Sughun 8

1Aɓwoon ɗi mbii ɗiisi moo kyes, ɓe Laatum ni wuri fi̶lap ndiɓen ki̶ stam ɗiipovul ni. Kaaɗi wuri wang, ɓe gurum mo ɗok titik ndi̶ghi̶n ɗengnaan, har ni kus ki̶ kaghar mu awa mi̶ndong. 2Wan naa nyemlop kì̵ Naan mo povul, ɗi moo ɗar ntoghom kì̵ Naan, ɓe mo cín feer, nkoo a ɗiiɗang ye, mɓut mmo povul ni. 3Mee ngulop kì̵ Naan wuri j`i ɗar kus ki̶ peewus mbiizughum, wuri ki̶ mee ɗaa wus mbiizughum, ɗi mo ɗak ni a shi zinariya. Mo cín mwoor ɗiiɗu shang-shang mu wus mbiizughum nwuri ɗes, mpeku wuri cín mo ɗi ashak ki̶ aduwa mu nyem ɗiiɓang mo ɗi nkaa peewus mbiizughum ɗi mo ɗak ni a shi zinariya, ɗi ni ntoghom ki̶ peetong mu mulki ni. 4Ɗangɓe ɗiyeel mu mwoor wus mbiizughum ɗiiɗu shang-shang ni, ki̶ aduwa mu nyem kì̵ Naan mo, ɗi nin nsar kì̵ ngulop kì̵ Naan ni, ni kàa wul pe Naan ɗi. 5Ɗangɓe ngulop ni wuri mang ɗaa mu wus mbiizughum ni, wuri gam ɗaa ni shi wus, ɗi ni nkaa peewus mbiizughum ni, ɓe wuri vwet nkaa yil ni. Kaaɗi wuri vwet wus ɗiisi ni nkaa yil ni, ɓe nluupet, ki̶ ɗoo mo, ki̶ pee mi̶lep ɗes, ki̶ yil ni yoghon zak. 6Aɓwoon ɗiisi, ɓe nyemlop kì̵ Naan ɗiipovul, ɗi mo ki̶ feer mo povul si, mo ɗak sut, mpeku mo ɗoghom taa feer ni mo ɗi. 7Ngulop kì̵ Naan ɗin nshee, wuri taa feer fi̶ri, ɓe ɗaghar, ki̶ wus, riyeep ki̶ toghom, mo sham ɓeer nkaa yil ni. Mi̶ndong nkaa kun, mu yil ni caan, ki̶ mi̶ndong nkaa kun, mu ting mo caan zak, ki̶ shit mo caan jir zak. 8Ngulop kì̵ Naan ɗiivul, wuri taa feer fi̶ri, ɓe mee mbii kaa kus jwak ɗiiɗes si, nii lapwus, ɓe mo vwet ni ndi̶ghi̶n bahar. 9Nɗin mman, ɓe mi̶ndong nkaa kun, mu bahar ni cighi̶r ɗee a toghom. Mi̶ndong nkaa kun, mu mbii ɗi mo ki̶ seen jir, ɗi moo tong ndi̶ghi̶n bahar, mo murap. Mi̶ndong nkaa kun, mu jirgi am mo lagham. 10Ngulop kì̵ Naan ɗiikun, wuri taa feer fi̶ri, ɓe mee zar ɗiiɗes, ɗi ni lap wus hi̶lak-hi̶lak, ni put aɗeng har ni sham táa nkaa mi̶ndong mɓut nkun, mu dung mo, ki̶ tuɓut am mo. 11Sum kì̵ zar ɗiisi ni a, Ɗeet. Ɓe mi̶ndong mɓut nkun, mu am, mo cighi̶r ɗee a ɗiiɗeet, gurum mo ɗes mo murap, mpeeɗi mo shwaa am ɗiiɗeet ɗiisi ni. 12Ngulop kì̵ Naan ɗiifeer, wuri taa feer fi̶ri, ɓe mo cut mi̶ndong mɓut nkun, mu puus, ki̶ mi̶ndong mɓut nkun, mu tar, ki̶ mi̶ndong mɓut nkun, mu zar mo. Mpeemi̶ni, ɓe mi̶ndong mɓut nkun, mu peeɓang furu, ba mo kuɗi kì̵ ɓangpee kas. Mi̶ndong mɓut nkun, mu wet, ba ni kuɗi ki̶ peeɓang kas, ki̶ mi̶ndong mɓut nkun, mu mpar, ba ni kuɗi ki̶ peeɓang kas zak. 13Kaaɗi wan naapee, ɓe wan ki̶ling mee puul, ɗi nii mwaan aɗeng, nii petpee shi ɗoo ɗiiɓal, nee, "Jeel! Jeel Jeel. Mpee gurum ɗi mon ndi̶ghi̶n yil ni, mpeeɗi nyemlop kì̵ Naan ɗi mo kuɗi kun sí, mo kus kì̵ taa feer furu mo."

will be added

X\