Matiyu 6

1"Wu tap, taji wu c`in ɗak fuu ɗiiret mo, a yit kì̵ gurum mo nki̶kàam, mpeku mo naa wun ɗi kas. Katɗang wu c`in aasi, ɓe ba wun ki̶ mee kwat pe Naan puun fuu ɗi wuri aɗeng kas. 2Katɗang ɓe wugha nkaa cín zughum nyemjeel mo, ɓe taji a taa feer ku gurum mo man ɗi kas, kaaɗi nyem ɗi moo so ndang Naan shi putughup vul-vul moo c`in, ndi̶ghi̶n lu seyil nNaan mo, ki̶ a ar mo si, mpeku gurum mo kwoop mo ɗi. Azeen-nzeen ki̶n sat nwun, mo kì̵ ten lap kwat furu jee. 3Amma katɗang ɓe wugha nkaa cín zughum nyemjeel mo, ɓe taji a yit ku shaar fugha ɗiikus ki̶ wugha wuri man mbii ɗi wugha nkaa cín ni kas. 4Mpeku mbiizughum fugha mo ɗee ɗi a si̶sok. Ɗangɓe puun fugha ɗi wurii naa mbii mo a si̶sok wurin nkwat wugha." 5"Katɗang wu ɗoghom c`in aduwa, ɓe taji wu ɗee kaa nyem ɗi moo so ndang Naan shi putughup vul-vul si kas, mpeeɗi mo riɓet ɗar c`in aduwa ndi̶ghi̶n lu kì̵ Naan mo, ki̶ mpo ar mo, mpeku gurum mo naa mo ɗi. Azeen-nzeen ki̶n sat nwun nee, mo kì̵ ten lap kwat furu jee. 6Amma katɗang wugha ɗoghom c`in aduwa, ɓe a ɗel ndi̶ghi̶n lu fugha. Aɓwoon ɗi a shaghat polu ni, ɓe a c`in aduwa Naan puun fugha ɗi ba gurum ki̶ mak naa wuri kas, ɗangɓe puun fugha ɗi wurii naa mbii ɗi aa c`in mo a si̶sok, wurin nkwat wugha. 7"Katɗang wu c`in aduwa zak, ɓe taji wu baa wu satpo ni ɗiki̶ nki̶shak-nki̶shak kas, kaaɗi nyemk`um moo c`in si. Mpeeɗi mo pan nee mon nki̶ling ɗun a mpeeɗi wuɗun satpo mo ɗes-ɗes. 8Taji wu ɗee kaa mo si kas, mpeeɗi puun fuu wuri man mbii ɗi wuu riɓet, akuɗang wuu ɗang pu wuri. 9"Mpeemi̶ni, wu c`in aduwa a kaa ɗiisi si nee: Puun, funu ɗi aɗeng, A yit ku mu lesum fugha a ɗiiɓang. 10A yit ku mulki fugha ni j`i. A ɓam mun ku mu c`in ɗyen fugha a yil ɗiisi, kaaɗi moo c`in ndi̶ghi̶n ɗengnaan si. 11A cín mun mbiise ɗi mun nse cicinsi, ku mu wet ɗi. 12A fwo mmun mbii ɗi muu c`in mo bish-bish, kaaɗi mun muu fwo mbii ɗi gurum moo c`in ni mun bish-bish si. 13Taji a yit ku mu so, a peeɗi mon njwaan mun ɗi kas. Amma a ɓam mun nsar kì̵ Shetan. 14"Katɗang wuu fwo nyem ɗi mo c`in mbii ɗiibish nwun, ɓe puun fuu ɗi aɗeng wurin nfwo wuwun zak. 15Amma katɗang ba wu fwo nyem ɗi mo c`in mbii ɗiibish nwun kas, ɓe ba puun fuu wurin nfwo shikbish fuu mo kas zak." 16"Katɗang ɓe wu nook sese zak, ɓe taji wu le ku yit fuu mo ɗee jeel-jeel, kaaɗi nyem ɗi moo so ndang Naan shi putughup vul-vul moo c`in si kas. Mpeeɗi moo wat yit furu mo, mpeku gurum mo naa ɗi ne, mo nook a sese. Azeen ki̶n sat nwun, mo kì̵ ten lap kwat furu jee. 17Amma katɗang ɓe wugha nook sese, ɓe a pwos mwoor nkáa fugha, ki̶ a vwang yit fugha. 18Mpeku taji gurum mo naa ne, a wet aa neen kas. See a puun fugha ɗi ba gurum mak naa wuri kas, a wurin mman, ɗang puun fugha ɗi wurii naa mbii ɗi aa c`in mo a si̶sok, a wurin nkwat wugha." 19"Taji wu lelong mpee suk fuu a yil ɗiisi kas, a peeɗi ndukup, ki̶ naat njileng moo wat ni. A peeɗi wat moo sulpee ku mo hi̶r ɗi. 20Amma wu lelong mpee suk fuu mo ndi̶ghi̶n ɗengnaan, a peeɗi ba mee ndukup koo naat njileng mon nnwat ni kas. Ba mee wat mon nsulpee ku mo hi̶r ɗi kas. 21Mpeeɗi peeɗi wu lelong fuu mo ɗi, ɓe pan kì̵ putughup fuu mo ɗee a mpee mi̶ni zak." 22"Yit fugha ni a peeɓang kì̵ sak fugha, katɗang ɓe yit fugha nin nkagham, ɓe sak fugha jir ni ki̶ peeɓang. 23Amma katɗang ɓe ba yit fugha nin nkagham kas, ɓe sak fugha jir nin ngam ki̶ peenkoo. Katɗang yit fugha ɗi ni a peeɓang ki̶ sak fugha ni ɗee a peenkoo, ɓe mi̶nin nɗee a ɗiirap shek-shek hakyeng." 24"Ba mee gurum mak c`in ɗak ndaa mo vul kas. Mpeeɗi wurin nkwar mmemee, ku wuri wal ɗi memee. Koo wurin ncín ɗiiɗes mmemee, ɗangɓe wuri toklong mmemee. Ba wun mmak seyil nNaan ki̶ seyil nshaghal mo weet ntiit kas." 25"Mpeemi̶ni, wan sat nwun nee, taji wu daampee nsuk ki̶ pan mpee seen fuu mo, nkaa mbii ɗi wunn nse, koo mbii ɗi wunn nshwaa. Ki̶ koo a mpee suk fuu mo, ki̶ koo a mpee lée ɗi wunn njwal mo kas. Ba seen fuu mo met mbiise kas aa? Ki̶ ba suk fuu mo met leelop mo kas aa? 26Wu naa ny`er ɗi moo yaghal ncáap mo, ba moo kop mee mbiise kas, ki̶ ba moo ɗiip mee mbiise kas zak, ki̶ ba moo ɗiip mee mbii le nɗiyaar kas. Amma puun fuu ɗi wuri aɗeng wurii c`in mbiise mmo. Ba wun ki̶ koghop ni ɗes met ny`er mo kas aa? 27A we ndi̶ghi̶n wun ɗi mpee pan fi̶ri, ɓe wurin mmak le ku teer fi̶ri ni gyes so ɗi a kiyeen, koo a mpee teer mi̶ndong ye? 28"A me le ɗang wuu daampee nsuk mpee leelop mo ye? Wu pan pel ɗi moo kàa a yil, ba moo c`in mee ɗak kas, ki̶ ba moo ɗak mee lée mpee sut kas. 29Jir ki̶si, ɓe wan sat nwun nee, koo gyet a Solomon ndi̶ghi̶n ɗiiɗes fi̶ri jir, ɓe ba wuri mak c`in jwat nshin kaa memee mi̶ndong ndi̶ghi̶n pel ɗiisi mo kas. 30Katɗang ɓe Naan wuri c`in jwat nɗem ɗi mo a yil, ɗi mo ɗi cicinsi, amma daɗaar ɓe mon nfwo mon nwus, ɓe wu pan nee. Ba Naan wurin ncín leelop mo nwun ɗes met mpel ɗiisi mo kas aa? Kai wun! Cínzeen fuu ni a lee ɗak! 31Mpeemi̶ni, taji wu daampee nsuk ki̶ pan kas, ne wun nse a meye? Koo wun nshwaa a meye? 32A mbii ɗi nyemk`um moo tang mo mi̶ni jir. Puun fuu ɗi wuri aɗeng wuri man ne wuu riɓet mbii ɗiisi mo jir. 33Amma mbii ɗi ni ret met jir ni nɗiisi, wu shee le putughup fuu mo nkaa mbii ɗi mo a mu mulki kì̵ Naan, ki̶ ɗin ndi̶re fi̶ri, ɗangɓe mon nc`in mbii ɗiisi mo ɗiki̶ wun jir zak. 34Mpeemi̶ni, ɓe taji wu daampee nsuk ki̶ pan nkaa daɗaar kas, mpeeɗi katɗang gurum wul daɗaar ni, ɓe mbii daampee mu daɗaar ni mon nj`i. Wu yit ku mbii daampee mu puus mi̶ndong ni mak ki̶ puus mi̶ni."

will be added

X\