Matiyu 24

1Jesu wuri put ndi̶ghi̶n Lu kì̵ Naan ɗiiɗes, ɓe kaaɗi wuri a ar so, ɓe jeplop fi̶ri mo satpo nwuri nkaa ɗik Lu kì̵ Naan ɗiiɗes ni. 2Amma Jesu wuri sat mmo nee, "Wuu naa mbii ɗiisi mo jir aa? Azeen-nzeen, ki̶n sat nwun nee, ba mon nyit mee nhi̶k tong nkaa hi̶k mpee ɗiisi kas. Mon nshirip mo jir." 3Ɗangɓe kaaɗi Jesu wuri tong nkaa Jwakpaat, ɓe jeplop fi̶ri mo j`i pe wuri ɗi a si̶sok, ɓe mo sat nwuri nee, "A sat mmun, mbii ɗiisi mon, nyaghal c`in a pi̶rang ye? Ki̶ mun nnaa a mbii aapo ɗiiɗang mu baaj`i fugha, ki̶ parkyes kì̵ yil ɗiisi ye?" 4Jesu wuri lap mmo nee, "Wu tap, ku taji mee gurum num wun kas. 5Mpeeɗi gurum mo ɗes, mon nj`i ndi̶ghi̶n sum fi̶na, ki̶ mon nsat ne wuɗun a Kristi, har mon nnum gurum mo ɗes. 6Ɗangɓe wun nyaghal wu ki̶lingpo nkaa lek mo, ki̶ po kyetwa nkaa lek mo. Ɓe wu tap taji ni le ki̶i̶rmuut nwun kas. Mpeeɗi ting mbii ɗiisi mon nyaghal c`in aasi, amma parkyes kì̵ yil ni kuɗi. 7Pak yil mon nyaghal lek nkaa pak yil mo, ki̶ mee saghan mon nyaghal lek nkaa mee saghan ɗiici mo. Neen nin ntaa nkaa yil ni. Yil nin ntungpee shipee-shipee. 8Amma mbii ɗiisi mo jir mo a shee kì̵ jeel, kaaɗi aak ki̶ shee se mat si. 9Ɗangɓe mon nyaghal seet wun, ki̶ mon nlejeel nwun, ki̶ mon ntwa wun zak. Gurum mo jir mon nkwar wun mpee sum fi̶na. 10Gurum mo ɗes mon mbaa shiɓwoon ndi̶ghi̶n cínzeen furu mo, mon nsi̶repshak, ki̶ mon nkwarshak zak. 11Nyemkám mu ɗung mon nj`i put ɗes, ki̶ mon nnum gurum mo ɗes zak. 12Ɓe shikbish nin mbul ndi̶ghi̶n yil ni. Ɓe wal kì̵ gurum mo ɗes nin nzughum. 13Amma ngo ɗi wuri gung har peekyes ni, ɓe wurin nkat ɓam. 14Mon nsatpo ɗiiret, nkaa mulki kì̵ Naan ɗi ndi̶ghi̶n yil ni jir, ku ni ɗee ɗi a langting ɗi nyil ni mo jir. Ɗangɓe peekyes kì̵ yil nin nwul." 15"Mpeemi̶ni katɗang wu naa mbii ɗiibish ɗi ni watpee ɗee buu, ɗi gyet ngusatpo kì̵ Naan Daniyel wuri kì̵ ten satpo nkaa ni, nii ɗar ndi̶ghi̶n pee ɗiiɓang, (Ngo ɗi wurii tangpo ɗiisi ni, ɓe ni ret ku wuri manshii ni). 16Ɓe nyem ɗi mon ndi̶ghi̶n Judiya mo swa so mɓut njwak mo. 17Ngo ɗi wuri nkaa ɗenglu, ɓe taji wuri sham ɗel ndi̶ghi̶n lu ni mpee mang lée fi̶ri kas. 18Ngo ɗi wuri a peemaar a yil, ɓe taji wuri baaso ntulu mpee mang mbiisup fi̶ri kas zak. 19Amma jeel nin nsi̶ghi̶t naat nkaa mat aak mo, ki̶ mat ɗi mon nkaa cín wur njep mo ndi̶ghi̶n teer mi̶ni mo. 20Wu c`in aduwa nNaan, mpeku taji swa fuu ni ɗen a ntar kut, koo parpuus Nookɗi kas. 21Mpeeɗi jeel ɗiiɗes nin nj`i táa nkaa gurum mo parmi̶ni, ɗi ba gurum mo kì̵ kyam naa ni kas, pugyet Naan shee leyil ni ɗi har cicinsi, ki̶ ba gurum mon mbaa naajeel mi̶ni ɗi zak kas, har mpee vit. 22Katɗang ba a mpeeɗi Naan wuri kì̵ baa ki̶ pak shiiteer ɗiisi ni mo kas, ɓe ba ɗi mee gurum mmak kat bar kas. Amma a mpee sum kì̵ nyem ɗiibi̶bi̶lip ni mo, ɓe Naan wuri baa ki̶ pak shiiteer ni mo. 23"Katɗang mee gurum sat nwun nee, 'Wu naa Kristi wuri mpesi,' koo ne, 'Wuri akiyeen sí.' Ɓe taji wu cínzeen mpo mi̶ni kas. 24Mpeeɗi nyem ɗi moo c`in ɗung, ne wuɗun a Kristi, ki̶ nyemsatpo kì̵ Naan mu ɗung mon nj`i pwat ɗes. Mon nc`in mbii aapo ɗiiɗes mo, ki̶ mbii lukshik mo zak. Mpeku katɗang ni mak c`in, ɓe mo num nyem ɗi Naan wuri kì̵ ten bi̶lip mo ɗi. 25Wu naa, wan ki̶n ten satpo ɗiisi mo wun nshee, baaɗang pee nii wul. 26"Mpeemi̶ni katɗang gurum mo sat nwun nee, 'Wu naa, Kristi wuri a yil,' ɓe taji wu so ɗi kas. Katɗang ɓe mo sat nwun nee, wuri sok shin ndi̶ghi̶n lu ɗin ndi̶ghi̶n-ndi̶ghi̶n, ɓe taji wu cínzeen kas. 27Mpeeɗi j`i kì̵ Làa kì̵ Gurum nin nɗee a kaa ɗi pee ki̶ mi̶lep aɗeng yaghal nkoghop puus ki̶kàa, har so wul nkoghop puusru si. 28Mpeeɗi koo a pee ɗiiɗang ye ɗi kúm kì̵ mbii ɗi, ɓe nvurshi moo kuur a mpee mi̶ni." 29"Aɓwoon kì̵ jeel mi̶ni mo, ɓe puus nin ncighi̶r ɗee a pee nkoo, ki̶ ba tar nin mɓangpee kas zak. Ki̶ zar ɗi aɗeng mon mɓeer sham nyil, ki̶ mbii ɗiiɓal ɗi aɗeng mon ntungpee zak. 30Ɗangɓe gurum mon nnaa mbii ɗi nin nkám j`i mu Làa kì̵ Gurum ni mput aɗeng, ɓe gurum ɗi mo ndi̶ghi̶n yil ni jir mon nwal maap, ki̶ mon nnaa Làa kì̵ Gurum, wuri sham put ndi̶ghi̶n nluu ɗi aɗeng mo, shi iiko ki̶ ɗiihai ɗiiɗes. 31Wan nlop nyemlop mo shi tàa feer, ɗi ni ki̶ ɗoo ɗiiɓal, mpeku mo so kyak nyem ɗi wuri kì̵ ten bi̶lip mo kuur ashak ndi̶ghi̶n kwang ɗiifeer mu yil ni. Yaghal mpee ɗar kì̵ yil ni jir, har kàa wul mpee ɗar kì̵ ɗeng ni zak." 32"Wu yit ku tingkoon ni ɗee a mbiikám pe wun ɗi. Katɗang song kì̵ tingkoon ni mo ɗoghom put kompee ɗiipoo, ɓe wu man ne tarlok ni kus mmi̶ni. 33Aasi zak, katɗang wu naa mbii ɗiisi mo c`in jir, ɓe wu man nee, wan ki̶n j`i wul kus-kus mmi̶ni. 34Azeen-nzeen, ki̶n sat nwun nee, ba gurum ɗiiyaksi mon murap jir kas, see mbii ɗiisi mon ngam jir akuɗang. 35Ɗeng ki̶ yil mon nɗel so weet, amma ba po fi̶na mon mmak kyam ɗel so kas." 36"Ba mee gurum mak man parpuus mi̶ni, ki̶ pee ni kas. Koo a nyemlop kì̵ Naan ɗi aɗeng mo, ki̶ koo a Làa ni shikáa fi̶ri, ɓe ba wuri man kas, amma see a puun mindong ɓejee ɗak. 37Mpeeɗi baaj`i mu Làa kì̵ Gurum nin nɗee a kaa gyet mbii ɗi ni c`in mɓít kì̵ Nowa si. 38Gyet akuɗang am paa yil ɗiiɗes ni ki̶ j`i, ɓe gyet gurum mo nkaa sese ki̶ shwaapee, ki̶ lapmat mo, ki̶ soɗik, har parpuus ɗi Nowa wuri ɗel ndi̶ghi̶n jirgi am ni. 39Baa gyet mo man mbii ɗi nii c`in kas, har parpuus ɗi am paa yil ni j`i twa gurum mo jir. J`i kì̵ Làa kì̵ Gurum nin nɗee aasi zak. 40Parpuus mi̶ni, ɓe gurum mo vul mon mmaar a yil, ɓe mon mmang memee, ki̶ mon nyit memee ɗee ɗi. 41Katɗang mat mo vul mon nkaa ɗiyees shiit, ɓe mon mmang memee, ki̶ mon nyit memee ɗee ɗi. 42"Mpeemi̶ni wu tong shi gongpee, mpeeɗi ba wu man parpuus ɗi Daa fuu wurin nj`i ɗi kas. 43Amma wu man nee, katɗang ɓe ɗi ngulu wuri man parpuus ɗi wat nj`i ɗi, ɓe wurin ntappee, mpeku taji wat sul lu fi̶ri kas. 44Mpeemi̶ni wu ɗak suk fuu mo, mpeeɗi Làa kì̵ Gurum wurin nj`i a parpuus ɗi ba wun wu le mee pan ne wurin nj`i kas." 45"A we a ki̶rom ɗin ndi̶re, ɗiiseen ɗes ye? Ki̶rom ɗin ndi̶re ɗiiseen ɗes ni, a ngo ɗi ngulu fi̶ri le wuri a ɗiiɗes nkaa tulu fi̶ri. Mpeku wuri tap cín mbiise ɗi nyemtulu ni mo shidaar-shidaar. 46Ki̶rom mi̶ni wurin nkat ɗiiret, parpuus ɗi ngulu fi̶ri wurin nj`i wul, ɓe wuri kat ki̶rom ni wurin nkaa c`in ɗak fi̶ri mon ndi̶re-ndi̶re. 47Azeen-nzeen, ki̶n sat nwun nee, ngulu fi̶ri wurin nle wuri a ɗiiɗes nkaa long fi̶ri mo jir. 48Amma katɗang ki̶rom ni wuri a ɗiibish, ɗang wuri pan ndi̶ghi̶n putughup fi̶ri nee, ba ngulu fi̶na wuri j`i ki̶lak kas. 49Ɓe wuri yaghal ɗoghom ni̶ram niyee ki̶rom fi̶ri mo. Wuri se ki̶ shwaa ashak ki̶ nyemshwaa yughur mo. 50Katɗang ɓe ngulu kì̵ ki̶rom ni wurin nj`i, parmee puus ɗi ba ki̶rom ni wuri man kas, koo le mee pan kas. 51Ɓe ngulu ni wurin nsaa ki̶rom ni shi ngwam hakyeng, ɗangɓe wurin nle mo shaghat ki̶rom ni ashak ki̶ nyemso ndang Naan shi putughup vul-vul mo. A peeɗi mon nwal ki̶ sum aghas ɗi mmi̶ni.

will be added

X\