Filipi 2

1Katɗang seen fuu ɗi mo ndi̶ghi̶n Jesu Kristi mo ɗee a ɗiiɓal. Katɗang wal fi̶ri ni ɓam wun, katɗang wuu shaar ashak ki̶ Riin fi̶ri, katɗang wuu naajeel kì̵ shak ki̶ walnshak, 2ɓe wu le ku retnyit fi̶na ni gam, ki̶ pan fuu mo ɗee a ɗiimi̶ndong ki̶ wal fuu ni ɗee a ɗiimi̶ndong ki̶ putughup fuu mo ɗee a ɗiimi̶ndong ndi̶ghi̶n mbii mo jir. 3Taji wu c`in mee mbii mpee riɓetkáa koo ɗiyeepkáa kas, amma wu sham ki̶ káa fuu mo. Wu cín ɗiiɗes nshak met nkáa fuu mo. 4Taji memee fuu ɗee ntap aa mbii ɗi mo a mukáa fi̶ri ɓejee ɗak kas, amma wu tap ki̶ mbii mu niyee fuu mo zak. 5Wu yit ku mi̶se fuu mo ɗee a kaa mi̶se ɗi Kristi wuri ki̶ ni. 6Jesu ɗi wuri a ɗiimi̶ndong kì̵ Naan, amma ba wuri lekáa fi̶ri ntiit-ntiit kì̵ Naan kas. Ɗi ni ɗee a mbii ɗi wurin nyaa ni karmat shiɓal ku wuri ɗee ɗi kaa Naan si. 7Amma Jesu wuri sham ki̶ káa fi̶ri, har wuri leshin a káa ki̶rom si. Mo làa wuri ndi̶ghi̶n nan kaa kaghar gurum mo si. 8Amma kaaɗi gyet wuri ɗi ndi̶ghi̶n nan kaa gurum si, ɓe wuri sham ki̶ káa fi̶ri, har wuri cín shin fi̶ri mpee muut nkaa shiyeepyoghom. 9Mpeemi̶ni ɓe Naan ɗiyeep wuri a ɗiiɗes hakyeng, ki̶ wuri c`in sum nJesu, ɗi ni met kaghar sum mo jir. 10Mpeku ndi̶ghi̶n sum kì̵ Jesu, ɓe gurum mo jir ndi̶ghi̶n ɗengnaan, ki̶ ndi̶ghi̶n yil ɗiisi, ki̶ nder kì̵ yil ɗiisi, ɓe mon nj`i kurum ntoghom kì̵ Jesu. 11Ki̶ zak, koo a li̶po ɗiiɗang ye, ɓe nin nsat nee, Jesu Kristi wuri a Daa, mpee ɗiiɗes kì̵ Naan puun. 12Mpeemi̶ni, wun ɗi wan wal nwun si mo, kaaɗi shidaar ɓe wuu naa nc`in mbii ɗi jí wan sat ne, wu c`in mo, ɓe wan ashak ki̶ wun si. Ɓe wu sat a sekiyeen ki̶ c`in mbii ɗi gyet wan sat ni mo nwun ɗak. Koo ɗi ba wan kuɗi ashak ki̶ wun kas, ɓe wu cín ɗiiɗes nNaan, ki̶ wu ki̶i̶r wuri ndi̶ghi̶n putughup fuu mo zak. Wu c`in ɗak shiɓal fuu mo, mpeku ɓam fuu ni ɗee ɗi a ɗiigi̶gam. 13A Naan ɗi wurii c`in ɗak ndi̶ghi̶n putughup fuu mo shidaar-shidaar. A wurii le ku wu c`in mbii ɗi mo ret wurin nyit. Wurin nc`in ɓal nwun mpeku wu c`in mbii ɗiiret ni mo ɗi. 14Wu c`in mbii mo jir, ba a shi po nɗagham-nɗagham koo ɓeetshik kas. 15Mpeku taji gurum mo naa bish fuu kas. Mpeku wu ɗee ɗi a ɗiiɓang kaa jep kì̵ Naan ɗiigi̶gam mo si, ɗi moo tong ndi̶ghi̶n yil ɗiibish si, ki̶ ndi̶ghi̶n gurum ɗi mo gam ki̶ shikbish si. Wu ɗee a peeɓang mɓut mmo ndi̶ghi̶n yil ɗiisi ni, kaa peeɓang mu zar ɗi mo aɗeng si. 16Kaaɗi wuu satpo ɗiiret mu seen ni mo si. Katɗang wu c`in aasi, ɓe wan nkatpee mpee canjagham shi wun parpuus kì̵ Kristi. Mpeeɗi parpuus mi̶ni, ɓe nin nɗee agaak nee, ɗak ɗi jí wan ki̶n c`in ni, ba ni a buu kas. 17Koo ɗi mon nfet wan, ku mo ɗoo toghom fi̶na kaa mbiizughum si mpee cínzeen fuu ndi̶ghi̶n Naan, ɓe ni ret nwan nyit, ki̶ ni shang nwan ashak ki̶ wun jir. 18Ni aasi zak, ni ret ku wuwun, wu c`in retnyit ashak ki̶ wan zak. 19Katɗang Daa Jesu Kristi wuri riɓet, ɓe wan ki̶n lepan nee, wan nlop Timoti so pe wun ɗi ki̶lak. Mpeku katɗang wuri baaj`i, ɓe wan ki̶lingpo ɗi nkaa tong fuu, ku ni caa wan ɗi. 20Ba wan ki̶ mee ngo kaa wuri si kas, ɗi wuri ki̶ c`in shin fi̶ri azeen-nzeen mpee sekiyeen fuu. 21Kaghar gurum ni mo ɗee a nc`in mbii ɗi mukáa furu mo ɓejee ɗak, ba mo kak ki̶ sekiyeen mu po kì̵ Jesu Kristi kas. 22Wun shikáa fuu wuu man tong kì̵ Timoti, mpeeɗi wan ki̶ wuri, mun a kaa puun ki̶ ɗyem fi̶ri si, ɗi muu c`in ɗak ashak mpee satpo ɗiiret ni. 23Mpeemi̶ni wan lepan, mpeku wan lop wuri so pe wun ɗi ki̶lak-ki̶lak. Mpeku wan man sekiyeen ki̶ mbii mo ɗi. 24Wan cínzeen ndi̶ghi̶n Daa nee, Ba nin ntong ɗes kas, ɓe wurin nle ku wan shikáa fi̶na wan so pe wun ɗi. 25Wan ki̶n pan nee, ni ret ku wan lop Epafradaitus ɗyemni̶ghi̶n funu, wuri a shaarɗak fi̶na, ɗi wuri kì̵ c`in lek ni ashak kì̵ wan, so pe wun ɗi. Gyet a wun lop wuri j`i pe wan ɗi, mpeku wuri ɓam wan ɗi ndi̶ghi̶n ɗak mo. 26Gyet wuri ki̶ fes lepan mpeku wuri naa wun ɗi jir, amma wuri ki̶ putughup ɗiiwuwat mpeeɗi ba gyet wurin nkagham kas kaaɗi gyet wu ki̶ling si. 27Azeen-nzeen ba gyet wurin nkagham kas, har gyet wuri kus ki̶ muut, amma Naan wuri naajeel fi̶ri. Ba Naan naa a jeel mi̶ri ɓejee kas, amma har ki̶ wan ɗiki̶, mpeku taji wan kat putughup ɗiiwuwat nkaa putughup ɗiiwuwat kas. 28Mpeemi̶ni, wan ki̶n fes nlepan, mpeku wan lop wuri so pe wun ɗi. Mpeku wu kat retnyit ɗi mpee baa naa wuri shi yit fuu mo, ki̶ mpeku putughup mi̶na ni pan saam ɗi zak. 29Mpeemi̶ni, wu lap wuri ndi̶ghi̶n sum kì̵ Daa shi retnyit hakyeng. Wu cín ɗiiɗes kiyeet kì̵ nyem mi̶ni mo. 30Gyet ɗee ɗi a lee ku wuri muut mpee ɗak kì̵ Kristi. Gyet wuri cín seen fi̶ri, mpeku wuri ɓam wan ɗi, ndi̶ghi̶n ɗak ɗi ba wun shikáa fuu wu mak c`in ni kas.

will be added

X\