Rom 11

1Wan ki̶ mee tal nee, kyet ɗiisi ni ɗee a ne, Naan wuri kwar nyem fi̶ri mo mmi̶ni aa? Ba ni aasi kas koo diɓen. Wan shikáa fi̶na wan a ngu Yahudi. Wan a ndi̶ghi̶n dang kì̵ puun funu Abraham, ndi̶ghi̶n saghan kì̵ Benjami. 2Ba Naan wuri kwar nyem fi̶ri mo, ɗi wuri kì̵ ten bi̶lip mo kas. Ba wu man mbii ɗi mo kì̵ ran ndi̶ghi̶n takarda kì̵ Naan nkaa Ilaija kas aa? Ɗi wuri so ki̶ wal pu Naan ɗi, nkaa nyem Yahudi mo nee, 3"Daa mo ki̶ twa nyemsatpo fugha mo, ki̶ mo kì̵ shirip peewus mbiizughum fugha mo jir. Ɗee a wan mmi̶san, ɗi moo tang wan mpee tu zak." 4Naan wuri lap nIlaija a ne a meye? Wuri lap nwuri nee, "Wan ɗi ki̶ gurum mo duɓu povul, ɗi ba moo kurum nfurum ku mo seyil ɗi mBaal kas." 5Ni aasi ndi̶ghi̶n pee ɗiisi, ɓe rep pak nyem Yahudi mo ɗi, ɗi Naan wuri kì̵ ten bi̶lip mo mpee naajeel fi̶ri. 6Ni a mpee ɗiiret fi̶ri, ɗangɓe wuri bi̶lip mo, ba a mpee mee ɗak ɗi mo c`in kas. Katɗang ɗi Naan bi̶lip mo a mpee ɗak, ɓe ba ni kuɗi a mee yit naajeel kì̵ Naan kas. 7Ɗiisi ni arang mmi̶ni ye? Mbii ɗi nyem Yahudi moo tang ni, ɓe ba mo kat kas, amma nyem ɗi Naan wuri kì̵ ten bi̶lip mo, mo kat. Amma kaghar ni mo ɗee a nyemciishik mo. Mpeemi̶ni ɓe ba mo man zeen kas. 8Ni a kaaɗi mo kì̵ ran ndi̶ghi̶n takarda kì̵ Naan si nee: "Naan wuri le mo ɗee a kaa nyem ɗi mon nsaam si. Har cicinsi ɓe ba mo naa mee mbii kas, ki̶ zak, ba mo ki̶ling mee mbii kas." 9Devid wuri sat zak nee: "A yit ku peesese ki̶ mo ni ɗee a cip ɗi ni yaa a mo, ku mo pal ɗi, ku ni kar mo ɗi. 10A yit ku mo ɗee a vum mo, mpeku taji mo naapee, ki̶ zak a yit ku mo tong ndi̶ghi̶n jeel har ngaa-ngaa." 11Wan ki̶n tal nee, "Gyet nyem Yahudi ni mo canshii har mo pal, ɓe gyet ba mo baa yaghal kas me?" Ba ni aasi kas koo diɓen! A mpeeɗi nyem Yahudi mo c`in shikbish, ɓe Naan wuri pi̶rep nyem ɗi ba mo a nyem Yahudi mo kas, ne mo j`i ku mo kat ɓam ɗi ki̶ seen ɗiiso ngaa-ngaa, mpeku nyem Yahudi mo c`in zughur ɗi. 12Kaaɗi nyem Yahudi mo c`in shikbish, ɓe nii j`i ki̶ ɗiiret nkaghar gurum ɗi mo ndi̶ghi̶n yil ni mo jir. Mpee taakat kì̵ nyem Yahudi mo, ɓe nyem ɗi ba mo a nyem Yahudi mo kas, mo kat ɗiiret pe Naan ɗi. Katɗang shikbish ɗi nyem Yahudi mo c`in, nii j`i ki̶ ɗiiret nyem ɗi ba mo a nyem Yahudi mo kas, ɓe ɗiiret kì̵ Naan ni ɗes zam. Katɗang nyem Yahudi mo c`in mbii ɗi Naan sat ne, ni ret ku mo c`in, ɓe gurum mo kat ɗiiret kì̵ Naan ɗes hakyeng. 13Yaksi ɓe wan ki̶n katpo aa wuwun nyem ɗi ba wun a nyem Yahudi mo kas. Naan wuri lop wan kaa laalop kì̵ Jesu Kristi si, pe wun ɗi. Wan pi̶lang Naan mpeeɗi wuri cín ɗak ɗiisi ni wan, har wan ki̶n c`in nroghop ɗishik. 14Mpeku koo ɗi arang ye, ɓe ɗak ɗi wan ki̶n c`in mpee wun, nyem ɗi ba wun a nyem Yahudi mo kas, meeɓe, wan le ku pak nyem Yahudi mo naa kyaghar, mpeku mo j`i pe Jesu Kristi ɗi, ku mo kat ɓam ɗi. 15Kaaɗi Naan wuri kwar nyem Yahudi mo, ɓe wuri pi̶rep kaghar gurum ɗi mo ndi̶ghi̶n yil ni jir, mpeku mo j`i ɗee ɗi a shaar fi̶ri. Ɓe katɗang Naan wuri waa baa lap nyem Yahudi mo, ɓe gurum mo ɗes mon nkat seen ɗiiso ngaa-ngaa. 16Katɗang gurum kì̵ ten cín bred ɗin nshee nin nNaan, ɓe bred ni jir a mu Naan. Katɗang seen ting ni a mu Naan, ɓe songting ni mo jir a mu Naan zak. 17Tingpaat ɗiiret ni ɗi, ɓe mo tep pak song ni mo, ɗangɓe mo waa j`i ki̶ song tingpaat ɗiici, ku mo ɓwaghat mo ɗi nkaa paat ɗiiret ni. Wuwun nyem ɗi ba wun a nyem Yahudi mo kas, a wun a ɗi mo j`i ki̶ wun mpoo, ɗangɓe mo ɓwaghat wun nkaa kuk ki̶ tingpaat ɗi ni azeen ni. Mpeku wu kat pak mbiise ki̶ ni ɗi. 18Katɗang ɗiisi ni aasi, ɓe taji wu ɓak song ɗi mo ki̶ roghop mu paat ɗi ni azeen-nzeen ni kas. A me le ɗang wu ɗiyeepkáa fuu ye? Mpeeɗi ba a wun, wuu cínɓal nseen kì̵ ting ni kas, amma a seen kì̵ ting nii cínɓal nwun. 19Meeɓe wunn nsat nee, "mo roghop songting ni mo a mpeku mo lop mun diɓut." 20Ni azeen-nzeen, mo roghop mo kaa song tingpaat si, a mpeeɗi ba mo cínzeen kas. Wun ɗee ɗi ndi̶ghi̶n ting ni a mpeeɗi wu cínzeen. Mpeemi̶ni taji wu ɗiyeepkáa kas, amma wu ki̶i̶r Naan. 21Kaaɗi ba Naan wuri kiyee songting ɗi ni azeen ni kas, mpeemi̶ni ɓe ba Naan wurin nkiyee wun kas. 22Mu naa nee, mmee koghop, ɓe Naan wurii naajeel, amma mmee koghop, ɓe wurii gwak gurum shiɓal. Wurii gwak nyem ɗi mo taapal shiɓal. Wuri naajeel fuu katɗang wu gung ndi̶ghi̶n ɗiiret fi̶ri. Katɗang ba ki̶si kas, ɓe wurin nsaa wun baa ki̶ni zak. 23Katɗang nyem Yahudi mo tuwap, ku mo yit cíishik furu ni, ɓe wuri mak baa ɓàl mo ɗi nkaa kukting ni zak, mpeeɗi Naan wuri ki̶ iiko mpee baa ɗi ki̶ mo. 24Wun nyem ɗi ba wun a nyem Yahudi mo kas wun a kaa song kì̵ tingpaat ɗi ni a yil, ɗi mo can mo, mo ɓalɗik mo ki̶ tingpaat ɗiiret ni. Nyem Yahudi mo a kaa song kì̵ tingpaat ɗiiret ni si, ki̶ni a mbii ɗi ni fiyeel pe Naan ɗi, ku wuri waa baa ɓal songting, ɗi wuri ki̶ saa ni mo baa ki̶ mo, ɗi a pee furu, ɗi ndi̶ghi̶n tingpaat ɗiiret ni. 25Ɗyemnaa mo, wan riɓet ku wu man mbii ɗiisi̶sok ɗiisi, ɗi ni a zeen, mpeku taji wu pan ne, wun a nyemman mbii mo kas. Ba nee, nyem Yahudi mon nsat a nciishik ɗak har vit kas. Naan wuri yit ku mo ɓalnkáa ki̶ baashik, har parɗi ɗuu kì̵ nyem ɗi ba mo a nyem Yahudi mo kas mo cighi̶r pe Naan ɗi akuɗang. 26Ɗangɓe aɓwoon mi̶ni, ɓe nyem Yahudi mo jir mon nkat ɓam, kaaɗi mo kì̵ ran ndi̶ghi̶n po kì̵ Naan si nee: "Nguɓam wurin ntong a nkoghop Zayon j`i ɗi. Wurin mpwos mbii ɗiibish mo jir ndi̶ghi̶n nyem kì̵ Jekop mo." 27Naan wuri sat zak, "Ɗiisi ni a po ɗi wan ki̶n ɓi̶lemcuk shi toghom, ashak ki̶ mo mmi̶ni, kaaɗi wan kì̵ vwang shikbish furu mo." 28Nyem Yahudi mo ɗee a shaarlek kì̵ Naan, mpeeɗi mo kwarpo ɗiiret ni, ɗiisi ni ten ɗee aasi, mpeku wun nyem ɗi ba wun a nyem Yahudi mo kas, wu kat ɓam ɗi. Amma Naan kì̵ ten bi̶lip nyem Yahudi mo, ku mo ɗee a nyem fi̶ri mo, ki̶ wurii sat a nwal mmo ɗak, mpee po ɗi wuri kì̵ ten sat ni ashak ki̶ puunkaam furu mo. 29Katɗang Naan wuri kì̵ ten c`in zughum ngurum mo, ki̶ wuri bi̶lip mo, ku mo ɗee a nyem fi̶ri mo, ɓe ba wurin nkyam cighi̶r ki̶ pan fi̶ri kas. 30Kaaɗi gyet wu kwar lap Po Naan yam, amma yaksi Naan kì̵ c`in kussuk wun mpee cíi ki̶lingpee ki̶ nyem Yahudi mo. 31Ni aasi, mo ɗi yaksi, ɓe ba mo c`in mbii ɗi Naan wuri sat kas, amma wuri naajeel ki̶ mo ni, kaaɗi wuri naajeel fuu si zak. 32Naan wuri kì̵ ten le gurum mo jir mo ɗee a ki̶rom, mpeeɗi ba mo c`in mbii ɗi wuri sat mo kas. Wuri le mo ɗee a ki̶rom, a mpee pee lee, mpeku wuri yaghal naajeel kì̵ gurum mo ɗi jir. 33Kai! Ɗes mu long kì̵ Naan, ki̶ jurung, ki̶ seen kì̵ Naan, kì̵ man fi̶ri, a we mo mmak sat ni ye? A we mmak sat pan kì̵ Naan ye? A we mmak man mbii ɗi wurii c`in ye! 34Ni a kaaɗi mo kì̵ ran ndi̶ghi̶n takarda kì̵ Naan si nee: "A we man pan kì̵ Naan ye? Koo a we mmak sat nwuri mbii ɗi wurin nc`in ye? 35A we ki̶ kyam cín mee mbii nNaan, mpeku Naan wuri baa kwat ɗi ngwar mmi̶ni ye?" 36A wuri le mbii mo ɗi jir. Mbii mo ɗi jir a mpeeɗi wuri cínɓal mmo, ki̶ mo jir mo ɗi, a mpee sum fi̶ri. Daa Naan wuri a ɗiiɗes har ngaa-ngaa. Amin.

will be added

X\