Filipi 3

1Ɗyemnaa mo, mpee kyes kì̵ ni, ɓe wu c`in retnyit ndi̶ghi̶n Daa. Ba ni daampee nwan mpee baa ran po ɗi gyet wan ki̶n ten ran mo nwun kas, amma ni a mpeku ni ɓam wun ɗi, ku wu tong ɗi riyang. 2Wu tap ki̶ nyem ɗi moo c`in mbii ɗiibish, kaa as mo si. Nyem ɗi mo sat nee, ni a ting ku gurum mo can-can. 3A mun a ɗi mo kì̵ can mun, ba a mo kas. Mpeeɗi muu seyil nNaan a ndi̶ghi̶n Riin fi̶ri, ki̶ muu c`in retnyit ndi̶ghi̶n Jesu Kristi, mpeeɗi seen funu mo a ndi̶ghi̶n wuri. Ba muu gangkáa funu mo a nkaa mbii ɗi gurum moo c`in, ɗi mo a mu nan kas. 4Katɗang ɓe ɗi wan riɓet, ɓe ɗi wan mmak gangkáa fi̶na, nkaa mbii ɗi gurum moo c`in mu nan ni. Mpeemi̶ni, katɗang mee gurum ki̶ pan ne; wuɗi ki̶ mbii gangkáa ndi̶ghi̶n nan ni, ɓe wan met ngwar mi̶ni hakyeng ndi̶ghi̶n mbii ɗi mo a mu nan ni mo. 5Kaaɗi gyet mo làa wan, ɓe aɓwoon ɗi wan wul teer pokun, ɓe mo can wan. Wan a ngu Yahudi, ndi̶ghi̶n saghan mu Benjami. Wan a ngu Hiburu, làa kì̵ nyem Hiburu mo kyap. Katɗang a ndi̶ghi̶n ar mu tap ki̶ Waar mu nyem Yahudi mo, ɓe wan ki̶n tap ki̶ Waar ni a kaa nyem Farisi mo si. 6Gyet wan ki̶n cín jeel nyemso ndang Jesu mo. Nkoghop mu tap ki̶ Waar mu nyem Yahudi mo, ɓe wan ki̶n tap ki̶ Waar ni mon ndi̶re-ndi̶re jir. 7Amma ndi̶ghi̶n mbii ɗi gyet wan ki̶n kat mo, kaa li̶ɓet si, ɓe yaksi wan le mo ɗee a ɗiibuu mpee sum mu Kristi. 8Ii, azeen-nzeen, wan ki̶n le mbii ɗiisi mo ɗee a ɗiibuu, mpeeɗi yaksi, wan ki̶n man ɗiiɗes mu wal kì̵ Kristi Daa fi̶na, ɗi ni met mbii mo jir. Mpee sum fi̶ri, ɓe wan ki̶n fwo mbii mi̶ni mo jir. Yaksi, ɓe wan naa mo ɗee a kaa peeɗi mo ɓeer a gi̶ring si, har wan kwar mo jir. Mpeku wan ɗee ɗi a mu Kristi. 9Ku wan tong ɗi ndi̶ghi̶n wuri. Ba a mpee ɗiiret mukáa fi̶na kas, ɗi wan mak kat ni a mpee tap ki̶ Waar ni mo kas. Amma a mpee ɗiiret ɗi mu kat ni mpee cínzeen ɗi mun ki̶ ni ndi̶ghi̶n Kristi. A ɗiiret ɗi ni put a pu Naan ɗi, ɗi ni ɗar a nkaa cínzeen. 10A mbii ɗi wan ki̶n fes nriɓet nɗiisi, kun man iiko mu yaghal a peemúut fi̶ri. Ku wan shwaa pak jeel fi̶ri ni ɗi zak, kì̵ mpeku wan ɗee ɗi kaa wuri si ndi̶ghi̶n muut fi̶ri. 11Mpeku koo ɗi a me c`in ye, ɓe wan kat yaghal a peemúut ni ɗi zak. 12Ba ne wan ki̶n ten kat mbii ɗi wan ki̶n leyit nkaa mo ni kas. Koo ɗi ba wan ki̶n ɗee a ɗin ndi̶re-ndi̶re kas, amma wan ki̶n gung mpeku mbii mi̶ni mo ɗee ɗi a mi̶na, mpeeɗi Kristi wuri le ku wan ɗee a mi̶ri. 13Ɗyemnaa mo, ba wan ki̶n lesan nee, wan ki̶n ten nkat mbii ɗiisi ni mo kas, amma mbii mi̶ndong ɗi wan ki̶n c`in. Wan ki̶n mander mbii ɗi mo kì̵ ten ɗel. Yaksi, wan ki̶n leyit fi̶na ndi̶re-ndi̶re a nkaa mbii ɗi mo ati̶leng fi̶na ɓejee ɗak. 14Wan ki̶n gung mpee so wul a peekyes mu ɗak fi̶na, mpeku wan lap kwat ɗii mu kàa aɗeng ɗi ashak kì̵ Jesu Kristi, ndi̶ghi̶n petpee ɗi Naan wuri pet wan ni ɗi. 15Wu yit ku pan ɗiisi, ni ɗee ndi̶ghi̶n putughup funu mo. Mun nyem ɗi mun ki̶ seen, katɗang mee mbii ɗi, ɗi ba wu manshii ni kas, ɓe Naan wurin nkámshii ni nwun. 16Ni ret ku mu yaa mbii ɗi muu ten mu kat ni ɓal-ɓal. 17Ɗyemnaa mo, wun jir wu mwaan ndi̶ghi̶n shiimwaan fi̶na, ki̶ zak, wu naa nyem ɗi mwaan furu mo a ɗiiret ndi̶ghi̶n ar ni, kaaɗi mun muu ɗee a mbiikám pe wun ɗi si. 18Wan ki̶n ten sat mbii ɗiisi mo nwun, yit ɗes. Yaksi, ɓe wan baa sat a ni ɗi nwun, har shi yitmwaan. Gurum mo ɗi ɗes ndi̶ghi̶n wun, ɗi mo a shaarlek mu shiyeepmúut mu Kristi. 19Peekyes kì̵ nyem ɗiisi ni mo, a muut mu aawus ɗi ba nii peekyes kas, mpeeɗi naan furu ni a ɓut furu mo. Ba mo ki̶ mee naashoop kas. Moo ɗiyeepkáa furu mo. Mo fes le putughup furu mo a nkaa mbii ɗii mu yil ɗiisi mo. 20Amma mumun, ɓe tulu funu ni a ndi̶ghi̶n ɗengnaan. A peeɗi muu gong Nguɓam funu Daa Jesu Kristi ɗi wurin ntong aɗeng sham ɗi. 21Wurin ncighi̶r ki̶ sun funu ɗiimeet si mo, mpeku mo ɗee ɗi kaa shin mu ɗiiɗes fi̶ri si. Shi iiko fi̶ri ɗiisi, ɓe wurin nj`i ki̶ mbii mo jir, ku mo ɗee ɗi ntoghom fi̶ri.

will be added

X\