba wun a nyem Yahudi mo kas, wu kwoop Daa Naan, wu yit ku gurum ɗi mo ndi̶ghi̶n yil si jir mo kwoop wuri." 12Aizaya wuri sat zak nee, "Memee ndi̶ghi̶n dang kì̵ Jesse, wurin ndung j`i. Wurin nj`i se mulki nkaa gurum mo jir. A ndi̶ghi̶n wuri ɓe gurum mo jir ndi̶ghi̶n yil ni, moo leyit a nkaa wuri." 13Naan ɗi wuri cín canciin nwun, wurin ngam wun ki̶ retnyit ki̶ tongriyang ndi̶ghi̶n cínzeen fuu. Mpeku canciin fuu ndi̶ghi̶n iiko mu Riin Ɗiiɓang ni ɓul ɗi hakyeng. 14Ɗyemnaa mo, wan shikáa fi̶na wan man azeen-nzeen nee, wun a ɗiigi̶gam shi ɗiiret, ki̶ wun kì̵ man azeen-nzeen, ki̶ wu mak mpee kám nshak zak. 15Amma pak po ɗi wan ran nwun ndi̶ghi̶n wasika ni, wan ran ni shiɓal, mpeku wan lepan ɗi nwun nkaa mbii mo, ndi̶ghi̶n ɗiiret ɗi Naan wuri cín ni nwan. 16Wuri le wan ɗee a nguɗak kì̵ Kristi Jesu, mpee nyem ɗi ba mo a nyem Yahudi mo kas. Wan c`in ɗak fi̶na ni a kaa pris si. Wan satpo Naan mmo, mpeku nyem ɗi ba mo a nyem Yahudi mo kas, mo j`i ɗee ɗi a kaa mbiizughum ɗiili̶lap pe Naan ɗi, ku mo ɗee ɗi a ɗiiɓang, ɗi a Riin kì̵ Naan wuri le ku mo ɗee a ɗiiɓang. 17Ndi̶ghi̶n Kristi Jesu, ɓe wan ki̶n cín roghop mpee ɗak ɗi wan pu c`in ni nNaan. 18Ba wan mak sat mee mbii ɗik kas, see po nkaa ɗak ɗi Kristi wuri c`in ndi̶ghi̶n wan. Kaaɗi wuri j`i ki̶ nyem ɗi ba mo a nyem Yahudi mo kas, har mo c`in mbii ɗi Naan wuri sat shi po, ɗi wan nkaa sat ni mmo ki̶ shiɗak ɗi wan ki̶n c`in mo. 19Shi mbii aapo mo, ki̶ mbii lukshik mo, shiɓal kì̵ Riin ni, ndi̶ghi̶n mwaan fi̶na, yaghal nJerusalem, ki̶ peeɗi mo neer ni cighi̶rkaat, har Ilirikum, wan satpo ɗiiret nkaa Kristi. 20Wan le putughup mpeku wan satpo ɗiiret ni ɗi ndi̶ghi̶n peeɗi ba mee gurum kì̵ kyam sat sum kì̵ Kristi ɗi kas. Mpeku taji wan ɗiklu nkaa kuk ɗi mee gurum kì̵ ten ɓwot kas. 21Mpeeɗi ni a riran ndi̶ghi̶n takarda kì̵ Naan nee: "Nyem ɗi ba mo kì̵ kyam ki̶ling sum fi̶ri kas, mon nnaa wuri. Nyem ɗi ba mo kì̵ kyam ki̶lingpo nkaa wuri kas, mon mman shii kì̵ ni." 22A ni le ɗang yit ɗes, ɓe gyet wan ki̶n riɓet so pe wun ɗi, amma ba wan katpee so ni kas. 23Amma yaksi wan ki̶n kyes ɗak fi̶na nkoghop pee ɗiisi ni, ki̶ mpeeɗi gyet wan ki̶n kaghar mpee so naa wun ndi̶ghi̶n ɓit mo ɗes ɗi mo ki̶ ɗel si. 24Wan canciin mpee naa wun. Wan riɓet so tong ashak ki̶ wun akuɗang wan ɗel so nSipen, mpeku wan kat ɓam ɗi pe wun, ki̶ mpeku wu sel wan mpee so ɗi. Aɓwoon ɗi wan kì̵ mwaan tok ki̶ wun, mpee rep teer mo diɓen. 25Amma yaksi wan ndung so nJerusalem, mpeku wan so ɗiki̶ ɓam mpee nyem Jesu mo. 26Eki̶lisya ɗi mo ndi̶ghi̶n Masidoniya ki̶ Akaya mo cín mee zughum nwan, mpeku wan nso ki̶ ni ɗi nyemjeel ɗi mo ndi̶ghi̶n nyem Jesu ɗin nJerusalem mo. 27A mo shikáa furu mo riɓet c`in ki̶si, mpeeɗi azeen-nzeen ni ɗee a kaa káat si nkaa mo, ni ret ku mo ɓam mo. A mpeeɗi nyem ɗi ba mo a nyem Yahudi mo kas, mo shaar ashak ndi̶ghi̶n mbii ɗi mo a mu Riin. Mpeemi̶ni ɓe ni ret ku nyem ɗi ba mo a nyem Yahudi mo kas, mo ɓam mo shi mbii ki̶kat furu mo ɗi mo a mu yil ɗiisi zak. 28Aɓwoon ɗi wan ki̶n kyes ɗak ɗiisi ni, ki̶ wan ki̶n cín mbii ɗi mo kyak ni mmo, ɓe wan nso ntaa pe wun ɗi, a ar so nSipen ni. 29Wan man nee, katɗang wan nso pe wun ɗi, ɓe wan nso a ndi̶ghi̶n gam mu ɗiiret kì̵ Kristi. 30Ɗyemnaa mo, wan ɗang pe wun ndi̶ghi̶n Daa funu Jesu Kristi, ki̶ ndi̶ghi̶n wal ɗiisi ɗi Riin wuri cín mmun, wu c`in aduwa ashak ki̶ wan azeen-nzeen pe Naan ɗi, mpee wan shikáa fi̶na. 31Wu ɗang pu wuri, mpeku wuri ɓam wan ɗi ndi̶ghi̶n sar kì̵ nyem ɗi ba mo cínzeen kas, ndi̶ghi̶n yil nJudiya, ki̶ mpeku ɗak fi̶na ɗi wan c`in ni ndi̶ghi̶n Jerusalem, ni ɗee a ɗiili̶lap pe nyem kì̵ Naan mo ɗi. 32Ɗangɓe wan nwul pe wun ɗi shi retnyit, katɗang Naan riɓet, mpeku wan kat rep nookɗi pe wun ɗi. 33Naan ɗi wuri a riyang wuri tong ashak ki̶ wun jir. Amin.

will be added

X\