Sughun 12

1Mee alama ɗiiɗes ɗi ni aapo, ni j`i put ɗi ndi̶ghi̶n ɗengnaan. Mee mat wura, ɗi wura lop puus kaa nli̶r si nkaa sat, ki̶ tar nder shii fi̶ra, ki̶ wura lop zar mo kaghapaat baavul nkáa fi̶ra, kaa mbiikáa mu mulki si. 2Mat ɗiisi wura ki̶ aak. Kaaɗi aak ni mak làa, ɓe wura ɓwot or ɗiiɓal mu jeel, kaaɗi aak ni ɗoghom se wura. 3Ɗangɓe mee alama ni j`i put ɗi ndi̶ghi̶n ɗengnaan ni zak, mee kus nw`oo ɗiiɗes, ɗi ni a naat, ki̶ káa mo povul, ki̶ soghom mo kaghapaat, ki̶ mbiikáa mu mulki mo, nkaa koo káa ɗiiɗang ye, ɗi ni j`i put ɗi ndi̶ghi̶n ɗengnaan ni. 4Shi dang kì̵ nw`oo ɗiisi, ɓe ni tup mi̶ndong mɓut nkun, mu zar ɗi mo ndi̶ghi̶n ɗengnaan sham ɗyong nyil. Nw`oo ni ɗar akiyeen kì̵ mat ɗi wuran ndung làa-làa si, mpeku ni se làa ɗi mat ni wuran nlàa ni ɗi. 5Mat ni wura làa-làa ɗiimish, ɗi wurin nse mulki nkaa gurum ɗi mo ndi̶ghi̶n nyil ni mo shini-shini jir, shi kam ɗi mo ɗak ni a shi shaghal. Kaaɗi làa ni sham taa nyil, ɓe mo ɓam wuri kwet, ɗel kàa ki̶ wuri pe Naan ɗi, ki̶ peetong mu mulki fi̶ri. 6Mat ni wura su so a naar yil, a peeɗi Naan wuri tap ɗakle nwura, ɗi mon ntap ki̶ wura, har teer mo duɓu mi̶ndong, ki̶ ɗari vul ki̶ laarpeemee. 7Lek yaghal ndi̶ghi̶n nɗengnaan, Makiyel ki̶ nyemlop fi̶ri mo, mon nkaa lek ki̶ nw`oo ni ki̶ nyemlop fi̶ri mo, lek ni naat a mo. Nw`oo ni ki̶ nyemlop fi̶ri mo, mo c`in lek ni shiɓal hakyeng. 8Amma Makiyel ki̶ nyemlop fi̶ri mo, mo se koghorong nkaa nw`oo ni, mo ceen nw`oo ni ki̶ nyemlop fi̶ri mo aku ndi̶ghi̶n ɗengnaan. 9Mo mang nw`oo ni, ɓe mo vwet wuri sham ndi̶ghi̶n yil ɗiisi, ashak ki̶ nyemlop fi̶ri mo. Sum kì̵ nw`oo ɗiisi ni a Shetan, mishkagham kì̵ riin ɗiibish mo. Pugyet wuri ɗi mmuyíi, gyet yam-yam ɓe wurii num yil ni so ki̶ni a ar ɗin nkan. 10Ɗangɓe wan ki̶ling mee ɗoo ɗiiɗes ndi̶ghi̶n ɗengnaan ni sat nee: "Yaksi, ɓe ɓam kì̵ Naan ni j`i wul! Naan wuri kám iiko fi̶ri agaak. Yaksi, ɓe Kristi wuri nkám ɗiiɗes fi̶ri, mpeeɗi mo kì̵ vwet ngumwaanaa kì̵ ɗyemni̶ghi̶n funu mo sham nyil, wuri ɗi wuri kì̵ c`in mwaanaa furu ntoghom funu mpar ki̶ puus. 11Mo se koghorong nkaa wuri a mpee toghom kì̵ Laatum ni, ki̶ zak, mpeeɗi mo c`in langting nee, po fi̶ri ni azeen-nzeen, har mo cín seen furu mo mpee sum fi̶ri. 12Mpeemi̶ni, ɓe wu c`in retnyit, wun ɗengnaan mo, ki̶ nyem ɗi moo tong ndi̶ghi̶n ɗengnaan ni mo zak. Amma jeel ɗi mpee yil ni, ki̶ bahar mo, mpeeɗi Shetan wuri sham pe wun ɗi. Wuri gam ki̶ putughup ɗiiwuwat. Wuri man nee, pee fi̶ri ni ɗee a lee ɗak." 13Kaaɗi nw`oo ɗiisi ni naa, nee; mo vwet wuɗi sham ndi̶ghi̶n yil ɗiisi, ɓe ni yaa sushii ndang mat ɗi wura làa-làa ɗiimish sí. 14Amma mo cín cáap ɗiinan-nan mo nwura vul, ɗi mo a kaa mu puul si, mpeku wura katpee yaghal so wul ɗi a peeɗi Naan wuri kì̵ ten tap ɗakle nwura a naaryil ni. A peeɗi mon ntap ki̶ wura mpee ɓit mo kun ki̶ kaghar, peeɗi ba nw`oo nin mmak wul ɗi, ku ni kat, wura ɗi kas. 15Nw`oo ni fuut am mpo fi̶ri, so ndang mat ni wura, kaa am ɗi nii sham ndung si, wuri c`in ɗiisi, a mpeku am ni mang mat ni wura ɗi. 16Amma yil ni ɓam mat ni wura, yil ni wang po ki̶ ni, har ni shwaa am ɗi nw`oo ni fuut ni. 17Tughup fes tu nw`oo ni ndang mat ni wura, kaaɗi ni naa ba ni mak yaa mat ni wura kas, ɓe ni so yaa lek nkaa dang kì̵ mat ni mo. Dang kì̵ mat ni, a nyem ɗi moo ki̶ling ɗoo ki̶ Naan, ɗi mo lappo kì̵ Jesu. 18Nw`oo ni ɗar nkaa po ɗiyees mu am bahar ni.

will be added

X\