Matiyu 9

1Jesu wuri ɗel ndi̶ghi̶n mee jirgi am, ɓe wuri canɗel nkoghop nyil fi̶ri. 2Ɓe mee das mo j`i ki̶ mee gwar ɗi shin fi̶ri ni fii, nkaa mbiisaam pe wuri ɗi. Kaaɗi Jesu naa cínzeen furu, ɓe wuri sat ngo ɗi shin fi̶ri fii ni nee, "Làa fi̶na a c`in retnyit, wan ki̶n fwo shikbish fugha mo nwugha." 3Ɗangɓe pak nyemkám Waar kì̵ Mosis mo sat ndi̶ghi̶n putughup furu nee, "Gwar ɗiisi wurii satpo ɗiibish, mpeeɗi wuri leshin a kaa Naan si." 4Jesu wuri man pan furu mo, ɓe wuri sat nee, "A me le ɗangɓe wuu pan mbii ɗiibish mo ndi̶ghi̶n putughup fuu mo ye? 5A ɗiiɗang fiyeel met ye, ku wan sat nee, 'Mo kì̵ fwo shikbish fugha mo nwugha', aa koo, ɗi wan nsat nee 'A yaghal a mwaan ye?' 6Amma mpeku wu man ɗi nee, Làa kì̵ Gurum, wuri ki̶ iiko nkaa yil ɗiisi, mpee fwo shikbish ngurum mo." Ɓe Jesu sat ngwar ɗi shin fi̶ri fii ni nee, "A yaghal, a mang mbiisaam fugha, a so waa." 7Ngo ɗi shin fi̶ri fii ni wuri yaghal, ɓe wuri so ntulu fi̶ri. 8Kaaɗi ɗuu kì̵ gurum ni mo naa mi̶ni, ɓe ni aapo mmo, har mo kwoop Naan, mpeeɗi Naan wuri cín iiko ɗiisi ngurum mo. 9Kaaɗi Jesu wuri yit pee ni, wurin ndung ɗel so, ɓe wuri naa mee gwar ɗi moo pet sum fi̶ri a Matiyu, wurii tong a pee lapwap. Jesu sat Matiyu nee, "A j`i ndang wan" Ɓe Matiyu yaghal so ndang Jesu. 10Kaaɗi Jesu tong a peese mbiise ntulu kì̵ Matiyu, ɓe nyemlapwap mo ki̶ nyemshikbish mo ɗes, ki̶ jeplop fi̶ri mo, mo j`i tong ashak ki̶ wuri. 11Ɓe kaaɗi nyem Farisi mo naa mi̶ni, ɓe mo sat njeplop fi̶ri mo nee, "A me le ɗang ngukám fuu wurii sese ashak ki̶ nyemlapwap mo, ki̶ nyemshikbish mo ye?" 12Amma kaaɗi Jesu wuri ki̶lingpo mi̶ni, ɓe wuri sat mmo nee, "Ba nyem ɗi mon nkagham mon ntang nguyen kas, amma a nyem ɗi mo a gok, a moo tang nguyen. 13Wu so wu bi̶lip shii kì̵ mbii ɗi po Naan ni sat nee, 'Wan ki̶n riɓet a kussuk, ba a mbiizughum kas.' Ba wan j`i a mpee pet nyem ɗin ndi̶re mo kas, amma wan j`i a mpee pet nyemshikbish mo." 14Nyemlop kì̵ Joon mo j`i pe Jesu ɗi, ɓe mo tal pu nee, "A me le ɗang mumun ki̶ nyem Farisi mo, muu wet ki̶ neen, amma ba jeplop fugha moo wet ki̶ neen kas ye?" 15Jesu wuri sat mmo nee, "Kyet nin mmak c`in ku shaar kì̵ mish matpoo mo kat putughup ɗiiwuwat, ɓe mish kì̵ matpoo ni wuri kuɗi ashak ki̶ mo wa? Puus ni mon nj`i, ɗi mon mmang mish ni aku pe mo ɗi, ɗangɓe mon nwet ki̶ neen. 16Ba mee gurum mak lus nli̶r ɗiisi̶ghi̶r shi fuwaat ɗiipoo kas, mpeeɗi fuwaat ɗiipoo, ɗi mo lus nli̶r ɗiisi̶ghi̶r ni ɗishik, nin nkur, ɓe nii nwaa tee nli̶r ɗiisi̶ghi̶r ni, ɓe tee mi̶ni nɗes met ɗin nshee. 17Ba mon nɗoo am anab ɗiipoo ndi̶ghi̶n tughulshim ɗiisi̶ghi̶r mo kas. Katɗang mo c`in ki̶si, ɓe am anab ɗiipoo nin mpyan tughulshim ɗiisi̶ghi̶r ni mo, ɗangɓe am anab nin mɓeer, ki̶ tughul shim ni mon nɗee a ɗiiwuwat zak. Amma mon nɗoo am anab ɗiipoo a ndi̶ghi̶n tughulshim mu le am anab ɗiipoo mo. Katɗang mo c`in aasi, ɓe mon nfwang shim ni ki̶ am anab ni mo weet mmi̶ni." 18Kaaɗi Jesu nkaa satpo ngurum mo, ɓe mee ngo ɗiiɗes nkaa mee lu kì̵ Naan wuri j`i pe wuri ɗi. Ɓe wuri kurum nfurum ntoghom fi̶ri. Wuri sat nee, "Làa fi̶na ɗiimat wura kì̵ muut yak-yaksi, amma a j`i a lesar fugha nkaa wura, ku wura baa kat seen ɗi." 19Jesu wuri yaghal so ndang gwar ni ashak ki̶ jeplop fi̶ri mo zak. 20Mee mat ɗi wura ki̶ ɓeer ntoghom mpee ɓit mo kaghapaat baavul wura tap j`i nkoghom mɓwoon kì̵ Jesu, ɓe wura tuwaas pukom nli̶r fi̶ri. 21Wura kì̵ ten c`in pan ndi̶ghi̶n putughup fi̶ra nee, "Katɗang ɓe wan tuwaas koo a nli̶r fi̶ri ɓejee, ɓe wan mbar." 22Jesu wuri cighi̶r naa wura, ɓe wuri sat nwura nee, "Làa fi̶na, yi c`in retnyit, mpeeɗi cínzeen fii ni le ku yi ɗee a ɗiibi̶bar." Abet ɓe mat ni wura ɗee a ɗiibi̶bar. 23Kaaɗi Jesu wul ntulu kì̵ ngo ɗiiɗes nkaa mee lu kì̵ Naan ni. Ɓe wuri naa nyem taa njweng mo, a peemaap ni, ki̶ gurum mo ɗes mon mmaap. 24Jesu wuri sat mmo nee, "Wu baa aku, mpeeɗi ba làa ni wura kì̵ muut kas, amma wura a nsaam." Gurum ni mo shwar wuri shi shwar ɗi ni a mu ɓakpee. 25Kaaɗi mo pwat ki̶ ɗuu gurum ni mo ati̶leng, ɓe Jesu wuri ɗel ndi̶ghi̶n lu ni, wuri yaa laareep nin nsar, ɓe laareep ni wura yaghal ating. 26Po nkaa mbii ɗi Jesu wuri c`in ni, ni so koo a mpee ɗiiɗang ye ndi̶ghi̶n yil ni jir. 27Jesu wuri yit peemi̶ni, ɓe nyemvum mo vul mo so ndang wuri, ki̶ mo sat shiɓal nee, "Làa kì̵ Devid, kussuk, a naajeel funu." 28Kaaɗi wuri ɗel ndi̶ghi̶n mee lu, ɓe nyemvum ni mo j`i pe wuri ɗi. Ɓe wuri tal pu mo ne, "Wu cínzeen nee, wan mak wang yit fuu mo me?" Mo lap nwuri nee, "Ii, Daa." 29Ɗangɓe wuri tuwaas yit furu mo, ɓe wuri sat mmo nee, "Ni c`in nwun ntiit ki̶ cínzeen fuu ni." 30Ɗangɓe yit furu mo wang. Ɓe Jesu wuri sat mmo shiɓal nee, "Wu tap, taji wu sat ngurum mo mbii ɗi wan c`in nwun ni kas." 31Amma kaaɗi mo pwat, ɓe mo yaa satpo ni ngurum mo ndi̶ghi̶n yil ni jir. 32Kaaɗi gurum ni mo ndung pwat, ɓe mee das mo j`i ki̶ mee ti̶ding ɗi wuri ki̶ riin ɗiibish pe Jesu ɗi. 33Aɓwoon ɗi Jesu ceen riin ɗiibish ni, ɓe ti̶ding ni wuri katpo. Mbii ɗiisi ni aapo nɗuu gurum ni mo, har mo sat nee, "Ba muu kyam naa mbii kaa ɗiisi si ndi̶ghi̶n yil Isreil kas." 34Amma nyem Farisi mo sat nee, "Jesu wurii ceen riin ɗiibish mo a shi iiko mu mishkagham kì̵ riin ɗiibish mo." 35Jesu wuri mwaan ndi̶ghi̶n birni mo ki̶ jepyil mo jir. Wurin nkaa kám mmo, ki̶ satpo ɗiiret nkaa mulki kì̵ Naan ndi̶ghi̶n lu kì̵ Naan mo. Ki̶ wurii bar koo a shwal ɗiiɗang ye, ki̶ koo a gok ɗiiɗang ye zak. 36Amma kaaɗi wuri naa ɗuu gurum ni mo, ɓe ni le an nwuri. Mpeeɗi mo nkaa shwaajeel, ki̶ mo a ɗiititiit kaa tum ɗi ba mo ki̶ ngunaa mo kas si. 37Ɗangɓe Jesu wuri sat njeplop fi̶ri mo nee, "Ɗiɓen ni ɗes a yil hakyeng, amma nyem ɗiip ni mo a lee ɗak. 38Mpeemi̶ni, wu c`in aduwa pee Daa, nguɗiɓen ni, mpeku wuri lop nyemɗiip ɗiɓen fi̶ri ni mo ɗi."

will be added

X\