Sughun 19

1Aɓwoon ɗiisi, ɓe wan ki̶ling mee ɗoo ɗi ni kaa ɗoo ɗiiɗes, mu gurum mo ɗes-ɗes si ndi̶ghi̶n ɗengnaan. Ɗoo ni mo sat nee: "Haliluya! Wu kwoop Naan! Mpeeɗi ɓam, ki̶ ɗiiɗes, ki̶ iiko mo a mu Daa Naan funu. 2Mpeeɗi canɗiyeel fi̶ri ni azeen, ki̶ ni a ndi̶re. Wuri ki̶ canɗiyeel ɗiibish, mmat ngaa sí. Ɗi gyet wura wat yil ni shi ngaa fi̶ra si. Wuri baa kwat wura, ntiit ki̶ toghom kì̵ nyem fi̶ri ɗi gyet wura twa mo." 3Ki̶ zak, mo waa baa fwo or shiɓal nee, "Haliluya, wu kwoop Naan." Ɗiyeel ɗi mu caan wura ni sat a nkàa ɗak vit har ngaa-ngaa, ki̶ ngaa-ngaa. 4Nyemnan ɗii laarvul baafeer si mo, ki̶ mbii ɗiifeer ɗi mo ki̶ seen si mo, mo kurum nyil, ku mo seyil ɗi nNaan, ɗi wurii tong a peetong mu mulki. Mo seyil nwuri, mo sat nee, "Amin! Haliluya! Wu kwoop Naan!" 5Ɗangɓe mee ɗoo j`i put ɗi ndi̶ghi̶n peetong mu mulki ni nee: "Wu kwoop Naan, wun ki̶rom fi̶ri mo, wun ɗi wuu ki̶i̶r wuri, nyem ɗiiɗween mo, ki̶ nyem ɗiinan mo jir." 6Ɗangɓe wan ki̶ling mee mbii kaa ɗoo kì̵ gurum mo ɗes si, nin ntiit ki̶ wal ki̶ am ɗiiɗes, ɗi nii sham ndung, ki̶ ni wal kaa nluu ɗi nii pet si. Ɗoo ni mo sat nee: "Haliluya! Mpeeɗi Daa Naan funu ɗiiɓal jir, wuri se mulki. 7Wu yit ku mu c`in retnyit shi putughup ɗiiɓang, wu yit ku mu cín ɗiiɗes nwuri. Mpeeɗi pee ni wul, ɗi Laatum kì̵ Naan wurin nc`inɗik. Matpoo ni wura kì̵ ɗak sat mpee ɗik ni. 8Mo cín lée ɗiipiyaa peng-peng mo nwura, mpeku wura lop. Lée ɗiipiyaa peng-peng ni mo, moo kám a ɗak ɗiiret ɗi nyem kì̵ Naan mo kì̵ ten c`in." 9Ɗangɓe ngulop kì̵ Naan wuri sat nwan nee: "A ran ɗiisi. Ɗiiret nkaa nyem ɗi mo pi̶rep mo mpee se gwommat mu Laatum ni." Ngulop kì̵ Naan wuri waa baa sat nwan nee: "Ɗiisi ni a po kì̵ Naan azeen-nzeen." 10Wan taa nyil ntoghom fi̶ri, mpeku wan seyil ɗi nwuri, amma wuri sat nwan nee: "Taji a c`in mi̶ni kas, wan a ki̶rom kì̵ Naan kaa wugha si, ki̶ kaghar ɗyemni̶ghi̶n funu ɗi mo lap langting mu Jesu si. A seyil a nNaan." Po ɗi Jesu wuri woo ni, a ni a káa kì̵ po mu nyemsatpo kì̵ Naan mo. 11Wan naa Ɗengnaan a wuwang, ɓe mee bi̶ring ɗiipiyaa ɗi, ɗi sum kì̵ gwar ɗi wurii lang bi̶ring ɗiipiyaa ni a Ngo ɗin ndi̶re, ki̶ Nguzeen. Ngo ɗi ba wurii tep mbii ɗi wuri kì̵ sat kas. Wurii canɗiyeel a ndi̶ghi̶n ar ɗin ndi̶re, ki̶ c`in lek zak. 12Yit fi̶ri mo a kaa aawus si, ki̶ wuri ki̶ mbiikáa mu mulki mo ɗes nkaa káa fi̶ri zak. Wuri ki̶ mee sum ɗi ni a riran nkaa shin, ɗi ba mee gurum mak man ni kas, see a wuri shikáa fi̶ri ɓejee ɗak. 13Wuri lop a lée ɗi mo kì̵ lop ndi̶ghi̶n toghom, ki̶ sum fi̶ri ni a po kì̵ Naan. 14Nyemlek ɗi mo ndi̶ghi̶n ɗengnaan, moo mwaan ndang wuri nkaa bi̶ring ɗiipiyaa-piyaa mo, ki̶ mo tap lop a lee lillin ɗiipiyaa mo. 15Mee kwai ɗiisese j`i put mpo fi̶ri. A shi kwai ɗiisi ɓe wurin nsaa gurum ɗi mon nyil ni mo shini-shini. Wurin nse mulki nkaa mo a shi sar ɗiiɓal. Wurin nti̶reng am anab ni a peeti̶reng anab ɗi ni a mu tughup kì̵ Naan ɗiiɓal met jir. 16Nkaa nli̶r fi̶ri, ki̶ nkaa c`ii fi̶ri, ɓe mo ran sum ɗi ni sat nee, "Mishkagham mu mishkagham mo, Daa mu daa mo." 17Ɓe wan naa mee ngulop kì̵ Naan wurii ɗar nkaa puus, wuri pi̶rep ny`er ɗi moo yaghal ncáap shi ɗoo ɗiiɗes, nee, "Wu j`i, wu kaat ashak jir, mpee seriɓet ɗiiɗes mu Naan. 18Mpeku wu se luwa kì̵ mishkagham mo ɗi, ki̶ luwa kì̵ ɗiinan-nan mu nyemlek mo, ki̶ luwa ki̶ nyem ɗiinan-nan mo, ki̶ luwa mu bi̶ring mo, ki̶ mu nyemlang bi̶ring ni mo, ki̶ luwa kì̵ gurum mo jir, mu jeplu mo, ki̶ mu ki̶rom mo, ɗiiɗween mo, ki̶ ɗiinan mo jir." 19Wan naa luwayil si, ki̶ mishkagham mu yil ni mo, ki̶ nyemlek furu mo, mo kuur ashak, mpeku mo c`in lek ɗi ki̶ ngulang bi̶ring ɗiipiyaa si, ki̶ nyemlek fi̶ri mo. 20Amma mo yaa luwayil ni ashak ki̶ ngusatpo kì̵ Naan mu ɗung si, ɗi gyet wuri c`in mbii aapo, ki̶ alama mo a koppee mu luwayil ni. A shi mbii aapo ɗiisi mo, ɓe gyet wuri num nyem ɗi mo lap alama mu luwayil ni, ki̶ gyet mo seyil muriin fi̶ri zak. Mo vwet mo weet mmeen ndi̶ghi̶n aawus ɗi nii lap a shi fwat mu binti̶ka. 21Mo twa kaghar ni mo shi kwai ɗi ni j`i put po ki̶ ngulang bi̶ring ɗiipiyaa si. Ny`er mo jir, mo se luwa kì̵ mo ni, har ni mak mo.

will be added

X\