Filipi 4

1Mpeemi̶ni ɗyemnaa mo, ɗi wan wal nwun. Wan ki̶n fes nriɓet wun, ɗi wan ki̶n kat retnyit a shi wun, ki̶ wan ki̶n c`in roghop a shi wun zak. Wu ɗar ɓal-ɓal ndi̶ghi̶n Daa. 2Wan ki̶n satpo Yudiya, ki̶ wan ki̶n satpo Sintiki nee. Ni ret ku mo tongriyang ki̶ shak, mpeeɗi mo weet mo a ndi̶ghi̶n Kristi. 3Wan ɗang pe wugha ɗyemni̶ghi̶n fi̶na, ɗi muu c`in ɗak ashak, kussuk a ɓam mat ɗiisi mo. Mpeeɗi mat ɗiisi ni moo c`in ɗak ashak ki̶ wan ndi̶ghi̶n satpo ɗiiret ni, ashak ki̶ Ki̶limen ki̶ kaghar das ɗi jí muu c`in ɗak ashak ki̶ mo jir. Nyem ɗi sum furu mo a ɗiiriran ndi̶ghi̶n takarda mu seen. 4Wu c`in retnyit ndi̶ghi̶n Daa shidaar-shidaar. Wan baa sat a ni ɗi nwun zak nee, wu c`in retnyit. 5Wu yit ku gurum mo jir, mo naa gung fuu. Mpeeɗi baaj`i ki̶ Daa nii wul kus. 6Taji wu yit ku mee mbii daampee nwun kas, amma ndi̶ghi̶n mbii mo jir, ɓe wu sat mbii, ɗi wuu riɓet mon nNaan, ndi̶ghi̶n aduwa ki̶ ɗang. 7Riyang kì̵ Naan ɗi ni met man mo jir, ni tap ki̶ putughup fuu mo ki̶ pan fuu mo, ndi̶ghi̶n Kristi Jesu. 8Ɗyemnaa mo, peekyes kì̵ ni, ɓe koo meye ɗi ni azeen, koo a meye ɗi ni mak cín ɗiiɗes, koo a meye ɗi ni a ɗin ndi̶re, koo a meye ɗi ni a ɗiiɓang, koo a meye ɗi ni a wal, koo a meye ɗi ni a mu naajeel, koo katɗang nii mee mbii ɗiiret met jir ɗi, koo ɗi nii mee mbii ɗi ni ret pi̶lang ɗi, ɓe wu c`in pan nkaa mbii ɗiisi mo jir. 9Mbii ɗi gyet wuu ten wu kám mo, ki̶ mbii ɗi gyet wuu ten wu lap mo, ki̶ mbii ɗi gyet wuu ten wu naa mo, ki̶ mbii ɗi gyet wuu ten wu ki̶ling mo pe wan ɗi. Naan ɗi wuri cín tongriyang mmun, wurin ntong ashak ki̶ wun. 10Wan kat retnyit ndi̶ghi̶n Daa hakyeng, mpeeɗi gyet wuu ɗoghom mander nwan, amma yaksi wuu pan wan. Azeen, gyet wuu pan wan, amma ba gyet wu kat a pee mpee ɓam wan kas. 11Ba ne, a mee mbii jee nwan kas, mpeeɗi gyet wan ki̶n ten kám ar mu gung ndi̶ghi̶n koo meye ɗi wan ki̶ ni. Koo ɗi ni ɗes, ki̶ koo ɗi ni a lee, ɓe wan ki̶n tong a shi retnyit. 12Wan man kaaɗi wan nsham ki̶ káa fi̶na, katɗang ba wan ki̶ mee mbii kas, ki̶ zak, wan man mbii ɗi wan nc`in katɗang wan ki̶ mbii mo ɗes. Ndi̶ghi̶n mbii mo jir, ɓe wan ki̶n kám mbii ɗiisi̶sok ɗiisi, mpeku wan katpee ɗar ɗi ɓal-ɓal, koo a ndi̶ghi̶n hi̶ɓi̶l kì̵ koo a ndi̶ghi̶n neen. 13Wan mak c`in mbii mo jir, a ndi̶ghi̶n ɓal ɗi Kristi wurii c`in nwan shidaar-shidaar. 14Wan pi̶lang wun, mpeeɗi jí wu ɓam wan ndi̶ghi̶n jeel fi̶na. 15Wun nyem Filipi mo, wu man shikáa fuu nee, gyet nshee kì̵ po ɗiiret ni, kaaɗi gyet wan yaghal yit yil mMasidoniya, ɓe ba mee Eki̶lisya ɗi ni cínkáa fi̶ra ashak ki̶ wan mpee cín zughum mo, ki̶ lap zughum mo kas, see a wun ɓejee ɗak. 16Har kaaɗi gyet wan ndi̶ghi̶n yil nTasoloni, ɓe wuu lop ɓam so nwan nki̶shak-nki̶shak, ba a yit mi̶ndong koo vul ɓejee kas. 17Ba ne, a mpeeɗi wan ki̶n tang a mee zughum pe wun ɗi kas, amma wan riɓet ku wu kat li̶ɓet ɗiki̶ nkaa kwat fuu mo. 18Wuu ten wu kwat wan ki̶nɗing, mpeeɗi wan ki̶n kat mbii ɗi wan ki̶n riɓet ni, har ni ɗes met mbii ɗi jí wan ki̶n riɓet ni. Mpeeɗi wan ki̶n lap zughum ɗi wu lop j`i nwan nsar kì̵ Epafradaitus. Mbiizughum fuu ɗiisi ni, mo ɗu shang-shang a kaa zughum ɗi gurum moo cín nNaan si. Mbiizughum ɗi mo shang nNaan nyit hakyeng. 19Naan wuri cín mbii ɗi wuu riɓet mo nwun jir ntiit-ntiit ki̶ ɗiiɗes mu long fi̶ri ndi̶ghi̶n Jesu Kristi. 20Ɗiiɗes ni ɗee a mu Naan puun funu har ngaa-ngaa, ki̶ ngaa-ngaa. Amin. 21Wu tok ki̶ nyem kì̵ Naan ɗi mo a mu Kristi jir. Ɗyemnaa ɗi mo ashak ki̶ wan, moo tok ki̶ wun. 22Nyem kì̵ Naan mo jir moo tok ki̶ wun. Met jir, a nyem kì̵ Naan ɗi mon ntulu kì̵ mishkagham ɗiiɗes Siza. 23Ɗiiret kì̵ Daa funu Jesu Kristi ni tong ashak ki̶ riin fuu mo jir. Amin.

will be added

X\