Sughun 18

1Aɓwoon ɗiisi, ɓe wan naa mee ngulop kì̵ Naan wurii sham ndi̶ghi̶n ɗengnaan. Ngulop kì̵ Naan ɗiisi wuri ki̶ iiko ɗiiɗes zam, har peeɓang mu iiko fi̶ri ni ɓang yil ni kaa puus si. 2Shi ɗoo ɗiiɗes, ɓe wuri le or nee: "Ni kì̵ taa! Ni kì̵ taa birni mBabilon ɗiiɗes. Wura ɗee a tulu ki̶ riin ɗiibish mo. Wura ɗee a peetong mu koo a riin ɗiibish ɗiiɗang ye. Wura ɗee a peetong mu koo a mbii ɗiirap, ki̶ koo a ny`er ɗiibish ɗiiɗang ye. 3Mpeeɗi gyet gurum mu yil mo shini-shini, gyet mo c`in ngaa ki̶ wura, gyet mo shwaa a am anab mu ngaa ashak ki̶ wura. Ki̶ nyemnwor ɗii mu yil ɗiisi mo, moo long a shi li̶ɓet kì̵ mbii ki̶kat fi̶ra ɗi mu yil ɗiisi, ɗi ni met mu sat." 4Ɗangɓe wan ki̶ling mee ɗoo ɗi ni put ndi̶ghi̶n ɗengnaan, ni sat nee: "Wun nyem fi̶na mo, wu pwat aku ndi̶ghi̶n wura, mpeku taji mo cín kwat nwun ashak ki̶ wura mpee shikbish fi̶ra ni mo kas. Mpeku taji wu lap memee ndi̶ghi̶n jeel fi̶ra ni mo kas. 5Mo ak shikbish fi̶ra ni mo kàa wul aɗengnaan, ki̶ ba Naan kì̵ mander nshikbish fi̶ra mo kas. 6Wu baa ki̶ mbii fi̶ra mon nwura, kaaɗi gyet wura kì̵ cín mo nwun si. Wu kwat wura yitvul, mpee mbii ɗi gyet wura kì̵ cín mo nwun. Wu riyeep mo yitvul, mbii ɗi gyet wura kì̵ riyeep ni nwun. 7Wu yit ku kwat ɗi ni a mu kar ki̶ jeel ɗi wura lap ni, ni ɗee ntiit-ntiit ki̶ ɗiiɗes kì̵ long ɗi gyet wura cín nkáa fi̶ra, mpeeɗi wura nkaa ɗiyeep kaa ne wuɗa a mishkagham ɗiimat nkaa mbii mo jir. Ne, ba wuɗa a matkáa kas, ki̶ zak, ne, ba wuɗa kì̵ kyam wal maap kas. 8Mpeemi̶ni ɓe, jeel fi̶ra ni mon nj`i taa nkaa wura nɗin mman, mpeeɗi a parpuus mi̶ndong, ɓe muut ki̶ maap, ki̶ neen, mon ntaa nkaa wura. Ɗangɓe wus ncaan wura, mpeeɗi Daa Naan ɗi wurin ntokɗiyeel nwura, wuri ki̶ iiko ɗes." 9"Katɗang mishkagham mu yil ɗiisi mo, ɗi gyet mo c`in ngaa ashak ki̶ wura, ɗi gyet mo se pak long fi̶ra ni mo ashak ki̶ wura, ɓe mon nnaa ɗiyeel ɗi ni caan wura, ɓe mon nwal ki̶ maap mpee wura. 10Mpee jeel ɗiiɗes ɗi wuraa shwaa ni. Ɓe ki̶i̶rmuut nyaa mo, har mon nɗar a jong-jong ku moo wal ɗi, ki̶ mon nsat nee: 'Jeel! Jeel! mpee wii birni ɗiiɗes. Babilon birni ɗi gyet wii ki̶ iiko ɗes, ndi̶ghi̶n awa mi̶ndong, ɓe lagham fii ni j`i wul.' 11Nyemnwor ɗi mon nyil ni mo, mon nwal ki̶ maap nkaa wura, mpeeɗi ba mee ngo kuɗi, ki̶ seet lée nwor fi̶ra mo kas. 12Lée nwor ɗi mo a zinariya mo, ki̶ mu azurfa mo, ki̶ mu jwak ɗiiret ɗi moo mi̶lep yilak-yilak, ki̶ nli̶r ɗiiriret mo shini-shini, ki̶ nli̶r ɗi pan a naat mo, ki̶ katako ɗiiret mo, ki̶ mbii ɗi mo ɗak mo a shi aghas kì̵ níi mo, ki̶ katako ɗiiki̶rim mo, ki̶ mbii ɗi mo ɗak mo a shi shaghal ɗiiret mo, ki̶ jwak ɗiiret ɗii mu ɗiklu mo. 13Mbii ɗi mo ɗu shang-shang, kaa sinamon, ki̶ mi̶r, ki̶ frankisens, ki̶ mwoor ɗi gurum ki̶ caan, mpeku wuri ki̶ling ɗu ɗiishang ni ɗi si, ki̶ mu am anab, ki̶ mu mwoor paat, ki̶ mu áas ɗiiret mo, mu alkama, ki̶ mu randong mo, ki̶ tum mo, ki̶ mu bi̶ring mo, ki̶ mu keke bi̶ring, ki̶ ki̶rom mo, ki̶ seen kì̵ gurum mo." 14Nyemnwor ni mon nsat nwura nee, "Jir mbii ɗiiriret ɗi jí yii leyit nkaa mo, moo ɗel so jee. Long fii mo jir, ki̶ ɗiiɗes fii ni mo jir, mo lagham. Ba wii kuɗi yii kat mo ɗi zak kas." 15Nyemnwor, ɗi mo si̶rep mbii ɗiisi mo, har mo kat li̶ɓet, ki̶ long mpee wura, mon nɗar jong-jong, ki̶ ki̶i̶rmuut fes yaa mo, mpee shwaajeel ɗi wuran nkaa shwaa ni. Mon nwal ki̶ maap. 16Har mon nfwo ruruu nee: "Jeel fii, jeel fii, wii birni ɗiiɗes, gyet yam, ɓe wii yii jwal a lee mulki ɗiiriret mo ɗiitap piyaa mo, ki̶ ɗiitap naat juwal mo. Ɗi mo mi̶lep shi zinariya, ki̶ shi jwak ɗiiriret mo, ki̶ lilliu. 17Ndi̶ghi̶n awa mi̶ndong ɓejee, ɓe long fii ɗiiɗes si mo ɗee a ɗiibuu!" Jir nyemtung jirgi am mo, ki̶ gurum ɗi moo hi̶r mo njirgi ni mo, ki̶ nyem ɗi moo kat mbii teer furu mo a ndi̶ghi̶n bahar mo, das ɗiisi mo jir, mon nɗar jong-jong, ki̶ wura. 18Katɗang mon nnaa ɗiyeel mu caan fi̶ra ni kàa, ɓe mon nfwo or shiɓal nee, "Ba mo kì̵ kyam kat mee birni ɗiiɗes kaa wii si kas." 19Mon nhi̶r ɓuk le nkaa káa furu mo, ashak ki̶ wal, ki̶ maap nee: "Jeel fii, jeel fii, wii birni ɗiiɗes, Gyet yam ɓe nyem ɗi mo ki̶ jirgi am mo nkaa bahar, moo kat long a mpee long fii, amma ndi̶ghi̶n awa mi̶ndong, ɓe wii ɗee a ɗiili̶lagham jee. 20Wii ɗengnaan, yi c`in retnyit, mpee mbii ɗi ni kat birni ɗiisi wura. Wu c`in retnyit, wun nyem kì̵ Naan mo, ki̶ wun jeplop mo, ki̶ nyemsatpo kì̵ Naan mo, mpeeɗi Naan wuri canɗiyeel nwura, mpee mbii ɗi gyet wura kì̵ c`in mo nwun" 21Ɗangɓe mee ngulop kì̵ Naan ɗiiɓal, wuri mang mee nhi̶k ɗiiɗes kaa fin ɗiyees shiit si, wuri vwet ni ndi̶ghi̶n am bahar, ki̶ wuri sat nee, "Mon mbet Babilon birni ɗiiɗes si vwet a shiɓal aasi zak. Ki̶ zak, ba mon nkuɗi ki̶ naa wura ɗi zak kas. 22Ba mon mbaa ki̶ling wal ki̶ nɗeng-nɗeng, ki̶ ɗoo ki̶ nyemkook mo, ki̶ wal ki̶ ɓel, ki̶ wal ki̶ feer mo ndi̶ghi̶n wii Babilon kas. Ba mon nwaa kat mee nguc`in ɗak shi sar, mu koo a kiyeet kì̵ ɗak ɗiiɗang ye ndi̶ghi̶n wii kas. Ba mon waa ba ki̶ling wal ki̶ fin ɗiyees shiit mo ndi̶ghi̶n wii kas. 23Ba mee wus fitila nwaa baa ɓangpee ɗi ndi̶ghi̶n wii kas. Ba mon waa baa ki̶ling mee ɗoo ki̶ mi̶shpoo ki̶ matpoo ndi̶ghi̶n wii kas. Gyet yam, ɓe nyemnwor fii ni mo, a nyem ɗiinan-nan mu yil ni mo. Gyet a shi mulgut mu soghot fii, ɓe yii le gurum ɗi mo ndi̶ghi̶n yil ni mo jir, mo taa mer. 24Gyet a ndi̶ghi̶n wii, ɓe mo kat toghom kì̵ nyemsatpo kì̵ Naan mo, ki̶ toghom mu nyem kì̵ Naan mo, ki̶ toghom mu gurum ɗi gyet mo twa mo jir ndi̶ghi̶n yil ni."

will be added

X\