Filimon 1

1Wasika ɗiisi ni put a nsar mi̶na Pool, wan ɗi wan a shishaghat mpee sum k`i̶ Daa Jesu Kristi, ki̶ Timoti ɗyemni̶ghi̶n funu. So pe wugha ɗi, Filimon, shaar funu, ki̶ shaarɗak funu hakyeng. 2Ki̶ so pe Apfiya ɗyemni̶ghi̶n funu ɗiimat. Ki̶ Arkipus shaar funu nguc`in lek ashak ki̶ mun ndi̶ghi̶n ɗak k`i̶ Naan, ki̶ nyem so ndang Naan, ɗi moo kuur ndi̶ghi̶n tulu fugha zak. 3Daa Naan puun funu, ki̶ Daa funu Jesu Kristi, wuri cín ɗiiret ki̶ tongriyang nwun. 4Shidaar-shidaar, ɓe wan ki̶n pi̶lang Naan fi̶na, katɗang wan pan wugha ndi̶ghi̶n aduwa fi̶na mo. 5Mpeeɗi wan ki̶n ki̶ling cínzeen fugha ni ndi̶ghi̶n Daa Jesu Kristi, ki̶ wal fugha mpee nyem k`i̶ Naan mo jir. 6Wan ki̶n c`in aduwa mpee wugha, mpeku wugha ɗar ɗi ɓal-ɓal ndi̶ghi̶n cínzeen fugha, mpeku a kat gam k`i̶ man mbii ɗiiret mo jir, ɗi mun ki̶ ni ndi̶ghi̶n Kristi. 7Cínzeen fugha ni le retnyit nwan ɗes zam, ki̶ ni caa wan hakyeng mpee cínzeen fugha ni. Ɗyemnaa! Nii cínɓal mputughup nyem k`i̶ Naan mo ɗes zam. 8Mpeemi̶ni, wan mak kat ɓal mputughup, mpeku wan sat ɗi nwugha shiɓal, kaa ɗyemni̶ghi̶n fi̶na ndi̶ghi̶n Jesu Kristi si, mpeku a c`in mbii ɗi ni ret ku a c`in ɗi. 9Amma mpeeɗi wan wal nwugha, ɓe wan ɗang pe wugha, wan Pool ngunan, ɗi yaksi wan a ɗii shishaghat mpee sum k`i̶ Daa Jesu Kristi. 10Wan ki̶n ɗang pu wugha, mpee làa fi̶na Onisimus, wuri ɗi wuri ɗee a làa fi̶na, kaaɗi wan a shishaghat si. 11Jí yam, ɓe ba wuri ki̶ mee koghop ni pe wugha ɗi kas, amma yaksi, ɓe wuri ki̶ koghop ni pe wugha ɗi ki̶ wan zak. 12Wan lop wuri baaso pe wugha ɗi shi putughup fi̶na mi̶ndong. 13Ɗyen nwan ku wuri tong ɗi ashak ki̶ wan, mpeku wuri c`in ɗak ɗi nwan a koppee fugha, kaaɗi wan a shishaghat mpee po ɗiiret ni si. 14Amma ba wan riɓet c`in mee mbii mmi̶san, nɗin sat ni nwugha kas, mpeku katɗang wugha riɓet c`in mee ɓam ɗi nwan, ɓe wugha c`in mi̶ni a shi putughup fugha mi̶ndong, ba a mpeeɗi mee gurum k`i̶ sat nwugha ne, a c`in kas. 15Meeɓe, jí Onisimus wuri yaghal yit wugha ɗi a mpee, rep pee lee, mpeku wuri baaj`i ɗee ɗi a mugha har vit. 16Yaksi ba wuri a ki̶rom pe wugha ɗi ɓejee kas, amma wuri met nki̶rom, wuri a ɗyemni̶ghi̶n ndi̶ghi̶n Kristi. Wuri ki̶ koghop ni hakyeng pe wan ɗi, ki̶ zak, wan man nee, wurin nɗee k`i̶ koghop ni ndi̶ghi̶n Kristi zak. 17Katɗang ɓe wugha mang wan a kaa ngo fugha si, ɓe wughan nlap wuri kaaɗi a lap wan si. 18Katɗang jí wuri k`i̶ c`in mee mbii ɗiibish nwugha, koo jí wuri k`i̶ sekaat nwugha, ɓe wan nkwat wugha. 19Wan Pool, ki̶n ran ɗiisi ni shi sar fi̶na nee, wan Pool, wan nkwat wugha kaat ɗi Onisimus k`i̶ se wugha. (Ba ni ki̶ koghop ni ku wan sat nwugha nee, wugha kat seen a mpee wan kas.) 20Ɗyemni̶ghi̶n fi̶na ndi̶ghi̶n Jesu Kristi, wan ki̶n riɓet kun kat mee mbii pe wugha ɗi, a caa putughup fi̶na ndi̶ghi̶n Kristi. 21Wan cínzeen nee, kaaɗi wan ran po ɗiisi ni, ɓe wughan nc`in mbii ɗi wan ɗang ni, har met mbii ɗi wan ɗang ni zak. 22Mee mbii mi̶ndong, a ɗak lu mi̶zep a le nwan, mpeeɗi wan ki̶n lepan nee, Daa Naan wuri ki̶ling aduwa fuu mo, mpeku wuri fwoon wan ɗi, ku wan baaso ɗi pe wun. 23Abafaras, ngo fi̶na ɗi wuri a shishaghat kaa wan si, mpee sum k`i̶ Jesu Kristi, wuri lop tokshik fi̶ri nwun. 24Ki̶ zak, Maak, ki̶ Aristaakus, Dimas, ki̶ Luk nyemɗak ashak ki̶ wan, mo lop tokshik furu mo. 25Ɗiiret k`i̶ Daa Jesu kristi tong ashak ki̶ riin fuu mo jir.

will be added

X\