Rom 1

1Wasika ɗiisi ni put a nsar kì̵ Pool ki̶rom kì̵ Daa Jesu Kristi. Jesu wuri pet wan mpekun ɗee ɗi a laalop fi̶ri. Wuri lop wan mpeku wan satpo ɗiiret mu Naan ɗi ngurum mo. 2Po ɗiiret ɗiisi ni, Naan wuri kì̵ ten sat ni yam-yam nsar nyemsatpo fi̶ri mo, kaaɗi mo kì̵ ten ran ni ndi̶ghi̶n takarda kì̵ Naan si. 3Po ɗiiret ɗiisi ni a nkaa Làa fi̶ri, Daa Jesu Kristi, ɗi ndi̶ghi̶n nan, ɓe gyet mo làa wuri a ndi̶ghi̶n dang mu Devid. 4Ki̶ wuri yaghal a peemúut ndi̶ghi̶n ɓal mu Riin Ɗiiɓang, ni kám mmun azeen-nzeen nee, wuri a Làa kì̵ Naan. 5Ndi̶ghi̶n Jesu, ɓe Naan wuri bi̶lip wan, kun ɗee ɗi a laalop fi̶ri, mpeku mɓut sum kì̵ Jesu, ɓe wan j`i ki̶ gurum ɗi mo ndi̶ghi̶n yil ni mo jir, ku mo cínzeen nJesu, ku mo ki̶ling wuri ɗi zak. 6Wun zak, wun ndi̶ghi̶n nyem ɗi Daa Jesu wuri pi̶rep mo ni. 7Wan ran wasika ɗiisi a mpee nyem ɗi Naan wal mo jir ndi̶ghi̶n yil nRom, ɗi Naan wuri ki̶ pi̶rep mo, ku mo ɗee ɗi a nyem fi̶ri mo. Naan puun funu ki̶ Daa Jesu Kristi mo le ɗiiret nkaa wun ki̶ tongriyang zak. 8Mbii ɗin nshee, wan pi̶lang Naan fi̶na ndi̶ghi̶n Jesu Kristi mpee wun jir, mpeeɗi koo a neye ndi̶ghi̶n yil ni, ɓe gurum moo ki̶ling, kaaɗi wuu cínzeen nDaa Jesu Kristi si. 9Naan wuri a langting fi̶na nee, mbii ɗi wan ki̶n sat ni azeen. Naan ɗi wan ki̶n seyil nwuri shi putughup mi̶ndong, ki̶ wan ki̶n satpo fi̶ri ɗiiret, wuri man azeen-nzeen nee, wan ki̶n pan wun ndi̶ghi̶n aduwa fi̶na mo jir. 10Wan nkaa c`in aduwa, mpeku Naan wuri cínpee ɗi nwan, mpeku wan so ɗi mpee fuu yaksi, katɗang ni a shi ɗyen fi̶ri. 11Wan riɓet naa wun zam, mpeku katɗang wan nwul pe wun ɗi, ɓe wun nkat pak zughum ɗi nii put a pe Riin ki̶ Naan ɗi, ku ni le ku wu ɗar ɗi ɓal-ɓal. 12Mbii ɗi wan nkaa sat ni nee, wan ki̶ wun, mu ɓamshak, shii kì̵ mi̶ni nee, wuu caa wan mpee cínzeen fuu mo, ki̶ wan ki̶n caa wun mpee cínzeen fi̶na. 13Ɗyemnaa mo, wan riɓet ku wu man nee, yit ɗes ɓe wan ɗak san, mpeku wan so pe wun ɗi, (amma mee mbii ɗar ɗi a ar ni) shidaar-shidaar. Wan ki̶n riɓet, kun j`i ki̶ pak mo ndi̶ghi̶n wun pe Daa Jesu ɗi, kaaɗi wan ki̶n c`in ndi̶ghi̶n pak yil ni mo si. 14Ni ɗee a ting, mpeku wan satpo ɗiiret ni ngurum mo jir, mpee nyemseen mo ki̶ mwen mo, ki̶ nyem ɗi moo man mo, ki̶ mpee nyem ɗi ba mo man-man kas. 15Ki̶ zak, wan fes nriɓet, mpeku wan satpo ɗiiret ni nwun jir, wun nyem ɗi wun ndi̶ghi̶n yil nRom. 16Ba mee nashoop yaa wan mpee satpo ɗiiret ni ngurum mo nkaa Daa Jesu Kristi kas. Mpeeɗi a shi po ɗiiret ɗiisi, ɓe Naan wurin mɓam gurum mo. Shii kì̵ mi̶ni a nee, jir ngo ɗi wuri cínzeen nJesu Kristi, mpee nyem Yahudi mo nshee, ɗangɓe kaghar gurum ɗi ba mo a nyem Yahudi mo kas zak. 17Po ɗiiret ɗiisi ni, ni kám mmun kaaɗi Naan wuri le gurum mo ɗee a ɗin ndi̶re nyit fi̶ri jir. Muu ɗee a ɗin ndi̶re nyit kì̵ Naan. Mu mak kat mi̶ni, a shi cínzeen nshee, ki̶ har peekyes ni zak. Ni a kaaɗi mo kì̵ ten ran ndi̶ghi̶n takarda kì̵ Naan si nee, "Katɗang mee gurum ɗi Naan wuri le wuri ɗee a ɗin ndi̶re nyit fi̶ri, mpeeɗi ngo ni cínzeen, ɓe gwar mi̶nin nkat seen." 18Naan wuri nkaa woo ni mun agaak nee, nii láa wurin mɓut zam, mpee shikbish ɗi gurum moo c`in ni nkaa wuri, ki̶ nkaa niyee furu mo zak. Shikbish ɗiisi ni, nii ti̶reng zeen nyit kì̵ gurum mo. 19Naan wurii kar mo, mpeeɗi mon nkaa c`in shikbish, koo ɗi mo man mbii ɗi ni ret, ku mo man nkaa Naan, ki̶ har Naan wuri kì̵ ten kám mmo mbii ɗiisi mo jir. 20Nshee kì̵ yil ni, ɓe mbii ɗi Naan wuri le mo, mo kám ngurum mo agaak mi̶se kì̵ Naan. Koo ɗi ba gurum mo mak naa wuri shi yit kas, ɓe ni agaak nee, a wuri mmi̶shin ɓejee, ɗi wuri kì̵ seen ɗiiso ngaa-ngaa, ki̶ a wuri mi̶shin ɓejee a Naan ɗiiɓal met mbii mo jir. Mpeemi̶ni, ɓe ba gurum moo mee mbii langkáa kas, ɗi mon nsat nee, a ciin man furu le ɗangɓe ba wuɗun man ɗyen kì̵ Naan kas. 21Koo ɗi mo man ne Naan ɗi, amma ba mo cín ɗiiɗes nwuri kaa Naan si kas, ki̶ zak, ba mo pi̶lang wuri kas. Dangɓe pan furu mo ɗee a ɗiibuu, moo tong a ndi̶ghi̶n peenkoo, ki̶ ba mo kuɗi kì̵ man mbii ɗiiret kas. 22Mo lesut a kaa nyemseen mo si, amma ɓe mo a mwen mo. 23Ɗi ni ret ku mo seyil a Naan ɗi wuri a ɗiiɗes, ɗin ngaa-ngaa, amma mo kwar wuri, ki̶ mo pi̶ring ɗiiɗes kì̵ Naan, mpeku mo seyil ɗi nk`um mo, ɗi mo ɗak mo kaa gurum mo si, ɗi moo murap ki̶lak-ki̶lak. Pak mo kaa ny`er mo si, ki̶ pak mo a kaa long mo si, ki̶ pak mo kaa mbii ɗi moo fee shi ɓut mo si. 24Mpeemi̶ni, ɓe Naan wuri cínpee mmo, ku mo c`in mbii ɗiibish, ɗi moo riɓet c`in mo. Ki̶ zak, mo c`in mbii nashoop ki̶ shak. 25Mo kwar zeen kì̵ Naan, ku mo so ɗi ndang ɗung. Moo seyil mbii ɗi Naan ɗak mo, ki̶ moo tap mbii mi̶ni mo, amma ba moo seyil nNaan ɗi wuri le mbii ɗiisi mo kas. Naan ɗi ni ret ku gurum mo cín ɗiihai nwuri har ngaa-ngaa. Amin. 26Mpeemi̶ni, ɓe Daa Naan wuri yit mo, mpeku mo c`in mbii nashoop ɗi moo riɓet c`in mo ɗi zak. Mat moo saam ki̶ shak, mbii ɗi ba ni shang nNaan kas koo diɓen. 27Mish moo kwar teer kì̵ mat mo, amma moo kyaghar ɗiiɓal mpeku mo teer ɗii aa shak. Mbii ɗiisi, ɗi moo c`in ni mo, mo ɗee a mbii nashoop zam ki̶ ndi̶ng-ndi̶ng. Mon nlap kwat ɗi ni ntiit-ntiit ki̶ shikbish furu mo zak. 28Nyem ɗiisi mo kwar man Naan, ɓe Naan wuri yit mo ɗi mpeku mo mwaan ndang pan mu putughup furu ɗiibish mo. Mpeemi̶ni, ɓe moo c`in mbii ɗiibish mo. 29Putughup furu mo gam ki̶ mbii ɗiibish mo. Nyem ɗi moo riɓet ku mbii ɗiibish táa nkaa gurum mo, nyemnaa kyaghar mo, nyemzughur mo, nyemtukáa mo, moo c`in lek kì̵ gurum mo jir. Shidaar-shidaar ɓe mo nkaa tok gurum mo nɗagham-nɗagham. Nyemkatpo ɗiibish nkaa gurum mo. 30Mo le Naan ɗee a shaarlek furu. Ba moo ɗyen kas. Moo ɗiyeep káa furu mo, ki̶ canjagham. Shidaar-shidaar ɓe mo a nkaa tang ar ɗiipoo, mpeku mo c`in mbii ɗiibish mo ɗi. Ba moo ki̶lingpo kì̵ puun furu mo kas. 31Ba mo kuɗi ki̶ man mbii ɗiiret ki̶ ɗiibish kas. Ba mo mak c`in mbii ɗi mo kì̵ ten sat kas. Ba mo ki̶ putughup mu naajeel kì̵ mee gurum kas. 32Nyem ɗi mo c`in mbii ɗiisi mo jir, mo man nee, po kì̵ Naan ni sat nee, kiyeet kì̵ nyem ɗi moo c`in mbii ɗiibish mo, ɓe mon mmurap. Amma ba ni daampee mmo kas koo diɓen. Mbii ɗiibish met jir, mo fes riɓet nyem ɗi moo c`in mbii ɗiibish kaa mo si zak. Ki̶ moo sat nee, mbii ɗi gurum moo c`in ni, ɗi mo a ɗiibish, ɓe moo sat ne, a mbii mi̶ni mo a ɗiiret.

will be added

X\