Filipi 1

1Wasika ɗiisi ni put a nsar kì̵ Pool ki̶ Timoti ki̶rom kì̵ Daa Jesu Kristi mo, so pe nyem kì̵ Naan mo ɗi mo ndi̶ghi̶n yil nFilipi ɗi mo ɓàlkáa furu mo ashak ki̶ Kristi, har ki̶ nyem ɗiinan-nan mu Eki̶lisya, ki̶ nyemɓam mo, ki̶ Bishop mo, ki̶ Diikon mo. 2Naan puun funu ki̶ Daa funu Jesu Kristi, mo cín ɗiiret ki̶ tongriyang nwun. 3Wan ki̶n pi̶lang Naan koo a pi̶rang ye, katɗang wan pan wun, 4ndi̶ghi̶n aduwa ɗi wan ki̶n c`in ni mpee wun shidaar, ɓe wan ki̶n c`in ni shi retnyit. 5Mpeeɗi wu fes wu ɓàlkáa fuu ki̶ mun ndi̶ghi̶n po ɗiiret ni, yaghal mpuus ɗi gyet wu shee ki̶ling ni har cicinsi. 6Wan man azeen-nzeen nee, Naan ɗi wuri yaa c`in ɗak ɗiiret ɗiisi ndi̶ghi̶n wun, wurin nsat a nc`in ni har parpuus ɗi Jesu wurin mbaaj`i. 7Wan ki̶n pan wun ndi̶ghi̶n putughup fi̶na shidaar-shidaar, mpeemi̶ni, ɓe ni ret ku wan kat pan mi̶ni nkaa wun. Mpeeɗi wu ɓàlkáa fuu mo ki̶ wan ndi̶ghi̶n ɗiiret ɗi Naan wuri cín nwan. Kaaɗi yaksi, ɓe wan ndi̶ghi̶n lushaghat, ki̶ kaaɗi gyet wan so nluɗiyeel mpeku wan satpo mu put ki̶ káa fi̶na ɗi nkaa po ɗiiret ni, ki̶ zak, mpeku wan kám ɗi ngurum mo nee, po ɗiiret ni azeen-nzeen. 8Naan wuri a langting fi̶na, pan ɗi wan ki̶ ni mpee wun ni a kaa wal ɗi Jesu Kristi shikáa fi̶ri wuri ki̶ ni mpee mun si. 9Wan ki̶n c`in aduwa nNaan, mpeku wal fuu ni naa nwurang ɗi, ki̶ mpeku wu kat man ki̶ seen ɗi wun mman ɓeet mbii mo ɗi ndi̶re-ndi̶re. 10Mpeku wu bi̶lip mbii mo ɗi riret, ki̶ zak, mpeku wu ɗee ɗi a ɗiiɓang, ɗi ba wun ki̶ mee rap kas parpuus ɗi Daa Jesu wurin mbaa baaj`i. 11Seen fuu mo gam ki̶ mbii ɗiiret mo azeen-nzeen, ɗi a Daa Jesu wuri mak c`in ni ɓejee, mpee le Naan a ɗiiɗes ki̶ kwoop wuri. 12Ɗyemnaa mo, wan riɓet ku wu man nee, jeel ɗi mo kat wan, ɓe ni le ku po ɗiiret ni sekiyeen. 13Har sooja ɗi moo tap ki̶ lu kì̵ mishkagham nRom, ki̶ pak gurum mo, mo man nee, wan a shishaghat a mpee sum kì̵ Jesu Kristi. 14Pak ɗyemni̶ghi̶n funu mo ɗes ɗi mo ndi̶ghi̶n Daa mo waa kat ɓal ndi̶ghi̶n putughup furu mo, mpee satpo ɗiiret ni shi putughup mi̶ndong, ba a shi ki̶i̶rmuut kas, mpeeɗi wan a shishaghat a mpee sum kì̵ Jesu. 15Ii, azeen-nzeen, pak moo satpo ɗiiret nkaa Kristi a mpee zughur, ki̶ pak moo sat ni a mpee ɓi̶lep, amma pak moo sat a shi putughup mi̶ndong. 16Nyem ɗi moo satpo ɗiiret nkaa Kristi shi putughup mi̶ndong si, moo sat mi̶ni a ndi̶ghi̶n wal, ki̶ zak, mo man ne, wan a shishaghat a mpee sum kì̵ po ɗiiret ni. 17Amma nyem ɗi moo satpo ɗiiret nkaa Kristi a mpee zughur si, moo riɓet wat a putughup fi̶na, ki̶ mo pan nee, wuɗun j`i aa jeel nkaa wan ndi̶ghi̶n lushaghat ni. 18Ba ni daampee wan kas, katɗang mo satpo ɗiiret nkaa Kristi, koo a mpee mbii ɗiiɗang ye, ɓe ni ret nwan nyit. Koo ɗi moo sat a ndi̶ghi̶n pan ɗiibish, koo ɗi moo sat a ndi̶ghi̶n pan ɗiiret, ɓe wan nsat a nkat retnyit ɗak, mpeeɗi gurum moo ki̶lingpo ɗiiret nkaa Kristi koo neye. 19Mpeeɗi wan man nee, shi aduwa fuu mo mpee wan, ki̶ ɓam ɗi ni put pe Riin kì̵ Jesu Kristi ɗi, ɓe mon nfwoon wan. 20A ɗyen fi̶na ki̶ canciin fi̶na nɗiisi nee, ba wan c`in mee mbii ɗi nin nj`i ki̶ nashoop nkaa wan kas. Amma riɓet fi̶na, ku wan satpo ɗiiret ni shiɓal ba shi ki̶i̶rmuut kas mpeku koo a mpee ɗiiɗang ye, ki̶ koo a pi̶rang ye, ɓe wan cín ɗiiɗes ɗi nKristi shiɓal ki̶ san fi̶na jir. Koo ɗi wan ɗi ki̶ seen, ki̶ koo ɗi wan muut. 21Pe wan ɗi, ɓe seen fi̶na ni a Kristi, ki̶ muut fi̶na ni a li̶ɓet zak. 22Amma katɗang wan sat a ntong ndi̶ghi̶n nan ɗiisi ɗak, ɓe wan nc`in ɗak ɗi nin mɓam gurum mo. Yaksi ba wan man ar ɗi wan mbi̶lip kas. 23Wan ɗee a kaa kamlang a naar kì̵ am si. Pan ɗiivul mo ɗul wan so ndi̶ghi̶n ar mo vul. Wan ki̶n riɓet kun muut yaksi, mpeku wan so ntong ɗi a shak ki̶ Kristi, mi̶ni ret nwan met. 24Amma ni ki̶ koghop ni zam, mpeku wan tong ɗiiseen ndi̶ghi̶n nan ɗiisi, mpee ɓam wun. 25Mpeeɗi wan man zeen ni aasi. Mpeemi̶ni, ɓe wan man nee, ba wan mmuut yaksi kas, wan ntong ɗi, mpeku wan ɓam wun ɗi ku wu sekiyeen ɗi shi retnyit ndi̶ghi̶n cínzeen fuu. 26Mpeku katɗang wan mbaaj`i pe wun ɗi zak, ɓe wu kat mbii ɗi wun ncanjagham ɗi shi wan, mpee seen ɗi wun ki̶ ni ndi̶ghi̶n Kristi Jesu, mpee tong ɗi wan ntong ashak ki̶ wun ni. 27Ni a ting ku wu mwaan a ndi̶ghi̶n mbii ɗi po ɗiiret kì̵ Kristi ni sat ne wu c`in mo. Mpeku koo ɗi wan nj`i naa wun, koo ɗi ba wan nkatpee baaj`i naa wun kas, ɓe wan ki̶ling ne, wuu ɗar ɗi ɓal-ɓal, kì̵ po fuu mo ɗee a ɗiimi̶ndong, ki̶ pan fuu mo ɗee a ɗiimi̶ndong zak. Mpeku wu c`in lek ɗi ashak, mpee po ɗiiret, ɗi wuu cínzeen ni. 28Taji wu ki̶i̶r shaarlek fuu mo kas, koo diɓen. Ɗiisi nin nkám mmo nee, Naan wuri kì̵ ten ɓam wun, amma wurin ntwa mo mpee shikbish furu mo. Mpeku wu man ɗi zak nee, Naan shikáa fi̶ri, wurin ncín koghorong ni wun aasi. 29Naan wuri cínpee nwun, ba a mpeku wu cínzeen ɗi nKristi ɓejee kas, amma mpeku wu shwaajeel ɗi mpee wuri zak. 30Yaksi wu mak c`in lek ni ashak ki̶ wan. Lek ɗiisi ni a lek ɗiimi̶ndong ki̶ ɗi gyet wu naa wan nkaa c`in ni, ki̶ kaaɗi wu ki̶ling nee, wan ɗi a nkaa c`in lek mi̶ni har cicinsi.

will be added

X\