Sughun 21

1Wan naa ɗengnaan ɗiipoo ki̶ yil ɗiipoo, mpeeɗi ɗengnaan ɗin nshee, ki̶ yil ɗin nshee ni, mo ki̶ ɗel so jee, ki̶ ba mee bahar kuɗi kas. 2Wan naa birni ɗiiɓang, Jerusalem ɗiipoo, ni sham put ndi̶ghi̶n ɗengnaan pe Naan ɗi. Mo tap ɗak wura a kaa matpoo ɗi wura lop lée riret mpee kaat ki̶ mish fi̶ra si. 3Ɗangɓe wan ki̶ling mee ɗoo put a peetong mu mulki ni, ni sat nee, "Yaksi peetong kì̵ Naan ni ashak ki̶ gurum mo, ki̶ wurin ntong ashak ki̶ mo, ki̶ mon nɗee a nyem fi̶ri mo, ki̶ Naan wuri shikáa fi̶ri wurin ntong ashak ki̶ mo, ki̶ wurin nɗee a Naan furu zak. 4Wurin mpwos koo a yitmwaan ɗiiɗang ye ndi̶ghi̶n yit furu mo. Ba mee muut koo maap, koo wal, koo shwal kuɗi kas, mpeeɗi mbii ɗiiyam mo kì̵ ɗel so jee." 5Wuri ɗi wurii tong nkaa peetong mu mulki ni wuri sat nee, "Wan nkaa ɗak koo meye, a ɗiipoo." Ɗangɓe wuri sat nee, "A ran mbii ɗiisi mo, mpeeɗi mo mak ku gurum cínzeen, ki̶ mo a zeen zak." 6Wuri sat nwan nee, "Nii c`in. A wuɗi a Alfa ki̶ Omega, ɗin nshee, ki̶ kyes kì̵ mbii mo jir. Ngo ɗi neen am tu wuri, ɓe wuɗin ncín am ngwar ni shwaa nzughum, ndi̶ghi̶n tuɓut mu am mu seen si. 7Ngo ɗi wuri se koghorong, ɓe wurin nse kop kì̵ mbii ɗiisi mo jir. Wuɗin nɗee a Naan kì̵ ngo ni, ki̶ gwar mi̶nin nɗee a làa fi̶ɗi. 8Amma nyemki̶i̶rmuut mo, ki̶ nyemkwar cínzeen mo, ki̶ nyemɗiibish mo, ki̶ nyemtukáa mo, ki̶ nyemngaa mo, ki̶ soghot mo, ki̶ nyemseyil nk`um mo, ki̶ nyemc`in ɗung mo, nyemc`in mbii ɗiisi mo jir, mon nfwo mo ndi̶ghi̶n aawus ɗi nii lap wus a shi fwat mu binti̶ka. Ɗiisi ni a muut ɗiivul mmi̶ni." 9Memee mɓut nyemlop kì̵ Naan ɗiipovul si mo, ɗi mo ki̶ ɗaa mo povul, gam ki̶ jeel ɗiipovul mu kyes ni si mo, wuri j`i sat nwan nee, "A j`i, ku wan kám mpee matpoo ɗi wura a mat kì̵ Laatum ni ɗi nwugha." 10Ɗangɓe Riin kì̵ Naan ni j`i ɗel ndi̶ghi̶n nwan, ɓe ngulop kì̵ Naan wuri mang wan so ki̶ ni nkaa mee jwak ɗiiɗes ɗiiwurang, ɗang wuri kám mpee birni ɗiiɓang ni nwan. Jerusalem, ni sham put aɗeng pe Naan ɗi. 11Ni ɓangpee shi ɗiiɗes kì̵ Naan. Ɓangpee ni a kaa mu jwak ɗiiki̶rim mo si, kaa ɓangpee mu jaspa si. Ni ɓangpee kyel-kyel! 12Ni ki̶ mee fwang ɗiiɗes, ɗiiwurang, ɗi ni ki̶ polu mo kaghapaat baavul. Nyemlop kì̵ Naan mo kaghapaat baavul, moo ɗar mpolu ɗiisi mo, shimi̶ndong-shimi̶ndong. Mo ran sum kì̵ saghan ɗiikaghapaat baavul mu nyem Isreil mo nkaa polu ɗiikaghapaat baavul ɗiisi ni mo shimi̶ndong-shimi̶ndong. Koo polu ɗiiɗang ye, ɓe ni ki̶ sum mi̶ndong mmi̶ni. 13Nkoghop puus ki̶kàa, polu mo kun, nkoghop ngween, polu mo kun, nkoghop nɗeng, polu mo kun, nkoghop puusru, ni ki̶ polu mo kun. 14Fwang kì̵ birni ni ki̶ kuk mo kaghapaat baavul. Mo ran sum kì̵ jeplop kì̵ Laatum ni mo nkaa kuk ɗiisi mo shimi̶ndong-shimi̶ndong. 15Ngulop kì̵ Naan ɗi wuri katpo ki̶ wan, wuri ki̶ mbiikám pee, ɗi mo ɗak ni a shi zinariya, mpeku wuri kám birni ni ɗi, ki̶ polu ni mo, ki̶ fwang ni. 16Shwal ki̶ birni ni ki̶ kaam ki̶ni, mo a ntiit-ntiit. Ngulop ni wuri mang kam, mpee kám birni ni, kaam kì̵ birni ni, kì̵ shwal ki̶ birni ni, ki̶ wurang ki̶ ni, a meel duɓu mi̶ndong ki̶ ɗari paat. 17Ngulop ni wuri waa kám kaam kì̵ fwang ni, ɓe ni a shii ɗari vul ki̶ kaghapaat baapeemee, kaaɗi gurum ki̶ kám mbii si, ntiit ki̶ mbiikám peeɗi ngulop wuri ki̶ c`in ɗak ki̶ni. 18Mo ɗak fwang kì̵ birni ni a shi jaspa, ki̶ birni ni a shi zinariya ki̶n ndi̶ng-ndi̶ng, ni aasi kyel-kyel. 19Mo tap c`in jwat nkuk kì̵ fwang mu birni ni mo shi jwak ɗiiriret mo. Mo c`in jwat kì̵ kuk ɗin nshee ni a shi jaspa, ɗi nii lapwus yilak-yilak, ɗiivul ni a shi safir ɗi mi̶ni a tup, ɗiikun ni a shi aget, ɗi mi̶ni ki̶ kalla mo shini-shini, ɗiifeer ni a shi emeral, ɗi mi̶ni yilak-yilak a tup. 20Ɗiipaat ni a shi Onis, ɗi nii lapwus yilak-yilak, ɗiipeemee ni a shi kaneliyan, ɗi ni lapshak ki̶ shoop mu luɓang. Ɗiipovul ni a shi krisolai ɗi ni a kaa yara si, ɗiipokun ni a shi beril, ɗi nii mi̶lep riret kaa ɗem si, ɗiipofeer ni a shi tapas, ɗi ni a kaa yara ɗiiɓang kyet-kyet si, ɗiikaghapaat ni a shi krisoprez, ɗi ni mi̶lep kaa shit si, ɗiikaghapaat baa mi̶ndong ni a shi jasit, ɗi ni a tup kaa ɗengnaan si, ɗiikaghapaat baavul ni a shi ameshist, ɗi ni a naat juwal kaa mwoorɓang si. 21Mo ɗak koo a polu ɗiiɗang ye ɗiikaghapaat baavul si mo shi mee jwak ɗiiret ɗi moo pet ni a peyal. Koo a polu ɗiiɗang ye, ɓe ni mang peyal mi̶ndong. Ar ɗi mon mbirni ni, mo ɗak a shi zinariya ki̶n ndi̶ng-ndi̶ng, nii lapwus yilak-yilak. 22Ba wan naa mee Lu kì̵ Naan ɗiiɗes ɗi ndi̶ghi̶n birni ni kas, mpeeɗi Daa Naan ɗiiɓal met jir, ki̶ Laatum ni, mo a Lu kì̵ Naan mu birni ni. 23Ba birni nii riɓet puus, koo tar kas, mpeeɗi ɗiiɗes kì̵ Naan nii ɓang birni ni jir, ki̶ Laatum wuri a fitila kì̵ birni ni. 24Gurum ɗin ndi̶ghi̶n yil mo, mo mwaan a ndi̶ghi̶n peeɓang kì̵ ni, ki̶ mishkagham mu yil ni mo, mon nj`i ki̶ ɗiiɗes furu mo ndi̶ghi̶n ni. 25Ba mon nkyam shaghat polu ni mo koo yit mi̶ndong kas, mpeeɗi ba mee peenkoo nɗen ɗi mpee mi̶ni kas, koo ɗiɓen. 26Ɗiiɗes ki̶ ɗiihai mu yil ni mo, mon nj`i ki̶ mo ɗi ndi̶ghi̶n ni jir. 27Ba mee mbii ɗiirap mmak ɗel ɗi ndi̶ghi̶n birni ni kas. Koo ngo ɗi wurii c`in mbii ɗii mu nashoop, koo numpee, ɓe ba mon nkyam ɗel ndi̶ghi̶n birni ni kas, amma see a nyem ɗi sum furu mo a riran ndi̶ghi̶n takarda mu seen mu Laatum ɓejee ɗak.

will be added

X\