Matiyu 25

1"Katɗang teer mi̶ni mo kus, ɓe mulki kì̵ Naan nin nɗee a kaa jiraap mo kaghapaat si, ɗi mo mang fitila furu mo, mpeku mo so kaat ngulapmat ɗi. 2Jiraap mo paat ndi̶ghi̶n a mwen mo, ki̶ ɗiipaat mo a ɗiiseen. 3Mpeeɗi kaaɗi ɗiimwen ni mo mang fitila furu mo, ɓe ba mo pan mee mwoor kas. 4Amma ɗiiseen ni mo pan mwoor ndi̶ghi̶n been ashak ki̶ fitila furu mo. 5Kaaɗi ngulapmat ni wuri kuɗi, ɓe yit furu mo toghon shi saam, har saam mang mo jir. 6"Ɗangɓe nnaar par, ɓe mo ki̶ling or nee, 'Wu naa, ngulapmat ni wurii j`i. Wu pwat ku wu kaat wuri ɗi!' 7Jiraap ni mo yaghal a peesaam jir, mo ɗoghom ɗak fitila furu mo. 8Ɓe jiraap ɗiimwen ni mo sat nɗiiseen ni mo nee, 'Wu cín pak mwoor fuu mo mmun wa? Mpeeɗi fitila funu mon ndung pit.' 9Amma ɗiiseen ni mo lap mmo nee, 'Meeɓe ba nin mmak mun ki̶ wun jir kas. Ɓe ngyal wu so pe nyemwor mo, ku wu seet ɗi shikáa fuu.' 10Kaaɗi jiraap ɗiimwen ni mo kì̵ so mpee seet mwoor ni, ɓe ngulapmat ni wuri j`i wul. Ɗangɓe jiraap ɗiiseen ɗi mo kì̵ ten ɗak sut furu, mo ɗel ashak ki̶ wuri ndi̶ghi̶n luse mbiise lapmat ni. Ɓe mo shaghat polu ni. 11"Aɓwoon mi̶ni, ɓe jiraap ɗiimwen si mo j`i wul, mo sat nee, 'Daa, Daa, a wang polu ni mmun.' 12Nguɗik ni wuri lap mmo nee, 'Azeen-nzeen, wan sat nwun nee, ba wan man wun kas.' 13Mpeemi̶ni wu tong shi gongpee, mpeeɗi ba wu man parpuus ni koo pee ni kas." 14"Katɗang teer mi̶ni mon nwul kus, ɓe mulki kì̵ Naan nin nɗee a kaa mee gurum ɗi wuri yaghal mpee so mwaan jong-jong, ɓe wuri pi̶rep ki̶rom fi̶ri mo, ki̶ wuri lelong fi̶ri mo nsar furu. 15Wuri cín talent mo paat memee, ki̶ wuri cín talent mo vul memee, ki̶ wuri cín talent mi̶ndong memee zak, ntiit ki̶ ɓal kì̵ koo weye ndi̶ghi̶n mo. Ɗangɓe wuri yaghal so mwaan ni. 16Abet ɓe ki̶rom ɗi wuri lap talent paat si, wuri so c`in nwor shi mo, har wuri kat li̶ɓet talent mo ɗiki̶ paat zak. 17Ki̶rom ɗi wuri lap talent vul si, wuri so c`in nwor ɗishik aasi zak, har wuri kat li̶ɓet talent mo ɗiki̶ vul. 18Amma ki̶rom ɗi wuri lap talent mi̶ndong si, wuri so ɓwan yil, ku wuri sok shaghal kì̵ ngulu fi̶ri ni ɗi. 19"Aɓwoon ki̶ shiiteer mo ɗes, ɓe ngulu kì̵ ki̶rom ni mo, wuri baaj`i wul ntulu, ɗangɓe wuri tal shaghal fi̶ri pe ki̶rom ni mo. 20Ki̶rom ɗi wuri lap talent mo paat si, wuri j`i sat nee, 'Daa, jí wugha cín talent mo wan a paat. A naa, wan ki̶n kat li̶ɓet talent mo ɗiki̶ paat zak.' 21Ɓe ngulu kì̵ ki̶rom ni sat nwuri nee, 'Ni ret zam. Wugha a ki̶rom ɗin ndi̶re, ɗi wan mak cínzeen nwugha. Wugha kì̵ c`in mbii ɗi mon mmak cínzeen nwugha ndi̶ghi̶n mbii ɗiilee-lee si mo. Wan nle wugha nkaa mbii mo ɗes zak. A j`i a ɗel mɓut retnyit kì̵ daa fugha.' 22"Ki̶rom ɗi wuri lap talent mo vul si, wuri j`i zak. Wuri sat nee, 'Daa, j`i wugha cín talent mo nwan a vul, a naa, wan kì̵ kat li̶ɓet talent mo ɗiki̶ vul zak.' 23Ngulu kì̵ ki̶rom ni sat nwuri nee, 'Ret zam, wugha a ki̶rom ɗiiret, ɗi wan mak cínzeen nwugha. Wugha kì̵ c`in mbii ɗi mon mak cínzeen nwugha ndi̶ghi̶n mbii ɗiilee-lee mo. Wan nle wugha nkaa mbii mo ɗes zak. A j`i a ɗel mɓut retnyit kì̵ daa fugha.' 24"Ki̶rom ɗi wuri lap talent mi̶ndong si, wuri j`i zak, wuri sat nee, 'Daa, wan man nee, wugha a ngo ɗiiɓiyaal. Wugha ki̶ ɗiip a mmaar ɗi ba wugha kop kas, ki̶ wugha ki̶ l`ee ɗiɓen a maar ɗi ba a wugha ɓwot cirem ni kas zak. 25A ni le ɗangɓe ki̶i̶rmuut yaa wan, har wan so nsok fugha ni ndi̶ghi̶n yil a lap shaghal fugha.' 26"Amma ngulu kì̵ ki̶rom ni sat nwuri nee, 'Wugha ki̶rom ɗiibish ɗi wugha a seer! Ashee, a man nee, wan ki̶n ɗiip a mmaar ɗi ba a wan kop kas, ki̶ wan ki̶n l`ee ɗiɓen a mmaar ɗi ba a wan ɓwot cirem ni kas zak wa? 27Jí ni ret ku a so a le talent fi̶na ni mbank, ɓe kaaɗi wan j`i si, ɓe ɗi wan nlap mbi̶na ashak ki̶ li̶ɓet nkaa ni!' 28Mpeemi̶ni, wu yaa wuri ki̶ talent ni, ku wu cín ngo ɗi wuri ki̶ talent mo kaghapaat si. 29Mpeeɗi koo ngo ɗiiɗang ye ɗi wuri ki̶ mbii, ɓe mon mbaa cín ɗiki̶ nwuri zak, har wuri kat ɗes. Amma ngo ɗi ba wuri ki̶ mee mbii kas, ɓe rep mbii ɗi wuri ki̶ ni, mon nsi̶ghi̶t waa yaa wuri ki̶ ni. 30Wu vwet ki̶rom ɗiibuu si ati̶leng ndi̶ghi̶n pee nkoo. A peeɗi gurum moo wal ki̶ sum aghas ɗi." 31"Parɗi Làa kì̵ Gurum wurin nj`i ndi̶ghi̶n ɗiiɗes fi̶ri, ashak ki̶ nyemlop kì̵ Naan mo jir. Ɓe wurin ntong nkaa mbiitong mu mulki fi̶ri ɗiiɗes. 32Mon nkuur gurum ɗin ndi̶ghi̶n yil si mo jir ntoghom fi̶ri. Ɗangɓe wurin mɓàk mo gang vul, kaa ɗi ngukiyeer long wurii ɓàk tum mo ki̶ hi̶i̶ mo si. 33Wurin nle nyem ɗin ndi̶re-ndi̶re mon nsarse, ki̶ nyemɗiibish mon nsarkul fi̶ri. 34Ɗangɓe Mishkagham ni wurin nsat nyem ɗi mon nsarse fi̶ri nee, 'Wu j`i. Wun ɗi puun fi̶na wuri le ɗiiret nkaa wun, wu lap mulki ɗi mo kì̵ ɗak ni mpee wun pugyet ɗin nshee kì̵ yil ni. 35Mpeeɗi gyet neenláa nwan, ɓe wu cín mbiise nwan, ki̶ gyet amtu wan, ɓe wu cín am nwan shwaa. Gyet wan a mi̶zep, ɓe wu lap wan ntulu fuu mo. 36Gyet wan ngum, ɓe wu cín nli̶r mo nwan lop. Gyet wan a gok, ɓe wu so wu tap ki̶ wan. Gyet wan ndi̶ghi̶n lushaghat, ɓe wu j`i wu tok ki̶ wan.' 37Ɗangɓe nyem ɗin ndi̶re ni mo lap nwuri nee, 'Daa, a pi̶rang ɗi mu naa neenláa nwugha, ɗang mu cín mbiise nwugha ye? Koo amtu wugha, ɗang mu cín am nwugha shwaa ye? 38A pi̶rang ɗi mu naa wugha a mi̶zep, ɗang mu lap wugha ntulu funu ye? Koo a ngum, ɓe mu cín nli̶r nwugha lop ye? 39A pi̶rang ɗi mu naa wugha agok, koo ndi̶ghi̶n lushaghat ɗang, ɓe mu so mu tok ki̶ wugha ye?' 40Ɗangɓe Mishkagham ni wurin nlap mmo nee, 'Azeen-nzeen ki̶n sat nwun, a mpeeɗi wuu ten wu c`in mbii ɗiisi mo mpee memee mi̶ndong ndi̶ghi̶n ɗyemni̶ghi̶n fi̶na ɗiilee si mo, ɓe wu c`in a nwan mmi̶ni.' 41"Ɗangɓe Mishkagham ni wurin nsat nyem ɗi mon nsarkul fi̶ri si nee, 'Wu baa aku pe wan ɗi, wun ɗi wun a mbii fulup mo, wu so ndi̶ghi̶n aawus ɗin ngaa-ngaa, ɗi mo kì̵ ten ɗak ni le mpee Shetan ki̶ nyemlop fi̶ri mo. 42Mpeeɗi gyet neenláa nwan, ɓe ba wu cín mbiise nwan kas. Gyet amtu wan, ɓe ba wu cín am nwan shwaa kas. 43Gyet wan a mi̶zep, ɓe ba wu lap wan ntulu fuu mo kas. Gyet wan ngum, ɓe ba wu cín nli̶r nwan lop kas. Gyet wan agok, ki̶ wan ndi̶ghi̶n lushaghat, ɓe ba wu so wu tok ki̶ wan kas.' 44Ɗangɓe mon nlap nwuri zak nee, 'Daa, a pi̶rang ɗi mu naa neenláa nwugha, koo amtu wugha, koo wugha a mi̶zep, koo wugha ngum, koo wugha a gok, koo wugha ndi̶ghi̶n lushaghat, ɗangɓe mu kwar ɓam wugha ye?' 45Ɗangɓe mishkagham ni wurin nlap mmo nee. Azeen-nzeen, ki̶n sat nwun nee, a mpeeɗi gyet wu kwar c`in mbii ɗiisi mo, mpee memee mi̶ndong ndi̶ghi̶n ɗyemni̶ghi̶n fi̶na ɗiilee si mo, ɓe gyet wu kwar c`in ni a nwan mmi̶ni. 46Nyem mi̶ni mon nso a peeɗi mon nshwaajeel ɗiingaa-ngaa ɗi. Amma nyem ɗin ndi̶re mon nso a peeɗi mon nkat seen ɗiiso ngaa-ngaa ɗi."

will be added

X\